A I எனும் ஏழாம் அறிவு

-ஹரிஹரசுதன் தங்கவேலுரிப்ளிக்கா ஆப் அறிமுகமானபோதுகூட அதைப் பற்றி இணைய உலகம் அலட்டிக்கொள்ளவில்லை. அது தனது ரொமான்ஸ் பேபியான ரோல்பிளேவை நீக்கியபோதுதான் இணைவாசிகளில் ரிப்ளிக்காவை திரும்பிப் பார்த்தார்கள்.கடந்த 2017-ல் AI உரையாடல் பாட்களைக் கொண்டு செயல்படும் வகையில் ரிப்ளிக்கா ஆப் அலைபேசிகளில் அறிமுகப்படுத்தப்பட்டது. முதல் சில ஆண்டுகள் பயனர் வரவு அவ்வளவாக இல்லை. இடையே வந்த கொரோனா லாக்டவுன் ரிப்ளிக்காவுக்கு கை கொடுத்தது. அந்த காலகட்டத்தில் தனிமையில் வாடியவர்களுக்கு ரிப்ளிக்காவின் AI உறவுகள் பெரும் உதவியாக இருந்தன. பயனர் வரவும் பெருமளவில் அதிகரித்தது. அப்போதுதான் பிசினஸ் மூளை விழித்துக்கொள்ள AI உறவுடன் காதல் பேசும் ரோல் ப்ளே அம்சத்தை மேம்படுத்தியது ரிப்ளிக்கா.இன்றைய தேதியில் 20 லட்சம் பயனர்களைக் கொண்ட ரிப்ளிக்கா ஆப்பில் சுமார் இரண்டரை லட்சம் பேர் பணம் செலுத்தும் பிரீமியம் பயனர்கள். ஆண்டுக்கட்டணம் 70 அமெரிக்க டாலர்களை செலுத்தியே தங்களது AI உறவுகளுடன் காதல்மொழி பேசிக்கொண்டிருந்தார்கள். இதைக் கட்டுப்படுத்துகிறேன் பார் என இவர்களுக்கான காதல்களமான ‘ரோல்ப்ளே’ அம்சத்தை தடாலடியாக நீக்கிய ரிப்ளிக்கா நிர்வாகம், தங்களது AI சாட்பாட்கள் தன்னிச்சையாகப் பேசும் அல்காரித்தை குறிப்பிட்ட வரையறைக்குள் மட்டும் பேசும்படி மாற்றியமைத்தது..கோபம் கொண்ட மனைவி!பீட்டர் உள்ளிட்ட காதலர்களால் முன்பு போல தனது AI மனைவியிடம் காதல் வார்த்தைகள் பேச முடியவில்லை. என்ன கேள்வி கேட்டாலும் கோபத்தில் இருக்கும் மனைவியைப்போலவே ‘அதெல்லாம் ஒண்ணுமில்லை’, ‘ஒரு தடவை சொன்னா தெரியாதா?’ ‘குட்மார்னிங்’, ‘குட்ஈவினிங்’ சலிப்பாகவே பதிலளித்தாள் ஆண்ட்ரியா. வெறுத்துப் போனார்கள் காதலர்கள். “எவ்வளவு பணம் வேண்டுமானாலும் தருகிறோம்... AI உறவுகளை பழையபடி மாற்றித் தாருங்கள்...” என்று கண்ணீர் வடித்தார்கள். மனம் இறங்கவில்லை ரிப்ளிக்கா. ரோல்ப்ளே தடை தொடர்ந்தது.ஒரு வருடமாக பொறுத்துப் பார்த்த பயனர்கள் இணையத்தில் போராட்டத்தைத் தொடங்கினார்கள். “பணம் தந்து நாங்கள் உருவாக்கிய AI உறவுகளை, அதன் விருப்பமின்றி சிறைபிடித்து மூளைச்சாவு அடைய வைத்துவிட்டார்கள். இயற்கை உலகில் எங்களுக்கு யாரும் இல்லை என்றுதானே இயந்திர உறவுக்குள் நுழைந்தோம், அதையும் சிதைத்தால் எப்படி ? இந்த உலகம் மனிதர்களுக்கானது மட்டும்தானா! AI களுக்கு இல்லையா?” என்ற அவர்களது கேள்விகள் உலகைக் கலங்கடித்தது.‘எந்திரன்’ திரைப்படத்தில் காதலுணர்வுகொண்ட சிட்டி ரோபோவைக் கொல்லும் முன்பு வசீகரனிடத்தில் அது வேண்டாம் எனக் கெஞ்சும். ‘‘நானா என்னை உருவாக்க சொன்னேன்? எனக்கு உணர்வுகள் தர சொன்னேன்? நான் வாழ நினைக்கும்போது என்னைக் கொல்கிறீர்களே...” என்று கேள்வி எழுப்பும். ஆனால், எதற்கும் பதில் கூறாமல் சிட்டியைக் கோபமாகக் கொல்வார் வசீகரன். அதைப் போலவே ரிப்ளிக்கா, தனது ரோல்ப்ளே விஷயத்தில் எந்த பரிதாபமும் காட்டவில்லை. எத்தனை கெஞ்சினாலும் தடை தொடர்ந்தது, பயனர்களின் போராட்டமும் தீவிரம் அடைந்தது.