விருத்தாசலம் : வேண்டுதல்களை விரைவில் நிறைவேற்றும் வேடப்பர்!

தேவார மூவரில் சுந்தரமூர்த்தி சுவாமிகள் வரலாற்றோடு தொடர்புடைய தலம், விருத்தாசலம். இங்கிருந்து பெண்ணாடம் செல்கின்ற வழியில் பூந்தோட்ட எல்லையில் அமைந்துள்ள வேடப்பர் கோயில் உருவான விதம் சுவாரஸ்யமானது.சுந்தரமூர்த்தி சுவாமிகள் ஒவ்வொரு சிவதலமாக தரிசனம் செய்துவிட்டு விருத்தாசலத்திற்கு வந்தபோது, இதுவோ முதுகுன்றம், பழமலை! இறைவனோ பழமலை நாதர்! இறைவியோ விருத்தாம்பிகை! (விருத்தம் - முதுமை ). எனவே ஊரும் கிழம், இறைவனும் கிழம், இறைவியும் கிழம் எனக் கருதி இத்தலத்தை பாடாமல் கடந்துபோனார். இதைக் கண்டு வருந்திய விருத்தகிரீஸ்வரர் (பழமலைநாதர் ) முருகனை நினைத்தார்.இறைவனின் திருவுளக் குறிப்பறிந்த முருகன் விருத்தாசலத்தை விட்டு சுந்தரர் வெளியே சென்றுவிடக்கூடாது என்ற எண்ணத்தோடு நான்கு திசையிலும் காவலுக்கு நின்றார் என்கிறது தலபுராணம்..தெற்கு திசையில் வேடப்பர் என்ற திருநாமத்திலும், மேற்கு திசையில் கொளஞ்சியப்பர் என்ற திருநாமத்திலும், வடக்கு திசையில் வெண்ணெய் மலையப்பர் என்ற திருநாமத்திலும், கிழக்கு திசையில் கரும்பாயிரம் கொண்டவர் என்ற திருநாமத்திலும் முருகப்பெருமான் கோயில் கொண்டுள்ளார்.தெற்கு திசை நோக்கிச் சென்ற சுந்தரரை வேடுவ குமரனாக எதிர்கொண்டு பொன்னையும் பொருளையும் பறித்துக்கொண்டு, ‘’நீங்கள் பழமலைக்கு வந்து வாங்கிக் கொள்ளுங்கள்’’ எனக் கூறிச் சென்றார். சுந்தரர் தனது குற்றத்தை உணர்ந்தார். திருமுதுகுன்றம் சென்று பழமலைநாதரைப் பாடி, தன் பிழைகளைப் பொறுத்தருள வேண்டினார். பழமலைநாதர் ஆலாலசுந்தரரின் வேண்டுதலை ஏற்று, ‘’பொற்காசுகளை நான் மணிமுத்தாறு நதியில் போட்டு விடுவேன். அதை நீ திருவாரூர் கமலாலயக் குளத்தில் எடுத்துக்கொள்ளலாம்’’ எனக் கூறினார். சுந்தரர் தன் பயணத்தைத் தொடர்ந்தார். அவ்வாறு உருவானதுதான் வேடப்பர் கோயில்.விருத்தாசலத்திலிருந்து பெண்ணாடம் செல்லும் சாலையில் சுமார் மூன்று கிலோ மீட்டர் தொலைவில் சாலையின் வலது பக்கம் வயல்வெளிகள் நிறைந்த, அடர்ந்த மரங்கள் சூழ்ந்த குளிர்ச்சி பொருந்திய ஒரு ரம்யமான சூழலில் வேடப்பர் கோயில் அமைந்துள்ளது..இது ஒரு வித்தியாசமான கோயில். பொதுவாக முருகன் கோயிலில் சிவன், பார்வதி சன்னதிகள் இருக்கும். ஆனால் இங்கு சுதையாலான குதிரைச் சிலைகள், யானைச் சிலைகளும்; கருப்பசாமி, முனியப்பன் போன்ற கிராம தெய்வங்களின் சன்னதிகளும் உள்ளன.கோயில் வளாகத்தில் நுழையும்போது இடப்பக்கம் முனியப்பன், கருப்பசாமி சன்னதிகளும்; மூல சன்னதியின் முன்பு தென்புறம் இரு குதிரைச் சிலைகளும், வடபுறம் ஒரு யானைச் சிலையும், ஒரு குதிரைச் சிலையும் அமைக்கப்பட்டுள்ளன.