குமாரவயலூர்: அருணகிரிநாதரை வயலூருக்கு வரவழைத்த வடிவேலன்!

தொன்றுதொட்டு நம் மண்ணில் இறைபக்தியிலும், கோயில் திருப்பணியிலும் பெண்களின் பங்கும் கணிசமாக இருந்து வருகிறது. அந்த வகையில், பெண் பக்தை ஒருவர் தம் பக்தி மேலீட்டால் உமா மகேசுவரியை தன் மகளாகப் பாவித்து, இறைவனுக்கு மணமுடித்து வைத்த சம்பவம் ஒரு தலத்தில் அரங்கேறியுள்ளது.சுமார் ஆயிரத்து நூறு ஆண்டுகள் பழம்பெருமைமிக்க அத்தலம், சோழவள நாட்டில் அமைந்துள்ள குமார வயலூர். இது வயலூர் என்றும் அழைக்கப்படுகிறது.இங்கு கி.பி. 902-ஆம் ஆண்டு முற்காலச் சோழ மரபில் வந்த முதலாம் ஆதித்தன் சிவாலயம் ஒன்றைக் கட்டி, இறைவனுக்கு திருக்கற்றளி பரமேசுவரர் என்ற பெயரைச் சூட்டினார். திருக்கற்றளி என்பதற்கு புனிதமிக்க கற்கோயில் என்று பொருள்.இதற்குக் காரணம் என்னவென்றால், சங்க காலம் தொட்டு நம் மண்ணில் இறைவன் எழுந்தருளியிருக்கும் கோயில்கள் இருந்தாலும், கி.பி. ஒன்பதாம் நூற்றாண்டு வரை கட்டப்பட்ட கோயில்கள் எல்லாம் செங்கல் கட்டடங்களே. குன்றுகள் இருந்த ஒரு சில இடங்களில் குடைவரைக் கோயில்கள் இருந்தன. ஆனால், முதலாம் ஆதித்தசோழன் முழுக்க முழுக்கக் கல்லால் ஆன கோயில்களை காவிரி பாய்ந்து வளப்படுத்தும் சோழநாட்டில் கட்டி வைத்தான். அவ்வகைக் கற்றளிகளில் வயலூர் சிவாலயமும் ஒன்றாகும்.. திரும்பிய பக்கமெல்லாம் பச்சைப்பசேல் எனப் பூத்துக் குலுங்கும் நெல், தென்னை, வாழை, வயல்கள். அதனாலேயே இத்தலத்திற்கு காரணப்பெயராக அக்காலத்திலேயே வயலூர் எனப் பெயரிடப்பட்டது. அந்த வேளையில் வயலூர் பகுதியைச் சேர்ந்த சேந்தன்காரி என்னும் பக்தை இறைவி உமா மகேசுவரியின் மீது தீராபக்தி கொண்டு ஒரு செப்புப்படிமம் ஒன்றைச் செய்து, அர்த்த மண்டபத்தில் வைத்து வழிபாட்டைத் துவக்கினார்.அந்த உமாமகேசுவரியை தம் மகளாகவே பாவித்து இறைவன் பரமேசுவரருக்கு மணம் செய்து வைத்தார். அந்த வேளையில் தன் உடன்பிறந்தார்களிடமிருந்து தனக்கு சீதனமாக வந்த நிலத்தை உமாமகேசுவரியின் தினசரி நைவேத்தியத்திற்கு அமுது படைக்கும் செலவுக்கு தானமாக அளித்தார். இந்த அறச்செயலுக்கு சேந்தன்காரியின் சகோதரன் மாறன் நக்கன் என்பவனே உறுதுணையாக இருந்து செயல்பட்டார். இதன்மூலம் சோழர் கால மகளிரின் உரிமை, அவர்களின் இறைப்பற்று மற்றும் கொடை உள்ளம் ஆகியவை தெரியவருகின்றன.