ஒருபக்கக் கதை: தடயம்

இன்ஸ்பெக்டர் சஞ்சய் செய்வதறியாது திகைத்து நின்றார். கொள்ளையடிக்கப்பட்ட வீட்டைச் சுற்றிலும் மிளகாய்ப்பொடி தூவப்பட்டிருந்தது. இந்த வாரத்திலேயே இது நான்காவது கொள்ளை. மோப்ப நாய்கள் கண்டுபிடிக்க முடியாதபடி… எல்லா இடங்களிலும் ஒரே மாதிரி மிளகாய்ப்பொடி தூவப்பட்டிருந்தது. வீட்டைச் சுற்றிவந்த சஞ்சய் அந்த வீட்டுக்காரரிடம் "இங்கே சிசிடிவி கேமரா இல்லையா?" என்று கேட்டார். " இல்லை சார்… இனிமேதான் வைக்கணும்" என்றார் பரிதாபமாக. "இனிமே வெச்சி என்ன சார் பிரயோஜனம்? " என்று சலித்துக்கொண்டார் இன்ஸ்பெக்டர். ’சிசிடிவி இல்லாத வீடுகளாகத் தேர்ந்தெடுத்துத் திருடுகிறார்கள்…’. என்று எண்ணியவாறு நோட்டம் விட்டுக்கொண்டே வந்தவர், கீழே அதைப் பார்த்ததும் சட்டென எடுத்து பாக்கெட்டில் போட்டுக்கொண்டார். ஒரே வாரத்தில் திருடர்கள் பிடிபட்டனர். திருடர்களை எப்படி பிடித்தோம் என்று மேலதிகாரிகளிடம் விளக்கினார் இன்ஸ்பெக்டர் சஞ்சய்... " கத்திரிக்கப்பட்ட மிளகாய்ப்பொடி பாக்கெட்டின் நுனிதான் அந்த இடத்தில் எனக்குக் கிடைத்த தடயம், அதை வைத்து முதலில் அது ஒரு கிலோ பாக்கெட் என்று கண்டுபிடித்தேன். அவை சிறிய கடைகளில் கிடைக்காது. பெரிய பாக்கெட்டை ஓட்டல்களுக்குத்தான் வாங்குவார்கள். அப்படி ஓட்டல் இல்லாமல் வேறு யார் யார் வாங்குகிறார்கள் என்று பெரிய கடைகளில் போலீஸாரை கண்காணிக்க வைத்ததில், அடுத்த திருட்டுக்காக வந்து வாங்கியவர்கள் மாட்டினார்கள் " என்றார் பெருமையாக!- திருப்பூர் சாரதி

ஒருபக்கக் கதை: தடயம்

Related Stories