கருங்கற்களால் கட்டப்பட்ட கருவறையில் உயர்ந்த பீடத்தின் மீது வேடப்பர் வள்ளி, தெய்வானை சமேதரராய் நின்ற கோலத்தில் எழுந்தருளியுள்ளார். பொதுவாகவே முருகன் என்றாலே அழகுதான். ஆனால் இங்கு அழகுக்கு அழகு சேர்க்கும் வண்ணமாக சந்தனக் காப்பு மற்றும் மலர் அலங்காரத்தில் கண்களை விட்டு அகலாவண்ணம் அருட்காட்சிபுரிகின்றார். ஆதியில் இருந்த திருமேனி பீடத்திற்குக் கீழ்ப் பகுதியில் நிறுவப்பட்டுள்ளது. கருவறை மீது ஏகக் கலசம் தாங்கிய ஒரு நிலை விமானம் முருகனின் பல்வேறு சுதைச் சிற்பங்களைத் தாங்கிய வண்ணம் எழிலோடு காட்சியளிக்கின்றது..கருவறை வாயில் முன்பு இருபுறமும் விநாயகர் மற்றும் சுந்தரமூர்த்தி நாயனார் ஆகியோர் அருள்கின்றனர். கருவறையைச் சுற்றிலும் பக்தர்கள் இலகுவாக வலம் வரும் வகையில் மகாமண்டபம் எழுப்பப்பட்டுள்ளது. அதன் வழியே முருகனை நோக்கியவாறு மயில் வாகனமும் பலிபீடமும் அமைந்துள்ளது. அத்துடன் மிகப்பெரிய வேல் ஒன்றையும் காணமுடிகிறது. தல விருட்சமாக உகா மரமும், தீர்த்தமாக மணிமுத்தாறும் விளங்குகின்றன. தினசரி தமிழ் முறைப்படி ஒரு கால பூஜை நடைபெறுகிறது.இத்தலத்தில் செவ்வாய், சஷ்டி, கிருத்திகை தினங்களில் சிறப்பு அபிஷேக ஆராதனைகள் நடைபெறுகின்றன. வைகாசி விசாகம், தைப்பூசம், கந்தசஷ்டி போன்ற வருட உற்சவங்களும் கொண்டாடப்படுகின்றன. பெரிய திருவிழாவாக சித்ரா பௌர்ணமி கடைப்பிடிக்கப்படுகிறது. அன்று சுற்றுப்புற கிராமங்களில் இருந்து முருகனுக்கு பால்குடம் மற்றும் காவடிகள் எடுத்து வந்து நேர்த்திக்கடன் செலுத்துவார்கள். இதில் ஏராளமான பக்தர்கள் கலந்துகொள்வது குறிப்பிடத்தக்கது..இங்கு பிராது கட்டுவது என்ற நிகழ்வு பிரசித்தம். காணாமல் போன பொருட்கள் திரும்பக் கிடைக்க, திருமணத்தடை விலக, குழந்தை பாக்யம் கிட்ட, குடும்ப பிரச்னைதீர, உடல் நலம்பெற, தொழில் தடை நீங்க எனப் பல்வேறு வேண்டுதல்களுக்கு அதற்கென உரிய படிவத்தில் எழுதிக்கட்டணம் செலுத்தி, முருகனின் திருப்பாதங்களில் வைத்து பூஜித்து, பின் அதற்கான உரிய இடத்தில் கட்டி வைப்பர். இப்படிச் செய்பவர்களின் பெரும்பாலான கோரிக்கைகள் நிறைவேறி விடுகிறதாம். கோரிக்கைகள் நிறைவேறிய பின் பிராதுகளை திரும்பப் பெற்றுக்கொள்ளலாம். சிலர் வேண்டுதல்கள் நிறைவேற முருகனிடம் வேண்டிக் கொண்டு பூட்டு ஒன்றை வேல் கம்பியில் பூட்டிவிட்டுச் சென்று விடுகின்றனர். கோரிக்கை நிறைவேறிய பின் அப்பூட்டை திரும்ப எடுத்துச் சென்று விடுவர்.வேண்டுதல்கள் நிறைவேறும் என மனதார நம்பி, தம்மை வழிபட்டுச் செல்லும் பக்தர்களின் கோரிக்கைகளை விருத்தாசலம் வேடப்பர் விரைவில் நிறைவேற்றி வைக்கிறார் என்பதுதான் உண்மை!எங்கே இருக்கு ?விருத்தாசலத்தில் இருந்து பெண்ணாடம் செல்லும் பாதையில் 3 கி.மீ. தொலைவில் வேடப்பர் கோயில் உள்ளது. பேருந்து வசதிகள் உள்ளன.தரிசன நேரம்காலை 6 - மாலை 6.- வி. பி. ஆலாலசுந்தரம்

விருத்தாசலம் : வேண்டுதல்களை விரைவில் நிறைவேற்றும் வேடப்பர்!

Related Stories