அந்தப் பகுதி முழுவதும் காவிரி பாய்ந்து வளப்படுத்தியதால் மக்களின் பூர்வீகத் தொழிலான வேளாண்மைக்கு உறுதுணையாக அமையுமாறு நீர்ப்பாசனத்தில் உரிய கவனம் மன்னர்களால் செலுத்தப்பட்டது. ஊர்கள்தோறும் பல வாய்க்கால்கள் உருவாக்கப்பட்டன. குறிப்பாக வயலூரில் இருந்த வாய்க்கால்களில் சிந்தாமணிவதியும், இராஜேந்திர சோழன் வாய்க்காலும் குறிப்பிடத்தக்கவை. முதலாம் குலோத்துங்க சோழனின் பட்டத்தரசி தீனசிந்தாமணி ஆவார். அவரது பெயரில் இங்கு வாய்க்கால் அமைக்கப்பட்டிருந்தது. நூற்றாண்டுகள் பல கடந்தும் இன்றைக்கும் விவசாயம் சிறக்க இந்த புராதன வாய்க்கால்களே உறுதுணையாய் இருந்து வருவது குறிப்பிடத்தக்கது..ஊரின் வடபுறம் கிழக்குப் பார்த்தவண்ணம் கோயில் அமைந்துள்ளது. தெற்கு, வடக்கு ஆகிய பக்கங்களிலும் வாசல்கள் உள்ளன. கிழக்கு வாசலுக்கு எதிரே சக்தி தீர்த்தம் என்னும் பெரிய நீராழி மண்டபத்துடன் கூடிய தீர்த்தக்குளம் உள்ளது. கோயில் இரு சுற்றுகளைக் கொண்டது. பிரதான கிழக்கு வாசலில் மூன்று நிலை கோபுரம் உள்ளது. உள்ளே நுழைந்ததும் ஆஸ்தான மண்டபம் அமைந்துள்ளது. அதனையடுத்து ஐந்து நிலை ராஜகோபுரம் கம்பீரமாக உயர்ந்து நிற்கிறது. கோபுர வாசல் தாண்டியதும் பரந்த உள்சுற்று. அதில் வசந்த மண்டபம், முக மண்டபம், மகா மண்டபம், அர்த்த மண்டபம், கருவறை உள்ளது. வசந்த மண்டபம் பிற்காலத்தில், அதாவது கி.பி. 16ஆம் நூற்றாண்டு நாயக்கர் ஆட்சியில் கட்டப்பட்டது. இதைக் கட்டிய மன்னரின் சிற்பம் தூண் ஒன்றில் காணப்படுகிறது. செப்புக்கவசம் போர்த்திய கொடிமரம், பலிபீடம், நந்தி மண்டபம் ஆகியவை வசந்த மண்டபத்தில் உள்ளன. மண்டப வடபுறம் நவகிரக சந்நதி உள்ளது. இத்தல நவகிரக வழிபாடு சகல தோஷங்களையும் நீக்க வல்லது.நந்தி மண்டப வடபுறம் ஆதிநாயகி அம்பாள் சந்நதி உள்ளது. அம்பாள் சோழர் கலை அம்சப்படி நான்கு கரங்களுடன் கருணாம்பிகையாக எழுந்தருளியிருக்கிறாள். மேல் இரு கரங்கள் தாமரை மலர் ஏந்தி இருக்க, கீழ் இரு கரங்கள் அபயவரத ஹஸ்த முத்திரை காட்டியபடி உள்ளன. அம்பாள் சந்நதி எதிரே தெற்குப்பக்க வாசல் உள்ளது. முக மண்டப வாசலில் சுதையாலான துவார பாலகர் சிற்பங்கள் உள்ளன. முக மண்டப வடபுறம் நடராஜர், சிவகாமி அம்மன் சந்நதி உள்ளது. இந்த தில்லைக்கூத்தர் சதுர கரண தாண்டவத்தில் எழுந்தருளியிருப்பது குறிப்பிடத்தக்கது. அர்த்த மண்டப வாசலில் புடைப்புச் சிற்பங்களாய் துவாரபாலகர் உள்ளனர். கருவறை மூலவராய் ஆதிநாதர் லிங்கேசுவர மூர்த்தியாய் எழுந்தருளியுள்ளார். மூலவர் விமானம் வேசர வடிவில் உள்ளது. தேவ கோட்டத்தில் நர்த்தன கணபதி, தட்சிணாமூர்த்தி, துர்க்கை, சண்டிகேஸ்வரரும், தெற்குச் சுற்றில் அய்யனார், ஜேஸ்டாதேவி, நால்வர், அருணகிரி நாதர், பொய்யா கணபதி, முத்துக்குமாரசாமி ஆகியோரும் உள்ளனர்.