தஞ்சாவூர் பிள்ளையார்பட்டி : ராகு – கேது தோஷம் போக்கும் ஹரித்ரா விநாயகர்!

பிள்ளையார்பட்டி என்றதும் அனைவரது நினைவுக்கும் வருவது காரைக்குடி அருகில் உள்ள பிள்ளையார்பட்டிதான். அதே பெயரில் தஞ்சாவூர் அருகிலும் ஓர் ஊர் உள்ளது உங்களுக்குத் தெரியுமா?இங்கு மாமன்னர் ராஜராஜ சோழன் கட்டிய ஹரித்ரா விநாயகர் கோவில் பிரசித்தி பெற்று விளங்குகிறது. பிள்ளையார்பட்டி கற்பக விநாயகர் போல இங்குள்ள விநாயகரும் உருவத்திலும் கீர்த்தியிலும் புகழ்பெற்றவர்.தஞ்சாவூர் பிள்ளையார்பட்டிக்கு பிள்ளையார் வந்த கதை:தஞ்சாவூர் பெரியகோவிலைக் கட்ட முற்பட்ட ராஜராஜ சோழன் முதன்முதலில் விநாயகரை பிரதிஷ்டை செய்ய நினைத்தான். அதற்காக ஒற்றைக் கல்லினாலான விநாயகர் சிலையை சிற்பக்கூடத்தில் வடிவமைத்து அதை தஞ்சைக்கு எடுத்துவர தலைமைச் சிற்பிக்கு மன்னர் ஆணையிட்டான்..செதுக்கப்பட்டது. பின்னர் அதை தேரில் ஏற்றிக்கொண்டு இவ்வூர் (தற்போது பிள்ளையார்பட்டி) வழியாக தலைமைச் சிற்பி வரும் போது பாரம் தாங்காமல் தேரின் அச்சு முறிந்துபோனது. ஒரு சங்கடஹர சதுர்த்தி அன்றுதான் இந்தச் சம்பவம் நடந்தது. உடனே தலைமைச் சிற்பி தேரில் இருந்த விநாயகரை இவ்வூரில் இறக்கி வைத்து சம்பிரதாயப்படி வழிபட்டான். காலையில் புதிய அச்சு கொண்டு வந்து தேரின் பழுதுகளைச் சரி செய்தார்கள். பின்னர் விநாயகர் சிலையைத் தூக்கி தேரில் ஏற்ற முயன்றபோது ஒரு அங்குலம்கூட அவர்களால் நகர்த்த முடியவில்லை. தஞ்சைக்கு விநாயகரை எடுத்துச்செல்லும் முயற்சி தோல்வியடைந்தது. உடனடியாக மன்னனிடம் சென்று தகவல் தெரிவித்தான் தலைமைச் சிற்பி.ஆனைமுகன் அந்த ஊரிலேயே அருள்பாலிக்க விரும்புவதை அறிந்த ராஜராஜ சோழன் அங்கேயே அவருக்கு மகுடாகம முறையில் மங்கள விநாயகர் என்கிற ஹரித்ரா விநாயகர் கோவிலைக் கட்டி, அதைக் கிராமத்தாருக்குக் கொடுத்துவிட்டான். சங்கடஹர சதுர்த்தி அன்று பிள்ளையார் இவ்வூரில் இறங்கிய காரணத்தால் இந்த இடம் பின்னர் பிள்ளையார்பட்டி ஆனது.இச்சம்பவத்தின் மூலம் தஞ்சை பெரிய கோவில் கட்டுமானத்திற்கு சிலைகளாக வடித்து எடுத்து வராமல், பெரிய கருங்கற்களாக எடுத்து வந்ததும்; கோவில் கட்டப்பட்டுள்ள பகுதியிலேயே சிலைகள் செதுக்கப்பட்ட வேண்டும் என்பதையும் விநாயகர் உணர்த்தியிருக்கிறார் எனவும் சொல்லப்படுகிறது. மேலும் மாமன்னன் ராஜராஜன் சோழன் தஞ்சாவூர் பெரிய கோவிலில் பெருவுடையாரை மகுடாகம முறையில் பிரதிஷ்டை செய்ய இந்தச் சம்பவமும் ஒரு காரணம் என்கிறார்கள் வரலாறு ஆய்வாளர்கள்.இத்தலத்து விநாயகர், பெரிய கோவில் கட்டிய தலைமைச் சிற்பியின் கனவில் அவ்வப்போது தோன்றி, பெரிய கோவில் கட்டுமானத்திற்குக் குறிப்புகள் கொடுத்து வழிகாட்டினாராம். மேலும் தஞ்சாவூர் பெரிய கோவில் கட்டுமானத்திற்குத் தேவையான பெரிய கருங்கற்கள் பலவற்றை வெளியூரிலிருந்து தஞ்சாவூருக்கு எடுத்துவர ஏதுவாக யானைப்படைகளை சிருஷ்டித்தாராம். ராஜராஜ சோழனின் பெரிய கோவில் கனவு இத்தலத்து விநாயகர் அருளால் நிறைவேறியதாம்..