மர்மத் தொடர்: ராஜ ரகசியம்

-இந்திரா சௌந்தர்ராஜன் 31ரமேஷிடம் உருவான பயம் அவன் முகத்தில் அப்பட்டமாகத் தெரியவும் தொடங்கியது. அதைக் கவனித்த சந்திரசேகரும் பார்வதியும், “என்ன ரமேஷ்... யார் போன்ல? ஏன் உன் முகம் பேதலிக்குது?’’ என்று சரியாகக் கணித்துக் கேட்டனர்.ரமேஷோ அவர்களை ஒருமாதிரி பார்த்தான். போனில் கேட்டதைச் சொல்லலாமா வேண்டாமா என்றும் யோசித்தான்.“சொல்லுடா... எதாவது கெட்ட செய்தியா? உன் பார்வையும் மௌனமும் எங்களையும் கலங்க வைக்குது...’’ பார்வதி நிமிண்டினாள்.“நான் ஆரம்பத்துல இருந்தே இந்த விஷயத்துல உங்களை எச்சரிச்சிக்கிட்டு வரேன்... ஆனா, நீங்க கேக்கல... இப்ப விஷயம் ரொம்பவே விபரீதத்துல போய் நின்னுருக்கு...’’“இப்படி மொட்டையா சொன்னா எப்படிடா... விளக்கமா சொல்லு...’’ரமேஷும் போனில் தான் கேட்டதைச் சொல்லி முடித்தான். சந்திரசேகரும் பார்வதியும் உதற ஆரம்பித்துவிட்டனர். மீனா இடையில் பாத்ரூம் போயிருந்ததால் அவளுக்கு அந்த எச்சரிக்கை செய்தி தெரியவில்லை. அவர்கள் ஏதோ பேசுகிறார்கள் என்று தன் அறைக்குச் சென்று லேப்டாப்பை நோண்டத் தொடங்கிவிட்டாள். சந்திரசேகர் பீதி வழிந்த விழிகளோடு ரமேஷை குடையத் தொடங்கினார்.“ரமேஷ்... இப்ப என்னடா பண்றது?’’“முதல்ல போன் பண்ண அந்த பிரகஸ்பதி யார்னு பாக்கறேன்...’’ என்று தனக்கு வந்த எண்ணிற்குத் தொடர்புகொண்டான்.மறுமுனையில் ‘கொய்ங்ங்’ என்கிற ஒரு சப்தம்தான் கேட்டது.“ஏதோ ஃபேக் நம்பர் போல இருக்கு. இப்பல்லாம் செல்போன்ல நிறைய ட்ரிக்கி மெதட்ஸை யூஸ் பண்ணத் தொடங்கிட்டாங்க. சைபர்கிரைமுக்குப் போய் கம்ப்ளைன்ட் பண்ணி சீரியசா ஃபாலோ பண்ணா போன் பண்ணது யார்னு தெரிய வரலாம். ஆனா அப்படி தெரிய வந்தாலும் பிரயோஜனம் கிடையாது.சிலர் இப்பல்லாம் அடுத்தவங்க போனைப் பயன்படுத்திப் பேசி தங்களை மறைச்சுக்குறாங்க. போன் ஓர் அப்பாவியோடதா இருக்கும்- பேசினவன் கிரிமினலா இருப்பான்.’’.“அதுசரி... நம்பள எதுக்காக வெளியூருக்குப் போகச் சொல்றான். அதுவும் எங்க போறோம்கறது யாருக்கும் தெரியக்கூடாதுன்னுவேற சொல்லியிருக்கான். நம்மை இப்படித் தலைமறைவாகச்சொல்லக் காரணம்?’’“இங்க இருந்தாதான் ஆபத்துன்னுட்டானே?’’“நாம யார் வம்புக்குப் போனோம்? நமக்கு எதுக்கு ஆபத்து வரணும்?’’