திருநின்றியூர்...சந்தான பாக்யம் அருளும் சந்தன பிரசாதம் !

-பொ.பாலாஜிகணேஷ்சிவபெருமான் லட்சுமிக்கு அருளியதால் இத்தலத்திற்கு லட்சுமிபுரம் என்ற பெயரும்; இறைவனுக்கு லட்சுமிபுரீஸ்வரர், மகாலட்சுமீசர் என்ற திருநாமங்களும் உண்டு.சோழ மன்னனான கோச்செங்கோட்சோழன் தில்லை என்னும் சிதம்பரம் நடராஜரை தரிசிக்க விரும்பினான். அதற்காக தனது மந்திரி மற்றும் படைவீரர்களுடன் தில்லை நோக்கிப் பயணமானான். மன்னன் பல்லக்கிலும், மந்திரியும் மற்ற வீரர்களும் நடந்தும் பயணத்தைத் தொடர்ந்தனர். பகலிலும் இரவிலும் நடந்த அவர்கள் இரவில் காடா விளக்கின் துணையோடு காட்டுப்பகுதியைக் கடந்தனர்.திருநின்றியூர் என்ற ஊரின் எல்லையைத் தொட்டபோது நன்றாக இருட்டிவிட்டது. சட்டென எல்லா காடா விளக்குகளும் அணைந்தன. மீண்டும் மீண்டும் ஏற்றினாலும் அணைந்துகொண்டே வந்தன. அவர்கள் தட்டுத் தடுமாறி ஊரின் எல்லையைக் கடந்த பின்னர் காடா விளக்கை ஏற்ற, அது நன்றாக எரிந்தது.மன்னருக்கும் உடன் வந்தவர்களுக்கும் ஒன்றும் புரியவில்லை. தில்லை சென்று ஆடலரசனை தரிசனம் செய்துவிட்டு மன்னரும் மற்றவர்களும் திரும்பினர். வரும் வழியில் இரவில் திருநின்றியூரில் மறுபடியும் காடா விளக்குகள் குறிப்பிட்ட அதே இடத்திற்கு வந்ததும் அணைந்தன. இதற்கு என்ன காரணம் என்று அறிந்து வர மந்திரியைப் பணித்தார் மன்னர்.விடிந்தது. யாரிடமாவது கேட்கலாம் என மந்திரி நினைத்து சுற்றிலும் பார்வையைப் படரவிட்டபோது, மாடு மேய்க்கும் சிறுவன் ஒருவன் தென்பட்டான்..அவனை அழைத்து, ’’இந்த ஊரில் ஏதாவது விசேஷம் உண்டா?’’ எனக்கேட்டார், மந்திரி. ‘உண்டு’என்ற அந்தச் சிறுவன், ’‘தினமும் இரவுநேரத்தில் காமதேனு வானிலிருந்து இங்கே ஓரிடத்தில் வந்து இறங்கி, பாலைச் சுரக்கிறது’’ என்று அந்த இடத்தைச் சுட்டிக்காட்டினான். வியந்த மன்னரும் மந்திரியும் அவன் சுட்டிக் காட்டிய இடத்தை நோக்கி நடந்தனர். சிறிது தொலைவு சென்றதும் மன்னரின் கால் சேற்றில் மாட்டிக்கொண்டது. அதிலிருந்து விடுபட அவரால் முடியவில்லை.பெரிய கல் போன்ற ஒரு இரும்புக் குண்டைக் கொண்டு வந்து, ‘’மன்னா! இதைச் சேற்றில் ஊன்றி மேலே வாருங்கள்’’என்றார், மந்திரி.அவர் சொன்னபடியே மன்னர் அந்த இரும்புக் குண்டை வாங்கி தரையில் பலமாக ஊன்றினார். மறுகணம் தரையிலிருந்து ரத்தம் பீரிட்டது. பதறிப்போன மன்னன் அந்த இடத்தைத் தோண்டச் செய்ய, அங்கே ஒரு சிவலிங்கம் இருக்கக் கண்டார். அனைவருக்கும் வியப்பு. மன்னன் கண்டெடுத்த அந்தச் சிவலிங்கத்தை அங்கேயே பிரதிஷ்டை செய்து ஓர் ஆலயம் கட்டப்பட்டது. அதுவே திருநின்றியூரில் உள்ள ‘லட்சுமிபுரீஸ்வரர்’ ஆலயம்.