ஆலய அமைப்பு:கிழக்கு நோக்கிக் கட்டப்பட்டுள்ள ஹரித்ரா விநாயகர் ஆலயத்தின் நுழைவாயிலில் இருபுறமும் துவாரபாலகர்கள் நம்மை வரவேற்பது போல காட்சி தருகிறார்கள். சிறிய ராஜகோபுரம் வழியாக உள்ளே சென்றால் மகா மண்டபத்தில் பலிபீடத்தையும் நந்தியையும் தரிசனம் செய்யலாம். விநாயகருக்கு இங்கு நந்தி வாகனம் அமைந்திருப்பது சிறப்பு.அர்த்த மண்டபத்தின் வலது புறத்தில் சிறிய விநாயகரும், இடது புறத்தில் ஆவுடையார் இல்லாமல் லிங்கமும் பிரதிஷ்டை செய்யப்பட்டுள்ளது. தஞ்சாவூர் பெரிய கோவில் கட்டுமானங்கள் முழுமைபெற இராஜராஜ சோழன் இவர்களை வழிபட்டதாகச் சொல்லப்படுகிறது.கருவறை நுழைவாயிலுக்கு வலப்பக்கம் கணபதியும், இடப்பக்கம் வள்ளி, தெய்வானை சமேத முருகன் சன்னதியும் உள்ளது. கருவறையில் ஹரித்ரா விநாயகர் எழுந்தருளியுள்ளார். ஹரித்ரா என்பதற்கு வடமொழியில் மஞ்சள் என்று பொருள். மஞ்சள் மங்களகரமானது. இவர் மங்களங்கள் அனைத்தையும் அருளக்கூடியவர் என்பதால் ஹரித்ரா விநாயகர். பிள்ளையாரின் 32 திருவுருவங்களுள் இவரும் ஒருவர்..நான்கு கைகளுடன் கூடிய இந்த ஹரித்ரா விநாயகர் வலது மேல்கரத்தில் அங்குசமும், இடது மேல் கரத்தில் பாசாங்குசமும், வலது கீழ்க்கரத்தில் வியாச முனிவர் சொல்லச் சொல்ல மகாபாரதம் எழுத வேண்டி தனது தந்தத்தை உடைத்துக் கையிலும் வைத்துள்ளாராம். இடது கீழ்க்கரத்தில் மோதகம் (கொழுக்கட்டை) வைத்து அமர்ந்த நிலையில் அபூர்வ கோலத்தில் காட்சி தருகிறார். இவரின் துதிக்கை, தந்தம், கைவிரல், உடம்பு முழுவதும் தத்ரூபமாகச் செதுக்கப்பட்டுள்ளது. இவரது வயிற்றுப் பகுதியில் ராகு, கேதுக்கள் இடம்பெற்றுள்ளன. ஹரித்ரா விநாயகரை வழிபட்டால் ராகு, கேது தோஷங்கள் விலகுகிறது. எனவே இது ராகு, கேது தோஷத்திற்குச் சிறந்த பரிகாரத் தலமாகவும் விளங்குகிறது. மேலும் இவரை வழிபட்டால் மணப்பேறு, மழலைப்பேறு கிட்டுமாம். கல்வித்தடைகள், கடன் தொல்லைகள் அகலுமாம். மங்கள வாழ்வு அமையுமாம். திருமணம் மற்றும் குழந்தை பாக்யத்திற்கு வாழைப்பழத் தார் காணிக்கைச் செலுத்தியும் வேண்டிக்கொள்கின்றனர்.கருவறை கோஷ்டத்தில் நாகர்கள், நாகாலம்மன், தட்சிணாமூர்த்தி, துர்க்கை அம்மனும்; கோவில் உட்பிராகாரத்தில் தென்மேற்கில் ஐயப்பன், வடமேற்கில் தையல் நாயகி சமேத வைத்தீஸ்வர சுவாமி, நந்தி, சண்டிகேஸ்வரர், வடக்கில் நவகிரகங்கள், வடகிழக்கில் சிவனுக்கு நேர் எதிரில் காலபைரவர், கிழக்கில் லோபமுத்திரை உடனுறை அகத்தியர் ஆகியோர் அருள்கின்றனர். தலவிருட்சம் வில்வம்..சங்கடஹர சதுர்த்தி:இக்கோவிலில் ஒவ்வொரு சங்கடஹர சதுர்த்தி அன்றும் பதினாறு வகை செல்வங்கள் வேண்டி 16 வகையான திரவியங்களால் மாபெரும் சிறப்பு அபிஷேகம் நடைபெறுகிறது. அன்று ஒன்பது தீபங்கள் ஏற்றி விநாயகருக்கு அருகம்புல் மாலை, வாழைப்பழங்கள் மாலை சாற்றி அர்ச்சனை செய்து ஒன்பது முறை வலம் வந்து வழிபட்டால் சங்கடங்கள் யாவும் தீருமாம். இங்கு சங்கடஹர சதுர்த்தி வழிபாட்டில் கலந்து கொள்ள பூர்வ ஜென்மத்தில் புண்ணியம் செய்திருக்க வேண்டுமாம்.