அம்மாவின் கூந்தல்

தனக்கு முன்னால் இருந்த ஃபைலின் பக்கங்களை நிதானமாகப் புரட்டிக் கொண்டிருந்த டாக்டர் ராஜ்குமாரையே பார்த்துக் கொண்டிருந்தான் முகுந்தன். ஃபைலை புரட்டும் மெல்லிய சத்தம் தவிர வேறு எந்த சத்தமும் இல்லை. அவ்வளவு அமைதி. தனக்கு பக்கத்தில் ஒருவித பதற்றத்துடன் அமர்ந்திருந்த அம்மாவை ஒரு தடவை பார்த்துக் கொண்டான். மருந்து கம்பெனி பெயர் தாங்கிய குழந்தைகள் அல்லது இயற்கைக் காட்சி என எந்தப் படங்களும் டாக்டரின் அறையை அலங்கரிக்கவில்லை. மிகச் சாதாரணமாக இருந்தது. முன்னால் இருந்த டேபிளில் ஒரு டாக்டருக்குத் தேவையான மிக மிக முக்கியமான பொருட்கள் மட்டுமே இருந்தன. ."வெல் மிஸ்டர் முகுந்தன்…" என்ற குரலில் கலைந்து, மருத்துவரைப் பார்த் தான் முகுந்தன். ஒரு மருத்துவர் இவ்வளவு அழகாகச் சிரி க்க முடியுமா என்பதுபோல் சிரித்துக்கொண்டே, தன் கையில் இரு ந்த எக்ஸ்ரேயைப் பார்த்தபடி… "நல்லாருக்காங்க.. இன்னும் டூ வீக்ஸ் கழிச்சு ஃபர்ஸ்ட் கீமோவுக்கு வரணும். இது மாதிரி ஆறு தடவை வரணும். எந்தந்த டேட்ல வரணும்னு அந்த வார்டுலேயே சொல்வாங்க" என்றார். .. ‘’டாக்டர்..இனிமே எதுவும் பயமில்லையே..?!" .."டோன்ட் வொர்ரி… கேன்சர்லேயே முழுமையா கியூரபில்ங்கறது பிரெஸ்ட்டும், செர்விக்ஸ்ங்கிற கர்ப்பப்பை வாய் ரெண்டும்தான். ஆரம்பத்திலேயே நீங்க வந்துட்டதால… எந்த பயமுமில்ல. தவறாம செக்கப்புக்கு மட்டும் வந்துடுங்க..." .."டாக்டர் இது எதுனால வருதுன்னு..?" .."ரீசன் ஏகப்பட்டது இருக்கு. மெயினா ஸ்ட்ரெஸ்தான். உள்ளுக்குள்ளேயே அடைச்சு வெச்சுகிட்டு புழுங்கறதுதான்…காரணம்" டாக்டர் சொல்லிவிட்டு .."ஓகே." என்றபடி மணியை அழுத்தினார்.முகுந்தனும் அம்மாவும் எழுந்து டாக்டருக்கு ‘வணக்கம்’ சொல்லி புறப்பட்டபோது,.."கீமோ தெரபி எடுக்கறப்ப முடி கொஞ்சம் கொட்டும். பாதி பேருக்கு தலை மொட்டையாகிவிடும். அதுக்காக கவலப்படாதீங்க. ட்ரீட்மென்ட் முடிஞ்சதும் நல்லா வளர்ந்துடும்..". டாக்டர் சொல்வதை மலங்க மலங்க விழித்தபடி குழந்தை போல கேட்டுக் கொண்டிருந்த அம்மாவையே பார்த்தான் முகுந்தன். மொட்டையாகிவிடுமா? கொண்டையாகி பந்துபோல் கிடந்த து முட்டி தொடும் அம்மாவின் கூந்தல். அம்மாவைப் பார்க்கும் எல்லோர் கண்ணையும் முதலில் தொடுவது அவளது கூந்தல்தான். .பின்பக்கமாகப் பார்த்தால் அலை அலையாக சுருள்சுருளாக தெய்வப் படங்களில் வருவது போல கிடக்கும். மானின் கொம்புகள் போல அவளுக்குத் துன்பம் கொடுத்ததும் அதெ முடிதான். ."