திருவண்ணாமலையில் தங்கியிருந்த அருணகிரிநாதரை வயலூருக்கு வரும்படி குமாரக்கடவுள் கனவில் உணர்த்தினார். அதன்படி வயலூருக்கு விரைந்த அருணகிரிநாதர் முதலில் பொய்யா கணபதிக்கு ஐந்து பாடல்கள் பாடினார். பின்னர் வயலூர் சுப்பிரமணியருக்கு 18 பாடல்கள் தனது திருப்புகழில் பாடியுள்ளார். பின்னர் தல யாத்திரையாக அவர் சென்ற பல்வேறு இடங்களிலும் வயலூர் முருகனைப் பற்றிக் குறிப்பிட்டுப் பாடியுள்ளார். அந்த அளவுக்கு அவர் மனதில் வயலூர் குமரன் ஆழமான இடத்தைப் பிடித்திருந்தார். மூலவர் ஆதிநாதரின் கருவறைக்குப் பின்புறம் வள்ளி, தெய்வானை சமேத சுப்பிரமணியர் சந்நதி உள்ளது. இவருக்கு வாரியார் சுவாமிகள் தலைமையில் அமைந்த திருப்பணிக்குழு தங்கக் கவசம் ஒன்றைச் செய்து தந்துள்ளது. உற்சவ காலங்களில் சுப்பிரமணியரை தங்கக்கவச அலங்காரத்தில் கண்டு தரிசிப்பது கண்கொள்ளாக் காட்சி.தோஷத்தால் பாதிக்கப்பட்ட குழந்தைகளை அதன் பெற்றோர்கள் இந்த சந்நதியில் வைத்து தத்துக்கொடுத்து வாங்கினால் தோஷம் நிவர்த்தி ஆகிவிடுகிறதாம். ஆகவே, நாள்தோறும் பரிகார பூஜைக்காக இத்தலத்தில் ஏராளமானோர் குவிகின்றனர். முன்னதாக அபிஷேகப் பொருட்களுடன் உள்சுற்றை பதினொரு முறை வலம் வந்து வழிபடுகின்றனர்.வடக்குச் சுற்றில் மகாலட்சுமி, காலபைரவர் சந்நதிகள் உள்ளன. தலவிருட்சம் வன்னி. முருகன் வள்ளியைக் கரம் பிடித்த தலம் வயலூர். ஆகவே, இங்கு திருமண வைபவம் நடத்தினால் வாழ்க்கை மங்களகரமாக இருக்குமாம். எனவே, சுற்றுவட்டார கிராமத்தினர் எல்லோரும் தங்கள் வீட்டு சுபகாரியங்களை இத்தலத்தில் வைத்து நடத்துவதை வழக்கமாகக் கொண்டுள்ளனர்.காமிக ஆகம முறைப்படி தினமும் ஆறுகால பூஜை நடைபெறுகிறது. ஆயிரம் ஆண்டுகளுக்கு முன்னரே இங்கு சித்திரை மாதப்பிறப்பும், தைப்பொங்கலும் மிக சிறப்பாகக் கொண்டாடப்பட்டனவாம். வைகாசி விசாக பிரமோற்சவம் 12 நாள் விழாவாக நடைபெறுகிறது. ஆண்டுதோறும் புனர்பூச நட்சத்திரத்தில் கொடியேற்றத்துடன் விழா துவங்குகிறது. சுவாதி நட்சத்திரத்தில் தேரோட்டம் நடைபெறும். விசாகத்தன்று ஆயிரக்கணக்கான பக்தர்கள் அலகு குத்தி, காவடி ஆட்டம் ஆடி, பால்குடம் எடுத்து வருவார்கள். பக்தர்கள் கந்தவேலுக்கு தங்கள் மனமும், அகமும் குளிர பாலபிஷேகம் நடத்தி நலமும், வளமும் வேண்டி வணங்கிச் செல்வர். விநாயகர் சதுர்த்தி, ஆடி கடைசி வெள்ளி, நவராத்திரி கொலு, ஐப்பசி அன்னாபிஷேகம், கந்த சஷ்டி, கார்த்திகை மகாதீபம், மார்கழி 30 நாட்கள் திருப்பள்ளியெழுச்சி, ஆருத்ரா தரிசனம், தைப்பூசம், மகாசிவராத்திரி, பங்குனி உத்திரம் ஆகிய விழாக்கள் மற்றும் மாதாந்திர கார்த்திகை, சஷ்டி நாட்களும் சிறப்பாகக் கொண்டாடப்பட்டு வருகிறது..