தில்லை நடராஜர் தான் இந்த உலகத்தின் இயக்கமாக இருக்கிறார்!

-சித்தாந்த ரத்னம் உ.வெங்கடேச தீக்ஷிதர் பேட்டிசென்ற இதழ் தொடர்ச்சி....சிதம்பரம் நடராஜர் கோயிலில் உள்ள நான்கு கோபுரங்களில், தெற்குக் கோபுரத்தில் மட்டும் காவிக்கொடி பறக்கவிடப்படுகிறது. இதன் பின்னணி என்ன?தீக்ஷிதர் வம்சத்தில் பிறந்த உமாபதி சிவம் என்கிற சந்தான ஆச்சாரியர் ஞானத்தின் திருவுருவமாக அமைந்து, சிதம்பரத்தில் கொடியேற்றுவதற்காக கொடிக்கவி என்கிற நான்கு வெண்பாக்களை அருளியிருக்கிறார். அதில் "கோபுர வாசல் கொடி கட்டினேனே" என்று சிறப்பித்துப் பாடியிருக்கிறார். எனவே ஆனித் திருமஞ்சனம், மார்கழி திருவாதிரை கொடியேற்ற தினத்தில், தெற்கு ராஜகோபுரத்தில் இந்த அன்னக்கொடியும் (காவி) ஏற்றப்படுகிறது. நம்முடைய சைவ சமயத்தின் சிறப்பாக இது விளங்குகிறது. நாவுக்கரசர், அன்னம்பாலிக்கும் தில்லை என்று பாடியிருக்கிறார். இதே கருத்தை எம்.ஜி.ராமச்சந்திரன் அவர்கள் ஒரு பாடலில் "பஞ்சம் இல்லை என்று சொல்லும் அன்னக்கொடி" என்று பாடியிருக்கிறார். தீக்ஷிதர்கள் ஒருபக்கமாக முன்குடுமி வைத்திருக்கிறார்கள். இதற்கு ஏதாவது காரணங்கள் இருக்கிறதா?பொதுவாக ஒவ்வொரு இடங்களில் ஒவ்வொரு முறைகளை நம் முன்னோர்கள் வகுத்திருக்கின்றனர். அதன்படி தில்லையில் தீக்ஷிதர்கள் இடது புறம் குடுமி அமைத்து வழிபாடு செய்கிறார்கள். கேரள நம்பூதிரிகள் வலது பக்கம் குடுமி அமைத்து வெளிப்படுகிறார்கள். வைதீகர்கள் தலையின் பின்புறம் குடுமி வைத்துக்கொண்டு இருக்கிறார்கள். அதன்படி மிகச்சிறந்த அடையாளமாக சிதம்பரத்திற்கே உரிய தீக்ஷிதர்கள் இடது பக்கம் குடுமியமைத்து இருக்கிறார்கள். ஒவ்வொரு முறையும் ஆருத்ரா தரிசனம், ஆனித்திருமஞ்சனம் போன்ற பெரிய விழாக்களை பொறுப்பேற்று நடத்துவதற்கு ஒருவரை தேர்வுசெய்கிறீர்களே, இது எதனால்? அவருக்குத் தரப்படும் மரியாதைகள் என்னென்ன? ஆனி மற்றும் மார்கழி மாதத்தில் நடைபெறும் உற்சவத்திற்கு திருவுளச்சீட்டின் மூலம் தீக்ஷிதர் ஒருவர் தேர்ந்தெடுக்கப்பட்டு உற்சவ நிகழ்வுகள் நடத்த உரிமை அளிக்கப்படுகிறது. அதன்படி அவருக்குத் துணையாக இருந்து அனைத்து பொது தீக்ஷிதர்களும் உற்சவ நிகழ்வுகளை நடத்தித் தருகிறார்கள். ஒரு முறை உற்சவ ஆச்சாரியர் ஆனவர் மறுமுறை தேர்ந்தெடுக்கப்படுவதில்லை. இதனால் புதிதாக ஒருவருக்கு கொடியேற்றும் உரிமை கிடைக்கிறது. இது மிகவும் போற்றுதலுக்கும் பெருமைக்கும் உரியதாக விளங்குகிறது.. தில்லை என்றாலே சிவன் கோயில்தானே. அப்படியிருக்க, அந்தக் கோயிலின் வளாகத்திலேயே கோவிந்தராஜப் பெருமாள் கோயில் எப்படி வந்தது? அங்கு பூஜை செய்கிறவர்கள் யார்? எந்த ஆகமம் கடைப்பிடிக்கப்படுகிறது?