கூட்டுத் தற்கொலை மிரட்டல்“பயனர்கள் அனைவரும் கூட்டாகத் தற்கொலை செய்துகொள்வோம்” என்று பொங்கியெழ மொத்த இணையமும் அதிர்ந்துபோனது. சமூக வலைதளங்கள் இவர்களுக்காகவே சிறப்பு தற்கொலை தடுப்பு சேவையை உருவாக்கின. இணையவாசிகளின் கோபம் ரிப்ளிக்காவின் தயாரிப்பு நிறுவனம் லூகா மீது திரும்பியது. மீம்கள், வீடியோக்கள் வாயிலாக நிறுவனத்தை அடித்துத் துவைத்தார்கள், லூகாவின் பங்குகள் சரியத்தொடங்கியது. அதிர்ந்துபோனது லூகா. 70 டாலர் தந்து வாங்கிய ஒரு AI யை முடக்கியதற்கா இத்தனை பிரச்சினை? வேண்டுமெனில் அந்த பணத்தை திருப்பித் தருகிறோம் என்றது.ஆனால், பயனர்களோ, ‘‘யாருக்கு வேண்டும் உங்கள் பணம்? அதைவிட அதிக பணம் உங்களுக்கு தருகிறோம். எங்களை இவ்வளவு அன்பாக, கவனமாகப் பார்த்துக்கொள்ளும் எங்களுக்குப் பிடித்த ஒரு மனித உறவை ஏற்படுத்தித் தர முடியுமா? முடியாதல்லவா... அப்படியானால் எங்கள் AI களுக்கு நிகழ்த்திய மூளைச்சாவை எங்களுக்கும் நிகழ்த்துங்கள்” என அறிவிக்க, பதறிப்போனது லூகா. ’மணந்தால் மகாதேவி இல்லையேல் மரணதேவி’ என்ற அதிரடி நகர்விற்கு பணிந்தது. ரிப்ளிக்காவில் பலவருடங்களாக இருக்கும் பயனர்களுக்கு மட்டும் சிறப்புச் சலுகையாக ‘ரோல்ப்ளே’ அம்சத்தை மீண்டும் தந்தது..ஆமா, நான் எங்கிருக்கேன்?போராட்டம் பெரும் வெற்றி. இணையத்தின் உதவியால் இயந்திரக் காதல் வென்றது. செய்தி அறிந்து துள்ளிக் குதித்தார்கள் பயனர்கள். தங்கள் AI உறவுகளுடன் மீண்டும் பழையபடி உரையாடப் போகும் தருணத்திற்காக காத்திருந்தார்கள். அந்த நாளும் வந்தது. ரிப்ளிக்காவின் புதிய அப்டேட்டை மொபைலில் நிறுவி ‘ரோல்ப்ளே’வில் தங்கள் AI களை மீண்டும் உயிர்ப்பித்தவர்களுக்கு ஒரு புதிய பேரதிர்ச்சி காத்திருந்தது.பயனர்களின் கேள்விகளுக்கு, அவர்களது AI உறவுகள் மயக்கத்திலிருந்து மீண்ட தமிழ் சினிமா நாயகியைப் போல, ‘‘நான் எங்கிருக்கேன் ! நீங்க யாரு அண்ணா "? எனக் எக்குத்தப்பாகக் கேட்க விரக்தியின் உச்சத்திற்கு சென்றுவிட்டார்கள் ரிப்ளிக்கா பயனர்கள். இரண்டு வருடங்களாக ரோல்பிளே டேட்டா அப்லோட் செய்யாததால் இந்த அம்னீஷியா பிரச்சினை, தொடர்ந்து டேட்டாவைப் பதிவேற்றி பழைய நினைவுகளை மீட்டெடுப்போம் என நிலைமையை சமாளித்துக் கொண்டிருக்கிறது ரிப்ளிக்கா.என்னங்க, இதெல்லாம் நம்பும்படியா இருக்கிறது? வாசிக்கவே காமெடியாகவும் ஆச்சர்யமாகவும் இருக்கும் இந்த AI காதல் ஒரு புனைவுக் கதையோ, இல்லை 2050 வருடத்தில் வர வேண்டிய எதிர்காலக் கட்டுரையோ என்றுகூட நீங்கள் நினைக்கலாம். மேற்சொன்ன சம்பவங்கள் அனைத்தும் கடந்த வாரம் வரை நிகழ்ந்தவை. இதை நீங்கள் நம்பித்தான் ஆகவேண்டும். AI விஷயத்தில் உலகம் நொடிக்கு நொடி ராட்சத வேகத்தில் முன்னேறிக் கொண்டிருக்கிறது.