அழகா இருக்கறேன்னு கொழுப்பாடி..." எவன் பாக்கறதுக்காக இப் புடி சீவிச் சிங்காரிச்சு மினுக்கறே…" என்று அப்பாவிடம் சாதாரணமாகத் தலை சீவி நின்றாலே அடியும், உதையும் கிடைக்க வைத்த தும் அதே கூந்தல்தான். அம்மா ஏதோ ஒரு வார்த்தை சொன்னதற்காக… அதை பொறுக்க மனமில்லாத அப்பா, அரிவாள்மனையால் அவளதுகூந்தலைக் கன்னாபின்னாவென்று வெட்டித் தள்ளினார். கொஞ்ச நாளிலேயே முடி வளர்ந்துவிட்டாலும் மனம் முழுக்க வரைந்து தள்ளிய ரணங்கள். மனிதர் இறந்தபிறகுதான் அவனுக்கும் அம்மாவிற்கும் விடுதலை. நல்லவேளையாக அம்மாவுக்கு வந்துள்ள பாதிப்பை ஆரம்ப நிலையிலேயே கண்டுபிடிக்க முடிந் தது. "முகுந்தா… போக்கு கொஞ்சம் ஜாஸ்தியா இருக்குப்பா… ரொம்ப டயர்டாவும் வருது. எதாச்சும் ஆஸ்பத்திரிக்கு கூட்டிட்டுப் போறீயாப்பா..?" என்று அம்மா கேட்டதும் கெட்டதில் ஒரு நல்லதாகிப்போனது. உடனே, அம்மாவை அழைத்துக்கொண்டு வந்ததில் பரிசோதனை முடிவுகள் கர்ப்பப்பை வாய்ககேன்சர் என்றன. வேறு உடல் உறுப்புகளுக்கும் பரவாமல் இருந்ததில் கடவுளுக்கு நன்றி செலுத்தினார்கள் அம்மாவும் பிள்ளையும். டாக்டர் சொன்ன ஸ்ட்ரெஸ் ஞாபகத்துக்கு வந்தது. அன்று வாய்த் திறக்காமல் பட்ட அடிகளும் வசவுகளுந்தான் காரணமா? இல்லை, தன் பட்டுப்போன வாழ்க்கையாலா..?.ஷொபானாவை முதன்முதலில் பார்த்து காதல் கொண்டதற்குக் காரணமே… அம்மா மாதிரி அவளுக்கும் நீண்ட கூந்தல் இருந்ததுதான். ஆனால், அமமா போல் சுருள் சுருளாக இருக்காது. பட்டுப் போல் மென்மையாக, மிக மிருதுவாக இருக்கும் ஷொபானவின் கூந்தல். இரண்டு பக்கமும் எந்த எதிர்ப்பும் இல்லாமல் நடந்த திருமணம் அவ் அனுடையது. கல்யாணமான புதிதில் அவன் "அடடா… என்ன மிருதுவா இருக்கு! அப்படியே பட்டாட்டம்…" என்று சொல்லியபடி அவள் கூந்தலில் முகம் புதைத்து, "என் ஷோபி யின் கூந்தலுக்கு இயற்கையிலேயே மணம் உண்டா... இல்லையா.. ?" என்று திருவிளையாடல் வசனம் பேசுவான். .."ம்ம்.. .மருதாணி கருவேப்பிலை போட்ட சீகக்காய் ஷாம்பு... டொட்டடொய்ங்.." என்று வாயினால் மியூசிக் போட்டு , செல்லமாகக் சிணுங்குவாள் ஷோபனா.உயிராக இருந்த தாம்பத்தியத்தில், எது புகுந்துப் பிரித்தது? விதியின் பெயர் சொல்லிய அவர்கள் இருவரின் ஈகோவா? .."முகுந்த்..அப்பா அம்மா திருப்பதி கூப்பிட றாங்க..எதோ சின்ன வயசு வேண்டுதலாம்… போலாமா?!" .."