தங்கள் கேள்வியே பிரித்தாலும் சூழ்ச்சிக்கான கேள்வியாக இருக்கிறது. இந்து மதத்தில் ஆதிசங்கரர் ஆறு சமயங்களை வகுத்துக் கொடுத்திருக்கிறார். அதன்படி உலகத்திலேயே ஒரே இடத்தில் நின்றுகொண்டு சிவனையும், பெருமாளையும் வழிபடும் சிறப்பைப் பெற்ற ஒரு கோயில் இதுவாகும். இரண்டு ராஜாக்கள் ஆளும் பூமியாக தில்லை ஸ்தலம் விளங்குகிறது. பெருமாளுக்கு வைகானச ஆகம முறைப்படி பூஜைகள் நடைபெறுகிறது. சில நூற்றாண்டுகளுக்கு முன் தீக்ஷிதர்களே பூஜை செய்த பெருமை கொண்டது. திருமங்கையாழ்வாரும், குலசேகர ஆழ்வாரும் மங்களாசாசனம் பாடியிருப்பது தில்லையின் சிறப்பாகும். சிதம்பரத்தில் தீக்ஷிதர் குடும்பங்கள் எத்தனை உள்ளது? அவர்களுக்கு வருமானம் எந்த முறையில் வருகிறது? தீக்ஷிதர் குடும்பத்தைச் சேர்ந்தவர்களின் வாரிசுகள் டாக்டர், இன்ஜினீயர் உள்ளிட்ட துறைகளை எடுத்துப் படிப்பதில் ஆர்வம் காட்டுகிறார்களா?சுமார் 500 குடும்பங்கள். 1500 ஆண், பெண்கள் தில்லையிலே வசிக்கிறார்கள். வருமானம் என்பது நிச்சயமற்றது. இருப்பினும் பக்தர்கள் தனித்தனியாக தரக்கூடிய காணிக்கைகளைக் கொண்டு ஜீவிக்கிறார்கள். தீக்ஷிதர் இனத்தில் இரண்டு எம்.ஏ.கள், தமிழ், சமஸ்கிருதம், ஆங்கிலம் என பல கல்வி பயின்றவர்களும் உண்டு. இருப்பினும், எங்களுடைய வாழ்வியல் முறைக்கு ஒத்து வராத எந்தத் துறைகளையும் நாங்கள் கற்க விரும்புவதில்லை. ஆனால், சிறிய வயதிலேயே வேதம் மற்றும் பள்ளிக்கல்வியை போதுமான அளவு படித்திருக்கிறோம்.. சிதம்பரம் கோயிலில் பூங்காக்கள் அமைக்கப்பட்டு வருகிறது. ஆனால், இன்னும்கூட பக்தர்களுக்குப் போதிய கழிப்பறை வசதியில்லையே?ஆலயத்தில் குளோபல் வார்மிங் என்கிற பூமியை குளுமையாக வைக்கக்கூடிய வழிகளை கடைப்பிடித்து வருகிறார்கள். விழாக் காலங்களில் மொபைல் கழிவறைகள் ஏற்படுத்தப்பட்டு விழா முடிந்தவுடன் அப்புறப்படுத்தப்படுகிறது. இருப்பினும், ஆலயத்தினுள் நிரந்தர கழிப்பிடங்கள் அமைக்கச் சாத்தியமில்லை. கோயிலின் நான்கு வீதிகளிலும் டூரிஸ்ட் வாகனங்கள் நிறுத்தப்படுவதால், பக்தர்களுக்கு இடையூறு ஏற்படுகிறது. அதேபோல், அவர்களிடம் நகராட்சி வசூலிக்கும் பார்க்கிங் கட்டணமும் அதிகம் என்கிறார்கள். இதைச் சரிசெய்வது எப்படி?