நவதானிய முடிச்சு வழிபாடு:கடன் தொல்லைகளில் இருந்து மீள வழி தெரியாமல் அவதிப்பட்டு வருபவரா நீங்கள்? இத்தல கணபதி இருக்க கவலைகள் வேண்டாம். தலா நூறு கிராம் வீதம் நவதானியம் வாங்கி மஞ்சள் துணியில் முடிந்து சங்கடஹர சதுர்த்தி அன்று ஹரித்ரா விநாயகர் பாதத்தில் வைத்து அர்ச்சனை செய்து வாங்கி, அதை வீட்டிற்கு எடுத்துச் சென்று பூஜை அறையில் வைத்து மூன்று நாட்கள் தினமும் ஒரு அச்சு வெல்லம் கொண்டு நிவேதனம் செய்து வழிபடவேண்டும். மூன்றாம் நாள் இரவு நவதானிய முடிச்சுகளில் உள்ள நவதானியங்களை ஒரு பாத்திரத்தில் போட்டு அத்துடன் மூன்று நாட்கள் நிவேதனம் செய்த அச்சு வெல்லத்தைக் கலந்து தண்ணீரை ஊற்றிப் பாதுகாப்பாக மூடி வைக்கவேண்டும். மறுநாள் காலை எழுந்ததும் நீராடி முன்தினம் இரவு ஊறிய தண்ணீருடன் எடுத்துச்சென்று கோவில் கோசாலை பசுவிற்கோ அல்லது அருகில் உள்ள வீடுகளில் வளர்க்கும் பசுவிற்குகோ தரலாம். இந்த வழிபாட்டைத் தொடர்ந்து ஒன்பது சங்கடஹர சதுர்த்தியன்று மேற்கொண்டால் நவகிரக தோஷங்கள் மற்றும் கடன் தொல்லைகளிலிருந்து விடுபடலாம் என்கிறார்கள்..முக்கிய தினங்கள்:தமிழ் மற்றும் ஆங்கில வருடப்பிறப்பு, சங்கடஹர சதுர்த்தி, பத்துநாள் பெருவிழாவாக விநாயகர் சதுர்த்தி, பிரதோஷம், கார்த்திகை சோம வாரம், தனுர் பூஜை, சங்கராந்தி, மகாசிவராத்திரி ஆகியவை இங்கு சிறப்பாகக் கொண்டாடப்படுகிறது.வருகின்ற 18.9.2023 திங்கட்கிழமை, விநாயகர் சதுர்த்தி அன்று விடியற்காலையில் கணபதி ஹோமமும், அதனைத் தொடர்ந்து ஹரித்ரா விநாயகருக்கு சிறப்பு அபிஷேகமும், சந்தனக்காப்பு அலங்காரமும் நடைபெறுகிறது. மாலை சிறப்பு சகஸ்ரநாம அர்ச்சனையும், சிறப்பு அலங்காரத்தில் உற்சவர் புறப்பாடும் நடக்கிறது. அன்றைய தினம் நாள்முழுவதும் கோவில் திறந்திருக்கும்.கார்த்திகை சோமவாரத்தில் ஹரித்ரா விநாயகருக்கு அபிஷேகம் செய்து, விபூதி, சந்தனம், நவதானியம், மலர் அலங்காரம் செய்யப்படுவதும், வெள்ளிக்காப்பு சாத்துதலும் இத்தலத்தின் தனிச்சிறப்பம்சமாகும்.தஞ்சாவூர் பெரிய கோவிலுக்குச் செல்லும் பக்தர்கள் பெருவுடையாரை தரிசிக்கும் முன்போ அல்லது பின்போ இத்தலத்தில் உள்ள கஜமுகனை வழிபட்டால் வியாபார தலத்தில் கஜானா நிரம்புமாம்; வீட்டில் செல்வம் நிறையுமாம்; கஷ்டங்கள் யாவும் தீருமாம்!.எங்கே இருக்கு?தஞ்சாவூர் பழைய பேருந்து நிலையத்திலிருந்து மருத்துவக்கல்லூரி வழியாக வல்லம் செல்லும் பேருந்து மார்க்கத்தில் சுமார் 9 கி.மீ. தொலைவில் உள்ள பிள்ளையார்பட்டியில் பிரதான சாலையில் ஹரித்ரா விநாயகர் கோவில் அமைந்துள்ளது.தரிசன நேரம்காலை 7 - பகல் 12; மாலை 5 – இரவு 8. சங்கடஹர சதுர்த்தியன்று காலை 7 –இரவு 9. - தஞ்சை இராசு