கடவுளின் குரல் : மந்திரங்களின் மகிமையை உணர்த்திய மகான்.

ஒரு சமயம் ஸ்ரீமடத்தில் தொடர்ந்து ஒருவாரம், வேத மந்திர பாராயணம் நடத்தலாம் என்று உத்தேசித்தார், மகான். அப்படியே ஏற்பாடு செய்தார்கள், தொண்டர்கள். ஏராளமான வேத விற்பன்னர்கள் கலந்து கொண்டு, ஒவ்வொரு நாளும் வேதமந்திரங்களை முழங்கினார்கள். மந்திர கோஷங்கள் முடிந்தபிறகு, மகானின் உபதேசமும் அன்னதானமும் நடந்தது. ஏராளமான பக்தர்கள் அதில் கலந்துகொண்டார்கள்.அந்த சமயத்தில் பக்தி நாட்டம் கொஞ்சமும் இல்லாத நபர் ஒருவரும் அங்கே நடக்கும் அன்னதானத்துக்காகவே தினமும் வந்துகொண்டிருந்தார். முதல் இரண்டு நாட்கள் அமைதியாக இருந்த அவர், மூன்றாம் நாள், வேத விற்பன்னர்கள் மந்திரங்களைச் சொல்லிக்கொண்டிருந்தபோது, ‘’ஒண்ணுமே புரியாத ஒரு கூச்சல்...இதைக் கேட்க இவ்வளவு கூட்டம்... இதுக்கு ஏதாவது பாட்டுக்கச்சேரி நடத்தினாலாவது கேட்கலாம்!” என்றெல்லாம் முணுமுணுக்க ஆரம்பித்தார். போதாக்குறைக்கு தன் சலிப்பை மற்றவர்களிடமும் பரப்ப ஆரம்பித்தார்.புரியாத மந்திரங்கள் என்றாலும் அதற்கு ஓர் ஆற்றல் உண்டு என்று சிலர் சொன்னாலும் அதை அவர் கேட்பதாக இல்லை. அவரது புலம்பலால், பக்தர்கள் இடையே கவனச்சிதறல் ஏற்பட்டது. இவை எல்லாம் பக்தர்கள் கூட்டத்தில் நடந்ததே தவிர, யாரும் மகானிடம் சொல்லவில்லை.நேரம் நகர்ந்து வேத கோஷம் முடிந்து அன்னதானம் தொடங்கியது. தன் அருகே நின்றிருந்த தொண்டரை அழைத்த மகான், இவ்வளவு நேரம் முணுமுணுத்துக் கொண்டிருந்த நபரை அவருக்கு சுட்டிக்காட்டி என்னவோ சொன்னார்.சரி என்று சொல்லிவிட்டுச் சென்ற தொண்டர், அன்னதானம் நடந்த இடத்துக்குச் சென்றார்..உணவுப் பதார்த்தங்களை எடுத்துக்கொண்டு வரிசையாகப் பரிமாறிக்கொண்டே வந்த அவர், முணுமுணுப்பு ஆசாமியின் இலையில் பரிமாறியபோது கொஞ்சம் சத்தமாக ஏதோ சொன்னார். அவர் சொன்னதன் அர்த்தம் புரியாமல் விழித்த அந்த ஆசாமி, சரி எதோ சொல்கிறார் என்று சாப்பிடத்தொடங்கினார். அடுத்தடுத்து அவர் இலையில் உணவுப் பதார்த்தங்களை வைத்தபோதெல்லாம் முணங்கலாக ஏதோ சொன்னார் தொண்டர்.ஆரம்பத்தில் அசட்டையாக இருந்த அந்த ஆசாமிக்கு, தொண்டரின் முணங்கல் எரிச்சலாகவே, சட்டென்று எழுந்தார், “இங்கே நடக்கறது பொதுவான அன்னதானம்... இதுல என்ன வேண்டாத முணுமுணுப்பு என்று கோபமாகக் கத்தினார்!”சரியாக அதே நேரத்தில் அந்தப் பக்கமாக வந்த மகான், முணுமுணுப்பு ஆசாமியை அமைதியாக சாப்பிட்டுவிட்டு வரும்படி சொன்னார்.உண்டுமுடித்த நபர் மகான் முன் சென்று நின்றார். அமைதியாக அவரைப் பார்த்த மகான், “என்ன சாப்பாடு பரிமாறுறப்போ புரியாதபடிக்கு ஏதோ முணங்கினதுல உனக்குக் கோபம் வந்திடுத்து போல இருக்கே..!” கேட்டார்.“ஆமாம்...!” கொஞ்சம் அழுத்தமாகவே சொன்னார். “அவன் முணங்கினது என்ன வார்த்தைன்னு உனக்குப் புரிஞ்சுதா?” ‘’இல்லை...ஆனா, ஏதோ சலிப்பா சொன்னதாகத் தெரியுது!” “அப்படின்னா, அர்த்தம் புரியலை...சொன்னது என்னன்னு தெரியாது...ஆனாலும், அந்த வார்த்தை உன்னோட கோபத்தைத் தூண்டியிருக்கு... வெறும் ரெண்டு வார்த்தையே இப்படிச் செய்யுதுன்னா, வேதகால ரிஷிகள் சொல்லிவைச்ச மந்திரங்கள் எவ்வளவு நல்ல அதிர்வைத்தரும்... அர்த்தம் புரியலைன்னாலும் அதைக் கேட்கறதுக்கு இவ்வளவு பேர் அதனாலதான் வர்றாங்க... புரிஞ்சுதா?”மகான் சொல்லச் சொல்ல, மந்திரங்களின் மகிமையை உணர்த்தவும், தனது அறியாமையை நீக்கவுமே மகான் இப்படி ஒரு நாடகத்தை நடத்தியிருக்கிறார் என்பதைப் புரிந்துகொண்ட அந்த நபர், சாஷ்டாங்கமாக நமஸ்கரித்தார். -ஆர்.என்.ராஜன்

கடவுளின் குரல் : மந்திரங்களின் மகிமையை உணர்த்திய மகான்.

Related Stories