எனக்கும் ஏழுமலையானுக்கு ஹலோ சொல்லணும்னு ஆசையாத்தான் இருக்கு ஷோபி. ஆடிட் பீரியட். லீவு கேட்டா எங்க மேனேஜர் எரிஞ்சு விழுவார். நீ போய்ட்டு வா.." என்று அனுப்பி வைத்தான். ஆனால் திருப்பதி சென்று இப்படி வந்து நிற்பாள் என்று அவன் எதிர்பார்க்கவில்லை. மழுங்க மொட்டை அடித்துக் கொண்டு வந்து நின்ற ஷோபனாவை ஏறேடுத்துப் பார்த்தவனுக்கு அடி நெஞ்சிலிருந்து கோபம் உருண்டு திரண்டது. கோபத்தில் மனமும் உதடும் துடிக்க வார்த்தை வராமல் நின்ற மௌனத்தை புரிந்துகொள்ளாத ஷோபனா, "அப்பா கூட உங்ககிட்ட சொல்லிட்டு முடி இறக்கிக்கலாம்னுதான் சொன்னாரு. நான்தான் அதெல்லாம் எதுவும் சொல்ல மாட்டாருன்னு சொன்னேன்..’’ என்றாள்.‘’.ஆமாம்.. இளிச்சவாயானா இருந்தா மரியாதை கெடைக்காது தான்.." என்று பேச ஆரம்பித்தவன், "உனக்குத்தான் ஏன் இப்படி புத்தி போச்சு… என்கிட்டே கேட்கணும்னு தோணலையா உனக்கு..’’ சீறி விழுந்தான்...’’என்னங்க… இதுக்குப் போயி? சாமிக்குத்தானே நேந்துகிட்டேன். நாளைக்கு வளர்ந்துரப் போவுது.." என்று ஷோபனா சொன்ன சமாதானமும்… அம்மாவின் ஆசுவாசப்படுத்தலும் முகுந்தனிடம் எடுபடாமல் போனது. இதன் காரணமாக கணவன் மனைவி இருவரிடையே வளர்ந்த பேச்சின் உக்கிரம்… கடைசியில் பிரிவின் எல்லைக்கு சென்று… இல்லற வாழ்விலிருந்து விலக்கி வைக்க, ஷோபனா தாய் வீட்டுக்கே சென்றுவிட்டாள். ’ஒருவேளை என்னதான் தாய் வளர்த்தாலும் ,கொடுந்தகப்பனின் ரத்தமும் கலந்திருந்ததுதான் நமதுகோபத்துக்கும் ஈகோவுக்கும் காரணமோ..?’ என்று முகுந்தன் அடிக்கடி நினைத்துக் கொள்வான்.ஆனால் ஏனோ மீண்டும் அவளிடம் சமாதானம் பேச ஈகோ முட்டிக் கொண்டு முந்தி வந்து நின்றுவிடும். ’தனது கல்யாண வாழ்வு இப்படி ஆகிவிட்டதென்ற கவலைதான் அம்மாவை இந்த நிலைமைக்கு கொண்டுவந்துவிட்டதோ?’ நினைத்தபடி அம்மாவின் கையைப் பிடித்தபடி நடந்தவன் கண்ணில் பட்டது அந்தக் கடை. .முன்புறம் உள்ள கண்ணாடி அலமாரியில் கூந்தல் போலவே வைக்கப்பட்டிருந்த நீளமான முடியைப் போலவும், பாப் விக்குகளும், மார்பகங்களும் அதற்கு உண்டான உள்ளாடைகளும் காட்சிப்படுத்தப்பட்டிருந்தன. .."கீமோ கொடுத்து முடி போயிட்டவங்க பயன்படுத்துறதுங்க.இந்த பிரெஸ்ட் எல்லாம் சிலிக்கான்ல செஞ்சது. பொருத்திகிட்டா பிரெஸ்ட் இருக்கற மாதிரியே இருக்கு." அந்தக் கடையில் இருந்த சிப்பந்தி பெண் சொன்னாள். சொல்லிக்கொண்டு இருக்கும்போதே ஒரு பெண் வேகமாக வந்தாள்.அவள் கையில் பெரிய பை இருந்தது."அடடா..சாப்பாட்டுக்குப் போயிட்டாங்களா….சரி ஈவினிங் வர்றேன்.." என்றபடி திரும்பி நடந்தாள் .."