ஒருபக்கக் கதை: வீட்டுச் சாப்பாடு!

" இன்னைக்கு என் பொண்ணோட பர்த்டே. அதுக்காக சின்னதா ஒரு ட்ரீட். மத்யானம் லஞ்சுக்கு எங்க வீட்டுக்கு வந்துடுங்க… சார்!" என்று பிரபாகர் சொன்ன வார்த்தை, மேனேஜர் ராம்குமாரின் காதில் இன்பத் தேனாய் வந்து பாய்ந்தது. உடனே சம்மதித்துவிட்டார். வீட்டுச் சாப்பாடு சாப்பிட்டு, எத்தனை நாட்களாகிறது?! இந்த ஆபிஸுக்கு ராம்குமார் மாற்றலாகி வந்து மூன்று மாதங்கள் ஆகிறது. மனைவி அரசு வேலையில் சொந்த ஊரில் இருக்க, இவர் மட்டும் இங்கே அறை எடுத்துத் தங்கியிருக்கிறார். ஆபீஸுக்குப் பக்கத்தில் இருக்கும் ரங்கா விலாஸ் ஹோட்டலில்தான் மூன்று வேளையும் அவருக்கு சாப்பாடு. நல்ல ஓட்டல்தான். ஆனாலும் எப்போதும் மாறாத ஒரே சுவை. ஒரே ஐட்டங்கள்! செத்துப்போய்க் கிடந்த நாக்குக்கு பிரபாகர் வழியாக இன்று இப்படி ஒரு விருந்து! மதியம் பிரபாகர் வீட்டில் கூட்டம் அதிகமில்லை. மீறிப்போனால் பத்து பேர் இருப்பார்கள். கொண்டுபோன கிஃப்ட் பார்சலை குழந்தைக்குக் கொடுத்துவிட்டு, சாப்பிட அமர்ந்தார் ராம்குமார். வயிறும் நாக்கும் ஏகப்பட்ட எதிர்பார்ப்புடன் பரபரத்தது! தலைவாழை இலை விரிக்கப்பட்டு, ஒவ்வொரு அயிட்டமாகப் பரிமாறப்பட... அதனைப்பார்த்த ராம்குமார் முகம் சற்று குழப்பத்துடன் மாறியது. பிரபாகரை அழைத்து "எல்லாம் உங்க ஒய்ஃப் செஞ்சதா? " என்றார். " இல்ல சார், அவளுக்கு சரியா சமைக்க வராது. இத்தனை பேரை அழைச்சு நல்லபடியா சாப்பாடு போடலேனா எப்படி... அதான் ஓட்டல் ரங்கா விலாஸ்ல லஞ்ச் ஆர்டர் பண்ணிட்டோம் " என்றார் பிரபாகர், பெருமையாக! ராம்குமாருக்குப் பசி மறந்துபோனது!- திருப்பூர் சாரதி

ஒருபக்கக் கதை: வீட்டுச் சாப்பாடு!

Related Stories