தொடர்: மகாபாரதம் - 5

-டாக்டர் சுதா சேஷய்யன்சந்திர வம்சம் எங்கே தொடங்குகிறது? இதென்ன கேள்வி, சந்திரனில்தானே சந்திர வம்சம் தொடங்கவேண்டும்! மகாபாரதக் காப்பியத்தைத் தமிழில் பாடிய வில்லிபுத்தூரார், எடுத்த எடுப்பிலேயே ‘திங்கள் மாமரபினில் பிறந்து இசையுடன் சிறந்தோர் தங்கள் மாக் கதையான் அறி அளவையின் சமைக்கேன் – சந்திர குலத்தில் தோன்றிப் புகழோடு வாழ்ந்த மன்னர்களின் கதையை, யான் அறிந்த மட்டில் உரைக்கிறேன்’என்றுதான் கூறுகிறார். சந்திரனின் பெருமையை வில்லிபுத்தூரார் எடுத்துக்காட்டுகிற விதமும் மிக அருமையானது. பொன் மயமாக மிளிர்ந்த மந்தர மலையை மத்தாக வைத்து, அதிலே பாம்பைப் பிணைத்து வடமாக்கி, உம்பர் ஆனவரும் (தேவர்கள்), தானவரும் (அசுரர்கள்) கடைந்தார்கள். அப்போது, அந்தப் பாற்கடலில், அமிழ்தம் தோன்ற, அதன் உடன்பிறந்தோனாகச் சந்திரனும் தோன்றினான். பாற்கடலில் பிறந்த ஆலகால நச்சால் உலகம் நலிந்தது; மண்மகளான பூமாதேவியும் துன்பப்பட்டாள். தன்னுடைய குளிர்ச்சியையும் மென்மையையும் பொழிந்து, இந்தத் துன்பத்தை ஆற்றியவன் சந்திரன்.இப்படிப்பட்ட பெருமை வாய்ந்த சந்திரனை மாலைப் பொழுதில் அனைவரும் வணங்குகின்றனர். சந்திரனின் மனைவியரில் தாரை என்பவள் ஒருத்தி. சந்திரனுக்கும் தாரைக்கும் பிறந்த மகன், அறிவில் உயர்ந்தவனான புதன்..புதன் யாரை மணந்தான்?புதனுடைய காதலிலும் திருமணத்திலும்தான் சந்திர வம்சத்தின் கிளைகள் விரியத் தொடங்குகின்றன. கதையும் ஆரம்பிக்கிறது.மனுவின் மகன் ஒருவன் தேரில் சென்றான் என்று கட்டியம் கூறுகிறார் வில்லிபுத்தூரார்: வளை நெடுஞ் சிலைக் கரத்தினன் மனு அருள் மைந்தன் உளை எழும் பரித் தேரினன் உறுவது ஒன்று உணரான்…………இவ்வாறு சென்றவன் இளன் என்பவன். இவனைப் பற்றி மகாபாரதம் இப்படிச் சொல்கிறது. வைவஸ்வத மனு (இவர் விவஸ்வான் என்னும் சூரியனின் மகன் ஆவார்) என்பவருக்குப் பத்துக் குழந்தைகள்; இக்ஷ்வாகு, வேனன், த்ருஷ்ணு, நரிஷ்யந்தன், நாபகன், காரூஷன், சர்யதி, ப்ருஷத்ரன், நாபகாரிஷ்டன் ஆகிய ஒன்பது மகன்களோடு இளை என்னும் மகள், ஆக மொத்தம் பத்துப் பேர். புரூரவாஸ்ததோ வித்வாநிலாயாம் ஸமபத்யத – ஸா வை தஸ்யாபவன்மாதா பிதா சைவேதி ந: ஸ்ருதம்.இளையிடம் அறிவுமிக்கவனான புரூரவன் தோன்றினான். புரூரவனுக்கு இளையே தந்தையும் தாயும் என்று செவிமடுத்திருக்கிறோம் என்று கூறிவிட்டு, புரூரவனைப் பற்றித் தொடர்ந்து விடுகிறது பாரதம். ஆனால், வேறு சில புராணங்கள், இளையைப் பற்றி மேலும் சில விவரங்களைத் தருகின்றன..