கடவுளின் குரல்: அம்பாளுக்கு அர்ச்சனை செய்யச் சொன்ன ஆசார்யா!

-ஸ்ரீராமஜெயம்ஸ்ரீ மடத்தில் ஏகாந்தமாக (தனியாக) அமர்ந்திருந்த மகாபெரியவர் முன் வந்து நின்றார்கள் அந்தத் தம்பதியர்.பொதுவாக, மகான் தனிமையில் நிஷ்டையில் இருக்கும் சமயங்களில் யாரையும் தரிசிக்க அனுமதிக்க மாட்டார்கள். ஆனால் அன்று வந்த தம்பதியர் மனவருத்தத்தோடு அழுதபடியே வந்ததால்,மகானிடம் விஷயத்தைச் சொல்லி, அவர் உத்தரவு தரவே அவர்களை அனுமதித்திருந்தார்கள் தொண்டர்கள்.அமைதியாக அமர்ந்திருந்த மகானின் திருவடிகளில் நமஸ்கரித்துவிட்டு எழுந்த தம்பதியரின் விழிகளில் நீர் பெருகி வழிய, அவர்கள் எதுவும் சொல்லாதபோதே, ‘’என்ன, பொண்ணுக்கு கல்யாணம் அமையலைங்கற கவலை வாட்டுதா?” கேட்டார் மகான்.சொல்லாமலே நிலையுணர்ந்த மகானின் அன்பில் கரைந்து வார்த்தைபேசவும் இயலாமல் தலையசைத்தனர் அத் தம்பதியர்.வாத்சல்யத்தோடு அவர்களைப் பார்த்த மகான், “கவலைப்படாதீங்க… திருவானைக்காவல் கோயிலுக்கு உங்க மகளை அழைத்துக்கொண்டுபோய், அங்கே அம்பாள் சன்னதியில் அர்ச்சனை செய்யுங்கள்… எல்லாம் நல்லபடியாக நடக்கும்!” சொன்னார்.பூரண நம்பிக்கையோடு அவரை வணங்கிவிட்டுப் புறப்பட்டார்கள், அந்தத் தம்பதியர்.மகான் சொன்னபடியே அடுத்தவாரமே மகளை அழைத்துக்கொண்டு திருவானக்காவல் திருத்தலத்திற்குச் சென்றார்கள். அங்கே அம்மன் சன்னதியில் அர்ச்சனை செய்ய, அர்ச்சகரிடம் மகளின் பெயர் நட்சத்திரம், குடும்பக் கோத்திரம் சொன்னார்கள்.எல்லாவற்றையும் கேட்டுக்கொண்ட அர்ச்சகர், அம்பாளுக்கு அர்ச்சனை செய்யத் தயாரான சமயத்தில் அங்கே வேகவேகமாக வந்தார்கள் இன்னொரு தம்பதியர். தங்கள் மகன் பெயர், நட்சத்திரம், கோத்திரம் முதலானவற்றைச் சொல்லி அர்ச்சனை செய்யச் சொன்னார்கள்.அதையும் கேட்டுக்கொண்டு, இருவர் பெயருக்குமாக அர்ச்சனை செய்துமுடித்த அர்ச்சகர் அவரவர் கொண்டுவந்த அர்ச்சனைத் தட்டுகளை அவரவரிடமே பிரசாதமாகத் திருப்பிக் கொடுத்தார்..அதைப்பெற்றுக்கொண்டவர்கள் ஆளுக்கு ஒரு பக்கமாகச் சென்று கோயிலில் ஓர் இடத்தில் அமர்ந்தார்கள்.அந்த சமயத்தில் பெண் சார்பாக அர்ச்சனை செய்ய வந்த தம்பதியருக்கு கோயிலின் தூண் ஒன்றில் சாய்ந்தபடி அமர்ந்திருந்த முதியவர் ஒருவரைப் பார்த்ததும், பிரசாதக் கூடையில் இருந்த பழங்களை எடுத்து, அவருக்குத் தரலாம் என்று தோன்ற, கூடைக்குள் கைவிட்டவருக்கு ஓர் அதிர்ச்சி காத்திருந்தது. கூடைக்குள் தங்க மோதிரம் ஒன்று இருந்தது. யாருடையதோ எவருடையதோ என்று பதறிப்போனவர்கள் அதை எடுத்துக் கொண்டு வேகவேகமாக அம்பாள் சன்னதிக்குச் சென்றார்கள். அங்கே அர்ச்சனைத் தட்டில் அம்பாள் பாதத்தில் வைத்து வாங்குவதற்காக தாங்கள் எடுத்துவந்த மோதிரத்தைக் காணோம் என்று தேடிக்கொண்டிருந்தார்கள், பையனின் பெயருக்கு அர்ச்சன செய்தவர்கள்.சரியாக அதேசமயத்தில் இவர்கள் சென்று மோதிரத்தைக் கொடுக்க, பெரிதும் மகிழ்ந்தவர்கள், ஒருவருடன் ஒருவர் நட்பாகப் பேசிக்கொள்ள, மகனின் திருமணத் தடை நீங்க வேண்டிக்கொள்வதற்காக அவர்களும், மகளின் கல்யாணம் கைகூடிவர பிரார்த்திக்க இவர்களும் வந்திருப்பது தெரியவர பரஸ்பரம் எல்லா விஷயங்களையும் பேசி, ஒருவருக்கு ஒருவர் சம்பந்தியாவது எனத் தீர்மானித்தார்கள்.அதேசமயம் கோயிலின் உள்ளே யாரோ சில பக்தர்கள் ஜெயஜெய சங்கர ஹரஹர சங்கர என கோஷம் எழுப்பியபடி வலம்வர, அத்தனையும் அந்தக் காஞ்சிமகான் நடத்திய அற்புதம் என்பதை உணர்ந்து சிலிர்த்தார்கள், இரு வீட்டாரும்.

கடவுளின் குரல்: அம்பாளுக்கு அர்ச்சனை செய்யச் சொன்ன ஆசார்யா!

Related Stories