தைப்பூசத்தையொட்டி முத்துக்குமாரசாமி வயலூரில் இருந்து கிளம்பி கீழ வயலூர், வடகாபுத்தூர், சோமரசம்பேட்டை, அல்லித்துறை, அதவத்தூர் ஆகிய பக்கத்து ஊர்களுக்கு எழுந்தருள்வார். அதுசமயம், ஆயில்ய நட்சத்திர நாளில் சோமரசம்பேட்டையில் அல்லித்துறை பார்வதீஸ்வரர், பொம்மினி சமுத்திரம் காசி விசுவநாதர், உய்யக்கொண்டான் மலை உஜ்ஜீவன நாதர், வரையூர் பெருமாள், சோமரசம்பேட்டை முத்துமாரி ஆகிய ஐந்து தெய்வங்கள் சப்பரங்களில் எழுந்தருளி சங்கமிக்கும் விழா வெகு விமரிசையாக நடைபெறும். பின்னர், முத்துக்குமாரசாமி வயலூர் திரும்பும் நிகழ்வு நடைபெறும். பங்குனி உத்திரத்தை முன்னிட்டு முதல்நாள் பக்தர்கள் பால்குடம் எடுக்கும் நிகழ்ச்சியும், இரண்டாம்நாள் தினைப்புனம் காக்கும் நிகழ்வும், மூன்றாம் நாள் வள்ளியை யானை விரட்டும் நிகழ்வும், நான்காம் நாள் வள்ளித் திருமண நிகழ்வும் நடைபெறும். இந்த திருக்கல்யாண உற்சவத்தை தரிசித்தால் திருமண பாக்கியம் கைகூடும் என்பது ஐதிகம். எனவே, இந்த வைபவத்தில் வந்து திருமண வரம் வேண்டி பலரும் பிரார்த்தித்து செல்வது வழக்கம். அவர்களது கோரிக்கை உடனடியாக நிறைவேறும் என்பதை இங்கு கூடும் பக்தர்களின் அனுபவ மொழியாகக் கேட்க முடிகிறது. தை, ஆடி அமாவாசை நாட்களில் சிறப்பு அபிஷேகம் நடைபெறும்.இக்கோயில் உறையூர் கூற்றத்து வயலூரில் அமைந்துள்ளது. இவ்வூருக்கு அருகில் இருந்த ஊர்களாக தென்னூர், அதவத்தூர் ஆகியன குறிப்பிடப்படுகிறது. இவற்றில் ஆயிரம் ஆண்டுகள் கடந்துவிட்ட பின்னரும் வயலூரும், அதவத்தூரும் இன்றைக்கும் அதே பெயரில் நீடித்திருப்பது குறிப்பிடத்தக்கது..கி.பி. 902இல் முதலாம் ஆதித்த சோழனைத் தொடர்ந்து முதலாம் பராந்தகன் (கி.பி. 914), சுந்தரசோழர் (கி.பி. 960), உத்தமசோழர் (கி.பி. 985), இராஜராஜசோழன் (கி.பி. 988), முதலாம் குலோத்துங்கன் (கி.பி. 1072) ஆகிய சோழ மன்னர்கள் இக்கோயில் வளர்ச்சியில் பெரிதும் அக்கறை எடுத்து, தானங்கள் அளித்தனர். தங்கள் குறைகள் யாவும் நீங்கி எல்லா நலமும், வளமும் குறைவிலாது பெற்றிட குமரக்கடவுள் அருளாட்சி புரியும் இந்த குமாரவயலூர் திருத்தலத்திற்கு அவசியம் ஒருமுறை குடும்பத்தோடு சென்று தரிசித்து வரலாமே!எங்கே இருக்கு?திருச்சி சத்திரம் பேருந்து நிலையத்தில் இருந்து வயலூருக்கு அடிக்கடி பேருந்து வசதி உள்ளது. பயண தூரம் 11 கி.மீ.தரிசன நேரம்காலை 6 – பகல் 1, மாலை 5 – இரவு 9. - ஆர். சுப்புலெட்சுமி

குமாரவயலூர்: அருணகிரிநாதரை வயலூருக்கு வரவழைத்த வடிவேலன்!

Related Stories