அரை நிர்வாணமா நடிக்கப் பயந்தேன்- ராஜலட்சுமி ஓப்பன் டாக்

அறிமுகமில்லாத நடிகர்கள், குறைவான பட்ஜெட்டைக் கொண்டு, ‘பொன்னியின் செல்வன்’ படத்துடன் ஒப்பிட்டுப் பேசவைக்கும் அளவுக்கு அதிர்வலைகளை ஏற்படுத்திய படம் ‘யாத்திசை’. அந்தப் படத்தின் இரண்டு ஹீரோயின்களில் ஒருவர்தான் ராஜலட்சுமி. ஒரு நல்ல நடனக் கலைஞருக்குள்ள நளினம், ஒரு இளவரசிக்குரிய கம்பீரம் என புதிய உடல் மொழியுடன் தேவரடியாராக நடித்த ராஜலட்சுமியிடம் பேசினோம்...உங்களைப் பற்றி அறிமுகம் பண்ணிக்கோங்க... “சொந்த ஊர், சிவகங்கை பக்கத்துல ஒரு கிராமம். ஆனா, பெத்தவங்க சென்னைல செட்டில் ஆயிட்டதுனால, நான் இங்க தான் பிறந்தேன், வளர்ந்தேன். அப்பா, அம்மா, அண்ணன்னு அளவான, அழகான குடும்பம் என்னோடது. நான் பி.பி.ஏ. முடிச்சுட்டு, எம்.எஸ்.டபிள்யூ. படிச்சிருக்கேன். என்னோட 5 வயசுல இருந்து பரத நாட்டியம் கத்துக்கிட்டு இருக்கேன். பரத நாட்டியத்துல டிப்ளமோ முடிச்சிட்டு, இப்போ எம்.ஏ. படிக்கிறேன்.”.சினிமா வாய்ப்பு கிடைத்தது எப்படி?நான் பி.பி.ஏ. படிக்கும்போது தான் ‘யாத்திசை’ படத்துல நடிக்கிறதுக்கான வாய்ப்பு கிடைச்சது. இயக்குநர் தரணி ராசேந்திரனுடைய முதல் படமான ‘ஞானச்செருக்கு’ல, என்னோட ஹெச்.ஓ.டி. மேடம் ஒர்க் பண்ணிருக்காங்க. ‘யாத்திசை’ படத்துல தேவரடியாரா நடிக்க, பரத நாட்டியம் ஆடத் தெரிஞ்ச பொண்ணு வேணும்னு கேட்டப்போ, மேடம் என்னை ரெகமெண்ட் பண்ணாங்க. அதுவரைக்கும் சினிமாவுல நடிக்கணும்கிற ஆசையே எனக்கு இருந்தது கிடையாது. இந்தப் படத்துக்குப் பிறகு சினிமா மேல காதல் வந்துடுச்சு.”முதல் சினிமா அனுபவம் எப்படி இருந்துச்சு? “முதல்ல நடிக்கக் கேட்டப்போ, ‘வேண்டாம்’னு சொல்லிட்டேன். ஏன்னா, என் கேரக்டருக்கான ஆடைனு அவங்க சொன்னது, அரை நிர்வாணம். கோயில் சிற்பங்களைத்தான் இயக்குநர் எனக்கு ரெஃபரன்ஸா காண்பிச்சார். காஸ்ட்யூம் பார்த்து பயந்து போயிட்டேன். அந்தச் சமயத்துல நான் லைட்டா குண்டா இருந்தேன். அந்த உடல்வாகோட எப்படி இந்த கேரக்டரைப் பண்றதுனு தயக்கமாவும் இருந்துச்சு. ஆனா, ‘நம்மைத் தேடி ஒரு வாய்ப்பு வந்துருக்கு. நமக்கு சினிமாவுல இண்ட்ரஸ்ட் இல்லைன்னாலும், நடனம் இந்த வாய்ப்பைக் கொடுத்துருக்கு. அதே வேஸ்ட் பண்ண வேண்டாம்’னு தோணுச்சு. அதனால, நடிக்க ஓகே சொன்ன கையோட ஜிம்ல சேர்ந்து 10 கிலோ எடை குறைச்சேன்.எனக்குத் தரப்பட்ட கதாபாத்திரத்துக்கு, உடல் எடையைக் குறைச்சா மட்டும் போதாதுனு தோணுச்சு. ஏன்னா, தேவரடியார்கள் தொடர்ச்சியா டான்ஸ் ஆடுறதுனால, அவங்க கால்கள் ரொம்ப ஸ்ட்ராங்காவும் கட்டுமஸ்தாவும் இருக்கும். அதனால, கோயில் சிற்பங்கள் போலவே என் உடலோட வளைவு, நெளிவுகள் இருக்கணும்கிறதுக்காக, என் ட்ரெயினர்கிட்ட சொல்லி, அதுக்குத் தகுந்த மாதிரி உடற்பயிற்சி