வடமாத்தூர்: கல்லில் வெளிப்படும் கணபதி!

மலைகள், வனங்கள் , வயல்கள் சூழ்ந்து இயற்கையின் மடியில் தவழும் அழகிய தலமாக விளங்குகிறது, திருவண்ணாமலை மாவட்டம், செங்கம் வட்டத்தில் அமைந்த வடமாத்தூர். இங்கு கோவில் கொண்ட மாணிக்க விநாயகர் சுயம்பு மூர்த்தமாகும்.ஜவ்வாது மலையில் தோன்றி, திருவண்ணாமலை மாவட்டத்திற்குள் பாய்கிறது சேயாறு. பாலாற்றின் துணை ஆறாக விளங்கும் இந்தச் சேயாறு வளம் சேர்க்கும் பூமியில் வடமாத்தூரும் ஒன்றாகும். இந்த ஆறு தோன்றியது குறித்து ஒரு புராணக்கதை உண்டு.ஜவ்வாது மலையில் சப்தரிஷிகள் தவமியற்றி வந்தனர். அதே பகுதியின் சமவெளியில் இறைவனின் இடப்பாகம் பெற சிவலிங்கம் நிறுவி வழிபாடு செய்யத் தொடங்கினாள், அன்னை பார்வதி. அப்போது பூஜைக்கு நீர் தேவைப்பட, தன் அன்னைக்காக நீரூற்று உருவாக்க ஜவ்வாது மலைத்தொடர் மீது அம்பு எய்தார் முருகப்பெருமான். அதன் பயனால் நீர் பெருகி சேயாறு உருவானது. ஆனால், அம்பின் தாக்கத்தில் மலையில் தவமியற்றிய ஏழு ரிஷிகளும் மாண்டுபோனார்கள். எனவே முருகனுக்கு தோஷம் ஏற்பட்டது. அது நீங்கிட சேயாற்றின் கரையோரம் ஏழு சிவாலயங்களை நிறுவி தோஷம் நீங்கப்பெற்றார்..சேயாற்றின் தென் கரையில் சப்தரிஷிகள் உருவாக்கி வழிபட்ட ஏழு சிவாலயங்கள் சப்த கயிலாயத்தலங்கள் என்றும்; முருகப்பெருமான் சேயாற்றின் வடகரையில் நிறுவி வழிபட்ட ஏழு சிவாலயங்கள் சப்தகரைகண்டதலங்கள் என்றும் வழங்கப்பட்டன. அதன் முதல் தலம், இவ்வூரிலிருந்து 7 கி.மீ. தொலைவில் அமைந்துள்ள காஞ்சி கரைகண்டேஸ்வரர் ஆலயமாகும். யுகங்களைக் கடந்து விண்ணை முட்டி நிற்கும் மலையே இறைவனாக விளங்கும் திருவண்ணாமலை அனைவராலும் போற்றப்படுகின்றது. இந்த மலையின் சுற்றளவு 14 கி.மீ. ஆகும். இதன் வெளிவட்டத்தில் சுமார் 15 கி.மீ. தெற்கே அமைந்த புனிதத்தலமாக விளங்குவதுதான் வடமாத்தூர்.கிழக்கு நோக்கிய ஆலயம். நுழைவு வாயிலின் மேற்பகுதியில் விநாயகர், சிவபெருமான், முருகப்பெருமான் எனச் சுதை வடிவங்கள் அழகுறக் காட்சிதருகின்றன. கொடிமரம், பலிபீடம், நந்திதேவரை அடுத்து கருங்கல் கூரை கொண்ட முன்மண்டபம் அமைந்துள்ளது. அடுத்து இடதுபுறம் எளிய வடிவில் எழுந்தருளியுள்ளார் மூலவர் மாணிக்க விநாயகர்.கைதேர்ந்த சிற்பி செதுக்கிய சிலையைப் போன்றே உருவமற்ற குண்டு கருங்கல்லானது மெல்ல மெல்ல விநாயகர் உருவம் பெற்று வருவது அதிசயம்! இந்த மாணிக்க விநாயகர் அனைத்து தோஷங்களையும் போக்கும் பெரும் வரப்பிரசாதியாக விளங்குகின்றார். வலதுபுறம் வள்ளி, தெய்வயானை சமேத முருகப்பெருமான் அருளாசி வழங்குகின்றார்.