நான்கு வீதிகளிலும் திருவிழாக் காலங்களில் பஞ்ச மூர்த்திகள் வலம் வரும் நிகழ்வானது தொன்று தொட்டு நடைபெறுகிறது. அந்த நேரங்களில் மிகவும் இடையூறாக இருக்கிறது என்பது உண்மையே. கோயிலுக்குக் கொடுப்பதாகக் கூறி நகராட்சி பணம் வசூல் செய்கிறது. ஆனால் வாகனங்களுக்குப் போதுமான வசதிகள் செய்வதில்லை. இது மிகவும் அவலமான விஷயம். ஆலயம் சார்ந்த நகராட்சிகள் பலவற்றில் இலவசமாக கழிவறை, குளியலறையைப் பராமரிக்கிறார்கள். ஆனால் சிதம்பரத்தில் கீழ வீதியில் அமைந்திருக்கக் கூடிய கழிவறை மற்றும் குளியலறை முறையான பராமரிப்பு இன்றி உள்ளது. அதை சரிசெய்து இலவசமாகப் பராமரிக்கவேண்டும் என்பது மக்களின் விருப்பமாகும்.சிதம்பரம் கோயிலுக்கும் அதன் நான்கு வீதிகளுக்கும் நடுவில் அக்காலத்தில் நான்கு வீதிகள் இருந்ததாகவும், அங்கு தேரோட்டம் நடைபெற்றதாகவும் சொல்கிறார்கள். இப்போது நான்கு வீதிகள் எங்கே?ஐந்து பிராகாரங்களைக் கொண்ட முழுமையான ஆலயமாக சிதம்பரம் கோயில் விளங்குகிறது. நீங்கள் நினைப்பதுபோல நடுவில் ஒரு வீதி இருந்ததற்கு எந்தச் சான்றும் இல்லை. ஆனால் சிதம்பரம் கோயிலில் தற்பொழுது விளங்கக்கூடிய நான்கு வீதிகளிலேயே பல நூற்றாண்டுகளாக ஆண்டுக்கு இரண்டு முறை திருத்தேர் உலா நடைபெறுகிறது என்பது உண்மையாகும்..சிதம்பரம் நடராஜர் கோயிலில் நடராஜருக்கு நித்தியப்படி என்னென்ன நெய்வேத்தியம் செய்யப்படுகிறது?சிதம்பரம் நடராஜருக்கு காலை முதல் இரவு வரை பலவிதமான உணவு வகைகள் நெய்வேத்தியம் செய்யப்படுகிறது. காலையிலே பால் நெய்வேத்தியம், நெல்பொரி, பழம், பட்டி (வாழைப்பழம், வெற்றிலை பாக்கு); கால சந்தியில் வெண்பொங்கல்; நண்பகல் வெல்ல சர்க்கரைப் பொங்கல்; மதியம் தயிர் சாதம்; மாலை புளி சாதம், சம்பா , கத்திரிக்காய் கொஸ்து, வடை, சர்க்கரைப் பொங்கல்; இரவு தேங்காய் சாதம், பால் சாதம், வடை, அப்பம், சுண்டல், பாயசம் போன்ற நெய்வேத்தியங்கள் ஒவ்வொரு காலத்திற்கும் செய்யப்பட்டு வருகிறது. சிதம்பரம் நடராஜர் கோயிலில் மூலவர் திருமூலநாதர். ஆனால் அவருக்கு முக்கியத்துவம் தராமல் கனகசபையில் வீற்றிருக்கும் நடராஜருக்கே அதிக முக்கியத்துவம் தரப்படுவது ஏன்?