“அதான் ஓர் ஆர்க்கியாலஜிஸ்ட் அந்தத் தங்கப்புதையலைக் கண்டுபிடிக்க நமக்குள்ள வந்துருக்காரே?’’“அந்த விஷயத்துல ஒரு பிள்ளையார்சுழியைக்கூட இன்னும் போடலை. ஆனா அதுக்குள்ள ஆபத்துன்னா எப்படிடா?’’“நாம போடலப்பா... ஆனா நம்மைவெச்சு யாரோ பெருசா போட்டுருக்காங்க...’’“என்னடா பயமுறுத்தறே... அப்படி போட்றவங்களே இப்படி ஊரைவிட்டு ஓடிப்போயிடுன்னு பயமுறுத்துவாங்களா?’’“இது நல்ல கேள்விப்பா... எல்லாத்துக்கும் விடை போகப்போகத்தான் தெரியும்...’’“சரி, இந்த போன்வரைல நம்ம அடுத்த ஸ்டெப்..?’’“அதான் யோசிக்கறேன்...’’“இதுல யோசிக்க என்னங்க இருக்கு... போலீஸுக்குப் போய் இப்படி ஒரு மிரட்டல் வந்ததுன்னு கம்ப்ளைன்ட் தருவோங்க...’’ பார்வதி பதறினாள்.“நாம இப்படி கம்ப்ளைன்ட் தர முயற்சிப்போம்னு போன் பண்ணினவனும் நினைக்காமலா இருந்திருப்பான்?’’“அதுக்காக..?’’“ரொம்ப ஷார்ப்பா யோசிக்கவேண்டிய விஷயம் இது... நல்லவேளை மீனாட்சி இப்ப பாத்து பாத்ரூம் போய்ட்டு அப்படியே அவ ரூமுக்கும் போயிட்டா. அவளுக்கு இந்த போன் பத்தின விஷயம் தெரியாம இருக்கறதுதான் சரி.’’“ஆமாம்... அதுதான் சரி... நாம இப்ப கவலைப்பட்றது போதும். அவ ஏற்கெனவே குழப்பத்துல இருக்கா... இதுவேற சேரவேண்டாம்.’’“ரமேஷ்... போலீஸுக்குப் போகப்போறோமா இல்லையா அதை முதல்ல சொல்லு...’’“நிச்சயமா போகணும்ப்பா... நாம ஒண்ணும் தெலுங்கு சினிமா ஹீரோ கிடையாது. தனியா போராட இந்த விஷயமும் எதிர்வீட்டுக்காரனோட வந்துருக்கற சண்டை இல்லை. இது ஒரு வினோதமான பிரச்னை. ஒருபக்கம் பூர்வஜன்ம ஞாபகங்கள்- மறுபக்கம் தங்கப்புதையல்- அதைக் குறிவெச்சு வர்ற ஓர் ஆர்க்கியாலஜிஸ்ட் வேற... ஆகையால இந்தப் பிரச்னைல நாம சொந்த சாதுர்யமா நடந்துக்கணும்.’’“சாதுரியமான்னா?’’“போலீஸுக்குப் போகணும். ஆனா போறது தெரியாம போகணும். அதேசமயம் பயந்துபோய் ஊரைவிட்டுப் போறதெல்லாம் கூடாது. இங்கேயே இருந்தாதான் நமக்கு இப்ப போன் பண்ணவனும் திரும்ப போன் பண்ணுவான். இல்ல அவன் சொன்னமாதிரி எதாவது விபரீதமா நடக்கத் தொடங்கலாம். அப்படி எல்லாம் நடந்தாதான் அதை யார் செய்யறாங்கன்னும் நாம கண்டுபிடிக்கமுடியும்...’’“என்னடா ரமேஷ் இது... கத்தி போய் வாலு வந்த கதையால்ல இருக்கு... ஏற்கெனவே பூர்வஜன்ம குழப்பத்துல இருக்கோம். இதுல இப்படி உயிருக்கு ஆபத்து ஊரைவிட்டு ஓடுங்கறதெல்லாம் பிரச்னையை பெருசாக்கிகிட்டேல்லடா போகுது?’’