செய்தேன். அதேமாதிரி, என் கேரக்டருக்கான நகைகளை எல்லாம் ஒவ்வொரு மாதமும் போட்டு பார்த்து, என் உடலோடு பொருந்துதானு செக் பண்ணிப் பார்ப்பேன். ஏன்னா, உள்ளாடைகள் இல்லாம நகைகள் மட்டும் அணியும்போது, அது உடலோடு ஒட்டி இருக்கணும். கொஞ்சம் பிசகினாலும் ஆபாசமாகி விடக்கூடிய வாய்ப்புகள் இருந்த கேரக்டர் எனக்கு. ‘எந்த விதத்திலும் தேவரடியார்களை தவறா காண்பிச்சிடக்கூடாது’னு இயக்குநர் தெளிவா இருந்தார். அதனால, இவ்வளவு சிரமப்பட்டு இந்தப் படத்துல நடிச்சேன்.”ஷூட்டிங் ஸ்பாட் எக்ஸ்பீரியன்ஸ் பற்றிச் சொல்லுங்க... “கும்பகோணம், செஞ்சி, காஞ்சிபுரம் ஆகிய இடங்கள்ல ஷூட்டிங் நடந்துச்சு. எல்லா இடத்துலயும் ஊர் மக்கள் ரொம்பவே உதவியா இருந்தாங்க. நாங்க ஷூட் பண்ண எந்த இடத்துலயும் கழிப்பறை வசதியோ, ஆடை மாற்றுவதற்கான இடமோ கிடையாது. ஆனா, மக்கள் தான் எங்களுக்கு ரொம்ப உதவியா இருந்தாங்க. ரொம்ப முக்கியமா குறிப்பிட வேண்டியது உதவி இயக்குநர்கள். 26 ஆண்கள், 2 பெண்கள்னு மொத்தம் 28 உதவி இயக்குநர்கள். ஆண், பெண் பேதமில்லாம எல்லாரும், எல்லா வேலையையும் செய்வாங்க. அதனால, எந்தக் கஷ்டமும் எங்களுக்குத் தெரியலை.நாங்க ஷூட் பண்ண சில இடங்கள், தொல்லியல் துறையோட கட்டுப்பாட்டுல இருக்கு. அங்க ஷூட் பண்றதுக்கு அனுமதி கிடைக்குறதே பெரிய விஷயம். அவங்க அனுமதி கொடுத்த நேரத்துக்குள்ள ஷூட் பண்ணிடணும்கிறதுனால, எல்லாரும் தங்களோட கடின உழைப்பைக் கொடுத்தாங்க.”.இந்தப் படம் தொடங்கி 4 வருடங்கள் ஆச்சு. ஒரு படத்துக்காக 4 வருட காத்திருப்பு என்பதை நீங்க எப்படிப் பார்க்குறீங்க? “4 வருஷத்துல ரெண்டு வருஷம் லாக்டவுன்லயே போயிடுச்சு ப்ரோ. இன்னொண்ணு, ஷெட்யூல் ஷெட்யூலாத்தான் ஷூட் போனாங்க. ஒவ்வொரு ஷெட்யூலுக்கும் குறைஞ்சது மூணு மாசமாவது இடைவெளி இருக்கும். ஏன்னா, ஒவ்வொரு ஷெட்யூலுக்குமான முன் தயாரிப்புப் பணிகள் அதிகமா இருந்துச்சு. அதனால, இந்தப் படத்துக்கு எவ்வளவு டைம் தேவைப்பட்டுச்சோ, அந்த டைமைத்தான் யூஸ் பண்ணிருக்காங்க.”‘யாத்திசை’ படத்தின் ட்ரெய்லர் வந்தப்போ, ‘பொன்னியின் செல்வன்’ படத்த்துக்கு நிகரா பேசப்பட்டுச்சு. ஆனா, படம் வெளியானபிறகு கலவையான விமர்சனங்கள் வந்துச்சே... “எல்லாப் படமும் எல்லாருக்கும் பிடிக்கும்னு சொல்ல முடியாது. சிலருக்கு ‘பொன்னியின் செல்வன்’ பிடிச்சிருக்கு; சிலருக்கு ‘யாத்திசை’ பிடிச்சிருக்கு. நாங்க விமர்சனங்கள் பற்றியெல்லாம் யோசிக்கவே இல்லை. ‘நல்ல படத்தைக் கொடுக்கணும்’கிறதுதான் எங்க நோக்கமா இருந்துச்சு. படம் பிடிச்சிருக்குறவங்க கொண்டாடுவாங்கனு எங்களுக்கு நம்பிக்கையும் இருந்துச்சு. அந்த நம்பிக்கை வீண்போகல.”- சி.காவேரி மாணிக்கம்

அரை நிர்வாணமா நடிக்கப் பயந்தேன்- ராஜலட்சுமி ஓப்பன் டாக்

Related Stories