அபூர்வ சந்திப்பு: ’’உமா பாதின்னு கையெழுத்துப் போட்டுட்டேன்!’’.... தவறுக்கு வருந்திய ஜி.உமாபதி

ஒரு ரீவைண்ட் கொண்டாட்டம்: திரு ஜி. உமாபதி - திருமதி எஸ். வரலட்சுமிஆனந்த் தியேட்டர் உரிமையாளர் திரு. ஜி. உமாபதியும் சினிமா நட்சத்திரம் திருமதி எஸ்.வரலட்சுமியும் சந்திக்கிறார்கள் …சென்ற இதழ் தொடர்ச்சி….உமாபதி: நான் வேலை செஞ்ச ஸ்கூல் பிரஸ்லியே மானிடர் போஸ்ட் வந்தது. அப்ளை செய்தேன்.வரலட்சுமி: கிடைச்சுதா?உ: அப்ளிகேஷன்லே கையெழுத்துப் போடறப்போ, உமாபதிங்கறதுக்கு உமா பாதின்னு கையெழுத்துப் போட்டு அனுப்பிச்சிருக்கேன். சீதாபதி நாயுடு என்கிறவரு அப்போ ஹெட்மாஸ்டர். போடா போ. உமாபதிக்கு உமா பாதி என்று கையெழுத்துப் போடறே, உனக்கு அந்தப் போஸ்ட் கொடுக்க முடியாதுன்னு சொல்லிட்டாரு.வ: அதுக்காக இன்னிக்கு வருத்தப்பட வேண்டாண்ணே. அன்னிக்கு நீங்க தப்பா கையெழுத்துப் போட்டதனாலேதான் இன்னிக்கு உங்க தலையெழுத்து சரியா அமைஞ்சுது!உ: (சிரித்துக்கொண்டே) அந்த வேலை அன்னிக்குக் கிடைச்சிருந்தா இன்னி வரைக்கும் அதை விட்டிருப்பேனா? நூற்றுத்தொண்ணூறு இருநூறு ரூபாய் சம்பளம் வந்திட்டிருக்கும் இல்லே?வ: அந்த வேலை கிடைக்கலே, அப்புறம்?உ: ஒரு ரோசம். அன்னிலேந்து ஒரு வாரத்துக்குள்ளாற ராம நாமம் எழுதுவாங்களே அதுபோல என் கையெழுத்தை ஆயிரம் ஆயிரம் வாட்டி எழுதிப் பழகினேன். ஸ்கூல் பிள்ளைங்க எல்லாம் என்னைப் பதி பதின்னுதான் கூப்பிடுவாங்க. அதனாலே ஜி.யு. பதிங்கிற பேரிலே நானே ஓர் அட்டைப்பெட்டி கம்பெனியை ஆரம்பிச்சேன்..வ: அதற்குப் பிறகுதான் உங்களுக்குக் கல்யாணம் இல்லே?உ: கம்பெனி வியாபாரம் பிடிச்சிட்டது. அப்புறம் கல்யாணம் ஆச்சு. எங்கிட்ட இருந்த பணம், மனைவி கொண்டுவந்த சொத்து எல்லாவற்றையும் போட்டு, உமா பிரின்டிங் ப்ரஸ் என்று ஒன்று ஆரம்பித்தேன்.வ: நீங்க ஒரு பத்திரிகைகூட நடத்தினீங்க, இல்லே?உ: ‘உமா’ங்கற பேரிலே ஒரு பத்திரிகையும் நடத்தினேன். அது பத்துப் பன்னிரண்டு வருஷங்கள் வெளிவந்தது. ஆனந்த் தியேட்டர் கட்டின பிறகு மற்ற வேலைகளின் தொந்தரவு காரணமாக அதை நிறுத்திவிட்டேன். உமா பத்திரிகையிலே அட்டைப்படமாக வந்த பொருள்பொதிந்த படங்களெல்லாம், ஆர்டிஸ்ட் கே. மாதவன் வரைந்தது. ஆனந்திலே, மாடியிலே, டிரெஸ் சர்க்கிளிலே மாட்டியிருக்கேன். இப்போகூட அங்கே பார்க்கலாம்.வ: உங்களுக்கு இரண்டு சம்சாரம் இல்லே?உ: இரண்டு பேரும் அக்கா தங்கச்சிதானே? இன்னிவரைக்கும் எங்களுக்குள்ளே ஒரு சின்னத் தகராறுகூட வந்தது இல்லே?வ: உங்களுக்கு எத்தனை பசங்க?உ: மூணு பொண்ணு, மூணு பிள்ளை. நான் படிக்கலையே தவிர, என் பிள்ளைகளை நன்றாகப் படிக்கவச்சேன். பிள்ளைங்க எல்லாத்துக்கும் கல்யாணம் ஆயிட்டுது. பேரன் பேத்திகூட எடுத்துட்டேன்.வ: நீங்க அரசியலில் எப்படி ஈடுபாடு கொண்டீங்க?