உடையவரைச் சோதித்த உத்தம குரு!

திருக்கோஷ்டியூர் நம்பி அவதாரத் திருநாள்: 21.5.2023நாதமுனிகள் என்னும் ஆசாரியருக்கு நாலாயிர திவ்வியப் பிரபந்தப் பாசுரங்களை உபதேசித்த நம்மாழ்வார் ஒரு துறவியின் விக்ரகத்தையும் அவரிடம் அளித்தார்.“இந்த விக்ரகத்தைப் போலவே பொலிகின்ற தோற்றத்துடன் எதிர்காலத்தில் ஓர் ஆசாரிய புருஷர் அவதரிக்க இருக்கின்றார். அவரே நம் ஸ்ரீவைஷ்ணவ சித்தாந்தத்தின் பவிஷ்யதாசாரியர். அவருக்கு திருமந்திரம் உள்ளிட்ட ரகசிய மந்திரங்களை உபதேசிக்க ஆவன செய்வீராக!” என்றும் ஆழ்வார் கட்டளையிட்டார்.வடமொழியில் பவிஷ்யதாசாரியர் என்றால் எதிர்காலத்தில் அவதரிக்க உள்ள குரு. அவர் வேறு யாருமல்ல. சுமார் ஆயிரம் ஆண்டுகளுக்கு முன்பு ஸ்ரீபெரும்பூதூரில் அவதரித்து விசிஷ்டாத்வைதத் தத்துவத்தையும், சரணாகதி மார்க்கத்தையும் இவ்வுலகத்தவர்களுக்கு உபதேசித்த ஸ்ரீராமாநுஜரே அந்த பவிஷ்யதாசாரியர் ஆவார்.நம்மாழ்வாரால் அடையாளம் காட்டப்பட்ட பெருமைக்குரிய ஸ்ரீராமாநுஜரையே பதினெட்டு முறை நடையாக நடக்கவிட்டு அதன் பின்பே திருமந்திரப் பொருளை உபதேசித்த ஆசாரியரே திருக்கோட்டியூர் நம்பி..திருக்கோட்டியூர் என்னும் திவ்வியதேசம் தற்போதைய சிவகங்கை மாவட்டத்தின் திருப்பத்தூர் நகரத்திற்கு அருகில் உள்ளது. இங்குள்ள பஞ்சாங்க விமானத்துடன் கூடிய திருக்கோயிலில் ஸ்ரீஸௌமியநாராயணப் பெருமாள் அருள்பாலிக்கின்றார். பெரியாழ்வார் உள்ளிட்ட ஐந்து ஆழ்வார்களால் இப்பெருமாள் மங்களாசாஸனம் செய்யப்பட்டிருக்கின்றார்.ஏராளமான வரங்களைப் பெற்ற இரணியனை எவ்வாறு அழிப்பது என்பதைப் பற்றி ஆராய்வதற்காக எம்பெருமான் ஸ்ரீமந்நாராயணனும், தேவர்களும், முனிவர்களும் இத்திருத்தலத்தில் ஒன்று கூடி (கோஷ்டியாக) இருந்து ஆலோசித்ததால் இவ்வூர் கோஷ்டீபுரம் என்ற வடமொழிப்பெயரால் அழைக்கப்பட்டது. அதுவே வைணவத்தமிழில் திருக்கோட்டியூர் என்று மருவியுள்ளது.இப்படிப்பட்ட பெருமைகள் வாய்ந்த திருக்கோட்டியூரில் செல்வநம்பி என்ற ஸ்ரீவைஷ்ணவர் ஒருவர் இருந்தார். ஆண்டாளின் திருத்தகப்பனாராகிய பெரியாழ்வார் பாண்டிய மன்னன் சபையில் வேதப்பொருளை விவரித்துக்கூறி ஸ்ரீமந்நாராயணனே பரம்பொருள் என்று நிரூபித்துப் பொற்கிழியைப் பரிசாகப் பெற்றாரல்லவா? அந்தப் பெரியாழ்வார் தாம் பாடிய திருப்பல்லாண்டு என்ற பிரபந்தத்தில், “அணி கோட்டியர்கோன் அபிமானதுங்கன் செல்வநம்பியைப் போலே திருமாலே நானும் உனக்குப் பழவடியேன்” என்று பாடியுள்ளார்.இவ்வாறு பெரியாழ்வாரால் புகழப்பட்ட செல்வநம்பியின் திருவம்சத்தில் காசியப கோத்திரத்தில் ஸர்வஜித் வருடம் (கி.