என் கேள்விக்கு என்ன பதில்? : பிதுர்தோஷம் ஏன் ஏற்படுகிறது?

சொந்தத்தில் பெண் கொடுப்பது, பெண் வாங்குவது கூடாது என்று கூறுகிறார்களே, அது ஏன்?- வண்ணை கணேசன், பொன்னியம்மன்மேடு. சொந்தத்தில் பெண் கொடுப்பது, வாங்குவது கூடாது என்றெல்லாம் சாஸ்திரங்களில் சொல்லப்படவில்லை. அக்காள், தங்கை மகள்களை தாய் மாமன் என்ற முறையில் மணப்பது அந்தக் காலத்தில் இருந்தது. ஆனால், அப்படி உறவிலே கல்யாணம் செய்துகொள்வதால், பிறக்கக்கூடிய குழந்தைகளில் பல, அங்கஹீனமாகப் பிறப்பதாக அறிவியல் வளர்ச்சியில் கண்டுபிடித்திருக்கிறார்கள். இதனாலேயே சொந்தத்தில் பெண் கொடுப்பது, எடுப்பது கூடாது என்று தவிர்க்கப்படுகிறது. இறுதிஊர்வலத்தின்போது எறியப்படுகிற பூமாலைகளை சாலையில் மிதித்துக்கொள்ள நேரிடுகிறது. இதனால் கெடுதல் உண்டா?- த. சத்தியநாராயணன், அயன்புரம்.இறுதி ஊர்வலத்தில் போடப்படும் மாலைகள், பூக்கள் போன்றவற்றை தவறுதலாக மிதித்துவிட்டால் எந்தப் பாவமும் வந்துவிடாது. ஏனென்றால், எந்தப் பொருள் பூமியில் எறியப்பட்டாலும் அது உடனடியாக அதன் தன்மையை இழந்துவிடுகிறது. அதனால், இறுதி ஊர்வலம் செல்கையில் தெருவிலே சாலையிலே எறியப்படும் பூக்களை மிதிப்பதால் எந்த தோஷமும் வராது. அதேசமயம், அப்படிப்பட்ட பூக்களை மிதிக்க நேர்ந்தால், கிருமித்தொற்று, ஆரோக்யம் கருதி, கால்களை நன்றாகக் கழுவிவிட்டு வீட்டுக்குள் செல்வது நல்லது. ஹோமத்தில் பட்டுத் துணிகள், காசுகள் மற்றவைகள் போடுவதன் தாத்பரியம் என்ன?- மாரிமுத்து, சிட்லபாக்கம். ஹோமம் செய்யப்படும்போது, அதில் ஆவஹனம் செய்யப்படும் தேவதைகள் எழுந்தருள்வதாக ஐதிகம். அந்த தெய்வத்துக்கு உரிய அலங்காரம், பூஜை, நைவேத்யம் போன்றவற்றைச் செய்யும்விதமாகவே யாக அக்னியில் எல்லாப் பொருள்களையும் இடுகிறோம். மற்றபடி அவற்றை வீணாகத் தீயில் இடுவதாகக் கருதக்கூடாது. தெய்வங்களுக்கு உரிய உபசார ஆராதனை முறையே அது. எனவே அதனை வீண் என்று நினைக்கவே கூடாது. .சில கோயில்களில் மண்சோறு சாப்பிடுகிறார்களே, இதனால் என்ன நன்மை?- விக்னேஷ், சென்னை.மண்சோறு சாப்பிடுவது என்பது, வெற்றுத்தரையில் பரிமாறப்பட்டு உணவு உண்பது. குழந்தை பாக்யம் கிடைக்க, வயிற்றுநோய் குணமாக என்றெல்லாம் வேண்டிக்கொண்டு, அவை நிறைவேற வேண்டியோ அல்லது நிறைவேறிய பிறகோ பிரார்த்தனையாக மண்சோறு சாப்பிடுவார்கள். இது தெய்வத்தின் மீதான பக்தி, நமது பிரார்த்தனையின் வலிமை இவற்றின் வெளிப்பாடுதான் இத்தகைய பழக்கங்கள் எல்லாம். தரையில் உட்கார்ந்து சாப்பிடுவதையே கௌரவக் குறைச்சலாகப் பார்க்கும் இந்தக் காலத்தில் தரையிலேயே உணவைப் பரிமாறிச் சாப்பிடுவது என்பது, தெய்வத்தின் மீதுள்ள பக்தியின் வெளிப்பாடே.பிதுர்தோஷம் ஏன் ஏற்படுகிறது? அதைப் போக்கும் வழி என்ன?- வசந்தா மாரிமுத்து, சென்னை-64. நம்முடைய முன்னோருக்கு வருஷத்துக்கு 96 நாட்கள் தர்ப்பணம் செய்யவேண்டும் என்கிறது சாஸ்திரம். மாதப்பிறப்பு, மன்வாதி நாட்கள், யுகாதி தினங்கள், அமாவாசை, மஹாளயபட்சம், அஷ்டகா, அனவஷ்டகா இப்படிப்பட்ட அந்த 96 நாட்களிலும் எல்லோரும் செய்வதில்லை. அப்படியே செய்பவர்கள் எல்லோரும் அக்கறையாகச் செய்வதில்லை. இப்படிப்பட்ட காரணங்களால் எல்லாம் பித்ரு தோஷங்கள் ஏற்படுகின்றன. அதாவது சிரத்தை இல்லாமல், அவரவர் இஷ்டப்படி செய்வதும் தவறு. பித்ருகள் திருப்தி அடையாவிட்டால், தோஷம் ஏற்படும். இதைப் போக்கிக்கொள்ள எளிய வழி, ராமேஸ்வரம் சென்று தில ஹோமம் செய்து பித்ருக்களை திருப்திப்படுத்துவதுதான். -மோகன் குருஜி