ஶ்ரீவிநாயகர் சதுர்த்தி: 18.9.2023 : விநாயகனே வினைதீர்ப்பவனே!

நம் கஷ்டங்களையும், வினைகளையும் தீர்த்து வைப்பவர் விநாயகப் பெருமான். எக்காரியத்தை ஆரம்பிக்கும் முன் அவரைத் தொழுதுவிட்டு முன்னேறினால் கையில் எடுத்த வேலை மங்கலகரமாய் முடியும் என்பது அசைக்கமுடியாத நம்பிக்கையாகும். இவரது உருவம் நம்மைப் புன்முறுவல் பூக்க வைப்பதுடன் சிந்திக்கவும் வைக்கிறது. வேழமுகம், அதற்குக் கீழே மனித உடல், மிகப் பெரிய தொந்தி, இடதுபக்க வாயில் ஆண்மையைக் குறிக்கும் நீண்ட தந்தம், வலதுபுறம் பெண்தன்மையைக் குறிக்கும் முறிந்த சிறிய தந்தம் ஆகியவை வியக்க வைக்கின்றன. பருத்த வயிறு பூதகணங்களை உள்ளடக்கியவர் என்பதைச் சுட்டுகிறது. ஆவணி மாதத்தின் வளர்பிறைச் சதுர்த்தி ஶ்ரீவிநாயகர் சதுர்த்தி எனப்படுகிறது. இந்த வளர்பிறைச் சதுர்த்தி சிலசமயம் புரட்டாசியில்கூட நிகழும். இந்த வருடம் புரட்டாசி 1 (திங்கள் 18.9.23) சதுர்த்தி திதி நிகழ்கிறது. அன்றே சதுர்த்தி விரதமும், விநாயகர் சதுர்த்தியும் அனுஷ்டிக்க வேண்டும். ஒருமுறை பார்வதிதேவி நீராடச்செல்லும்போது காவலுக்கு யாருமில்லாததால், தான் குளிக்க வைத்திருந்த சந்தனக் குழம்பினால் ஓர் உருவம் உருவாக்கி அதற்கு உயிர் கொடுக்க, அதுவே அவரது பிள்ளையாகிவிட்டது. எவரையும் உள்ளே அனுமதிக்கக்கூடாது என்ற தேவியின் ஆணைப்படி, அப்பிள்ளை ஈசனையும் தடுத்ததால் சினமடைந்தவர் அதன் சிரசைத் துண்டித்துவிட்டார். அதைக் கண்ட தேவி கடும் கோபமுற்று, காளியாக மாறி எல்லாவற்றையும் அழிக்கலானார். அவரைச் சாந்தப்படுத்த, ஈசனின் ஆணைப்படி தங்கள் பார்வையில் முதலில் தென்பட்ட யானையின் தலையைப் பூதகணங்கள் கொண்டுவர, அதையே பிள்ளையின் முண்டத்தில் இருத்தி உயிர்ப்பித்தார். அன்னையும் சமாதானமுற்று ‘பிள்ளையாரை’ அணைத்துக்கொண்டார். இந்நிகழ்வு நடந்த தினமே பாத்ரபத வளர்பிறை சதுர்த்தியாகி அவரது ஜெயந்தி விழாவாகக் கொண்டாடப்படுகிறது. அன்றையதினம் நாம் பூஜை செய்யும் சிலை மண்ணினால் செய்யப்பட்டதாக இருப்பது விசேஷம். நம் கட்டைவிரல் அளவைப்போல் பன்னிரண்டு மடங்கு அளவில் இருக்கவேண்டும். அப்படியில்லாவிட்டால் பூஜைமுறைகளைக் கோயிலில் செய்வது போல் அனுசரிக்கவேண்டும். அது எல்லாராலும் கடைப்பிடிக்க முடியாது என்பதால் பெரிய சிலைகளை வீட்டில் வைத்துக் கொள்ளாமல் நீரில் கரைத்து விடுகிறோம்..பூஜையன்று வீட்டைச் சுத்தப்படுத்திய பிறகு அழகிய கோலமிட்டு, வாயிலில் மாவிலைத் தோரணம் கட்டலாம். பூஜையறையில் மாக்கோலமிட்ட ஒரு மணையை வைத்து அதன்மேல் ஒரு தலைவாழை இலையை நுனி வடக்குப் பார்த்து இருக்க, அதன்மீது பச்சரிசியைப் பரப்பி, மத்தியில் களிமண் பிள்ளையாரை அமர்த்த வேண்டும். எருக்கம்பூ, அருகம்புல் மற்றும் பலவித மலர்மாலைகளை அணிவிக்க வேண்டும். வில்வதளம், நாயுருவி, மருக்கொழுந்து, வன்னி, இலந்தை, ஊமத்தை இலைகள், வாழை, நாவல் பழவகைகளைப் படைத்து ஆராதிக்கலாம். விநாயகருக்கு மிகவும் விருப்பமான ஔவையார் போற்றிப் பாடிய விநாயகர் அகவலைப் பாடலாம். விநாயகருக்குக் கொழுக்கட்டை, எள்ளுருண்டை, பாயசம், வடை ஆகியவற்றையும், பால், தேன், வெல்லம், முந்திரி, அவல் என ஒவ்வொன்றிலும் சிறிதளவு எடுத்துக் கலந்து நிவேதிக்கலாம். பசுஞ்சாணம், புற்றுமண், மஞ்சள், வெல்லம், எருக்கம் வேர், சந்தனம் ஆகியவற்றில் பிள்ளையார் உருவம் செய்து வழிபட்டால் அனைத்து விதமான நலன்களும் பெற்று மோட்சம் அடைவர் என்று விநாயக புராணம் கூறுகின்றது. சதுர்த்தி விரதமிருந்து மேம்பட்ட நிலையை மன்னன் கர்த்தமன், நள மகாராஜா, ஆதிசேஷன், தட்சன் மற்றும் பலர் அடைந்துள்ளனர். பூஜை முடிந்த அடுத்த நாளோ, மூன்றாவது தினமோ விநாயகர் சிலையை நீர்நிலைகளில் கரைப்பது ஐதிகம். ஏன் இந்த வழக்கம்? நம் முன்னோர் எதையும் காரணக் காரியத்தோடுதான் சொல்வார்கள், செய்வார்கள். ஆடிப்பெருக்கில் வெள்ளம் வந்து நீர்நிலைகளின் மணலைக் கரைத்துக்கொண்டு போய்விடும். நீர் நிலத்தடியில் இறங்காததால் நீர்மட்டம் குறையும். ஆனால் களிமண் நிறைந்த இடத்தில் நீர்கீழே பூமியில் இறங்கிவிடும். ஈரக்களிமண் உடனடியாக கரைந்து சென்றுவிடுமாதலால், சிலை ஈரப்பதமின்றி காய்ந்துவிடும். மூன்றாம் நாள் கரைத்து விடும் வழக்கம் உண்டானது. இதனால் குடிநீர் பிரச்னையும் வெகுவாகச் சமாளிக்கப்பட்டுவிடும், அல்லவா? விநாயகனே வினைதீர்ப்பவனே, உன் பாதமே சரணம்! -பா.கண்ணன்