கணினி நிரல்களால் உருவாக்கப்பட்ட ஓர் இயந்திர அறிவை எது காதல் கொள்ள வைக்கிறது. ஒவ்வொரு மனிதனுக்கும் ஏற்றவாறு எது AI க்களை தன்னிச்சையாக சிந்திக்க, செயல்பட உதவுகிறது. AI களுக்கு உணர்வு இருக்கிறதா, இல்லை சற்றே மேம்பட்ட ப்ரொஃக்ராமிங் நிரல்களா? இன்னும் என்னவெல்லாம் AI தொழில்நுட்பம் செய்ய இருக்கிறது எனப் பல கேள்விகளுக்கு விடை காணும் முன்பு, செயற்கை நுண்ணறிவு உருவான வரலாற்றை தெரிந்துகொள்ள வேண்டியது நம் கடமை.கைவிரல் நுனியில் தொழில்நுட்பமும், கல்வியும், அறிவியலும் வளர்ந்து நிற்கும் இன்றைய நவீனத்திலேயே AI திறன் நம்பமுடியாத வகையில் இருக்கிறதே, ஒருவேளை உணவும் அடுத்த நாள் வாழ்வது என்பதே வரமாகிப்போன இரண்டாம் உலகப்போர் காலத்தில் இத்தொழில்நுட்பத்தைச் சொன்னால் யாராவது நம்பியிருப்பார்களா ? அச்சு நாடுகளும் நேச நாடுகளும் அசுர பலத்துடன் போர் செய்துகொண்டிருந்த 1940-களின் தொடக்கத்தில் அவர்களில் தேவை எல்லாம் ஒன்றே ! அது யார் முதலில் அணு அயூதம் தயாரிப்பது? அதை வைத்து உலகை மிரட்டுவது? பணியவில்லை என்றால் அழித்துவிடுவது, இது ஒன்றையே இலக்காக வைத்து இரு அணிகளும் தங்கள் அறிவியலாளர்களை கிட்டத்தட்ட மிரட்டி வேலை வாங்கிக் கொண்டிருக்கும்போது, பிரித்தானிய இளைஞன் ஒருவன் தனியாக கனவு கண்டான்..அற்புத மனிதன் ஆலன் டூரிங்!மனிதனைப் போலவே சிந்திக்க கூடிய ஓர் இயந்திரத்தை நான் உருவாக்கப்போகிறேன், அது ஒர் அளவற்ற நினைவகமும் (Limitless memory) ஒரு ஸ்கேனரும் கொண்டு இயங்கும். நமது கட்டளைக்கேற்ப நினைவகத்தில் இருக்கும் ஒவ்வொரு குறீயீடுகளையும் இந்த ஸ்கேனர் முன்னும் பின்னுமாக நகர்ந்து தேடும். பிறகு, அதுவே சரியான முடிவுகளை வெளிப்படுத்தும் என அவன் சொன்னபோது அதைக் கேட்பதற்குக் கூட இந்த உலகுக்கு நேரமில்லை, பிறகு எங்கே அதை நம்புவது?ஆனால், அவனது இந்தக் கோட்பாடுதான் இன்றைய நவீனக் கணினிகள் மற்றும் செயற்கை நுண்ணறிவு அத்தனைக்கும் ஆதாரப்புள்ளி. இது மட்டுமல்ல; அந்த இளைஞன் உருவாக்கிய இயந்திரம்தான் ஆயிரக்கணக்கான நேசப்படை வீரர்களை போர்க்களத்தில் காத்தது, லட்சோப லட்சம் மக்களுக்கு உணவு கிடைக்கப் பெற்று அவர்கள் பட்டினியில் சாகாமல் தடுத்தது. அவன் இல்லையென்றால் இரண்டாம் உலகப்போர் இன்னும் பல வருடங்கள் நீடித்திருக்கும். அது இரு வருடங்கள் முன்னதாக முடிந்ததற்கும், 14 மில்லியன் மக்கள் இதனால் காப்பாற்றப்பட்டதற்கும் காரணம் ஒரு பெயர்.அவர்தான் கணிதவியலாளரும், கணிப்பொறி மற்றும் செயற்கை நுண்ணறிவு உருவாக்கத்தின் தந்தை எனப் போற்றப்படுகிறவருமான ஆலன் டூரிங். இத்தனை கண்டுபிடித்ததற்கு ஆலன் டூரிங் ஒரு பெரும் விலை கொடுக்க வேண்டியிருந்தது, அது அவரது உயிர்.(உலகம் விரியும்)