இப்படி விக் தயாரிக்கறதுக்காக நிறையப் பொண்ணுங்க தன்னோட வளர்ந்த முடியை வெட்டி இவங்ககிட்ட கொண்டுவந்து குடுப்பாங்க. இதுவொரு சமூக சேவை . இந்த ஷாப் வைச்சிருக்கறவங்க கூட அந்த மாதிரிதான்" என்றாள் அந்தப் பெண். .."அப்பா.." என்று சிலிர்த்துப் போனான் முகுந்தன். பெண்களுக்கு முடிதான் அழகே. தன் அழகையே அடுத்தவங்களுக்காக தியாகம் பண்றதுன்னா..!" மனதுக்குள் வியந்தாலும் அம்மாவை மொட்டையாகப் பார்க்க மனம் ஒப்புக் கொள்ளவில்லை அவனால். . ’அடுத்த தடவை வரும்போது ஒரு விக் வாங்கிக் கொள்ள வேண்டியதுதான்’ என்று நினைத்துக்கொண்டான். முதல் கீமோ முடிந்தவுடனேயே முடி கையோடு வரவே அம்மா பியூட்டி பார்லர் வைத்திருக்கும் பக்கத்து வீட்டுப் பெண்ணிடம் சொல்லி முழு மொட்டை அடித்துக்கொண்டாள். அம்மாவைப் பார்த்தவனுக்கு அழுகை பொங்கி வந்தது. கண்கலங்கி நின்ற அவனிடம்.."அழாதே முகுந்தா.. முடி பெரிசா.. உயிர் பெரிசா..?!" என்றாள் அம்மா. .."இந்தத் தடவை போறப்ப நிச்சயமா விக் வாங்கிற்ணும்மா.. உன்னை இப்படிப் பாக்க என்னால முடியல." என்று தினம் ஒரு தடவையாவது புலம்பிக் கொண்டிருந்தான். .."சரிப்பா.." என்றாள். அடுத்த முறை போகும் போதே தூரத்தில் இருந்து பார்த்தான்.கடை திறந்திருந்தது.முன்புறம் யாரும் இல்லை.சரி திரும்பி வரும்போது பார்த்துக்கொள்ளலாம் என நினைத்துக்கொண்டே சென்றான்.மருந்து செலுத்தி முடிந்ததும் ,கொஞ்ச நேர ஓய்வுக்குப்பிறகு வெளியே வந்ததும் , அம்மாவை ஓரிடத்தில் உட்கார வைத்துவிட்டு , அந்த விக் விற்கும் இடத்துக்கு சென்றான்... .."மேடம்..மேடம்.." என்ற முகுந்தனின் குரலுக்கு .."எஸ்….." என்ற பதில் குரலோடு வந்து நின்ற அவளைப் பார்த்ததும் … அதிர்ச்சி. . மொட்டை அடித்து லேசாக வளர்ந்திருந்த தலையுடன் நின்றிருந்த அந்தப் பெண் ஷோபனாதான். எந்த முடிப் பிரச்சினையால் அவனைப் பிரிந்தாளோ.. அதையே பிறர் நலம் பேணும் சேவையாக மாற்றிக்கொண்டு நின்ற தன் மனைவியையே பார்த்துக்கொண்டு நின்றான் முகுந்தன். கொஞ்சம் கொஞ்சமாக கண்ணில் நீர் சேர ஆரம்பித்தது. அத்தனை நாட்களாக வீம்பு பிடித்து நின்ற மனம் கரைந்து மிதக்க நின்றவனைப் பார்த்து , "என்ன வேணும்ங்க.."என்றாள் அறியாதவனைப் பார்த்துக் கேட்பது போல்.. கேட்டவளையே உதடு துடிக்கப் பார்த்தவன்… கண்ணில் வழிந்த நீரைத் துடைத்துக்கொண்டே கம்மிய குரலில் சொன்னான். .."உன் மன்னிப்பு.." -விஜி முருகநாதன்

அம்மாவின் கூந்தல்

Related Stories