A I எனும் ஏழாம் அறிவு

ஜெர்மனியின் SCAPA FLOW தாக்குதல் உலகளவில் அச்சத்தை தோற்றுவித்தது. ராணுவ பாதுகாப்புள்ள கடற்படைத் தளத்தில் நுழைந்து ஒரு பிரமாண்ட போர் கப்பலை தாக்கி, ஆயிரம் வீரர்களையும் கொன்று, எந்த சேதாரமுமின்றி ஜெர்மனிக்குத் திரும்பிவிட்டார்கள் என்பது பிரிட்டனுக்கு பெரும் தலைகுனிவை ஏற்படுத்தியது. உலகின் பாதியை தன்வசம் வைத்திருந்த அதிகார தேசமும் தனது அலட்சியத்தால் அடி சறுக்கியது. இப்படியொரு கச்சிதத் தாக்குதலை கோட்டை விட்டதை தோழமை நாடுகளான சோவியத்தும் அமெரிக்காவும் சிரித்தன. இதன் விளைவாக மொத்த கோபமும் பிரிட்டனின் உளவு அமைப்பு 'அல்ட்ரா' மீது திரும்பியது. ‘எனிக்மா’வை உடைக்கும் புதிய கண்டுபிடிப்பை நிகழ்த்தியே ஆகவேண்டிய அழுத்தம் அதிகரித்தது. .ரகசிய அல்ட்ரா இயங்கிய பிளட்ச்லே பார்க் பள்ளியில் ‘எனிக்மா’வை உடைக்கும் திட்ட வரைபடங் களை உருவாக்கியிருந்தார் ஆலன் டூரிங். 3 பற்சக்கரங்கள், 26 எழுத்துகள், இது மாற்றியமைக்கும் சாத்தியங்களை ஒரு இயந்திரத்தை வைத்து கண்டுபிடிப்பதே சரி. அது மின்சாரத்தால் இயங்கும் தானியங்கி இயந்திரமாக இருக்கவும் முடிவு செய்தார். இந்த இயந்திரத்தில் 26 ஆங்கில எழுத்துகள் பொறிக்கப்பட்ட 36 பற்சக்கரங்கள் மூன்று அடுக்குகளில் சுழலும். இதுபோல மொத்தம் 108 பற்சக்கரங்கள். ஒவ்வொரு பற்சக்கரமும் 108 மின்சாரத் துளைகள் கொண்ட சுழல் அச்சில் பொருத்தப்படும். இத்துளை வழி செல்லும் மின்சாரக் கம்பிகள் ஒன்றுடன் ஒன்று இணைக்கப்பட்டிருக்கும். ஜெர்மன் துருப்புகளுக்கு அனுப்பப்படும் எனிக்மா ரகசிய செய்தியை, அல்ட்ரா ஊழியர்கள் இடைமறித்து கேட்டதும், அதை தட்டச்சு செய்து நிபுணர்களுக்கு அனுப்புவார்கள். நிபுணர்கள் அந்த மறை நுட்பச் செய்தியில் இருக்கும் ஒவ்வொரு எழுத்தையும் இந்த பற்சக்கரங்களில் நிறுத்தி, இயந்திரத்தை உயிர்பித்தால், அது தன் தேடலைத் தொடங்கும். .A வாக எனிக்மாவில் அழுத்தப்பட்ட எழுத்து A வாக வெளிவராது என்பது தானே அதன் ஆதி ரகசியம், அது போலவே தனது இயந்திரமும் பொருத்தப்பட்ட எழுத்துகளை விடுத்து, பிற சாத்தியங்களில் சுழலத் தொடங்கும். அதன் பின்னணியில் இருக்கும் 108 துளைகளில் மின்சாரம் ஒவ்வொரு எழுத்து சுழற்சிக்கும் பாய்ந்துகொண்டே இருக்கும். எப்போது 3 அடுக்குகளில் சுழன்று கொண்டிருக்கும் 108 பற்சக்கரங்களில் மின்சாரம் தடையின்றி பாய்கிறதோ அப்போது இயந்திரம் தனது இயக்கத்தை நிறுத்தும். பற்சக்கரங்கள் நின்ற எழுத்துகளை குறித்து எழுதினால், அது தான் அனுப்பப்பட்ட உண்மையான செய்தி. ஆலன் இந்த இயந்திரம் இயங்கும் விதத்தை தனது சகாக்களிடம் விவரித்த போது அனைவரும் ஆர்வமாக துள்ளிக் குதித்தனர். ஒரே ஒருவரைத் தவிர. அல்ட்ரா இயக்குநர் கமாண்டர் டெனிஸ்டனுக்கு இதில் நம்பிக்கை இல்லை. ‘இயந்திரம் கடிகாரம் போல சுழலுமாம்… சரியான எழுத்தில் நிற்குமாம். இது சுத்த பேத்தல்! ‘எனிக்மா’வை உடைப்பது என்பது சாத்தியமில்லாதது. இருந்தும் இக்கோரிக்கையை எப்படி நிராகரிப்பது என யோசித்தார்;.