‘Oppenheimer ‘ நீ பற்ற வாய்த்த நெருப்பொன்று ...

இயக்குநர் கிறிஸ்டோபர் நோலனுக்கு உலகமெங்கிலும் தீவிரமான ரசிகர்கள் உண்டு. வித்தியாசமான திரைக்கதைகளை உருவாக்கி பார்வையாளர்களின் மூளையைச் சீண்டும் வகையில் படமாக்கும் அவரது பாணியை கொண்டாடுபவர்கள் பலர். நோலனின் இயக்கத்தில் சமீபத்தில் வெளியான திரைப்படம் ஓப்பென்ஹைமர். ‘அணுகுண்டின் தந்தை’ என்று புகழப்பட்ட ஒரு விஞ்ஞானியின் வாழ்க்கை வரலாற்றுத் திரைப்படம். ‘இதுதான் நோலனின் மாஸ்டர் பீஸ் திரைப்படம்’ என்று சில விமர்சகர்கள் புகழ்ந்து தள்ளும் அதே சமயத்தில் ‘வளவளன்னு ஒரே வசனமா பேசித் தள்றாங்கப்பா’ என்று பல ரசிகர்கள் அங்கலாய்த்துக் கொள்கிறார்கள்.கனவுக்குள் கனவு, கருந்துளைப் பயணம் என்று பொதுவாக நோலனின் திரைப்படங்கள் சிக்கலான திரைக்கதையைக் கொண்டிருக்கும். ஆனால் ஓப்பென்ஹைமரில் மூளையைப் பிறாண்டும் அவ்வாறான மாய்மாலங்கள் பெரிதுமில்லை. வெவ்வேறு காலக்கட்டங்களில் நிகழும் சம்பவங்கள் மற்றும் விசாரணைகளைக் கொண்ட காட்சிகள் சட்சட்டென்று மாறும் வகையில் நான்லீனியராக உருவாக்கப்பட்டிருந்தாலும் ஒரு குழப்பமுமில்லை. அதுதான் நோலனின் மேஜிக். இத்தகைய உருவாக்கம்தான் அவரது இயக்கத்திற்கு தனியான வசீகரத்தைத் தருகிறது..ராபர்ட் ஓப்பென்ஹைமர் அமெரிக்க இயற்பியலாளர். பிறப்பால் யூதர். கம்யூனிச கொள்கைகளின் மீது சிறிது ஆர்வமுண்டு. வேதியியல், இயற்பியல் போன்ற துறைகளில் பட்டப்படிப்பை சிறப்பாக முடிக்கும் ஓப்பென்ஹைமர், குவாண்டம் மெக்கானிக்ஸ், நியூக்ளியர் பிஸிக்ஸ் போன்ற ஏரியாக்களில் கில்லியாக விளங்குகிறார். இவரது ஆய்வுக் கட்டுரைகள் உலகமெங்கும் உள்ள விஞ்ஞானிகளால் பிரமிப்புடன் பார்க்கப்படுகின்றன.இரண்டாம் உலகப்போர் நடந்து கொண்டிருந்த காலக்கட்டம். ஹிட்லர் தலைமையிலான நாஜிப்படை மிக மிக மூர்க்கமான வெற்றிகளை அடைந்து உலக நாடுகளை கதிகலங்க வைத்துக் கொண்டிருந்தது. அணுகுண்டு சோதனையை முதலில் யார் நிகழ்த்துவது என்கிற போட்டி முன்னணி நாடுகளிடையே அப்போது இருந்தது. ஜெர்மனி இந்த விஷயத்தை முதலில் சாதித்து விடும் என்று பலரும் கருதினார்கள். அதற்குள் தாம் முந்திக் கொள்ள வேண்டும் என்று அமெரிக்கா ஆவேசமாக ஆசைப்பட்டது. அணுகுண்டு சோதனையை நடத்துவதற்காக பெரிய பட்ஜெட் திட்டமிடப்பட்டது. ‘மான்ஹாட்டன் திட்டம்’ என்கிற பெயரில் உலகத்திற்கு தெரியாமல் மிக மிக ரகசியமாக இயங்கத் துவங்கியது.நியூமெக்சிகோ அருகில் இதற்காக ஒரு நகரமே உருவாக்கப்பட்டு, அதன் ஆய்வகத்திற்கு ஓப்பென்ஹைமர் இயக்குநராக நியமிக்கப்படுகிறார். பல்வேறு துறைகளைச் சேர்ந்த விஞ்ஞானிகள், ராணுவத்தின் கண்காணிப்பில் கடுமையாக உழைக்கிறார்கள். அதுவரை தியரிட்டிக்கலாக மட்டுமே தனது ஆய்வுகளை உருவாக்கிக் கொண்டிருந்த ஓப்பென்ஹைமருக்கு நிஜத்தில் பரிசோதனை செய்து பார்த்து விடும் ஒரு வாய்ப்பு. ஏறத்தாழ மூன்று ஆண்டுகள் கடுமையாக உழைக்கிற இந்த அணி, ஒரு வழியாக தனது பரிசோதனையை (டிரிட்டினி டெஸ்ட்) வெற்றிகரமாக நிறைவேற்றுகிறது. இதன் மூலம் அணுகுண்டு சோதனையை முதன் முதலில் நிகழ்த்திய பெருமையை அமெரிக்கா ஈட்டுகிறது. ஓப்பென்ஹைமருக்கு புகழும் பாராட்டும் குவிகிறது..