இனியாவது திருந்தட்டும்!

ஈர நெஞ்சங்களை பதறவைத்திருக்கிறது விஷ்ணுப்ரியாவின் தற்கொலை. தன் தந்தையின் மதுப்பழக்கத்தால் நிம்மதி இழந்த அந்த ஜீவன் நிம்மதியைத் தேடி மரணத்தை நாடிவிட்டது. தமிழகத்துக்கு மது போதை தொடர்பில் இது ஒன்றும் முதல் தற்கொலை அல்ல...2018-ல் நெல்லையில் 17 வயது மாணவன், தன் தந்தையிடம் குடிப்பழக்கத்தை விட்டுவிடும்படி மன்றாடி கடிதம் எழுதியவன், அதற்காகவே தன்னுயிரையும் மாய்த்துக்கொண்டான். 2022-ல் ராசிபுரம் அருகே ப்ளஸ் டூ மாணவன் இதே காரணத்துக்காக தற்கொலை செய்துகொண்டான். இப்போது விஷ்ணுபிரியா..குடியால் குடும்பங்கள் சிதைவதும், பிஞ்சுகள் தங்களை மாய்த்துக்கொள்வதும் தொடர்ந்தாலும் குடிநோயாளிகள் திருந்துவதாகத் தெரியவில்லை. அதோடு, தமிழக அரசும் எதையும் கண்டுகொள்வதில்லை என்பதுதான் வேதனை. கள்ளச் சாராயம், குடிப்பவர்களைக் கொல்கிறது என்றால், அரசின் மதுபானம் குடிப்பவர்களை மட்டுமல்லாமல் அவர்களின் குடும்பங்களையும் சிதைக்கிறது. தேர்தல் நேரத்தில் அனைத்து கட்சிகளுமே, ‘நாங்கள் ஆட்சிக்கு வந்தால் டாஸ்மாக்கை மூடுவோம்’ என்று அறிக்கைகள் வெளியிட்டாலும், குடிகாரன் பேச்சாகவே இருக்கிறது தேர்தலுக்குப் பின் ஆளும் அரசுகளின் செயல்பாடுகள்.விஷ்ணுப்ரியா உள்ளிட்ட குழந்தைகளின் முடிவுகள் அவரவர் குடும்பத்தைத் திருத்த மட்டுமே அல்ல, தங்களுக்கும் சேர்த்துத்தான் என்பதை உணர்ந்து இனியாவது குடிமகன்கள் திருந்தவேண்டும். அதைவிட முக்கியம், அரசு மதுபானக் கடைகளை மூடுவது. இந்த ஆண்டில் முதல்கட்டமாக 500 டாஸ்மாக் கடைகளை படிப்படியாக மூடுவதற்கு தமிழக அரசு தீர்மானித்திருப்பதாக வரும் தகவல் சற்று ஆறுதலைத் தருகிறது. அதேசமயம், காலம் தாழ்த்தாமல் செய்யும் செயலே முழுமையான பலனைத் தரும் என்கிற வள்ளுவரின் கூற்றுக்கேற்ப தமிழக அரசு அதை விரைந்து செய்ய வேண்டும். அதுவே மதுவிலக்கை நோக்கிய முதல் படி என்பதாக இருக்கும்!