வைவஸ்வத மனுவுக்கும் அவர்தம் மனைவி சதரூபை என்னும் பெண்மணிக்கும் மகனாகத்தான் தோன்றினான் இளன்; சுத்யும்மன் என்பது இவனுக்கு வழங்கப்பட்ட இன்னொரு பெயர். பாஹ்லீகம் என்றழைக்கப்பட்ட பகுதிக்கு அரசன் ஆனான் (பாஹ்லீகம் என்பது எது தெரியுமா? பேக்ட்ரியா என்றழைக்கப்பட்டதும், இப்போதைய வட ஆஃப்கானிஸ்தானைச் சேர்ந்ததுமான பாரசீக ஆட்சிப் பகுதி; பிற்கால ஏடுகளில் பிரகலீகம் என்றும் குறிக்கப்பட்டுள்ளது).தேரில் ஏறிச்சென்ற இளன், பற்பல இடங்களில் சுற்றும்போது, அருந்தவ விபினம் (அரிய தவம் செய்யப்படுகிற இடம்) அடைந்தான். இந்த அருந்தவ விபினம் என்பது, உமையம்மையார் தவம் செய்த / செய்கிற இடம். இமயமலை அடிவாரத்தில் இருந்த குமார வனம் என்னும் பகுதிதான் இது என்று கருதப்படுகிறது. அம்மையின் தவம் கலையாமலிருப்பதற்காகவும், தகாத எண்ணத்தோடு இங்கு யாரும் உலவக் கூடாது என்பதற்காகவும், இந்தப் பகுதிக்கு வரும் இளைஞர்கள் யாராயினும், இளம் பெண்களாக மாறிவிடுவர் என்று சிவனார் ஆணையிட்டிருந்தார்.இளனுக்கும் இது பலித்தது. பெண்ணாக, அதாவது இளையாக மாற்றம் உற்றான். தன்னுடைய சஞ்சார எல்லையைத் தாண்டி வந்ததாலேயே இவ்வாறு நேர்ந்துவிட்டது என்பதை உணர்ந்த இளை, மீண்டும் தன்னை ஆணாக்கும்படி சிவனாரை வேண்டினாள். பொதுவாகப் பலருக்கும் பொருந்தும்படியும், எல்லைகளைத் தாண்டாமல் இருப்பதற்காகவும் விதிக்கப்பட்ட விதியை ஒருவருக்காகத் தளர்த்தமுடியாது என்று சிவபெருமான் மறுதலித்தார்..அன்னையிடம் ஓடி அருள் வேண்டினாள் இளை. முழுமையாக மாற்றமுடியாது என்றுரைத்த அம்பிகை, இளைமீது பரிதாபம் கொண்டு, ஒருமாதம் ஆணாகவும் ஒரு மாதம் பெண்ணாகவும் மாற்றி மாற்றி இருக்கும்படியான நிலையை அருளினாள். ஒருவாறு மனம் தேறிய இளை, குமாரவனப் பகுதியிலேயே தங்கி, ஒரு மாதம் பெண்ணாகவும் (இளை) ஒரு மாதம் ஆணாகவும் (இளன்) உலவிக்கொண்டிருந்தாள் (ன்). இந்த நிலையில்தான், குமாரவனத்து ஏரியில் உள்ளிறங்கி, நீருக்குள் மூழ்கித் தவம் செய்துகொண்டிருந்த புதன், தவத்தை நிறைவு செய்து நீரிலிருந்து வெளிப்பட்டான்.எதிரில் பேரழகியாக உலவிக்கொண்டிருந்த இளையைக் கண்டான். காதல் கொண்டான் (மனித இனத்தின் முதல் ‘கண்டதும் காதல்’ இதுதானோ என்கிறார் மலேசிய அறிஞர் முனைவர் தர்மரத்தினம்). இளைக்கும் காதல்தான். இருந்தாலும், தன்னுடைய சாப நிலையை எடுத்துச் சொன்னாள்(ன்). காதலைத் தள்ளவும் முடியாமல், யதார்த்தத்தை ஏற்கவும் முடியாமல் தவித்த புதன், கடைசியில் மனம் தெளிந்தான். இளை பெண்ணாக இருக்கும்போது கணவன் – மனைவியாக வாழ்வதாகவும், இளன் ஆணாக இருக்கும்போது நண்பர்களாக உலவுவதாகவும் இருவரும் தீர்மானித்தனர். பெண்ணாக இருந்த காலத்தில் கருவுற்ற இளைக்குப் பிறந்தவன் புரூரவன்.