இதற்கிடையில் நாஜிகளின் வீழ்ச்சி ஆரம்பித்து ஹிட்லர் தற்கொலை செய்து கொள்வதால் இரண்டாம் உலகப் போர் முடிவிற்கு வரும் நிலை ஏற்படுகிறது. என்றாலும் தயாரித்து வைத்திருக்கும் குண்டுகளை பரிசோதித்துப் பார்க்க அமெரிக்காவிற்கு கை பரபரக்கிறது. ரஷ்யாவுடன் பனிப்போர் ஆரம்பித்த காலக்கட்டம் என்பதால் தனது பலத்தை உலகத்திற்கு நிரூபிக்க வேண்டிய அவசியம் வேறு. எனவே அந்தச் சூழலில் தனக்கு மிகவும் அச்சுறுத்தலாக இருந்த ஜப்பானின் மீது அணுகுண்டுகளை வீசுகிறது. உலகின் கொடுமையான பேரழிவுகளில் ஒன்றாக இன்றளவும் கருதப்படும் ஹிரோஷிமா மற்றும் நாகசாகி நகரங்கள் பூண்டோடு அழிகின்றன. ஏராளமான மக்கள் கொல்லப்படுகிறார்கள். அணுகுண்டின் வீச்சினால் பல்வேறு வகைகளில் பாதிக்கப்படுகிறார்கள்.இந்தச் சம்பவம் ஓப்பென்ஹைமரின் மனதை மிகவும் பாதிக்கிறது. எனவே பயங்கர ஆயுதங்களுக்கு எதிரான பிரச்சாரத்தை மேற்கொள்கிறார். இது அமெரிக்காவை எரிச்சலூட்டுகிறது. பழைய சமாச்சாரங்களை தோண்டியெடுத்து ‘கம்யூனிச ஆதரவாளர், சோவியத் உளவாளி’ என்பது போன்ற புகார்களை முன்வைத்து ரகசிய விசாரணையை மேற்கொள்கிறது. ஓப்பென்ஹைமரின் முதுகிற்குப் பின்னால் கத்திக்குத்து துரோகங்களும் நிகழ்கின்றன. விசாரணையின் இறுதியில் ஓப்பென்ஹைமர் குற்றமற்றவர் என்று நிரூபணமாகி அமெரிக்க அதிபரின் கையால் விருது வாங்குவதோடு படம் நிறைகிறது..ஓப்பென்ஹைமராக கில்லியன் மர்பி அற்புதமாக நடித்துள்ளார். வாழ்நாளுக்கான நடிப்பு எனலாம். அணு வெடிப்பு குறித்தான சித்திரங்கள் அவருடைய கற்பனையில் ஓடிக் கொண்டேயிருப்பது, தன்னுடைய பரிசோதனையின் விளைவு என்ன மாதிரியாக இருக்கும் என்பது தெரியாத பதட்டம், தன்னுடைய அறிவு அழிவிற்கு காரணமாக அமைந்து விடுவது குறித்தான மனஉளைச்சல், தனிப்பட்ட வாழ்க்கையின் பிரச்சினைகள் போன்ற உணர்வுகளை படம் முழுவதும் துல்லியமாக வெளிப்படுத்தியுள்ளார். ஓர் உதாரணக் காட்சியைச் சொல்லலாம். அணுகுண்டு பரிசோதனை வெற்றியடைந்ததை அமெரிக்காவே கொண்டாடுகிறது. அதற்காக நிகழும் பாராட்டுக் கூட்டத்தில் கலந்து கொள்ளும் ஓப்பென்ஹைமருக்கு பாதிப்படைந்தவர்களின் உருவங்கள் மட்டுமே அகச்சித்திரமாக தெரிந்து வேதனையூட்டுகிறது.பரிசோதனை நடக்கும் நாளன்று நிகழும் சம்பவங்களின் பரபரப்பையும் திகிலையும் நமக்குள் அப்படியே கடத்தியிருக்கிறார்கள். ஓப்பென்ஹைமரை தேசத் துரோகியாக சித்தரிப்பதில் மறைமுகமாகச் செயல்படும் ராபர்ட் டவுனி ஜூனியரின் நடிப்பு அட்டகாசம். லுட்விக் கர்ரான்சனின் மிரட்டலான பின்னணி இசை, சூழலின் பதட்டத்தை நமக்குள் கொண்டு வந்து சேர்க்கிறது. ஏராளமான நட்சத்திரப் பட்டாளங்கள் உள்ள இந்தப் படத்தில் ஒவ்வொருவருமே தங்களின் சிறப்பான பங்களிப்பைத் தந்திருக்கிறார்கள்.விஞ்ஞானிகள் ஏறத்தாழ கடவுளுக்கு அருகில் இருப்பவர்கள். இயற்கையின் சில அரிய ரகசியங்களை அவர்களால் நெருங்கிச் சென்று பார்க்க முடியும். பல விஷயங்களில் ஆக்கப்பூர்வமாக செயல்படும் விஞ்ஞானம், சில விஷயங்களில் அழிவிற்குக் காரணமாகி விடுவது துரதிர்ஷ்டமானது. வரலாற்றின் பக்கங்களில் அழிக்கவே முடியாத ரத்தக்கறையை தன்னுடைய கண்டுபிடிப்பு ஏற்படுத்திய காரணத்தால் மனஉளைச்சலுக்கு ஆளாகும் ஒரு அறிவுஜீவியின் சுயவாக்குமூலம்தான் இந்தத் திரைப்படம் எனலாம். இந்த ஆதாரமான செய்தியை தன்னுடைய அபாரமான திரைமொழியால் சாத்தியப்படுத்தியுள்ளார், கிறிஸ்டோபர் நோலன்.- சுரேஷ் கண்ணன்