அனைத்து சிவாலயங்களிலும் சிவலிங்கமே மூலவராக வணங்கப்படுகிறது. அதில் மாற்றமில்லை. ஆனால் சிதம்பரத்திற்கு என்று ஒரு தனி சிறப்பை ஏற்படுத்துவதற்காக இறைவனால் அருளப்பட்ட ஒரு நிகழ்வுதான் தில்லையில் ஆனந்த நடராஜருடைய வழிபாட்டு முறை. பதஞ்சலியும், வியாக்ரபாதரும் தில்லையில் ஆதிமூலநாதரை வழிபட்டுத்தான் கைலாயத்திலிருந்து ஸ்ரீநடராஜரை அழைத்து வந்தார்கள். அதன்படி தில்லைக்கு என்று சிறப்பான வழிபாட்டு முறைகளை நம் முன்னோர்கள் வகுத்துக்கொடுத்துள்ளார்கள். பொதுவாக அனைத்து சிவாலயங்களிலும் நடராஜருடைய சந்நதி அமைந்திருக்கிறது. அங்கே ஒரு கால பூஜை மட்டுமே நடைபெறுவது அனைவருக்கும் தெரிந்ததுதான். விசேஷ காலங்களில், நடராஜருடைய அபிஷேக தினங்களில் சிறப்பான வழிபாடுகள் அனைத்து ஆலயங்களிலும் நடைபெறுகிறது. ஆனால் தில்லை நடராஜர்தான் இந்த உலகத்தின் இயக்கமாக அமைந்து, ஆனந்த நடராஜராகக் காட்சி கொடுத்துக் கொண்டிருக்கிறார். எனவே ஆறு கால பூஜைகளும் குறையில்லாமல் நடந்து கொண்டிருக்கிறது. ஆதிமூல நாதரையும் ஸ்ரீ நடராஜரையும் பிரித்துப் பார்ப்பது என்பது மிகவும் அவமானத்துக்குரியதாகும்.கோயிலில் ஆறு கால பூஜை சமயத்தில் மட்டுமே பக்தர்களுக்கு இலவசமாக சிதம்பர ரகசியம் காட்டப்படுகிறது. மற்ற நேரங்களில் சிதம்பரம் ரகசியத்தை தரிசிக்க கட்டணம் வசூலிக்கிறீர்களாமே?சிதம்பர ரகசியம் ஒரு நாளைக்கு ஆறு காலங்களில் மட்டுமே திரையைத் திறந்து காட்டப்படுகிறது. தனியாக கட்டணம் வாங்கிக்கொண்டு ரகசிய தரிசனம் செய்யும் பழக்கம் பல வருடங்களுக்கு முன்னர் நிறுத்தப்பட்டு விட்டது .தெற்குக் கோபுரத்தின் நேர் எதிரில் நந்தனார் வந்ததாகக் கூறப்படும் வழியை அடைத்து வைத்திருப்பதாகச் சொல்லப்படுவது உண்மையா?நந்தனாரை நமக்கு அறிமுகம் செய்து வைத்தவர் சுந்தரமூர்த்தி நாயனார். நந்தனாருடைய காலம் மூன்றாம் நூற்றாண்டு என்று கருதப்படுகிறது. இருப்பினும் ஆலயத்தில் மதிற்சுவர்கள் சுமார் 12-ஆம் நூற்றாண்டில் கட்டப்பட்டதாக அறியமுடிகிறது. ஆனால், பெரிய புராணத்தில் தெற்கு ராஜகோபுரத்தை தரிசித்த நந்தனார் இறைவனுடன் இரண்டறக் கலந்துவிட்டார் என்றும், அப்போது சுற்றி இருந்த தீக்ஷிதர்கள் அதிசயித்தனர் என்றும் சேக்கிழார் சொல்கிறார். எனவே அந்த சுவருக்கும் நந்தனாருக்கும் எந்தத் தொடர்பும் இல்லை. சிலர் இதை வைத்துக்கொண்டு தீக்ஷிதர்களுக்கும், நிர்வாகத்திற்கும் இடையூறுகளை செய்த வண்ணம் இருக்கிறார்கள்..