பி. 987) வைகாசி மாதம், ரோகிணி நட்சத்திரத் திருநாளில் அவதரித்தவரே திருக்கோட்டியூர் நம்பி. ஸ்ரீஆளவந்தாரின் அணுக்க சிஷ்யர்களில் ஒருவரான திருக்கோட்டியூர் நம்பி வேதம், திவ்வியப்பிரபந்தம் ஆகிய அனைத்தையும் கற்றுத்தேர்ந்தவராக விளங்கினார்..ஸ்ரீநம்மாழ்வாரால் அருளப்பட்ட பவிஷ்யதாசாரியர் என்னும் ஸ்ரீராமாநுஜருடைய விக்ரகம் உய்யக்கொண்டார், மணக்கால் நம்பி, ஸ்ரீஆளவந்தார் ஆகியவர்கள் வழியாகத் திருக்கோட்டியூர் நம்பிக்குக் கிடைத்தது. எதிர்கால ஆசாரியபுருஷராகிய ஸ்ரீராமாநுஜருக்குத் திருமந்திரத்தின் திரண்ட பொருளை உபதேசிக்கும் பெரிய பொறுப்பையும் ஸ்ரீஆளவந்தார் இவரிடம் ஒப்படைத்திருந்தார். திருக்கோட்டியூர் நம்பியும் தக்க சமயம் வரும் வரையில் காத்திருந்தார்.ஸ்ரீவைஷ்ணவர்களுக்கு மூன்று மந்திரங்கள் மிகவும் முக்கியமானவை. இம்மூன்றையும் ரகசிய மந்திரங்கள் என்று அழைப்பது வழக்கம். எம்பெருமான் ஸ்ரீமந்நாராயணனிடம் ஆழ்ந்த பக்தியும், மகாவிசுவாசம் என்னும் அசையாத நம்பிக்கையும் கொண்டு நியமநிஷ்டைகளுடன் வாழ்பவர்களுக்கே இந்த ரகசிய மந்திரங்களை ஆசாரியர்கள் உபதேசிப்பர். பொதுவாக பஞ்சசம்ஸ்காரம் என்ற வைணவ தீட்சை அளிக்கப்படும் சமயத்திலேயே இம்மந்திரோபதேசம் வழங்கப்படும்.இவற்றுள் “ஓம் நமோ நாராயணாய”என்ற எட்டெழுத்து மந்திரத்தைத் திருமந்திரம் என்று கூறுவர்.“ஸ்ரீமந்நாராயண சரணௌ சரணம் ப்ரபத்யே ஸ்ரீமதே நாராயணாய நம:” என்ற மந்திரத்தை துவயம் என்பர்.“ஸர்வதர்மான் பரித்யஜ்ய” என்று தொடங்கும் ஸ்ரீகிருஷ்ணபகவான் அருளிய கீதோபதேச மந்திரத்தினை சரம சுலோகம் என்பர்.பஞ்சசம்ஸ்கார தீட்சை பெற்ற ஸ்ரீவைஷ்ணவர்கள் இம்மூன்று மந்திரங்களையும் அன்றாடம் ஓதவேண்டும். அம்மந்திரங்களின் திரண்ட பொருளையும் தத்தம் ஆசாரியபுருஷர்களிடம் உபதேசமாகக் கேட்டு, அர்த்தானுஸந்தானம் (பொருளறிந்து ஓதுதல்) செய்து வருவது மிகவும் விசேஷம்..ஸ்ரீராமாநுஜருடைய குருமார்கள் ஐந்து பேர் ஆவர். அவர்கள் ஸ்ரீபெரியநம்பிகள், பெரியதிருமலைநம்பி, திருக்கோட்டியூர் நம்பி, திருமாலையாண்டான், திருவரங்கப்பெருமாள் அரையர் ஆகியோரே அந்த ஐவர்.ஸ்ரீராமாநுஜர் சந்நியாசம் ஏற்கும் முன்பே மதுராந்தகம் ஸ்ரீஏரிகாத்தராமர் திருச்சந்நதியில் ஸ்ரீபெரியநம்பிகளிடம் பஞ்சசம்ஸ்காரம் செய்து கொண்டதுடன் ரகசிய மந்திரோபதேசமும் கிடைக்கப் பெற்றார். அச்சமயம் ஸ்ரீபெரியநம்பிகள் அவருக்கு துவயமந்திரத்தின் விரிவான பொருளையும் உபதேசித்தருளினார். எனவேதான், மதுராந்தகத் திருத்தலம் துவயம் விளைந்த திருப்பதி என்ற சிறப்புப் பெயரைப் பெற்றது.