கடவுளின் குரல்: கனவில் வந்து மகான் சொன்ன வைத்தியம்!

-ஆர்.என்.ராஜன்மகாபெரியவர் மேல் அலாதியான பக்தி உள்ள குடும்பம் அது., மாதம் தவறாமல் மகானை தரிசிக்க வந்துவிடுவார்கள்.திடீரென்று குடும்பத் தலைவருக்கு டெல்லிக்கு மாற்றல் வரவே, குடும்பமே அங்கே சென்றது...நாட்கள் நகர்ந்தன. திடீரென்று ஒருநாள் அந்தக் குடும்பத்தின் தலைவிக்கு தொடர்ச்சியாக வாந்தி வந்தது. ஒரு வாய் உணவுகூட உடலில் தங்கவில்லை.எத்தனையோ டாக்டர், எவ்வளவோ மருந்து. ஆனாலும் பலனின்றி உடல் இளைத்துக்கொண்டே போனார்.ஒரு கட்டத்தில் இனி வேறு கதியில்லை என்று தீர்மானித்து, மகாபெரியவரை மனதார வணங்கினார்கள், குடும்பத்தில் எல்லோரும். அன்று இரவு, அந்தப் பெண்மணியின் கனவில் தோன்றிய மகான், ‘தொடர்ந்து ஒருமண்டலம் (நாற்பத்தெட்டு நாட்கள்) தினமும் கார்த்தால ரெண்டு வில்வ இலையை வெறும் வயிற்றுல சாப்பிடு...எல்லாம் சரியாகிடும்!” என்று சொல்ல, விழித்து எழுந்ததும் விஷயத்தைக் கணவரிடம் சொன்னார், மறுநாள் முதல், மகான் சொன்னபடியே தினமும் வில்வ இலைகளை சாப்பிடத் தொடங்கினார்.ஆச்சரியப்படும் விதமாக அவரது வாந்திப் பிரச்னை படிப்படியாகக் குறைந்து ஒரே மாதத்தில் முழுமையாக குணமானது. ஆனாலும் மகான் ஒரு மண்டலம் என கனவில் சொன்னதால், குணமான பிறகும் அதைத் தொடர்ந்தார், அந்தப் பெண்மணி..நாற்பத்தைந்தாவது நாள், ஒரு சோதனை வந்தது. வீட்டுக்கு உறவினர்கள் வந்ததில் பணிச்சுமை அதிகமானதால் அயர்ந்துபோய் இரவு வெகுநேரத்துக்குப் பின்னரே தூங்கிய குடும்பத் தலைவி, அடுத்த நாள் காலை எழுந்தபோதே சோர்வாக இருந்ததால், வில்வ இலைகளை எடுத்துக்கொள்ள மறந்து காபியைக் குடித்தார்.அவ்வளவுதான் சில நிமிடங்களிலேயே அவருக்கு குமட்டிக்கொண்டு வந்துவிட்டது. பதறிப்போனவருக்கு அப்போதுதான் வில்வ இலையை சாப்பிடாதது நினைவுக்கு வந்தது.அடுத்த நாள் அதிகாலையிலேயே வில்வ இலையை எடுத்துக்கொண்டும் பிரச்னை தீரவில்லை. முன்பைவிட அதிகரிக்கவே செய்தது. அதனால் நடுங்கிப்போன பெண்மணி, ’’பெரியவா, மன்னிச்சுக்குங்கோ... இனிமே சரியா வில்வத்தை எடுத்துக்கறேன்!” என வேண்டினார். அன்றிரவு அவரது பிரச்னை கொஞ்சம் குறைய, சற்று நிம்மதியாக தூங்கச் சென்றவரின் மனதில் புதிதாக ஒரு சந்தேகம் தலையெடுத்தது.இனிமேல் எடுத்துக்கொள்கிறேன் என்று வேண்டினோமே, அப்படியானால் மறுபடியும் முதலில் இருந்து தொடங்கி நாற்பத்தெட்டு நாட்கள் எடுத்துக்கொள்ள வேண்டுமா? அல்லது, இன்னும் பாக்கி இருக்கும் இரண்டு நாட்கள் மட்டும் எடுத்துக்கொண்டால் போதுமா?.சந்தேகம் வந்ததும், தூக்கம் கலைந்து புரண்டு புரண்டு படுத்தவர், சோர்ந்துபோன நிலையில், மகானையே வேண்டினார். சரியாக அதே நிமிடம், “அம்மா…இன்னும் ரெண்டுநாள்தான் பாக்கி இருக்கு பரீட்சைக்கு. கார்த்தால சீக்கிரமா எழுப்பிவிடு படிக்கணும்!” அருகில் உறங்கிக்கொண்டிருந்த அவரது மகள் எழுந்து சொல்லிவிட்டுப் படுக்க, சட்டென்று எழுந்து அமர்ந்தார், அந்தப் பெண்மணி.’இன்னும் ரெண்டு நாள்தான் பாக்கி இருக்கு அதாவது மகான் சொன்ன நாற்பத்தெட்டு நாள் முடிய இன்னும் இரண்டுநாள்தான். அதன் பிறகு எந்தப் பிரச்னையும் தனக்கு வராது!’ மகள் வாக்கின் மூலமே மகான் தந்துவிட்ட பதிலை நினைத்து சிலிர்த்துப்போனார்..ஸ்ரீமடம் இருக்கும் திசை நோக்கி வணங்கினார். அடுத்த இரண்டு நாட்கள் வில்வத்தை சாப்பிட்டார். அதன் பிறகு அவருக்கு ஒருபோதும் அந்த உடல்நலப் பிரச்னை வரவே இல்லை என்பதைச் சொல்லவேண்டுமா என்ன?