ரசிகனை வழிநடத்துங்கள்!

சென்ற வாரத்தில் வெளியான செய்தி ஒன்று நெஞ்சைப் பதறவைத்தது.பிறந்த நாள் கொண்டாடிய நடிகருக்கு கட் அவுட் வைத்தபோது, கல்லூரி மாணவர்கள் இருவர் மின்சாரம் தாக்கி உயிரிழந்திருக்கிறார்கள். எந்த நடிகருக்குக் கட் அவுட் வைக்கும்போது இறந்து போனார்களோ, அந்த நடிகர் இவர்களின் இறப்புக்குக் கூட நேரில் செல்லவில்லை. வாட்ஸ் ஆப் காலில் பேசி, வருத்தம் தெரிவித்திருக்கிறார். அதோடு அந்த ரசிகர்களின் குடும்பத்துக்கு உதவி செய்வதாகச் சொல்லியிருக்கிறார். அவ்வளவுதான். இதில் அவரைக் குறை சொல்ல முடியாது.கேரளாவில் ஒரு நடிகருக்கு 175 அடி உயரத்தில் கட் அவுட் வைக்கப்பட்டால், போட்டிக்கு வத்தலகுண்டில் இன்னொரு நடிகருக்கு 180 அடி உயரத்தில் கட் அவுட் வைக்கிறார்கள். 215 அடி உயரத்தில் திருத்தணி பைபாஸில் தன் இஷ்ட நடிகருக்குக் கட் அவுட் வைத்துத் திரும்பிப் பார்க்க வைக்கிறார், இன்னொருவர். இதுபோன்ற ரசிக மனநிலையுடன் தியேட்டர் வாசலை முற்றுகையிடும் இளைஞர்கள் சாதாரண குடும்பத்தைச் சேர்ந்தவர்களாகவோ, கூலித் தொழிலாளர்களாகவோதான் இருக்கிறர்கள்.உண்மையில் கட் அவுட் வைப்பதும், பாலாபிஷேக செய்வதெல்லாம் அந்த நடிகர்களை உச்சத்தில் இருக்கச் செய்யுமே தவிர, ரசிகர்களுக்கோ, அவர்களின் குடும்பத்துக்கோ எந்த வகையிலும் உதவாது என்பதை ரசிகர்கள் புரிந்துகொள்ள வேண்டும்.கட் அவுட் வைக்கிறபோது இறப்பு சம்பவங்கள் நிகழ்ந்தால் சம்பந்தப்பட்ட நடிகர்கள் வருத்தம் தெரிவிப்பதும் உதவிகளைச் செய்வதாக உத்தரவாதம் தருவதும் ஒரு பக்கம் இருக்கட்டும். ஒவ்வொரு நடிகரும் தனது படங்கள் வெளியாகிறபோது ரசிகர்கள் கட் அவுட் வைக்கக் கூடாது, பாலாபிஷேகம் செய்யக் கூடாது என கண்டிப்பான அறிவிப்பை வெளியிட வேண்டும். அப்படியான அறிவிப்புதான் ஒரு நடிகரை விரும்பும் ரசிகர்களுக்கும், அவர்களது குடும்பத்துக்குமான மிகப்பெரிய உதவியாக அமையும்.