பின்னர் சந்நியாசம் ஏற்றுக்கொண்டு ஸ்ரீரங்கம் வந்து சேர்ந்த ஸ்ரீராமாநுஜர், ஸ்ரீபெரியநம்பிகளின் அறிவுரைப்படி திருமந்திரம், சரமசுலோகம் ஆகியவற்றின் திரண்ட பொருளை உபதேசமாகப் பெறுவதற்காகத் திருக்கோட்டியூர் நம்பியை நாடினார்.இவ்விதமாக, ஸ்ரீநம்மாழ்வார் ஊன்றிய “பவிஷ்யதாசாரியர்” என்ற பயிருக்கு நீர் ஊற்றி வளர்க்கும் பொறுப்பு தானாகவே திருக்கோட்டியூர் நம்பியிடம் வந்து சேர்ந்தது.திருக்கோட்டியூர் நம்பியும் ஸ்ரீராமாநுஜருடைய அருமை பெருமைகளைப் பற்றி முன்கூடியே அறிந்தவர்தாம் என்றாலும், முதல் சந்திப்பிலேயே அவ்வுபதேசத்தைச் செய்துவிடவில்லை. ஸ்ரீராமாநுஜர் ஸ்ரீரங்கத்திலிருந்து கிளம்பி திருக்கோஷ்டியூருக்கு வந்து உபதேசம் செய்யுமாறு வேண்டிக்கொண்ட பொழுதெல்லாம், “இப்பொழுது வேண்டாம், வேறொரு சந்தர்ப்பத்தில் பார்க்கலாம்” என்று கூறித் திருப்பி அனுப்பி விடுவார். ஸ்ரீராமாநுஜரும் சற்றும் மனம் தளராமல் இது போன்று பதினேழு முறை திருக்கோஷ்டியூருக்குச் சென்று உபதேசம் பெறாமல் திரும்பி வந்துள்ளார்.இதன் பிறகும் உற்சாகம் குறையாத ஸ்ரீராமாநுஜர் தம்முடைய சிஷ்யர்களான முதலியாண்டான், கூரத்தாழ்வான் ஆகியோருடன் பதினெட்டாவது முறையாகத் திருக்கோட்டியூருக்குச் சென்றிருக்கிறார்.ஸ்ரீராமாநுஜர் இவ்விதமாக ஒவ்வொரு முறையும் சுமார் எழுபது மைல் தூரம் என்ற கணக்கில் மொத்தம் ஆயிரத்து இருநூற்று அறுபது மைல் தூரம் கால்நடையாகவே நடந்து சென்று உபதேசம் பெற்றார் என்பதிலிருந்தே அந்த அஷ்டாக்ஷரம், சரமசுலோகம் ஆகிய இரண்டு மந்திரங்களின் மகிமையையும், அவற்றின் உள்ளுறைப் பொருளை ஸ்ரீராமானுஜருக்கு உபதேசித்த திருக்கோட்டியூர் நம்பியின் பெருமையையும் நாம் உணரலாம்.அது மட்டுமா, அந்த உபதேசத்தைக் கேட்பதற்காகப் பதினெட்டு முறை மனம் தளராமல் நடைப்பயணமாகவே சென்று வந்த ஸ்ரீராமாநுஜரின் விடாமுயற்சியையும் நாம் உணரலாம்.ஸ்ரீராமாநுஜர் இவ்வளவு சிரமப்பட்டுப் பெற்ற உபதேசங்களைத் தம்முடைய குருவாகிய திருக்கோட்டியூர் நம்பியின் உத்தரவையும் மீறி மற்றவர்களுக்குப் பெருந்தன்மையுடன் உபதேசம் செய்ததால் “எம்பெருமானார்” என்ற சிறப்புப் பெயர் அவருக்குக் கிடைத்தது நம் எல்லோருக்கும் தெரிந்த ஒன்றுதான்.