சூடாகும் சூடான்: வேடிக்கை பார்க்கும் உலக நாடுகள்!

அரபி மொழியில் சூடான் என்றால் கருப்பு இனத்தவரின் நிலம் என்று பொருள். ஆனால், வெறுப்பில் உச்சத்தில் பிளவுப்பட்ட ராணுவம் மக்களை கொன்றுக் குவித்துக்கொண்டிருக்கிறது. ஏற்கெனவே பசியிலும் பட்டினிலும் வாடும் அப்பாவி மக்கள் உயிரை கையில் பிடித்துக்கொண்டு அலறுவதை வழக்கம்போல வேடிக்கைப் பார்க்கின்றன உலக நாடுகள்!நம்மூர் கலவரங்களில் உருட்டுக்கட்டை, அரிவாள், பெட்ரோல் பாம், தீப்பந்தம் இவற்றை எல்லாம் பார்த்திருப்போம். ஆனால், சூடானில் நடக்கும் கலவரத்தில் துப்பாக்கி வெடிக்கின்றன, பீரங்கிகள் பிளக்கின்றன. தலைநகர் கார்டூமில் பற்றியெரிகிறது. நூற்றுக்கணக்கான மக்கள் கொல்லப்பட்டுவிட்டார்கள். ஆயிரக்கணக்கானோர் காயமடைந்துள்ளனர். அங்கு சிக்கிக்கொண்ட வெளிநாட்டினரை மீட்பதற்கு அந்தந்த நாடுகள் நடவடிக்கை எடுத்து வருகின்றன. இந்தியாவின் தரப்பில் 'ஆபரேஷன் காவேரி' தீவிரப்படுத்தப்பட்டுள்ளது. இதற்காக அங்குள்ள இந்தியர்களை சூடான் துறைமுகத்துக்கு கொண்டு வந்து, அங்கிருந்து நமது போர்க்கப்பல்கள் மற்றும் விமானப்படை விமானங்கள் மூலம் சவூதி அரேபியாவில் உள்ள ஜெட்டாவுக்கு கொண்டு வந்து, அங்கிருந்து சிறப்பு விமானங்கள் மூலம் அவர்கள் இந்தியாவுக்கு அழைத்து வரப்படுகின்றனர். இதுவரை 2,000 இந்தியர்கள் இப்படி வந்து சேர்ந்துள்ளதாக வெளியுறவுத்துறை செயலாளர் வினய் குவாத்ரா தெரிவித்திருக்கிறார்.என்ன நடக்கிறது சூடானில்? சூடானில் அதிகாரத்தைக் கைப்பற்றுவதற்காக அதன் ராணுவம் மற்றும் துணை ராணுவத்துக்கிடையே கடுமையான உள்நாட்டுப்போர் எழுந்துள்ளது. தெற்கு சூடான் தனியாகப் பிரியும் வரை (2011) ஆப்பிரிக்காவின் மிகப்பெரிய நாடு சூடான்தான். சுமார் 5 கோடி மக்கள் கொண்ட இந்தநாட்டின் மக்கள் தொகையில் சுமார் 96 சதவீதம் பேர் இஸ்லாமியர்கள்..தெற்கு சூடான் அதனிடமிருந்து பிரிந்த பிறகு சூடானின் பெட்ரோலிய வருவாய் மூன்றில் இரண்டு பங்கு குறைந்துவிட்டது. இப்போதைக்கு விவசாயம்தான் ஓரளவு கை கொடுக்கிறது. மக்கள் தொகையில் பாதிக்கும் மேற்பட்டோர் எளிய வீடுகளிலும் வறுமை கோட்டுக்குக் கீழேயும் வசிக்கிறார்கள்.இப்போதைய குருக்ஷேத்ரத்தில் ஒருபுறம் ராணுவம். அதன் தலைவர் அப்துல் புர்ஹான். மறுபுறம் துணை ராணுவமான ஆர்.எஸ்.எஃப். இதுவும் சூடான் அரசாங்கத்தால் உருவான அமைப்புதான். அதன் தலைவர் முகமது டகாலோ. இந்த இரு தரப்பும்தான் கலவரங்களில் ஈடுபட்டுக் கொண்டிருக்கின்றன.காரணம்? வேறென்ன, அதிகாரத்தைக் கைப்பற்றும் போட்டிதான். முன்பு அந்த நாட்டை ஆட்சி செய்தவர் ஜனாதிபதி உமர் பஷீர். இவரது அடக்குமுறை ஆட்சிக்கு எதிராக பெரும் புரட்சி வெடித்தது. ஏப்ரல் 2019ல் அவரது ஆட்சிக்கு முடிவு கட்டினார்கள்.பின்னர் ராணுவமும் புரட்சியாளர்களும் ஓர் உடன்படிக்கையில் கையெழுத்திட்டனர். இதன்படி 'உள்ளூர் மக்களும் ராணுவத்தினரும் அடங்கிய ஒரு குழு 2023 இறுதியில் நடைபெறும் தேர்தலை மேற்பார்வையிடும். அதுவரை அப்துல்லா ஹம்டோக் என்பவர் தற்காலிக பிரதமராக நியமிக்கப்படுவார்' என்பது இரு பிரிவாலும் ஏற்றுக்கொள்ளப்பட்டது.