மக்கள் மீது அக்கறைகொள்ளுமா மாநகராட்சி!

கடந்த வாரம் சென்னை, அரும்பாக்கத்தில் தாயுடன் நடந்து சென்ற மாணவியை மாடு கொம்பால் முட்டி தூக்கி வீசியது. அந்த வீடியோ காட்சி சமூக வலைதளங்களில் பெரும் பரபரப்பை ஏற்படுத்தியது.இது பற்றி புகார் செய்யப்பட்டதன்பேரில் அம்மாட்டின் உரிமையாளரின் மீது போலீஸார் வழக்குப்பதிவு செய்து விசாரித்தனர்.இந்த ஒரு சம்பவம் மட்டும்தான் ஊடகங்கள் வழியாக வெளிவந்துள்ளது. இதுபோன்ற பல சம்பவங்கள் வெளியே தெரிவதில்லை. நகரங்களில் மாநகராட்சிக்கு உட்பட்ட பகுதிகளில் மாடுகளின் உரிமையாளர்கள் பால் கறக்கும் நேரத்தைத் தவிர, மற்ற நேரங்களில் மாடுகளை சாலைகளில் விட்டுவிடுவது சகஜமாக உள்ளது. இதனால், பொதுமக்கள் பல இன்னலுக்கு ஆளாகிறார்கள்.சிறுமியை மாடு முட்டிய சம்பவம் ஊடகங்கள் மூலம் தெரிய வந்ததால் மட்டுமே மாநகராட்சி நிர்வாகம் சாலைகளில் மாடுகளைத் திரியவிடும் மாட்டு உரிமையாளர்கள் மீது நடவடிக்கை எடுத்துள்ளது. மற்ற சமயங்களில் மாடுகள் சாலைகளில் திரிய விடுவதை மாட்டு உரிமையாளர்கள் நிறுத்துவதும் இல்லை. மாநகராட்சியினரும் அதனை கவனத்தில்கொள்வதும் இல்லை.இதில் அச்சமூட்டும் இன்னொரு விஷயமும் உள்ளது. நகர்புரத்தில் மாடுகள் வளர்ப்பதுடன், அவற்றை பொதுமக்களுக்கு இடையூறு விளைவிக்கும் வகையில் திரிய விடுபவர்களும் ஏதோ ஒரு கட்சியின் பின்புலம் கொண்டவர்களாக இருக்கின்றனர். அல்லது ஆள் பலம் கொண்டவர்களாக இருக்கின்றனர். இத்தகையோரிடம் ’உங்கள் மாடுகளை பொதுமக்களுக்கு இடையூறு விளைவிக்கும் வகையில் திரியவிடலாமா?’ என்று கேட்பதற்கு பொதுமக்கள் அஞ்ச வேண்டியிருக்கிறது.பொது மக்கள் தட்டிக் கேட்க அஞ்சும் சூழலில், மாடுகளின் உரிமையாளர்கள் மீது அரசு எடுக்கும் நடவடிக்கையானது மீண்டும் அரும்பாக்கம் சம்பவம் போல நடக்காமல் இருக்கும் வகையில் இருக்க வேண்டும்.