ஓட்டுக்கு நோட்டு: ஈரோடு ஃபார்முலாவை மிஞ்சிய தயாரிப்பாளர் சங்கத் தேர்தல்!

சமீபத்தில் நடந்து முடிந்த ஈரோடு இடைத்தேர்தலில் பிரபல கட்சி ஒன்றின் ’ஓட்டுக்கு நோட்டு’ பட்ஜெட் 500 கோடி ரூபாய்! இதில் அதிர்ச்சியடைய ஒன்றும் இல்லைதான்… ஆனால், பெரும் ஆரவாரங்கள் ஏதுமின்றி, கடந்த ஏப்ரம் 30ம் தேதி அன்று நடந்து முடிந்த தமிழ்த் திரைப்பட தயாரிப்பாளர்கள் சங்கத் தேர்தலில் ‘ஓட்டுக்கு நோட்டு’ பட்ஜெட் 150 கோடி ரூபாய்க்கும் அதிகம் என்றால் அதிர்ச்சியாகதானே இருக்கும்! அதே அதிர்ச்சியுடன் இதுகுறித்து விசாரித்தோம்...சிறு முதலீட்டுப்படங்களுக்கு பெரும் மானியம், அரசு வீட்டு வசதி போன்று, நலிந்துபோன அத்தனை தயாரிப்பாளர்களுக்கும் அரசாங்க உதவி, நட்சத்திரக் கலைவிழா நடத்தி அத்தனை பேரையும் நட்சத்திரத் தயாரிப்பாளர்களாக்குவது, படம் தயாரிக்க சங்கம் மூலம் நிதி உதவி என்று வாக்குறுதிகள் அள்ளி வீசப்பட்டு, நடந்து முடிந்திருக்கும் இந்த தயாரிப்பாளர் சங்கத் தேர்தலில் ‘நலம் காக்கும் அணி’ என்கிற பெயரில் போட்டியிட்ட தேனாண்டாள் முரளி ராமசாமியின் அணியினர் அனைத்து பொறுப்புகளையும் வென்றிருக்கிறார்கள்.’அடடே நலம் காக்கும் அணி பதவிக்கு வந்துவிட்டதே...இனி தயாரிப்பாளர்கள் வாழ்வில் பாலும் தேனும் ஓடப்போகிறது’ என்று நினைப்பீர்களேயானால் பாவம் நீங்கள் ஒரு அப்பாவி.ஏற்கனவே இருக்கிற அத்தனை குளறுபடிகளுடன், ஓயாத சண்டை சச்சரவுகளுடன், எல்லாப் பிரச்சினைகளுக்கும் கட்டப்பஞ்சாயத்துகள் மூலமே தீர்வு காணப்படும் பரிதாபத்துக்குரிய அதே சங்கம்தான் இனியும் தொடரும் என்பதில் கொஞ்சமும் சந்தேகம் கொள்ளவேண்டியதில்லை.இந்த தேர்தலில் கொடுக்கப்பட்ட தேன் சொட்டும் வாக்குறுதிகள் காலகாலமாகக் கொடுக்கப்படுவதுதான். ரொம்ப தூரம் போவானேன். இம்முறை தலைவர் பதவியை வென்றிருக்கிறாரே இந்த தேனாண்டாள் முரளியே ஏற்கனவே தலைவர் பதவி வகித்தவர்தான். இவரது அணியில் மற்ற பொறுப்புகளில் வென்ற ஃபைவ் ஸ்டார் கதிரேசன், ராதாகிருஷ்ணன், சந்திரபிரகாஷ் ஜெயின் போன்றவர்களும் கடந்த காலங்களில் பல்வேறு பதவிகள் வகுத்து கட்டப்பஞ்சாயத்துகளில் குளிர் காய்ந்தவர்கள்தான்..இன்னும் சொல்லப்போனால் வரும் காலங்களில் கட்டப்பஞ்சாயத்துகள் மேலும் அதிகரிக்கும். ஏனென்றால் இம்முறை இன்வெஸ்ட் பண்ணப்பட்டிருக்கிற தொகை ரொம்பப் பெருசு. போட்டதை இரட்டிப்பாக எடுக்கவேண்டும் என்பதுதானே இன்வெஸ்ட்மெண்ட் தர்மம்?1500 உறுப்பினர்களைக் கொண்ட தயாரிப்பாளர் சங்கத் தேர்தலில் இம்முறை வாக்களித்தவர்கள் 1111பேர். இந்த வாக்காளர்களுக்கு இதற்கு முந்தைய தேர்தல்களில் ரூ 2 முதல் 5 ஆயிரம் வரை, வெள்ளிக் குத்துவிளக்கு, பட்டு வேஷ்டி, பட்டுப்பொடவை, போன்றவை மட்டுமே சம்திங் ஆகக் கொடுக்கப்பட்டு வந்த நிலையில், இம்முறை இரு தரப்பினருமாக சேர்ந்து தலைக்கு சுமார் ஒரு லட்சம் வரை கவனித்ததாக பல சோர்ஸ்கள் கன்ஃபர்ம் செய்கின்றன.