தொடர்:சனாதன தர்மம் - 20.வேதங்கள் உபனிடதங்கள் கூறும் சமுதாய நலன்கள்

உபனிடதங்கள் கூறும் சில வாக்கியங்கள் ஆழ்ந்த அர்த்தங்களுடன் பிரபஞ்சத்தில் உள்ள அனைத்து சமுதாயங்கள் நலனுக்கும் வழிவகுக்கின்றன.வசுதைவ குடும்பகம் (மஹாஉபனிடதம்).உலகமே ஒரு குடும்பம்; வசுதா என்பதற்கு பூமி என்று பொருள். ஒருவன் அன்னியன்; இன்னொருவன் உறவினன் என்று சொல்வதெல்லாம் சிறுமை. உலகமே ஒரு குடும்பமாய் வாழ்வதே பெருந்தன்மையானது.வசுதைவ குடும்பகம் முதலில் கூறுவது, பிரபஞ்சம் ஒரு பிரம்மனுக்கு உரித்தானது. எனவே உலகில் நாம் அனைவரும் சமம்..இரண்டாவதாக, ஒவ்வொருவரும் மற்றொருவரிடம் அன்பு செலுத்த வேண்டும். தீவிரவாதிகளாக இருப்பினும் அவர்களுக்கும் அன்பு அவசியம்.அதேபோல் ஒருவர் மற்றொருவரின் நம்பிக்கைகளுக்கு மதிப்பும் மரியாதையும் தரவேண்டும். வேறு மதத்தினராக இருப்பினும் சரி!அகிம்சையே அனைவரது குணமாக இருத்தல்வேண்டும். கலியுகத்தில் நாளுக்கு நாள் பொறுமை குறைந்து குரோதம் அதிகமாகும் நிலை. கட்டுப்பாடு மிக முக்கியம். சகிப்புத்தன்மை இன்றியமையாதது.கடல் பெருமையுடையது. எந்தவிதபாகுபாடும் இன்றி சங்கமமாகும் அனைத்து நதிகளை ஏற்றுக்கொள்வதும், அதில் உறையும் அனைத்து உயிர்களையும் இரட்சிப்பதுதான் அதன் பெருமைக்குக் காரணம்.ஏகம் சத்விப்ரபஹுதா வதந்தி (ரிக் வேதம்).மெய் என்பது ஒன்றே! அறிஞர்கள் அதை வெவ்வேறு வகையில் தெரிவிப்பார்கள். பிரம்மம் ஒன்றே! அதை நாம் எந்த வடிவத்திலும் நாமத்திலும் உருவகப்படுத்திக் கொள்ளலாம்.உண்மைக்கும் நம்பிக்கைக்கும் உள்ள வேறுபாட்டையும் இது தெரிவிக்கிறது. மாறாதது உண்மை. ஆனால் நம்பிக்கைகள் மாறலாம்.கடவுள் என்பவர் யார்?பிரபஞ்சத்தின் தோற்றம், நிலைபெறல், ஒடுக்கம் என இவையனைத்தும் எவர் மூலம் நடைபெறுகின்றனவோ அவரே கடவுள்.கடவுள் என்றும் உள்ளவர், எப்போதும் தூயவர், எல்லாம் வல்லவர், எல்லாம் அறிந்தவர், கருணை வடிவினர், குருவிற்கெல்லாம் குருவானவர், எல்லாவற்றிற்கும் மேலாக அந்த இறைவன் சொல்லுக்கு அடங்காத அன்பு வடிவினன் எனச் சொல்லிக்கொண்டே போகலாம்.இந்து சமயம் கடவுளை பல பெயர்கள் கொண்டு அழைக்கின்றது. பரம்பொருள், பரமாத்மா, இறைவன், தெய்வம், தேவி என்று பல சொற்கள் கடவுளைக் குறிக்கின்றன. கடவுள் ஒருவர்தான். அவருக்கு பல பெயர்களும் பல உருவங்களும் உள்ளன..பொதுவாக, அனைத்து தெய்வங்களுக்குமே மூன்றுவித வெளிப்பாடும், உருவமும் உண்டு. அவை: முதலாவது - மூர்த்தி, அதாவது விக்கிரமாகச் செதுக்கப்படுவது.இரண்டாவது - யந்திரம். அது தகட்டில் அல்லது காகிதத்தில் வரையப்படுகிறது.