“அம்மா... புலம்பறதாலயோ பயப்பட்றதாலயோ எந்த பிரயோஜனமும் கிடையாது. எப்ப மீனாவுக்கு பூர்வஜன்ம ஞாபகங்கள்னு ஒண்ணு வரத் தொடங்கிடிச்சோ அப்பவே எல்லாம் தொடங்கிடிச்சு.’’“சரி ரமேஷ், போலீஸுக்குப் போறது தெரியாம போகணும்னு சொன்னியே அது எப்படி?’’“இப்பவே அழகியபாண்டியன் சாருக்கு போன் பண்றேன். நம்ப நிலைலதான் கிட்டத்தட்ட அவங்களும் இருக்கணும். அவருக்கு டி.எஸ்.பி. லெவல்ல நல்ல கான்டாக்ட் இருக்கு. ஏற்கெனவே இந்தப் பிரச்னைல ரெஹ்மான்கற போலீஸ்காரர் என்டர் ஆயிட்டாரு. ஆகையால நமக்கு அந்த விஷயத்துல கவலையில்லை...’’- என்ற ரமேஷ் அடுத்த வினாடியே அழகியபாண்டியனை அழைத்தான்.“சொல்லுங்க ரமேஷ்... நானே உங்களுக்கு போன் பண்ணணும்னு இருந்தேன்...’’“அப்ப நீங்களே எதுக்குன்னு சொல்லிடுங்க சார். நான் பிறகு பேசறேன்...’’“உங்களுக்கு எதாவது த்ரெட் கால் வந்ததா?’’“எக்ஸாக்ட்லி...’’“ஊரைவிட்டே ஓடிப்போகச் சொன்னானா?’’“ஹண்ட்ரட் பர்சன்ட்...’’“இங்க சுந்தருக்கும் அதே மிரட்டல்..!’’“இது மிரட்டல் மாதிரி தெரியலியே சார்... நமக்கு ஆபத்து நேரிடக்கூடாதுன்னு எவனோ நினைக்கறான்னு நாம ஏன் நினைக்கக்கூடாது?’’.“யு ஆர் ரைட்! அப்படியும் நினைக்கலாம்.’’“சரி சார்... நீங்க என்ன முடிவெடுத்திருக்கீங்க?’’“நான் உடனேயே என் ஃப்ரெண்ட் ஏ.எஸ்.பி. மணிவண்ணனுக்கு போன் பண்ணி விஷயத்தைச் சொல்லி, போன் நம்பரையும் கொடுத்து ஆளைக் கண்டுபிடிக்கச் சொல்லிட்டேன்.’’“நாம போலீஸுக்குப் போவோம்னு அவனுக்குத் தெரியாதா சார்?’’“நிச்சயம் அவன் வேற யார் போன்ல இருந்துதான் பேசியிருப்பான். குறைந்தபட்சம் அந்த போன் யாருதுன்னாவது தெரியும்தானே?’’“அவன் ஏன் தன்னை மறைச்சுக்கறாங்கறதும் முக்கியம் சார்...’’“மணிவண்ணன் கில்லாடி. எல்லாத்தையும் கண்டுபிடிச்சிடுவாரு. அதுமட்டுமில்ல... நமக்கு செக்யூரிட்டி புரொடக்ஷனையும் அரேன்ஜ் பண்ணிடுவாரு.’’“தேங்க்யூ சார்... இப்ப இப்படி ஒரு நிலைல உங்க அடுத்த மூவ் என்ன சார்?’’“நமக்கு நடுவுல ஓர் ஆர்க்கியாலஜிஸ்ட் உள்ள நுழைஞ்சிருக்கார் இல்லியா?’’“ஆமாம்...’’“அவர் என்ட்ரியாகவும்தான் இப்படி எல்லாம் போனும் வந்திருக்கு. அதனால போன் பண்ணவனுக்கும் அவருக்கும் நிச்சயம் சம்பந்தம் இருக்கணும்...’’