கிழக்கு நோக்கி அமைந்துள்ள ஆலயத்தின் முகப்பில் அழகிய ராஜகோபுரம். உள்ளே நுழைந்ததும் அகன்று விரிந்த பிராகாரம். நடுவே நந்தியும் பலிபீடமும் உள்ளன. தொடர்ந்து சிறப்பு மண்டபமும், இடதுபுறம் விநாயகரும், வலதுபுறம் முருகனும் அருள்பாலிக்க, இருபுறமும் துவாரபாலகர்கள் வீற்றிருக்கின்றனர். அதை அடுத்து மகாமண்டபமும், அர்த்த மண்டபமும் உள்ளது.கருவறையில் இறைவன் லட்சுமிபுரீஸ்வரர் லிங்கத் திருமேனியராக கிழக்கு நோக்கி அருள்பாலிக்கிறார். சுயம்பு மூர்த்தம். லிங்க வடிவின் உச்சியில் குழியுள்ளது. மகாமண்டபத்தின் வலதுபுறம் இறைவி உலகநாயகி நான்கு கரங்களுடன் தெற்கு நோக்கி நின்ற கோலத்தில் எழுந்தருளியுள்ளாள். அன்னையின் மேல் இரு கரங்களில் பத்மமும், அட்சயமாலையும் அலங்கரிக்க, கீழ் இரு கரங்கள் அபய, வரதமுத்திரைகளுடன் காட்சி தருகின்றன..இறைவனின் தேவகோட்டத்தில் தட்சிணாமூர்த்தி, லிங்கோத்பவர், பிரம்மா, துர்க்கை அருள்புரிகின்றனர். திருச்சுற்றில் பிள்ளையார், மகாவிஷ்ணு, பரசுராமர், சுப்ரமணியர், நால்வர், மகாலட்சுமி, சண்டிகேஸ்வரர், சூரியன், பைரவர் ஆகியோர் சன்னதிகள் உள்ளன. வடகிழக்கு மூலையில் நவகிரக நாயகர்கள் அருள்பாலிக்கின்றனர்.சுந்தரர், திருநாவுக்கரசர், சம்பந்தர் என மூவராலும் பாடப் பெற்ற தலம். பல நூற்றாண்டுகளைக் கடந்த பழமையான இந்த ஆலயத்தில் திரிபுவன சக்கரவர்த்தி ராஜராஜ தேவனின் கல்வெட்டு ஒன்று சிதைந்த நிலையில் கண்டெடுக்கப்பட்டுள்ளது.சிவபெருமானை நினைத்து மகாலட்சுமி தவம் இருந்தபோது, அவளது தவத்தைக் கண்டு இரங்கிய சிவபெருமான் அவள் முன் தோன்றி, ’‘என்ன வரம் வேண்டும்?’’ எனக் கேட்டார்.மனம் மகிழ்ந்த மகாலட்சுமி, ’’நான் என்றும் விஷ்ணுவின் மார்பில் குடியிருக்க வேண்டும்’’ என்று வேண்ட, சிவபெருமானும் அப்படியே அருள்புரிந்தார் என்கிறது தலவரலாறு..அனுஷ நட்சத்திரக்காரர்கள் இந்த ஆலயம் வந்து லட்சுமிபுரீஸ்வரரை வழிபட்டால் அவர்களின் தோஷங்கள், துன்பங்கள் யாவும் நீங்கும் என்பதும்; இத்தல இறைவிக்கு சந்தனக்காப்பிட்டு அந்த சந்தனத்தைப் பிரசாதமாக தினமும் பயன்படுத்தினால் மகப்பேறு கிடைக்கும் என்பதும் நம்பிக்கையாக இருக்கிறது.தந்தையின் கட்டளைப்படி தன் தாயைக் கொன்றார் பரசுராமர். பிரம்மஹத்தி தோஷம் அவரைப் பற்றிக்கொண்டது. அது நீங்க இத்தல இறைவனை சரணடைந்து பாவவிமோசனம் பெற்றார். அவரது திருமேனி ஆலயத்தின் மேற்கு திருச்சுற்றில் தனிச் சன்னதியில் உள்ளது.வாய்ப்பு அமையும் பொழுது நீங்களும் ஒரு முறை லட்சுமிபுரீஸ்வரரை தரிசிக்க திருநின்றியூர் வரலாமே!.எங்கே இருக்கு?நாகை மாவட்டம், மயிலாடுதுறை - சீர்காழி பேருந்து வழித்தடத்தில் மயிலாடுதுறையில் இருந்து 8 கி.மீ. தொலைவில் திருநின்றியூர் உள்ளது.தரிசன நேரம்காலை 6 – 11; மாலை 5 – 9. பிரதோஷ தினங்களில் மாலை 4 மணிக்கு கோயில் திறக்கப்படும்.

திருநின்றியூர்...சந்தான பாக்யம் அருளும் சந்தன பிரசாதம் !

Related Stories