அதிலும் முக்கியமாக துணைத்தலைவர்கள் பதவிக்கு நின்ற லைகா நிறுவனத்தின் தமிழ்குமரன், ஏ.ஜி.எஸ். நிறுவனத்தின் வாரிசு அர்ச்சனா கல்பாத்தி ஆகிய இருவரும் வென்றே ஆகவேண்டும் என்று தலைவர் முதல் சகலரும் தலைகீழாக நின்று தண்ணி குடித்திருக்கிறார்கள். காரணம் தேர்தல் செலவுக்கு புழங்கிய பணத்தில் 90 சதவிகிதம் இவர்களுடையது.தேர்தலுக்கு சில வாரங்கள் முன்புவரை தயாரிப்பாளர்சங்கத்தில் மெம்பர்களாகக் கூட இல்லாத இந்த இரு கார்ப்பரேட் கனிம வளங்களும் குறுக்கு வழியில் திடீர் மெம்பர்களாக்கப்பட்டது தனிக் கதை. ’கார்ப்பரேட் நிறுவன ஆசாமிகளை திரைத்துறைக்குள் நுழைய விடக்கூடாது. அவர்கள் உள்ளே வந்தால் தொழில் ரீதியான தயாரிப்பாளர்களை விழுங்கி ஏப்பம் விட்டுவிடுவார்கள்’ என்றொரு முழக்கம் இதே தயாரிப்பாளர் சங்கத்தில் ஒலித்துக்கொண்டிருந்ததும் இன்னொரு மினி கதை.இதுவரை நடந்த திரைத்துறை தேர்தல்களிலிலேயே அதிக தில்லுமுல்லுகள் நடந்த தேர்தல் என்று கோடம்பாக்கம் முழுக்க பரபரத்த நிலையில், முரளி ராமசாமியை எதிர்த்துப்போட்டியிட்ட தயாரிப்பாளர் மன்னனிடம் பேசினோம்.“நீதியரசர்கள் முன்னிலையில் நடத்தப்பட்ட இந்த தேர்தலில் ஒரு நீதியும் நிலைநாட்டப்படவில்லை. முரளி அணியினர் வாக்காளர்களை பணத்தால் குளிப்பாட்டினார்கள் என்று சொன்னால் மிகையில்லை. ஆரம்பம் முதலே தொடர்ந்து நட்சத்திர ஹோட்டல்களில் மீட்டிங் வைத்து பார்ட்டி மேல் பார்ட்டியாக வைத்து கோடிகோடியாகக் கொட்டினார்கள்..தேர்தலுக்கு முன்னரே அனைத்து வாக்காளர்களுக்கும் பெருந்தொகை அட்வான்ஸாகக் கொடுக்கப்பட்ட நிலையில், ஓட்டுப்போட்டுவிட்டு, இன்னாருக்குத்தான் ஓட்டுப்போட்டேன் என்று ஸ்கிரீன் ஷாட் காட்டியவர்களுக்கு மேலும் கணிசமான தொகையை அன்பளித்தார்கள். வாக்களிக்கும் இடத்துக்குள் செல்போன் தடை செய்யப்பட்டிருந்ததை எவருமே பொருட்படுத்தவில்லை என்பது ஒரு கொடுமை.தனக்கு ஆளும்கட்சியின் சப்போர்ட் இருக்கிறது என்று முரளி துவக்கத்திலிருந்தே முதல்வரின் பெயரை மிஸ்யூஸ் செய்தார். இந்த வெற்றி குறுக்கு வழியில் கிடைத்த வெற்றிதான். இந்த சுயநலம் காக்கும் அணியினரின் செயல்களால் இதுவரை நலிந்த தயாரிப்பாளர்களாக இவர்கள் காலத்தில் முற்றிலும் அழிந்த தயாரிப்பாளர்களாகிவிடுவார்கள்” என்றார்.நடிகர் விவேக் ஒரு படத்தில், தனது அள்ளக் கைகளைப் பார்த்து, ‘இதுவரைக்கும் நான் உங்களுக்கு என்ன செஞ்சிருக்கேன்?’ என்று கேட்க அதற்கு அவர்கள் ‘ஒண்ணும் செஞ்சதில்லை’ என்றவுடன் ‘இனியும் அப்படித்தான் எதுவும் செய்யிறதா இல்லை’ என்பார். எக்காலமும் எந்தை பிரச்சினைகளும் தீர்க்கப்படாத தயாரிப்பாளர் சங்க தலையெழுத்தும் அதுதான் போல.முத்துராமலிங்கன் படங்கள் : ம.செந்தில்நாதன்

ஓட்டுக்கு நோட்டு: ஈரோடு ஃபார்முலாவை மிஞ்சிய தயாரிப்பாளர் சங்கத் தேர்தல்!

Related Stories