இறைவன் மதுரநாதீஸ்வரர் புதுப்பொலிவோடு கிழக்கு முகமாய் வாயிலை நோக்கிக் காட்சிதருகின்றார். கருவறைச் சுற்றில் தட்சிணாமூர்த்தி, லிங்கோத்பவர், விஷ்ணு துர்க்கை, கஜலஷ்மி, சண்டிகேஸ்வரர் சிலா வடிவங்கள் அமைந்துள்ளன.அன்னை மரகதாம்பிகை சன்னதி கி.பி. 1921இல் கட்டப்பட்டு, தற்போது புதுப்பிக்கப்பட்டுள்ளது. அன்னை மரகதாம்பாள் நின்ற கோலத்தில் அருள்கிறாள்..அம்மன் சன்னதியின் வெளியில் நின்று தரிசனம் செய்யும் போது மரகதாம்பிகை, விஷ்ணு துர்க்கை, கஜலஷ்மி என முப்பெரும் தேவியரும் ஒரு சேரக் காட்சியளிப்பது சிறப்பாகும். அம்மனுக்கு இடப்புறம் அமைந்துள்ள உற்சவமூர்த்திகள் சன்னதியில் மாணிக்க விநாயகர், வள்ளி, தெய்வயானை சமேத முருகப்பெருமான், சோமாஸ்கந்தர், பிரதோஷ நாயகர், மரகதாம்பாள் உள்ளனர். ஈசான்ய மூலையில் நவகிரக சன்னதியும், அதன் அருகே மேற்கு நோக்கிய காலபைரவரும் காட்சி தருகின்றனர்.தலவரலாறு:சுமார் ஐந்து தலைமுறைகளுக்கு முன்பு இவ்வூரில் வாழ்ந்த பக்தர் ஒருவருக்கு தன் ஊரில் ஆலயம் இல்லையே என்ற குறை இருந்து வந்தது. அதனால் நெடுந்தொலைவில் இருந்து ஒரு விநாயகர் சிலையை எடுத்து வந்து தன் வீட்டின் அருகே வைத்திருந்தார். அன்றிரவு அவர் கனவில் விநாயகப்பெருமான் காட்சி தந்து, "உங்கள் ஊரில் பல நூறு ஆண்டுகளாக நான் மண்ணில் மறைந்திருக்கிறேன். நீ ஏர் உழும்போது நான் வெளிப்படுவேன். என்னை வெளியே எடுத்து ஆலயம் எழுப்பு" என்று கூறி, தான் இருக்கும் இடத்தையும் சுட்டிக்காட்டி மறைந்தார்.திடுக்கிட்டு எழுந்த அந்தப் பக்தர் காலையில் ஏர்க்கலப்பையைத் தூக்கிக்கொண்டு அதில் மாடுகளைப் பூட்டி, வயலை உழத்தொடங்கினார். நெடுநேரத்திற்குப் பிறகு ஏர்க்கலப்பையை மூன்று கருங்கற்கள் தடுத்தன. அதைத் தோண்டி வெளியே எடுத்தபோது அவற்றில் இரண்டு உருண்டை வடிவிலும், மற்றொன்று மூஞ்சூறு போன்றும் காட்சி தந்தது. இதனால் மனம் மகிழ்ந்த அடியார், அதனை தன் இல்லத்திற்குக் கொண்டு வந்தார். உருவமற்ற மூன்று கற்களில் எதை விநாயகராகப் பாவிப்பது என்ற சிந்தனையிலேயே அன்று இரவு கண் அயர்ந்தார்.மீண்டும் விநாயகப்பெருமான் அவர் கனவில் தோன்றி, "உன் விருப்பப்படியே ஏதேனும் ஒரு கல்லை மூலவராக்கி வழிபடு. அதிலிருந்து நான் என் உருவத்தை வெளிப்படுத்துவேன்" என்று கூறி மறைந்தார். அதன்படியே மறுநாள் தன் வீட்டின் அருகே ஆலயம் அமைத்து கிழக்கு நோக்கியவாறு தனக்குப் பிடித்த அந்த உருண்டைக் கல்லையும், அதன் எதிரே சிறிய மூஞ்சுறு கல்லையும் நிறுவினார். மற்றொரு கல்லை தனியே ஆலயத்திற்குள் வைத்திருந்தார்.காலச்சக்கரத்தில் அந்த உருண்டைக் கல்லில் விநாயகரின் உருவம் வெளிப்படத் தொடங்கியது. அது முதல் அடியார் மட்டுமே வழிபட்டு வந்த இந்த விநாயகர் அப்பகுதி மக்கள் மனதிலும் இடம் பிடிக்கத் தொடங்கினார். அத்துடன் அவர் தம்மை வணங்குவோருக்கு வேண்டிய வரங்களையும் அள்ளித் தரும் வள்ளலாகவும் விளங்கி வருகிறார்..