ஆனால், ஹம்டோக்கின் ஆட்சியை அக்டோபர் 2021லேயே கவிழ்த்துவிட்டு ராணுவத் தலைவர் புர்ஹான், தன்னையே நாட்டின் தலைவராக அறிவித்துக்கொண்டார். இதில் இரண்டாம் நிலைத் தலைவராக அறிவிக்கப்பட்டவர் துணை ராணுவத்தின் தலைவர் டகாலோ. 2023 தேர்தல்வரை இந்நிலை நீடிக்கும் என்று அறிவிக்கப்பட்டது.2013ல் உருவான துணை ராணுவ அமைப்பு ஆர்எஸ்எஃப் சில போர்களில் சூடான் அரசுக்குப் பெரிதும் கைகொடுத்தது என்றாலும், இதன் மீது கடுமையான மனித உரிமை மீறல் குற்றச்சாட்டுகள் வைக்கப்பட்டன. 2019ல் 120 எதிர்ப்பாளர்களை இது கொன்றது. இந்த அமைப்புக்கும் ராணுவத்துக்கும் இடையே இருந்த உறவு, பின்னர் மிகவும் சீர்குலைந்தது..பத்தாயிரம் பேர்களை உறுப்பினர்களாகக் கொண்ட இந்த அமைப்பைக் கலைத்துவிட்டு, அதில் உள்ள வீரர்களை ராணுவத்தில் சேர்த்துவிடலாம் என்கிறார் புர்ஹான். இன்னும் பத்து வருடங்களுக்கு இது நிகழக்கூடாது என்கிறார் டகாலோ. நாளடைவில் இந்த அமைப்பு தனக்கெதிராகத் திரும்பிவிடக் கூடும் என்று நினைக்கும் புர்ஹானோ, இது விரைவில் நடந்துவிட வேண்டும் என்கிறார். தான் தலைவராக உள்ள ஒரு அமைப்பு அப்படியே தொடர்வதுதான் தனக்குப் பாதுகாப்பு என எண்ணுகிறார் டகாலோ.ஆர்.எஸ்.எஃப் அமைப்பு சட்டவிரோதமாக தன் உறுப்பினர்களை அதிகரித்துக்கொண்டிருக்கிறது என்கிறது ராணுவம். பதவி நீக்கம் செய்யப்பட்ட முன்னாள் பிரதமர் பஷீரின் ஆதரவாளர்களோடு ராணுவம் கூட்டுசேர்ந்து செயல்படுகிறது என்கிறது அந்த அமைப்பு.செங்கடலில் தன் கடற்படையை நிலை நிறுத்த வேண்டும் என்று ரஷ்யா எண்ணுகிறது. பல ஐக்கிய அரபு நிறுவனங்கள் அங்கு ஒரு துறைமுகத்தை ஏற்படுத்த வேண்டும் என்றும் சூடானைப் பங்காளியாக சேர்த்துக்கொண்டு ஒரு விமான சர்வீஸை அதன் தலைநகரில் இருந்து இயக்க வேண்டும் என்றும் திட்டமிடுகின்றன. போரிடும் இரு தரப்புமே சவூதி அரேபியாவுக்கு நெருக்கம் காட்டுகின்றன. எகிப்தின் தற்போதைய அதிபரே ராணுவத் தலைவராக விளங்கி, வன்முறையில் அதிகாரத்தைக் கைப்பற்றியவர்தான். இவருக்கு சூடான் ராணுவத்தோடு நெருக்கம் உண்டு.சூடானில் நடைபெறும் பதவிப்போர் காரணமாக பல நாடுகளுக்கு யார் பக்கம் நிற்பது என்பதில் குழப்பம். ஆதரவளிக்காதவர் நாளைக்கே ஆட்சிக்கு வந்துவிட்டால் சிக்கலாகிவிடும் என்பதுதான் அதற்குக் காரணம்.சூடான், இந்தியாவின் நட்பு நாடுகளின் பட்டியலில் உள்ளது. இப்போது நடக்கும் கலவரங்களில் கூட இரு தரப்பினர்களும் இந்தியர்களை நேரடியாக துன்புறுத்தவில்லை. மாறாக கலவரக்காரர்கள் அன்புடன் அவர்களை மிரட்டி சொத்துக்களை வாங்கிகொள்கிறார்கள்.சூடானிலுள்ள பொதுமக்கள் போர் என்றாலே பெரிதும் நடுங்கும் மனநிலை கொண்டிருக்கிறார்கள். காரணம் 2003ல் சூடான் அரசுக்கும் புரட்சியாளர்களுக்கும் இடையே நடைபெற்ற போரில் மூன்று லட்சம் பேர் கொல்லப்பட்டார்கள்.வெள்ளைக் கொடியின் மகத்துவம், இம்சை அரசனுக்குத் தெரிந்த அளவுகூட பல நாடுகளின் பதவி வெறி பிடித்தவர்களுக்குத் தெரியாததுதான் வேதனை! -ஜி.எஸ்.எஸ்.

சூடாகும் சூடான்: வேடிக்கை பார்க்கும் உலக நாடுகள்!

Related Stories