மூன்றாவது - மந்திரம். அதை மனத்திற்குள்ளோ அல்லது உரக்கவோ சொல்லலாம். ஒவ்வொறு தெய்வதிற்கும் ஒரு தியான சுலோகம் உண்டு. அதை உச்சரித்தால், அந்தத் தெய்வம் இதயத்தில் எழுந்தருளும்.ஒவ்வொரு தெய்வ வடிவமும் அந்தப் பரம்பொருளைப் பற்றிய ஓர் அம்சத்தை விளக்க வந்தது. ஒவ்வொரு வடிவமும் ஏதோ ஒரு வகையில் நம் சிந்தனையை இறைவன்பால் திருப்புகிறது என்பதை நாம் மறந்துவிடக் கூடாது.ஏராளமான ரிஷிகளும், மகான்களும் தங்கள் இதயத்தில் தோன்றிய பரவசமூட்டும் காட்சிகளைக் கண்களாலும் கண்டனர். ஆகவே இந்து சமயத்தின் தெய்வ வடிவங்கள் எல்லாம் மெய்யானவை. அவை வெறும் சின்னங்கள் அல்ல. முயன்றால், நாமும் அத்திருஉருவங்களைக் காணலாம்.ஏகம் ஸத்விப்ராபஹூதா வதந்தி.இந்து சமய முக்கியமான கொள்கை இது. ஏகம் ஸத் என்றால் பரம்பொருள் ஒன்று என்று பொருள். விப்ராபஹூதா வதந்தி என்றால் பண்டிதர்கள் பலவிதமாகக் கூறுகின்றனர் என்பது பொருள். இறைவன் எல்லையற்ற சக்தி உடையவர். அவரால் இயலாதது என்பது இல்லவே இல்லை. பக்தர்கள் எந்த வடிவத்தில் காண விரும்புகின்றனரோ அந்த வடிவத்தில் அவர் காட்சியளிப்பார். அவ்வாறே பல பக்தர்கள் தாம் கண்ட வடிவங்களையே நமக்கு வெளிப்படுத்திச் சென்றுள்ளனர். ஒரு குறிப்பிட்ட வடிவத்தில் மட்டும் தான் கடவுள் வருவார் என்பது அவரது எல்லையற்ற சக்தியுடைமைக்கும், எல்லையற்ற கருணை உடைமைக்கும் இழுக்காகும். மேலும் எந்த வடிவிலும் இறைவனை வழிபடலாம் என்பதே உலகில் அமைதி நிலவச் செய்யும் கொள்கையாகும். இக்காரணங்களால்தான் உலகத்து அறிஞர்கள் அனைவரும் ஏகம் ஸத்விப்ராபஹூதா வதந்தி என்ற இந்து சமயக் கொள்கையைப் போற்றுகின்றனர். பல கடவுளர்கள் என்ற தோற்றத்திற்கு ஆதாரம் மும்மூர்த்திகள். அவர்களின் தேவிகளைப் பற்றிய பக்தி நெறிகள், கணபதி, முருகன், இந்திரன், வருணன், அக்னி, கிராம தேவதைகள், சிறு தெய்வங்கள் என ஒவ்வொரு வடிவங்களும் ஓரளவுக்கு பரம்பொருளின் சில அம்சங்களைச் சித்தரிக்கின்றன. புயல், நெருப்பு, மின்னல், சூறாவளி, எரிமலை இப்படிப் பலப்பல இயற்கைச் சக்திகளை இறைவனின் அம்சமாகக் காணுவது வழக்கம்.பகவத்கீதையில் ஸ்ரீகிருஷ்ணர் கூறுகிறார், "நீ எந்த உருவத்தில் என்னை வழிபட்டாலும், எந்த விதத்தில் என்னை அண்டி வந்தாலும் நான் உனக்கு அருள் செய்வேன்.".இந்துசமயத்தின் அடிப்படைத் தத்துவத்தை விளக்க இந்தச் சொல்லே போதும். எல்லோருக்கும் அனைத்துமாக இருக்கிற அந்த ஆண்டவன் பக்தர்கள் விரும்பும் வடிவத்தில் அவர்களுக்குக் காட்சி தந்து அருள் செய்வான். அன்போடு அவனிடம் அவர்கள் கேட்கலாம்.