‘’கேட்பதற்கு நன்றாக இருக்கிறது ஆலன்! இதை உருவாக்க எவ்வளவு பணம் தேவைப்படும்?" நைச்சியமாக கேட்டார், சில நொடிகள் யோசித்த ஆலன் டூரிங் “ஒரு இயந்திரத்திற்கு ஒரு இலட்சம் பவுண்ட் தேவைப்படலாம்” என்றார். "இது போர்க்காலம். அப்பணத்தில் இன்னும் எத்தனை துப்பாக்கிகளை, குண்டுகளை, உணவுப்பொருட்களை வாங்கலாம். ஆகவே இக்கோரிக் கையை நிராகரிக்கிறேன்" என கைவிரித்துவிட்டார். ஒரு புதிய உருவாக்கத்தை விட உணவு முக்கியம் என்பவரிடத்தில் என்ன பேசுவது எனத் தெரியாமல் நின்றிருந்தார் ஆலன். அட்லாண்டிக் கடலில் சோவியத்திலிருந்து கோதுமை மற்றும் உணவுப் பொருட்களை சுமந்துகொண்டு, லண்டனை நோக்கி வணிகக் கப்பல்கள் வந்த வண்ணம் இருந்தன. கச்சாப் பொருட்கள், ஆயுதம், உணவு என 30க்கும் மேற்பட்ட வணிகக் கப்பல்கள் 'கான்வாய்' குழுவாகப் பயணிக் கும். இவைகளு க்குப் பாதுகாப்பாக ஒன்றிரண்டு கடற்படைக் கப்பல்கள் முன்னும் பின்னுமாக அணிவகுத்துச் செல்லும். அந்தி நேரம், அட்லாண்டிக் கடல் அலைகளின்றி அமைதியாகத் தவழ்ந்திருந்தது. திடீரென, கோதுமை சுமந்து சென்ற சோவியத் கப்பலின் ரேடியோ கரகரத்தது, அதன் கேப்டன் எடுத்துப் பேசினார், எதிர்முனையில் ஜெர்மன் குரல் வெறித்தனமாக கொக்கரித்தது.. ‘’நாங்கள் கடல் ஓநாய்கள். உங்களுக்காக அட்லாண்டிக் ஆழத்தில் பதுங்கிக் காத்துக் கொண்டிருக்கிறோம். இன்று இரவு எங்கள் வேட்டை நீங்கள்தான். அதிலும் உனது கப்பலைத்தான் முதலில் மூழ்கடிக்கப் போகிறோம்’’ என அக்குரல் ஓநாயைப் போல ஊளையிட்டது. இதைக் கப்பல் ஒலிப்பெருக்கியில் கேட்ட பணியாளர்களுக்கு நடுக்கம் பரவியது. சிலர் தப்பிக்க நினைத்து நீரில் குதித் து உறைந்து இறந்து போனா ர்கள். காரணம் ஜெர்மன் நீர்மூழ்கிகளின் மீது பெரும் அச்சத்தை விதைத்திருந்தது ‘ஸ்கா பாஃப்ளோ’ தாக்குதல். காடுகளில் ஓநாய்கள் வேட்டையாடும் முறையில், அட்லாண்டிக் கடலில் வணிகக் கப்பல்களை விரட்டும் துரத்தல் படலம் நடுநிசியில் தொடங்கியது. ஹிட்லரின் ஓநாய் நீர்மூழ்கிப் படை. ஐந்தாறு நீர்மூழ்கிகள் ஒரு கப்பலை பின்தொடர்ந்து விரட்டும். அவர்களிடமிருந்து தப்பிக்க அதிவேகத்தில் அக்கப்பல் செல்லும்போது, கூட்டத்திலிருந்து பிரிந்துவிடும். பிறகு, அதை எளிதாகக் குண்டுகளால் தாக்கி அழிப்பார்கள். அன்றிரவு மட்டும் பிரிட்டனுக்கு சென்ற உணவு, கச்சாப்பொருள், ஆயுதங்கள் என அனைத்தையும் அழித்திருந்தது ஜெர்மன் கடற்படை..