AI எனும் ஏழாம் அறிவு

- ஹரிஹரசுதன் தங்கவேலுஇரண்டாம் உலகப்போர் துவங்கிய 1939 காலகட்டத்தில் லண்டன்தான் உலகின் மாபெரும் நகரம். எட்டு மில்லியன் மக்கள் வசித்த இந்நகரம் ஐக்கிய முடியரசுகளுக்கு மட்டுமே தலைநகரம் அல்ல! சூரியன் மறையாத பேரரசு என அழைக்கப்பட்ட பிரிட்டிஷ் சாம்ராஜ்யத்தின் தலைமை நகரமும்கூட. ஹிட்லருக்கு லண்டனின் மீது ஒரு தனி ஆசை உண்டு. அதன் அதிகாரம், ஆளுமை, உலகம் முழுவதிலும் இருந்து கொள்ளையடிக்கப்பட்ட பொக்கிஷங்கள், இது அனைத்தையும் அடைய வேண்டும், இல்லை அழித்தொழிக்க வேண்டும். அதைவிட முதலாம் உலகப் போரில் ஜெர்மனியை வீழ்த்திய பிரிட்டிஷை காலம் பார்த்து பழி தீர்க்க வேண்டும் என்ற வெறி அவரது மனதில் தீயாய் எரிந்துக்கொண்டிருந்தது..இதற்காகவே தனது 25ம் வயதில், 1912ம் ஆண்டு ரகசியமாக லண்டனிற்கு வந்த ஹிட்லர் லிவர்பூல் நகரத்தில் ஆறுமாத காலம் தனது தம்பி அலோயிஸ் (Alois) உடன் ஒரு அபார்ட்மென்ட்டில் தங்கியிருக்கிறார். லண்டனின் புகழ்மிக்க 'டவர் ப்ரிட்ஜ்' இயங்கும் விதத்தைக் காண லஞ்சம் தந்து இயந்திர அறைக்குள் நுழைந்து அது இயங்கும் விதத்தை கவனித்திருக்கிறார். லண்டன் வீதிகளில் பியர் அருந்தியபடியே ஜாலியாக உலாத்திருக்கிறார். இந்த தகவல் 1975க்கு பிறகே, ஹிட்லர் குடும்ப உறுப்பினர் எழுதிய கடிதம் மூலமாக லண்டனிற்குத் தெரிய வந்தது..ஆகவே போர் என வந்தால் லண்டன் எப்படி மூன்றுவித பாதுகாப்பு வளையத்திற்குள் நகரத்தைக் கொண்டு வரும் என்பதெல்லாம் ஹிட்லருக்கு அத்துப்படி. மூன்றாவது மற்றும் இரண்டாவது வளையங்களான லண்டன் புறநகர்களை சுற்றி பீரங்கி தடுப்புகள், வெடி குழிகள், கற்தடுப்புகள் நிறுவப்பட்டிருக்கும். தேம்ஸ் நதிக்கு உட்புறம் முதல் வளையமாக ஆயுதம் ஏந்திய காலாட்படை ராஜ தலைமைகளை பாதுகாக்கும். ஆகவே சாலை வழியாக தாக்குவது மாதம் பிடிக்கும் செயல். லண்டனை அதிர வைக்க ஒரே வழி, விமானத் தாக்குதல்தான் என்பதை போர் துவங்குவதற்கு ஏழு வருடங்கள் முன்பே ஹிட்லர் கணித்திருந்தார். ஆகவேதான் அதிபராக பொறுப்பேற்றதும் செய்த முதல் காரியம் ‘The Blitz’ எனும் அதிரடி விமானப் படையை உருவாக்கியது. இரண்டாம் உலகப்போர் தீவிரம் பெற்றது.