சர்வ பவந்துசுகினஹ சர்வ சந்து நிராமயஹ சர்வ பத்ரான்னிபஷ்யந்து மா கஷ்சித்துஹ்கப்ஹாக்பவேத் (கருட புராணம்) அனைவரும் நல்வாழ்வு பெறவேண்டும்; அமைதி நிலவவேண்டும்; வியாதிகளிலிருந்து அனைவரும் விடுபடவேண்டும்; அனைவரது வாழ்வும் வெற்றிகரமாகவும், மங்களகரமாகவும் அமையவேண்டும். துயரங்கள் அண்டக்கூடாது. இத்தகைய வாழ்த்துகளை பிரம்மமே எங்களுக்குத் தருவாயாக!அசதோமாசத்கமய (பிரஹதாரண்யக உபனிடதம்)இறைவனே! எங்களை சத்தியத்தின் பக்கமே எடுத்துச்செல்வீர்களாக! இருளிலிருந்து எங்களை ஒளிக்கு அழைத்துச்செல்லுங்கள். இறப்பிலிருந்து அழிவின்மைக்கு மீட்டுச்செல்வாயாக.பிரம்மம் சத்தியம்! பிரம்மம் முழுமையானது. இந்த பிரபஞ்சமும் முழுமையானது. பிரபஞ்சம் பிரம்மனின் படைப்பு. பிரபஞ்சத்தைப் படைத்ததால் பிரம்மனின் முழுமை தடையுறவில்லை. பிரம்மன் அனந்தம்!அனந்தம் என்ற சொல்லிற்கு அளவிட முடியாது என்பது பொருள். அனந்தத்தை அனந்தம் கொண்டு கழித்தாலும் வருவது அனந்தம்தான். அதேபோல் பூஜ்ஜியத்தை பூஜ்ஜியத்தைக் கொண்டு கழித்தாலும் வருவது பூஜ்ஜியம்தான். சனாதன தர்மத்தில் பூஜ்யம், அனந்தம் என்ற இரண்டும் ஒன்றாகிறது.ஆகாஷ்ஷூன்யஹை - ஆகாயத்தில் ஒன்றுமில்லை என்பதும், ஆகாஷ்அனந்த்ஹை - ஆகாயம் அளவிடமுடியாதது என்பதும் சனாதன தர்மத்தில் குறிப்பிடப்படுகிறது..சனாதன தர்மத்தின் சத்தியம் சத், தத் இரண்டு பதங்களில் அடங்கியுள்ளன என்றால் மிகையாகாது. சத் என்றால் இது என்று கண்டோம்; தத் என்றால் அது. ஒன்று பிரம்மத்தையும் மற்றொன்று ஆன்மாவையும் குறிப்பிடுகின்றன. பிரம்மம் முழுமையானது. நம்மைச் சுற்றியுள்ளது. அதன் ஒரு சிறு பகுதியாகத்தான் ஆன்மா இருக்கிறது.இதைப் புரிந்துகொள்பவன் தானும் தனது குணநலன்களால் முழுமை பெற முடியும் என்ற நம்பிக்கை அவனிடம் பிறக்கிறது. முக்தி அடையும் வாய்ப்பு அதிகமாகிறது.‘ஸத்’ என்றால் என்றும் மாறாத உண்மை!நிலை பெயராத உறுதியான உண்மை என்பதை அடிக்கோடிடுவதற்காக அதை ‘பரப்பிரம்மம்’என்றும் கூறுவதுண்டு. அங்கிங்கெனாதபடி எங்கும் விளங்கியதாய் இருக்கும் இப்பரம்பொருளைப் பற்றி ‘இருக்கிறது’ என்பதைத்தவிர வேறு ஒன்றும் பேசிவிடமுடியாது. வெறுமனே இருக்கும், அவ்வளவுதான். அது பேசாது, பேசவொண்ணாதது; பார்க்காது, பார்க்கவொண்ணாதது; காரணத்தில் அடங்காதது; காரியம் செய்யாதது; காரியத்தினால் ஏற்படாதது - இப்படிச் சொல்லிக்கொண்டே போகலாம். முக்காலத்திலும் இருப்பதனால் அதை ‘இருப்பு’ என்று பொருளுடைய‘ஸத்’ என்ற ஒரே சொல்லால் வேதங்கள் சொல்லிவிடுகின்றன.(சனாதன தர்மம் தழைக்கும்)

தொடர்:சனாதன தர்மம் - 20.வேதங்கள் உபனிடதங்கள் கூறும் சமுதாய நலன்கள்

Related Stories