ஒருபக்கக் கதை : ரோஜா மகள்

காரை விட்டு இறங்கினாள் சாரதா. மெல்லிய தூறல் தொடங்கியிருந்தது. கைப் பையில் இருந்த குடையை எடுத்து விரித்தபடி, சாலையில் எதிர்புறமிருந்த காத்தாயி அம்மன் கோயிலுக்குச் செல்ல முயன்றாள். அப்போது எதிர்பட்ட அந்தச் சிறுமி ‘‘அக்கா! ரோஸ் வாங்கிக்கங்க… ரெண்டே ரெண்டுதான் மிச்சமிருக்கு...’’ என்றாள். அச்சிறுமியை சாரதாவுக்கு நன்றாகத் தெரியும்.அந்தச் சிறுமியிடம் இருந்து ஒரு ரோஜாவை வாங்கிக்கொண்டாள் சாரதா. எவ்வளவு என்னது என்று எதுவுமே கேட்காமல், இருபது ரூபாய்த் தாளை அவளிடம் நீட்டியவள் ‘’பாப்பா! ஏன் இன்னிக்கு உங்கம்மா வரலையா?’’ என்றாள்.’’அம்மாவுக்கு ஒடம்பு ரொம்ப முடியல… வீட்டுல படுத்துருக்கு’’ என்றாள்.‘‘அப்படியா…’’ என்று சொல்லியபடி, அவளை கடந்துச் செல்லப்போன சாரதாவிடம், ‘‘அக்கா..! ஒரு உதவி செய்றீங்களா?’’ என்றாள் சிறுமி.சிறுமி கேட்டதும் சாரதா, ‘அச்சிறுமி தன் அம்மாவுக்கு மருந்து வாங்கப் பணம் கேட்கப் போகிறாள். இல்லையெனில் அந்த இன்னொரு ரோஜாவையும் தன்னை வாங்கிக் கொள்ளச் சொல்வாள்’ என யோசித்தாள்.பணம் எடுக்க தன் கைப் பையின் ஜிப்பை இழுத்துக்கொண்டிருந்த சாரதாவிடம்… தன் கையில் மிச்சமிருந்த ரோஜாவைக் கொடுத்த சிறுமி ’’இந்தப் பூவை உள்ளே இருக்கற சாமிக்கு வச்சிடுங்க அக்கா. எங்க அம்மாவுக்கு சீக்கிரம் உடம்பு நல்லாகணும்னு வேண்டிக்கிறீங்களா?’’ என்றாள்.திகைத்து நின்ற சாரதாவிடம் ரோஜாவைக் கொடுத்துவிட்டு, நடந்துகொண்டிருந்தாள் சிறுமி!இப்போது சாரதாவின் மனசுக்குள் மழை! - எஸ்.ஆர்.லீலா