ஜெர்மனியின் நாஜிப்படை டென்மார்க், நார்வே, ஹாலந்து ஆகிய நாடுகளை எல்லாம் அடித்து நொறுக்கி லண்டனை நோக்கி அதிவேகமாக முன்னேறியது. பிரிட்டிஷ் சாம்ராஜ்யம் மிரண்டது. ஹிட்லரை சமாளிக்க வேண்டுமெனில் இந்த நியாயம், வீரம் எல்லாம் வேலைக்காகாது. அதற்குத் தேவை விவேகம். தேவை, ஹிட்லரின் மூளையை சமாளிக்கும் ஒரு அடாவடி மூளை. வெறி கொண்ட நாஜிப்படையை எதிர்த்து பிரிட்டனைக் காப்பாற்றும் பொறுப்பை ஏற்று 66 வயது வின்ஸ்டன் சர்ச்சில் பிரதமராகப் பொறுப்பேற்றார்..இந்த இக்கட்டான சூழலில் வயதான சர்ச்சிலை தேர்வு செய்ய ஒரு காரணம் இருந்தது. சர்ச்சில் முதலாம் உலகப் போரில் பிரிட்டனின் கடற்படையை மேற்பார்வையிட்டவர், ராணுவத்தில் பணி புரிந்தவர் என்பதைவிட ஏழு வருடங்களுக்கு முன்பு ஹிட்லர் தன் விமானப்படையை பலப்படுத்தியதும், அது பிரிட்டனை தாக்குவதற்குத்தான் என எதிர்க்கட்சியாக பலமாகக் குரல் கொடுத்தவர். ஹிட்லரின் மன ஓட்டத்தை ஆரம்பத்திலேயே நாடி பிடித்த சர்ச்சில் போர்க் காலப் பிரதமாராகப் பதவியேற்ற அதே நாள் மே 10, 1940 பெல்ஜியம் நாடு ஹிட்லரிடம் வீழ்ந்தது.ஹிட்லரின் விமானப்படை எந்த வினாடியும் லண்டனை தாக்கலாம் என்பதை உணர்த்த சர்ச்சில் ஏற்கெனேவே இருந்த போர்க் கால நடவடிக்கைகளை 'பிளான் எல்லோ' என்ற பெயரில் தீவிரப்படுத்தினார். குழந்தைகள், பெண்கள், நோயாளிகள், அரசுப் பணியாளர்களை லண்டனில் இருந்து பாதுகாப்பாக வெளியேற்றினார். அருங்காட்சியகத்தில் இருந்த வரலாற்றுப் பொக்கிஷங்கள் ரகசிய இடத்திற்கு மாற்றப்பட்டன. பிரிட்டன் நூலகத்தில் இருந்த ஆயிரமாயிரம் புத்தகங்கள் மரப்பெட்டிகளில் போட்டு புதைக்கப்பட்டன. வரலாற்றுத் தேவாலயங்கள், கல்லறைகள் மணல் அடுக்குகளால் பாதுகாக்கப்பட்டன. மக்கள் பாதுகாப்பு கருதி லண்டன் உயிரியல் பூங்காவில் இருந்த விஷ ஜந்துக்கள் கொல்லப்பட்டன. பிற விலங்குகள் நாடு கடத்தப்பட்டன. கிட்டத்தட்ட லண்டனில் பாதியை காலி செய்தார் சர்ச்சில்..அதே அதிரடியில் அவர் உருவாக்கியது தான் 'அல்ட்ரா' உளவு நிறுவனம். அதற்கு கொடுக்கப்பட்ட ஒரே வேலை, எனிக்மாவின் ரகசியச் செய்திகளை உடைப்பது. ஆனால், அது நிகழ்ந்தபாடில்லை. மறுபுறம், எனிக்மாவின் செயல்பாட்டை இன்னும் ரகசியமாக்கினார் ஹிட்லர். காலை ஆறு மணிக்கு ஜெர்மன் துருப்புகளால் அனுப்பப்படும் முதல் ரேடியோ செய்தியில், வரும் குறிப்பிட்ட மூன்று எழுத்துகள் மிக முக்கியமானவை. அந்த மூன்று எழுத்துக்களில் இருந்து தான் எனிக்மாவின் உயிரான மூன்று பற்சக்கரங்களையும் துவங்க