ஜெர்மனியின் இடைவிடாத விமானத் தாக்குதலுக்குப் பிறகு, ஏற்கெனவே பிரிட்டன் வறுமையில் இருப்பதை சென்ற அத்தியாயங்களில் அறிந்திருப்போம். மக்கள் வரிசையில் காத்திருந்து ரேஷன் முறையில் உணவு பெற்றனர். கைவசமிருந்த மூலப்பொருட்களை காக்க, ஆடம்பர உணவுத் தயாரிப்புக்கு தடை விதிக்கப்பட்டிருந்தது. ராஜ குடும்பம் மற்றும் சில செல்வந்தர்கள் தவிர மக்கள் அத்தியாவசிய உணவு மட்டுமே சமைக்க வேண்டும் என பல போர்க்கால உணவு விதிகளை பிரிட்டன் நடைமுறைப்படுத்தியிருந்தது. ‘ஸ்கா பாஃப்ளோ’ தாக்குதலுக்கு பிறகு, ஹிட்லர் அழிக்க இருந்ததே இந்த அத்தியாவசியத்தைதான். எப்படி முதலாம் உலகப்போரில் ஜெர்மனியின் கடற்பரப்பில் கப்பல்கள் நுழையவிடமால் தடுத்து (Blockade) செயற்கை வறுமையை உருவாக்கி, பிரிட்டன் சரணடைய வைத்ததோ, அதை அவர்களுக்கே திருப்பித் தர திட்டமிட்டார். பிரிட்டனின் நேச நாடுகள் அமெரிக்கா மற்றும் சோவியத் மற்றும் அதன் ராஜாங்கத்துக்கு உட்பட்ட எந்த நாடுகளில் இருந்தும் ஒரு கப்பல் கூட பிரிட்டனுக்குள் நுழையக்கூடாது, முதலில் மிரட்டுங்கள், இரவில் விரட்டுங்கள், பிறகு வேட்டையாடி விளையாடிக் கொல்லுங்கள் என ஓநாய் நீர்மூழ்கிகளுக்கு கட்டளையிட்டிருந்தார் ஹிட்லர். இதற்கு வேட்டைக்களமாக அவர்கள் தேர்ந்தெடுத்த பகுதிதான் அட்லாண்டிக் கடலின் கருங்குழி ( The Black Pit ) என அழைக்கப்பட்டது. கடல் பயணத்தின்போது வணிகக் கப்பல்களுக்கு பாதுகாப்பாக அண்டை நாடுகளின் போர் விமானங்கள் வானில் பறந்தபடி கண்காணிக்கும், அதன் எல்லை தான் இந்த அல்டாண்டிக் மையப்பகுதி. எத்திசையிலிருந்தும் பிறநாடுகள் உதவிக்கு வர முடியா தொலைவுப் பகுதி இது. இதைக் கடப்பதற்கு வணிகக் கப்பல்களுக்கு 5 நாட்கள் தேவை. ஆகவே, இக்கருங்குழியில்தான் ஓநாய் நீர்மூழ்கிககள் பதுங்கிக் காத்திருக்கும். யாருமற்ற இந்த எல்லைக்குள் கப்பல் நுழைந்த நொடியில் தாக்குதல் தொடங்கும். அதிலும் ஜெர்மனியின் மற்ற படைகளை விட, நீர்மூழ்கிக் கப்பல் படை பெயரைக் கேட்டால் பிறநாடுகள் நடுங்கும். இதற்குக் காரணமிருந்தது. . போரின் எந்த சூழ்நிலையிலும் பயணிகள் கப்பலைத் தாக்கக்கூடாது என்பதுதான் உலக நாடுகளுக்கிடையேயான மனிதநேய உடன்படிக்கை. ஆனால், 2ம் உலகப்போர் தொடங்கிய சில மணிநேரங்களில் SS Athenia என்ற பயணிகள் கப்பலை தாக்கி மூழ்கடித்தது ஜெர்மனியின் U-30 நீர்மூழ்கி. இதில் ஆயிரத்துக்கும் அதிக பொதுமக்கள் கடலில் மூழ்கினர். போர் குறித்த எந்த வித முன்னறிவுப்பும் இல்லாமல், முதல் தாக்குதலையே ஈவு இரக்கமின்றி செய்யுமளவு கொடூரமானது ஜெர்மனியின் நீர்மூழ்கி ஓநாய்படை. 