சிறிது காலம் கழிந்த பின்னர், வேறொரு ரகசிய தத்துவத்தை ஸ்ரீராமாநுஜருக்கு உபதேசம் செய்ய விரும்பிய திருக்கோட்டியூர் நம்பி ஸ்ரீரங்கத்திற்கு எழுந்தருளினார். அதைக் கேட்பதற்காகத் திருவரங்கம் பெரியகோயிலில் உள்ள ஓர் ஆளரவமற்ற ஒதுக்குப்புறமான இடத்திற்கு உடையவரை வரச் சொல்லி உபதேசத்தைத் தொடங்கியவர், சற்று தூரத்தில் ஒருவர் குறட்டை விட்டுத் தூங்கிக்கொண்டிருப்பதைக் கண்டு, அவரது காதுகளில் இவ்வார்த்தைகள் விழுந்துவிடக்கூடாது என்பதற்காகத் தமது உபதேசத்தைப் பாதியிலேயே நிறுத்திக் கொண்டுவிட்டார். சில நாட்கள் கடந்த பின்பு, அதே இடத்தில் வேறு யாரும் இல்லை என்பதை உறுதி செய்துகொண்ட பின்னரே திருக்கோட்டியூர் நம்பி அந்த ரகசியத்தை ஸ்ரீராமாநுஜருக்கு உபதேசித்தாராம். வழக்கம் போலவே, ஸ்ரீராமாநுஜர் தாம் பெற்ற அந்த ரகசிய உபதேசத்தையும் தம்முடைய சிஷ்யர்களுக்கு உபதேசித்து விட்டாராம்.மேற்கண்ட நிகழ்வு ஸ்ரீபெரியவாச்சான் பிள்ளை என்ற ஆசாரியபுருஷர் எழுதிய வியாக்கியானம் ஒன்றில் குறிப்பிடப்பட்டுள்ளது.இவ்விரு நிகழ்வுகள் மூலம்,தகுதியானவர்களுக்கு மட்டுமே உபதேசிப்பது என்ற திருக்கோட்டியூர் நம்பியின் கொள்கையையும், விருப்பமுள்ளவர்களுக்கெல்லாம் உபதேசிப்பது என்ற ஸ்ரீராமாநுஜரின் நெகிழ்வுத்தன்மையையும் நம்மால் உணர்ந்து கொள்ள முடிகின்றது..உபதேசம் செய்வதில் கண்டிப்பை வெளிப்படுத்திய அதே சமயம், ஸ்ரீராமாநுஜரிடத்தில் எல்லையற்ற பரிவைக் கொண்டிருந்தார் நம் திருக்கோட்டியூர் நம்பி.தாம் ஏற்றுக்கொண்ட சந்நியாச நெறிப்படி ஸ்ரீரங்கம் நகரத்தின் வீதிகளில் தினந்தோறும் பிக்ஷை எடுத்து வந்த ஸ்ரீராமாநுஜருக்குச் சமர்ப்பிக்கப்பட்ட உணவில் விஷம் கலக்கப்பட்டதை அறிந்த திருக்கோட்டியூர் நம்பி உடனடியாகக் கிளம்பி ஸ்ரீரங்கத்திற்கு வந்து, ஸ்ரீராமாநுஜரைச் சந்தித்ததுடன், ஸ்ரீராமாநுஜர் அதன் பின்னர் வெளியில் பிக்ஷை எடுக்க வேண்டாம் என்று கூறிவிட்டார். மேலும் ஸ்ரீராமாநுஜருடைய திருமேனி நலத்தில் அக்கறை கொண்ட அணுக்கச் சீடரான கிடாம்பி ஆச்சானே இனி வரும் காலங்களில் அவருக்கு உணவு சமைத்துப் பரிமாற வேண்டும் என்றும் உத்தரவிட்டார். “ஆசாரியனின் தேகத்திற்கு சிஷ்யர்களே பொறுப்பு; அவருடைய ஆத்மாவிற்குப் பகவானே பொறுப்பு. அதே சமயம், சிஷ்யர்களின் தேகத்திற்கு பகவான் பொறுப்பு; அவர்களுடைய ஆத்மாவிற்கு ஆசாரியன் பொறுப்பு” என்பது ஸ்ரீவைஷ்ணவர்களின் கொள்கையாகும்.ஆனால், ஆசாரியராகிய ஸ்ரீதிருக்கோட்டியூர் நம்பியோ தம்முடைய சிஷ்யர் ஸ்ரீராமாநுஜரின் ஆத்மா, திருமேனி ஆகிய இரண்டின் மேலும் அக்கறை காட்டிய மகத்தான ஆசாரியபுருஷராக விளங்கினார். அவருடைய அவதாரத் திருநாள் வரும் 21.5.2023 (வைகாசி ரோகிணி) அன்று அமைகின்றது. - எஸ். ஸ்ரீதுரை

உடையவரைச் சோதித்த உத்தம குரு!

Related Stories