வேண்டும். அதை சரியாக வைத்து செய்தியில் வந்த குழப்படி எழுத்துக்களை டைப் ரைட்டரில் அடித்தால்தான் அனுப்பிய தகவலை புரிந்துகொள்ள முடியும். செய்தி அனுப்பப்பட்ட 20 நிமிடத்தில் தாக்குதல் துவங்கி விட வேண்டும். அதுதான் ‘Blitzkrieg’ என்ற மின்னல் வேகத் தாக்குதல் உத்தி. ஆக ஒரு நாளில் அனுப்பப்படும் அத்தனை தகவல் பரிமாற்றங்களின் ஆதார அச்சு இந்த மூன்று எழுத்துகள் தான். ஒவ்வொரு நாள் காலை ஆறுமணிக்கும் இந்த மூன்று எழுத்துக்களையும் தொடர்ந்து மாற்றிக் கொண்டே வந்தது ஜெர்மன் ராணுவம்.ஏற்கெனவே ஓர் எழுத்து எனிக்மா மூலம் எவ்வளவு எழுத்துக்களாக மாறி வெளிவரும் வாய்ப்புள்ளது என்ற அடிப்படைக் கணிதத்தை தீர்க்க முடியாமல் தவித்திருந்த அல்ட்ராவிற்கு இந்த புதிய மாற்றங்கள் மரண பயத்தை உருவாக்கியது. அதிலும் கணிதவியலாளர்கள், செஸ் போட்டியாளர்கள் என வல்லமைமிக்க இத்தனை பேர் இணைந்து முயன்றே ஒரு செய்தியை உடைக்க நாள் கணக்காகிறது. ஆனால், செய்தி அனுப்பப்பட்ட 20 நிமிடத்தில் தாக்குதல் நடந்து விடும் என்பதை 'அல்ட்ரா'வால் ஏற்றுக் கொள்ளவே முடியவில்லை. உளவியல் ரீதியாக பிரிட்டனுக்கு இது பெரும் அச்சத்தை கொடுத்தது..அதே நேரம், லண்டனைத் தாக்க நாள் குறித்தார் ஹிட்லர். பிற நாடுகளில் நிகழ்ந்ததுபோல் எல்லாம் தாக்குதல் சாதாரணமாக இருக்கக் கூடாது. ஒரு அலுவலகம், ஒரு வீடு, ஒரு செங்கல்கூட மிஞ்சக் கூடாது. குண்டுகளால் பிளந்தெடுங்கள், லண்டன் முழுவதும் பற்றி எரிய வேண்டும் என விமானப்படைக்கு கட்டளையிட்டார். இப்படியான சூழலில் அல்ட்ராவின் அலுவலகம் ‘ப்ளட்ச்லே பார்க்’ கதவுகளைத் திறந்து கொண்டு வேகமாக நுழைந்தான் ஓர் இளைஞன். மரியன் உருவாக்கிய மாதிரி எனிக்மாவைப் பார்த்தான். 26 மின்சார துளைகள் கொண்ட மூன்று பற்சக்கரங்கள், 10 பிளக் போர்டு கேபிள்கள், 26 எழுத்துக்கள் கொண்ட இரு போர்டுகள், இதை சில நிமிடங்கள் தொடர்ந்து கவனித்தவாறே இருந்தவன், மிக வேகமாக தன் மூளையில் கணக்கீடுகளை நிகழ்த்தத் துவங்கினான்..26X26X26 = 17576, அதில் ஆறு விதமான சாத்தியக் கூறுகள். அவனை இடைமறித்துக் கேட்டார் அல்ட்ராவின் தலைமை இயக்குநர் கமாண்டர் டெனிஸ்டன். “ நீ யார் ?”அவரைத் தவிர்த்து கணக்கீட்டைத் தொடர்ந்தான் அவன்...26X17576 / 26-2L என அவனது மூளை பல சமன்பாடுகளில் அதிவேகமாக இயங்கிக்கொண்டிருந்தது. “நீ யார்?” கோபமாக உறுமினார் டெனிஸ்டன்.