“நானும் அப்படித்தான் நினைக்கறேன் சார்...’’“அவர்தான் இந்தத் தங்கப்புதையல் பத்தி யார்கிட்டயாவது உளறி இருக்கணும். அதைக்கேட்டு அவரோட சேர்ந்து நம்மள சிலர் ஃபாலோ பண்ணலாம்னு கெஸ் பண்றேன்.’’“பாசிபிளிட்டி இருக்கு சார்...’’“இந்த விஷயத்துல ஏ.எஸ்.பி. மணிவண்ணன் என்ன சொல்றார்னு பாத்துட்டு அதுக்குப்பிறகு நாம அந்த ஆர்க்கியாலஜிஸ்ட் வரைல எப்படி நடந்துக்கறதுன்னு முடிவுக்கு வருவோம்.’’- அழகியபாண்டியன் ரமேஷிடம் சொல்லிக்கொண்டிருக்கும்போதே அவருக்கு ஒரு மிஸ்டு கால் வரத்தொடங்கிற்று. அது ஏ.எஸ்.பி. மணிண்ணனின் கால்!“மிஸ்டர் ரமேஷ்... மணிவண்ணன்தான் கூப்பிட்றாரு. நான் பேசிட்டு அப்புறமா உங்க லைனுக்கு வரேன்.’’- என்ற அழகியபாண்டியன் ரமேஷ் காலை கட் செய்துவிட்டு மணிவண்ணனுக்கு காது கொடுத்தார்.“அழகு... அந்த நம்பர் யாருதுன்னு தெரிஞ்சிடிச்சு. அது ஒரு பழக்கடைக்காரர் போன். யாரோ ஒருத்தன் அவர்கிட்ட கார்ல வந்து கிட்டத்தட்ட 1000 ரூபாய்க்கு பழம் வாங்கியிருக்கான். அப்படியே தன் செல்போன் ஹேங் ஆயிடிச்சின்னு பொய் சொல்லி, அவர் போனை வாங்கித்தான் உங்ககிட்ட பேசியிருக்கான். கொரோனா மாஸ்க் போட்ருந்துருக்கான். அதனால ஃபேஸ் ரீடிங் அவரால பண்ணமுடியல. பழம் வாங்கிட்டு அவன் தன் கார்ல கிளம்பியும் போயிட்டான். நல்லவேளை சிவப்பு கலர் கான்டசா கார்னு பழக்கடைக்காரர் சொல்லியிருக்காரு. பழம் வாங்கின டைமும் தெரிஞ்சி போச்சு. அந்தக் கடை இருக்கற மெயின் ரோட்ல அனேகமா எல்லா கடைகளிலயுமே ரோட்ட ஃபேஸ் பண்ணி சி.சி. கேமரா இருந்திருக்கு. அதுல ஒரு கேமரா அந்தக் காரோட நம்பரை காட்டிக் கொடுத்து அந்தக் கார் யாருதுன்னும் தெரிஞ்சிடிச்சு!அவர் பேர் ராமச்சந்திரன்! அவர் ஓர் என்.ஆர்.ஐ. இண்டியன். வீட்டு அட்ரஸ் முதல்கொண்டு எல்லாத்தையும் ஆர்.டி.ஓ.கிட்ட இருந்து கலெக்ட் பண்ணிட்டோம்.சப் இன்ஸ்பெக்டர் கல்யாணசுந்தரம் தலைமைல அவரை அரெஸ்ட் பண்ண ஒரு குரூப் புறப்பட்டுப் போயிருக்காங்க. அதிகபட்சம் அரைமணி நேரத்துல ஆள் சிக்கிடுவான். நம்மோட எல்லா கேள்விக்கும் பதிலும் கிடைச்சிடும்னு நான் நம்பறேன்...’’- மணிவண்ணன் சொல்லி முடித்தார். அழகியபாண்டியனிடம் ஸ்தம்பிப்பு.“என்ன அழகு... நான் சொன்னத நம்பமுடியலியா?’’