உ: எப்போதும் உணர்ச்சிகளினுடைய கொந்தளிப்புதானம்மா என் உள்ளம்! சென்னைக்கு சுபாஷ் சந்திரபோஸ் வந்தபோது சீனிவாச அய்யங்கார் வீட்டுக்குப் போய், போஸ் காலடியிலேயே உட்கார்ந்திருந்தேன். 42’ல் க்விட் இந்தியா மூவ்மென்ட்டிலே சிறைக்குப் போய் இருக்கேன். அரசியல்லே கடவுளுக்கு அடுத்தபடி எனக்குக் காமராஜ்தான்.வ: அப்படீங்களா?உ: என் கல்யாணத்தை நடத்தி வச்சவரே காமராஜ்தான். என் மக்கள் கல்யாணங்களை எல்லாம் நடத்திவச்சவரும் காமராஜ்தான்.வ: அவரோட அவ்வளவு பழக்கமா?உ: கொஞ்ச நாள் பழக்கமா? 30 வருடங்கள் இல்லை! பிரஸ், சாந்தி தியேட்டர், ஆனந்த், லிட்டில் ஆனந்த் இதுக்கு அஸ்திவாரம் போட்டது திறந்து வைத்தது எல்லாமே அவருதான்! வீட்டிலே கற்பூரம்கூட அவருக்குத் தெரியாமல் கொளுத்தினது இல்லை. ஆனா ஒண்ணு, இதுவரை நான் அவரிடம் எந்த உதவியும் கேட்டது கிடையாது..வ: உங்களுக்கு இவங்களையும் தெரியும் இல்லையா?உ: நன்றாகத் தெரியும். அண்ணாகிட்டேயும் சரி, கலைஞர்கிட்டேயும் சரி- எனக்கு மதிப்பு உண்டு.வ: இவங்க ஆட்சி எப்படீங்க?உ: எதிர்க்கட்சியைச் சேர்ந்தவன்னு நான் குறை சொல்லலாம். இவங்க ஆட்சியிலே உள்ள குறைகளைப் பற்றி நான் இங்கே பேசுவது சரியில்லை. ஆனா இவங்க போட்டிருக்கிற குடிசைமாற்று வாரியம், பிச்சைக்காரர் மறுவாழ்வு திட்டம், கண் சிகிச்சை திட்டம் எல்லாம் இருக்கு பாரு- நம்ம ஜனங்க உண்மையிலேயே கஷ்டப்படறப்போ நாம என்னதான் மாளிகையிலே, பண வசதியோடு இருந்தாலும் மனசிலே நிம்மதி இருக்குமா? இந்த ஏழை ஜனங்கள் எல்லாம் வாழ வேண்டுமென்று இவங்க போடுகிற திட்டம் எல்லாமே எனக்கு ரொம்பப் பிடிச்சிருக்கு. கூவம் சீரமைப்புன்னு சொல்லி, அதிலே லட்சக்கணக்காகப் பணத்தை வேஸ்ட் பண்றதைப் பார்த்தால் ரொம்பக் கஷ்டமா இருக்கு..வ: ஏ.பி.என். அண்ணன் கூடச் சொல்வாரு- அவங்களோடே நீங்க சிறையில் இருந்தப்போகூட ஒரு நாழி சும்மா இருக்கமாட்டீங்களாமே?உ: தமிழ்நாட்டு எல்லைப் போராட்டத்தின்போது ம.பொ.சி., கா.மு. ஷெரீப், ஏ.பி.என்., நான் எல்லாரும் ஒன்றாகச் சிறையில் இருந்தோம். அது சரி, நீ முதல்லே சினிமாவிலே எப்படி வந்தே?வ:7வது வயசிலேயே வந்துட்டேன். முதன் முதலிலே நான் நடிச்சது பாலயோகினி என்கிற தெலுங்குப் படம்தான்.உ: அதை எடுத்தது?வ: ராமபிரும்மம் என்கிறவர் எடுத்தார். அந்தப் படத்திற்கு நிறையக் குழந்தைகள் நடிக்க வேண்டியதாக இருந்தது. அதற்காக அழகான ஆண், பெண் பசங்க எங்கே இருக்குன்னு பார்த்துக்கிட்டே எங்க ஊர்ப் பக்கம் வந்தபோது, ஊர்க்காரங்க அவரிடம் என்னைப் பற்றி சொல்லி இருக்காங்க. உடனே என் வீட்டுக்கு வந்துட்டார். பெரியப்பாதான், அதெல்லாம் என் மச்சினி பெண்ணைச் சினிமாவில் நடிக்க நான் அனுமதிக்க மாட்டேன். என் பிள்ளே கூட இல்லே, அவங்க அப்பா ரொம்பக் கோவக்காரரு’ என்று சொல்லி அனுப்பிவிட்டார். என்னைப் பார்த்த பிறகு ராமபிரும்மத்துக்கு என்னமோ என்னை விட இஷ்டமே இல்லை. பின்னாலே 2 மாதம் கழித்து திரும்ப வந்து வற்புறுத்தினார். ‘குழந்தைதானே, நடிச்சால் என்ன?’ என்று பெரியம்மா சொன்னவுடன்தான் பெரியப்பா இணங்கினார். நாங்க சென்னை வந்துவிட்டோம்..உ: பாலயோகினி படத்தைத் தொடர்ந்து வேறு பல படங்களில் நடித்தாய் இல்லையா?வ: கே. சுப்பிரமணியம் எடுத்த சேவாசதனில் நடித்தேன். பிரேம்சாகர் என்கிற இந்திப் படம் ஒன்றிலே நடித்தேன். குழந்தைப் பருவம் தாண்டியவுடன்தான் குழந்தையாகவும் நடிக்க முடியல்லே, ஹீரோயின் ரோலும் நடிக்கிற நிலை இல்லை என்கிறபோதுதான் சில வருஷங்கள் சும்மா இருந்தேன். எதிர்பாராதது என்கிற உங்கள் படம் ரொம்ப சக்சஸ்புல்லாயிற்றே. அதை அடுத்து வேறு படம் எதுவும் எடுக்காமல் அந்தத் துறையைவிட்டு ஏன் விலகினீங்க?உ: மற்றவங்களைச் சின்னவங்களா நான் நினைக்கமாட்டேன். ஆனால், நான் என்கிற செருக்கு எனக்கு என்னைக்குமே உண்டு. எங்காவது ஃபங்ஷனுக்குப் போனால்கூட எனக்கு ஃப்ரன்ட் சீட் கொடுக்கவில்லை என்றால் ஏதாவது காரணம் சொல்லிவிட்டு எழுந்து வந்துவிடுவேன். இரண்டாந்தரமா இருக்கிற காம்ப்ளெக்ஸ் எனக்குக் கிடையாது. மற்ற தொழில்களிலே பணம் போட்டுத் தொழில் நடத்துகிற முதலாளிக்கு மதிப்பு இருக்கு- சினிமாத் தொழிலிலே அது இல்லை. அதனாலே அந்த ஃபீல்டை விட்டே அப்போ வந்துட்டேன்.வ: நீங்க ரொம்ப ஃப்ராங்க்கா பேசுறீங்க அண்ணே.உ: அது என் சுபாவம் தங்கச்சி. இனி மாத்திக்க முடியுமா? நடுவிலே படத்திலே நடிக்காது இருந்தப்போ நீ என்ன செஞ்சே?வ: அப்போவும் நான் சும்மா இல்லே. ரேடியோவிலே பாடுவேன்.உ: அட, அது எனக்குத் தெரியாதே.வ: ரொம்பப் பேருக்குத் தெரியாது. ஒருநாள் நான் ரேடியோவிலே பாடினேன். என் பாட்டைக் கேட்டு ராமப்பிரம்மம் ரேடியோ ஸ்டேஷன்லே என் வீட்டு விலாசத்தை அறிஞ்சுக்கிட்டு வாஷர்மென்பெட் வந்துவிட்டார்.உ: உன்னோட கூடப் பிறந்தவங்க எத்தனை பேரு?வ: இரண்டு சகோதரிங்க. மூன்று சகோதரர்கள். ரொம்ப நாள் கழிச்சு ராமபிரம்மத்தை மறுபடியும் பார்த்தபோது எங்களுக்கு எல்லாம் சந்தோஷம். அவருதான் மாயலோகா என்கிற படம் எடுப்பதாகவும், அதிலே நான் ஹீரோயினாக நடிக்கவேண்டும் என்று சொன்னவுடனே எனக்குக் குளிர் ஜுரம் வந்துவிட்டது. நடிக்கமாட்டேன்னு சொல்லிட்டு உறவுக்காரங்க வீட்டிலே போய் ஒளிந்துகொண்டேன். அவர் என்னை விடவில்லை. பிடிச்சு இழுத்தாந்து நடிக்க வச்சார். நான் குழந்தையா இருந்தப்போவும் அவர்தான் நடிக்க வச்சார், முதன் முதலில் என்னை ஹீரோயினாகவும் அவர்தான் நடிக்க வச்சார். (நன்றி உணர்வோடு கையைக் கூப்பித் தொழுகிறார்.)- தொடரும்…படங்கள்: ஞானம்

அபூர்வ சந்திப்பு: ’’உமா பாதின்னு கையெழுத்துப் போட்டுட்டேன்!’’.... தவறுக்கு வருந்திய ஜி.உமாபதி

Related Stories