இதன் பின்பு மாணிக்க விநாயகரை மையமாக வைத்து, மதுரநாதீஸ்வரர், மரகதாம்பிகை, வள்ளி, தெய்வானை சமேத முருகன் சன்னதி என அனைத்தும் உள்ளடக்கிய பெரிய ஆலயம் எழுப்பப்பட்டது. காலப்போக்கில் வழிபாடு நின்று ஆலயமும் சிதிலமடைந்தது.இந்நிலையில் இராணிப்பேட்டையில் வசித்து வந்த வடமாத்தூரைச் சார்ந்த தொழில் அதிபரான விநாயகப்பெருமானின் பரம பக்தர் ஒருவர், இக்கோவிலின் நிலை கண்டு மனம் வருந்தினார். பெரும்பொருட்செலவில் புதுப்பொலிவோடு ஆலயத்தை உருவாக்கினார். அன்னதான மண்டபம், நந்தவனம், வாகனங்களைப் பராமரிக்க தனி இடம் என அனைத்து வசதிகளையும் உள்ளடக்கிய இக்கோவிலின் கும்பாபிஷேகம் கடந்த 2014 இல் சிறப்பாக நடந்தது.பூமியில் வெளிப்பட்ட மற்றொரு கருங்கல் மரகதாம்பிகை சன்னதியின் இடதுபுறம் நிறுவப்பட்டுள்ளது. அந்தக் கல்லும் தற்போது ஐந்து தலை நாக வடிவினை மெல்ல வெளிப்படுத்தி வருவது மற்றொரு அதிசய நிகழ்வாக அமைந்துள்ளது. மூன்று சதுர்த்திகள்இத்தலம்வந்துமாணிக்கவிநாயகரைவழிபட்டுச்சென்றால் செவ்வாய்தோஷம், ராகு, கேதுதோஷம், காலசர்ப்பதோஷம்உள்ளிட்டசகலதோஷங்களும்நீங்கும்என்பதுபக்தர்களின்அசைக்கமுடியாத நம்பிக்கை. மேலும் மாங்கல்யப்பேறுகிட்டவும், கணவன், மனைவி பிணக்குத்தீரவும், தாலிபாக்யம்நிலைத்திடவும் சிறந்தபரிகாரத்தலமாகவிளங்குகிறது.வைகாசி விசாகத்தில் பத்து நாட்கள் பிரம்மோற்சவம் வெகு விமரிசையாகக் கொண்டாடப்பட்டு வருகிறது. இது தவிர தமிழ்ப்புத்தாண்டு, விநாயகர் சதுர்த்தி, சங்கடஹர சதுர்த்தி, பிரதோஷம், கிருத்திகை, மகா சிவராத்திரி, மார்கழி மாத வழிபாடு என அனைத்து விழாக்களுமே சிறப்பாக நடத்தப்படுகின்றன.தலமரமாக வில்வமும், தலத்தீர்த்தமாக ஆலயத்திற்குள் கிணறு வடிவமான கங்கா தீர்த்தமும் அமைந்துள்ளன.இவ்வூரில் காளியம்மன், மாரியம்மன், வேடியப்பன் ஆலயங்களும் அமைந்துள்ளன. இவ்வூரின் தெற்கே முருகப்பெருமான் நிறுவிய முதல் தலமான காஞ்சி கரைகண்டீஸ்வரர் தலமும், வடக்கே புகழ் பெற்ற திருவண்ணாமலையும் அமைந்துள்ளன.வடமாத்தூர் மாணிக்க விநாயகரை வழிபடச்செல்வோர் மேற்கண்ட ஆலயங்களுக்கும் சென்று வழிபட்டு கூடுதல் பலனைப்பெற்று வரலாமே!எங்கே இருக்கு?திருவண்ணாமலை பேருந்து நிலையத்தில் இருந்து 15 கி.மீ. தொலைவில் உள்ள வடமாத்தூருக்கு டவுன் பஸ் வசதி உள்ளது. அதுபோல், திருவண்ணாமலை - காஞ்சி (காஞ்சிபுரம் அல்ல) பேருந்து வழித்தடத்தில் பெரியகுளம் நிறுத்தத்தில் இறங்கி, தெற்கே 2 கி.மீ. பயணம் செய்தாலும் வடமாத்தூரை அடையலாம். தரிசன நேரம்காலை 7.30 - 10.30; மாலை 4.30 - இரவு 7.00 -நடுநாடன்