“சேச்சே... நான் பிரமிப்புல இருக்கேன் மணி. நான் கோடு போட்டா நீ ரோடே போட்டுட்டியே... அடேயப்பா எவ்வளவு ஃபாஸ்ட்!’’“டெக்னாலஜி அப்படி... தப்பு பண்ணிட்டு இப்பமட்டும் ஒருத்தன் தப்பிக்கவே முடியாது...’’“எங்க... லஞ்சம் வாங்கற அவ்வளவு பேரும் சுதந்தரமா நல்லாதானே இருக்காங்க..?’’“அதுல எங்க தப்பு எதுவுமில்ல... லஞ்சம் கொடுக்கற மக்கள் திருந்தும்போது நாங்க அவங்களையும் உண்டு இல்லன்னு பண்ணிடுவோம். நம்ப பப்ளிக் செல்ஃபிஷா இருக்கறதுதான் பல குற்றங்கள் தொடர்ந்து நடக்கவே காரணம்...’’“நீ சொல்றதும் ஒரு பெரிய உண்மைதான். எனிவே... அந்த மர்ம மனிதனை நாங்க பாக்க ஆவலா இருக்கோம்...’’“சில மணி நேரம் பொறு... சைபர் கிரைம் என்கொயரி பிளாக்ல அவனை நீங்க பாக்கலாம்...’’“மணி... அவன் எங்கள மட்டுமல்ல... அந்த மீனா பொண்ணு வீட்டுக்கு போன் பண்ணி அவங்களையும் ஊரைவிட்டு ஓடச்சொல்லியிருக்கான்.’’.“ஐ ஸீ... ஏன் அப்படி சொன்னான்... எதுக்கு சொன்னான்னு எல்லா கேள்விக்கும் சில மணி நேரங்கள்ள பதில் தெரிஞ்சிடும். டோன்ட் ஒர்ரி...’’“நிச்சயமா இது அந்தத் தங்கப்புதையல் தொடர்பாதான் இருக்கணும்.’’“பாக்கலாம்... ஒண்ணுமட்டும் நிச்சயம்! என் போலீஸ் கேரியர்ல இந்த விஷயம் ரொம்பவே பெக்கூலியர்!’’“என் புரொஃபசர் கேரியர்லயும் அப்படிதான்! அமானுஷ்யமான விஷயங்கள் ஒருபக்கம்... படுகிரைமான விஷயங்கள் மறுபக்கம்... நினைச்சா மலைப்பாவும் இருக்கு, வேடிக்கையாவும் இருக்கு...’’“சரி அழகு... நான் கூப்பிட்றேன்- எனக்கு சப் இன்ஸ்பெக்டர் கல்யாணசுந்தரத்துகிட்ட இருந்து போன் வந்துகிட்டிருக்கு. நான் பிறகு கூப்பிட்றேன்...’’- ஏ.எஸ்.பி. மணிவண்ணன் மறுமுனையில் கட் செய்துகொள்ள, அழகியபாண்டியனும் ஒரு சிறு பெருமூச்சுடன் போனை முடக்கினார்! ஏ.எஸ்.பி.யின் போனில் சப் இன்ஸ்பெக்டர் கல்யாணசுந்தரத்தின் குரல்!“சார்... ஆர்.டி.ஓ. கொடுத்த அட்ரஸை வெச்சு வீட்டை ட்ரேஸ் பண்ணி உள்ள நுழைஞ்சிட்டோம் சார். ஆனா ஒரு அன்ஃபார்ச்சுனேட் சார்...’’“என்ன கல்யாணசுந்தரம்?’’“அந்த ராமச்சந்திரன்கறவர் பொணமா தூக்குல தொங்கிகிட்டு இருக்கார் சார்..!’’- கல்யாணசுந்தரம் பதில் மணிவண்ணனை விதிர்க்கச் செய்தது!ரகசியம் தொடரும்...

மர்மத் தொடர்: ராஜ ரகசியம்

Related Stories