பட்டைய கிளப்பும் ’பார்பி’ ஓரங்கட்டும் நோலன்!

-ஷாஐஸ்வர்யா ராய் குழந்தையாய் இருந்த பொழுது அவர் உலக அழகியாய் வருவார் என்று நிச்சயம் அவரது பெற்றோர்கள் நினைத்திருக்க மாட்டார்கள். அதுபோல்தான் பார்பி பொம்மைகள் சந்தையில் அறிமுகப்படுத்தப்பட்ட போது அது உலகளவில் பெண்மையின் அடையாளமாகவே மாறும் என்று அந்த பொம்மைகளை உருவாக்கும் ‘மேட்டல்’ நிறுவன உரிமையாளர் ரூட் ஹாண்டலரே எதிர்பார்த்திருக்க மாட்டார்..இன்று வரை அந்த பொம்மையின் சிறு முடியைக்கூட அவர்கள் மாற்றியதில்லை... ஆனால் டாக்டர் பார்பி, என்ஜினீயர் பார்பி, சிங்கர் பார்பி என பெண்மைக்கு பெருமை சேர்க்கும் பல அவதாரங்களை பார்பியின் வடிவில் உருவாக்கினர். நவீன பெண்களின் அடையாளமாகவும், பெண் குழந்தைகளின் பெருங்கனவாகவும் மாறிப்போனது பார்பி. அண்மையில் அந்த பொம்மையின் பெயரில் ஹாலிவுட்டில் தயாரிக்கப்பட்டு, உலகம் முழுவதும் வெளியான திரைப்படம் சூப்பர் டூப்பர் ஹிட்! .வசூலில் ‘பார்பி’ வரலாற்று சாதனைகளை நிகழ்த்துவதோடு, ஹாலிவுட்டின் ராஜமௌலி கிறிஸ்டோபர் நோலனையே நொங்கெடுத்துக் கொண்டிருக்கிறது. நம்ம ஊர் தல - தளபதி ரேஸ் மாதிரி கிரிஸ்டோபர் நோலனின் ‘ஓப்பன்ஹெய்மர்’ படமும் இயக்குநர் கிரேடா கெர்விக்கின் ‘பார்பி’யும் உலகம் முழுவதும் பாக்ஸ் ஆஃபீஸில் முட்டி மோதிக் கொண்டிருக்கின்றன. போட்டியில் இப்போதைக்கு முந்துவது பார்பி தானாம். வசூலில் மட்டுமல்லாது விமர்சன ரீதியாகவும் பார்பியே அதிகமான நட்சத்திரங்களை அள்ளிக் கொண்டிருக்கிறதாம்..! அப்படி என்ன இருக்கிறது அந்த ‘பார்பி’யில்..?.‘பார்பி’ பொம்மைகள், அவைகளின் உலகத்தில் நிகழும் ஃபாண்டசி கதையாக மட்டும் இந்தப் படத்தைக் கருத முடியாது. ‘’பெண்ணியம்’, ‘ஆண் ஆதிக்கவாதம்’, ‘அடக்குமுறை’, ‘ஃபாசிசம்’, ‘நிறவெறி அரசியல்’, ‘இருத்தலியல்’ எனப் பல்வேறு விஷயங்களை இந்தத் திரைப்படம் கலந்துரையாட வைக்கிறது.அதுமட்டுமல்ல ‘பார்பி’ பொம்மைகளை உருவாக்கும் ‘மேட்டல்’ நிறுவனத்தையே இந்தப் படத்தில் விமர்சனத்திற்குள்ளாக்கியுள்ளனர். இந்தப் படத்தின் முதன்மை கதாபாத்திரமான ‘ஸ்டிரியோடிப்பிக்கல் பார்பி’ அதாவது ’வழக்கு மாறாத பார்பி’ எனும் கதாபாத்திரத்தில் நடித்துள்ள மார்கோ ராபி மிகச் சிறப்பாக நடித்திருந்தார். அந்தக் கதாபாத்திரத்தை நமது நிஜ உலகில் இருக்கும் வழக்கு மாறாத மாடர்ன் பெண்களோடு பொருத்திப் பார்க்கலாம். ரியான் காஸ்லிங் நடித்துள்ள ‘கென்’ கதாபாத்திரத்தை நம் நிஜ வாழ்க்கை ஆண்களோட ஒப்பிடலாம். இதை போகிற போக்கில் பார்வையாளர்களுக்கு கடத்தியது இந்தப் படத்தின் சிறப்பு. மேலும், நிஜ உலகில் ’பெண்ணியம்’ என்கிற கருத்து பார்க்கப்படும் விதம், பெண்களின் நிலை, பார்பி பொம்மைகளின் நிலை என அத்தனையையும் கலை நேர்மை தவறாது காட்சிப்படுத்தியிருக்கிறார் இயக்குநர் கிரேடா கெர்விக்..ஆரம்பத்தில் இயக்குநர் ஸ்டான்லி குப்ரிக்கின் ‘2001; ஏ ஸ்பேஸ் ஒடிசி(2001; A Space odyssey)’ திரைப்படத்தின் ஆரம்ப காட்சியை சட்டயர் பாணியில் அமைக்கப்பட்ட விதத்தில் தொடங்கி இந்தப் படம் நெடுக பல நக்கலான சட்டயர் காட்சிகள் இடம்பெற்றுள்ளன. சமகால நிகழ்வுகள் பலவற்றை அக்காட்சிகள் மூலம் சாடியது பார்வையாளர்களை ரசிக்க வைக்கிறது. மேலும், ‘பார்பி’ பொம்மைகளை தயாரிக்கும் ‘மேட்டல்’ நிறுவனத்தை தொடங்கிய ரூட் ஹாண்டலர் கதாபாத்திரத்தில் தொடங்கி பல நிஜ கதாபாத்திரங்களையும் இந்தப் படத்தில் சட்டையர் முறையில் சாடியுள்ளனர். கதாநாயகி மார்கோ ராபியையும் போகிற போக்கில் கலாய்த்தது நக்கலின் உச்சகட்டம்..பல வசனங்கள் மூலம் அடல்ட்டு காமெடி மற்றும் சமகால சினிமா, நிகழ்வுகளை கலாய்ப்பது என அனைத்தும் சிறப்பு. பொதுவாக ‘பார்பி’ பொம்மைகளையே ஒரு புரட்சிகரமான செயலாக பார்க்கலாம். ஏனென்றால், அதுவரை உலகளாவிய நாடுகளில் பெண் குழந்தைகளுக்கான பொம்மைகள் என்றாலே அது குழந்தை பொம்மைகளாகத் தான் இருக்கும். ‘பார்பி’யின் வருகைக்கு பின்னரே ‘டாக்டர் பார்பி’, ‘சிங்கர் பார்பி’, ‘இஞ்சினீயர் பார்பி’ என பல துறைகள் சார்ந்த ‘பார்பி’ பொம்மைகள் விற்பனைக்கு வந்தன. அந்த பொம்மைகள் பல பெண்களின் கனவுகளாகவும் மாறின. அதுவே ‘பார்பி’ பொம்மைகளின் உலகளாவிய புகழ் மற்றும் வர்த்தகத்திற்கும் வித்தித்தது. இந்த விஷயத்தை படத்தின் ஆரம்பத்தில் கூறியது அதை நாம் மீண்டும் ஒரு முறை உணர்வதாக அமைந்தது..படத்தின் இரண்டாம் பாதியில் வரும் ஒரு பாடல் மற்றும் சில காட்சிகள் மட்டுமே ஒரு சராசரி ஹாலிவுட் படமாக இந்தப் படத்தை மாற்றுகிறது. அந்த இடங்கள் நம்மை கொஞ்சம் சலிப்படையவும் செய்கிறது. அதைத் தவிர்த்துப் பார்த்தால் இந்தப் படத்தை ஒரு சிறந்த கலைப் படைப்பாகவே பார்க்கலாம். வித்தியாசமான ஜானர்களில் உள்ள திரைப்படங்களை பார்ப்பவர்கள் நிச்சயம் இந்தப் படத்தை முழுமையாக ரசித்துப் பார்க்க முடியும்.