ஆருத்ரா தரிசனத்தன்று பகல் 11 மணிக்கு கோயிலுக்குள் வரும் பக்தர்களுக்கு முன்பு மதியம் 2 மணிக்கெல்லாம் தரிசனம் கிடைத்துவிடும். ஆனால், இப்போதெல்லாம் மாலை ஐந்து மணிக்குத்தான் தரிசனம் கிடைக்கிறது. அதனால் பக்தர்கள் கடும் சிரமத்திற்கு ஆளாகிறார்கள். ஏன் இந்தக் கால தாமதம்?ஆண்டிற்கு இரண்டு முறை நடைபெறக்கூடிய ஒரு சிறப்பு நிகழ்வு ஆனித் திருமஞ்சனம் மற்றும் மார்கழி திருவாதிரை. இந்த இரண்டு உற்சவங்களிலும் அதிகாலையிலே பக்தர்களால் தரப்படுகிற அபிஷேகப் பொருட்களை சுவாமிக்கு அபிஷேகம் செய்யும் காரணத்தினால், தரிசன நிகழ்வில் காலதாமதம் ஆகிறது. இந்த வைபவம் பலவிதமான சம்பிரதாய நிகழ்வுகளை உள்ளடக்கியது. எனவே சரியான நேரத்தை நாங்கள் அறிவிக்கிறோம். அந்த நேரத்தில் வந்து தரிசிப்பது சாலச்சிறந்ததாகும். எதைக் கேட்டாலும் அந்தக் காலம் அந்தக் காலம் என்று கேள்வி கேட்பது இந்தக் காலத்துக்கு ஒத்து வராதது. நீதிமன்ற உத்தரவு இருந்தும், சமீப காலமாக கனக சபையில் இருந்து தேவாரம், திருவாசகம் பாட சிவனடியார்களை அனுமதிப்பதில்லையே, ஏன்?ஆலயத்தில் எல்லா நேரங்களிலும் தேவாரம், திருவாசகம் போன்ற பாடல்கள் பாடப்பட்டு வருகின்றன. இருப்பினும், இதுபோன்ற கேள்விகளை சிலர் எழுப்பி பிரச்னை செய்கிறார்கள். எத்தனையோ ஆலயங்களில் ஓதுவார்கள் இல்லை. இருக்கும் ஆலயங்களில் ஓதுவார்களுக்கு சம்பளமும் இல்லை. அங்கெல்லாம் தேவாரம் பாடப்படவில்லை. அங்கெல்லாம் சென்று பாடுவதற்கு முயற்சி செய்யலாமே!பிரபலமான கோயிலாக இருந்தாலும், கோயில் சார்பாக அன்னதானம் செய்வதில்லையே?சுமார் நானூறு வருடங்களுக்கு முன்னதாக கவிஞர் முத்து தாண்டவர் என்பவர், "அல்லும் பகலும் அளிக்கும் அன்னதான சிறப்பும்’’ என்று தமது பாடலில், தீக்ஷிதர்கள் குறித்து உயர்வாகப் பாடிச்சென்றிருக்கிறார். அந்த வகையில் இன்றும் எல்லா நேரங்களிலும் தீக்ஷிதர்களால் (பிரசாதங்கள்) அன்னதானம் செய்யப்பட்டு வருகிறது. மேலும் சிறப்பாக கீழகோபுரத்தின் அருகாமையிலும், தெற்குக் கோபுரத்தின் அருகாமையிலும் பொது தீக்ஷிதர்கள் சார்பில் அன்னதானம் நடைபெற்று வருகிறது. -மு.வெங்கடேசன்

தில்லை நடராஜர் தான் இந்த உலகத்தின் இயக்கமாக இருக்கிறார்!

Related Stories