'அல்ட்ரா' ப்ளட்ச்லே பார்க் பள்ளியில் பதைபதைப்புடன் நின்றிருந்தார் கமாண்டர் டெனிஸ்டன். அவரது எதிரில் ஆலன் தலைமையிலான நிபுணர் குழு. டெனிஸ்டனைக் கூர்மையாகப் பார்த்தார் ஆலன். ‘ஒரு லட்சம் பவுண்டுகளில் எத்தனை பேருக்கு உணவு கிடைக்கும் என்றீர்களே, எனிக்மாவை உடைக்கும் இந்த இயந்திரம் மட்டும் உருவாக்கப்படவில்லை என்றால் ஒரு ரொட்டித் துண்டுகூட பிரிட்டன் துறைமுகத்தை அடையாது’ என்கிற உண்மையை அவரது பார்வை உணர்த்தியது. அதை ஏற்றுக் கொள்ள முடியாமல் கோபத்தில் எழுந்து வெளியேறினார் கமாண்டர் டெனிஸ்டன்.இனி, இவரிடம் பேசிப் பலனில்லை என்பதை உணர்ந்த ஆலன், ஒரு காகிதத்தை டைப்ரைட்டரில் நுழைத்து, ஒரு கடிதம் அடித்தார். Secret and Confidential, To,The prime Minister only,10, Downing Street அன்புள்ள பிரிட்டன் பிரதமர் வின்ஸ்டன் சர்ச்சிலுக்கு, ஆலன் எழுதிக் கொள்வது, ‘எனிக்மா’வை உடைக்கும் பணியில் ஈடுபட்டிருக்கும் எங்களுக்கு உதவிசெய்ய ஊழியர்கள் இல்லை. இயந்திரம் வாங்க காசில்லை. இங்கு நிர்வாகம் என்பதே சரிவர இயங்குவதில்லை என ‘அல்ட்ரா’ மீது ஒரு பெரிய புகார்க்கடிதம் எழுதினார். உலகம் விரியும். - ஹரிஹரசுதன் தங்கவேலுசைபர் பாதுகாப்பு வல்லுநர்.பெட்டி செய்தி: A I-க்கு எதிரான போராட்டம்கடந்த வாரம் ஹாலிவுட் துணை நடிகர்கள் அமைப்பு SAG - AFTRA மற்றும் திரை எழுத்தாளர் அமைப்பு Writers Guild of America இரண்டும் ஒன்றிணைந்து ஒரு பெரும் வேலைநிறுத்தப் போராட்டத்தில் குதித்துள்ளார்கள். காரணம், நமது செயற்கை நுண்ணறிவுதான்! ‘ஜெனெரேட்டிவ் A I’ எனப்படும் உருவாக்கும் திறன்கொண்ட செயற்கை நுண்ணறிவைக் கொண்டு, துணை நடிகர்களை ஒவ்வொருவராக ஸ்கேன் செய்ய A I நிறுவனங்கள் அழைப்பு விடுத்திருக்கிறார்கள். இதன் மூலம் துணை நடிகர்களை ஒருமுறை ஸ்கேன் செய்து, அவர்களது Digital Double உருவத்தை உருவாகிவிட்டால் பின்னணிக் காட்சிகளுக்கு அதையே பயன்படுத்திக் கொள்ளலாம். அவர்கள் நேரடியாக வந்து நடிக்க வேண்டிய அவசியமில்லை. ‘அடப்பாவிகளா! ஒருநாள் கூலியைக் கொடுத்துவிட்டு எங்கள் நடிப்பு வாழ்க்கைக்கே முடிவு கட்டப் பார்க்கிறீர்களா?’ என அவர்கள் புலம்ப… ‘பாஸ்! எங்களிடம் கதையின் கருவை மட்டும் வாங்கிக்கொண்டு மொத்த கதையையும் ChatGPT போன்ற ‘மொழி மாதிரி நுண்ணறிவை’ வைத்து எழுதிக் கொள்கிறார்கள்’ என்கிறார்கள் அமெரிக்க திரை எழுத்தாளர்கள். ஆக, திரையுலகில் AI வீச்சை கட்டுப்படுத்த பல கோரிக்கைகளுடன் இப்போது சாலையில் அமர்ந்திருக்கிறார்கள். இப்போராட்டத்திற்கு மிஷன் இம்பாஸிபிள் நட்சத்திரம் டாம் க்ரூஸ் உட்பட பல நடிகர்கள் ஆதரவு தெரிவித்திருக்கிறார்கள். இத விடுங்க! டாம் இந்த வயதிலும் இளமையாக இருப்பதை பார்த்தால் அவரே ஒரு AI யாக இருப்பாரோ என்ற சந்தேகம் உங்களுக்கும் உள்ளதா?