அவன் சற்றும் பயப்படாமல், குரலை செருமிக்கொண்டு சொன்னான்."159 மில்லியன் மில்லியன் மில்லியன் சாத்தியங்கள்." “ என்ன சொல்கிறாய் ?” டெனிஸ்டன் புரியாமல் கேட்டார்.“கீ போர்டில் அழுத்தப்படும் ஒரு எழுத்து இன்னொரு எழுத்தாக எனிக்மாவில் மாற இருக்கும் சாத்தியங்கள் 159 மில்லியன் மில்லியன் மில்லியன் முறை...”டெனிஸ்டன் அவனை வியப்பாகப் பார்த்தார், அவன் தொடர்ந்தான்."ஒரு ரகசிய எனிக்மா செய்தி நம் கைகளுக்கு கிடைத்ததும், பத்துப் பணியாளர்கள், 24 மணி நேரம், ஏழு நாட்கள் என இடைவிடாமல் ஒவ்வொரு சாத்தியமாக முயற்சி செய்தாலும் ஒரு செய்தியை உடைக்க நாம் எடுத்துக் கொள்ளும் காலம் தோராயமாக 20 மில்லியன் வருடங்கள். அதாவது 20 நிமிடத்தில் நிகழப்போகும் ஒரு தாக்குதலைக் கண்டுபிடிக்க நமக்கு 20 மில்லியன் வருடங்கள் தேவைப்படும்."டெனிஸ்டன் சிரித்தபடியே கேட்டார்."அப்படியானால் இது மனிதர்களால் சாத்தியமற்ற காரியம்தானே?" “உண்மைதான். ஆனால், நான் உருவாக்கும் ஓர் இயந்திரத்தால் இது சாத்தியம்”கண்கள் மின்ன சொன்னான் அவன். “என்ன உளறுகிறாய்? ஓர் இயந்திரம் எப்படி மனித அறிவைவிட சிறப்பாக செயல்படும்?” கோபத்தில் உறுமினார் டெனிஸ்டன்."அது செய்ய வேண்டியது என்ன என்பதை நாம் தெளிவாக சொல்லிவிட்டால் மனித அறிவைவிட நொடிக்கு நூறாயிரம் மைல் வேகத்தில் அது செயல்படும். அதுதான் இயந்திரக் கற்றல் சார்” பொறுமையாகச் சொன்னான் அவன்..பின்னாட்களில் உலகை தன் அறிவால் ஆட்டிப்படைக்க இருக்கும் ‘மெஷின் லேர்னிங்’எனும் இயந்திரக் கற்றலைப் பற்றித்தான் அவன் சொல்லிக் கொண்டிருக்கிறான் என்பதை அறிந்திரா டெனிஸ்டன் அவனது வயதை கிண்டல் செய்யும் நோக்கில் நக்கலாகக் கேட்டார். “நீ என்ன சிறுவயது அறிவியல் மேதையா ? “இல்லை, நான் கணிதவியலாளன் ஆலன் மாத்திசன் டூரிங். நீங்கள் பணம் தந்தால் என்னால் அந்த இயந்திரத்தை உடனே கட்டமைக்க முடியும்.”இந்த 27 வயது இளைஞன் சொல்வது உண்மையா, இயந்திரம் சிந்திக்குமா, இவனை நம்பிப் பணம் தரலாமா? யோசித்தார் கமாண்டர் டெனிஸ்டன்.அதே இரவு, லண்டன் மாநகரத்தைப் பிளந்தெடுக்க ஜெர்மனியின் ஹெய்ன்ஹெல் ஹீ 111 விமானங்கள் தனது மக்னீசியக் குண்டுகளைச் சுமந்தபடி கிளம்பின. ‘Second Great fire of London’ என்றழைக்கப்பட்ட ஒரு வரலாற்று இரவுக்குத் தயாரானது லண்டன்!(உலகம் விரியும்)