பிள்ளை வளர வளர, தாயின் நிலை (நிலையின்மை) மூவருக்கும் சங்கடத்தைத் தந்தது. அரிஷ்டநேமி, பிரமேதனர் போன்ற மாமுனிவர்கள் ஒருமுறை அவ்வனத்திற்கு வர, தங்களின் நிலையை முனிவர்களிடம் புதனும் இளையும் தெரிவித்தனர். முனிவர்கள் சிவனாரை வேண்டி யாகம் செய்ய, வெளிப்பட்டுத் தோன்றிய சிவனாரிடம் இளைக்கு சாபநிவர்த்தியை முனிவர்கள் வேண்ட, மீண்டும் ‘இளனாகவே இவன் திகழ்வான்’ என்று வரமளித்துச் சிவனார் மீண்டார்..இளன் மீண்டும் தன் நிலை பெற்றான். புதன், மீண்டும் தவம் மேற்கொள்ள ஏரிக்குள் நுழைந்தான். புரூரவனை அழைத்துக்கொண்டு பாஹ்லீகம் திரும்பினான் இளன். நாட்டை நல்ல முறையில் ஆண்டு, புரூரவனுக்குத் தக்க பருவம் வந்தவுடன் திருமுடி சூட்டி அரசனாக்கிவிட்டு, தவம் செய்வதற்காகக் கானகம் சென்றான்.இதையெல்லாம் சேர்த்துச் சேகரித்துத்தான், ‘புரூரவனுக்குத் தந்தையும் தாயுமாக இளை இருந்ததாகக் கேள்விப்பட்டிருக்கிறோம்’ என்று ஜனமேஜயனிடத்தில் வைசம்பாயனரை உரைக்கச் செய்து, மகாபாரதம் கதையை நகர்த்துகிறது. வனத்தில் இருக்கும்போது தாயாக இருந்து பராமரித்த இளை, நாட்டிற்கு அழைத்து வந்து பட்டாபிஷேகம் நடத்தியதுவரை தந்தையாக இருந்து பாதுகாத்தாள் (ன்) இல்லையா?புரூரவன், புத்திசாலியாகவும் பேரழகனாகவும் திகழ்ந்தான். கடலில் தெளித்துக் கிடந்த பதின்மூன்று தீவுகள் உள்ளிட்ட பெருநிலப் பரப்பின் ஆட்சியதிகாரம் இவனிடத்தில் இருந்தது. பௌரவன் என்றும் விக்கிரமன் என்றும்கூட இவன் அழைக்கப்பட்டான். இவன் வழியாகத்தான் சந்திர வம்சம் தொடர்ந்தது. பௌரவ குலம் என்றும் பெருமையாகப் பேசப்பட்டது.புரூரவன் இருக்கட்டும். புதன் – இளை கதை இப்படியெல்லாம் நடந்ததா என்று வியக்கிறோம். இதென்ன கதை இது என்று எண்ணுகிறோம்.இந்தக் கதை இப்படித்தான் நடந்ததா என்னும் வினாவைக் காட்டிலும், இப்படி நடந்ததன் உள்ளர்த்தம் என்ன என்று சிந்திக்கலாமா?ஆண் பெண்ணாக மாறுவது, பெண் ஆணாக மாறுவது – இவற்றைவிட, பிறக்கும்போது குறிப்பிட்ட பாலினத்தில் தோன்றி, வளருகையில் உடலாலும் உணர்வாலும் அடுத்த பாலினத்திற்கு மாறவேண்டும் என்னும் உந்துதலைப் பெறுபவர்களை நம்முடைய வாழ்வில் சந்திக்கிறோம். சமீப காலங்கள்வரை, இப்படிப்பட்டவர்களை ஓரப்பார்வையால் சமூகம் ஒதுக்கியது என்பதை மறுக்கமுடியாது. இப்போதும்கூட நிலைமை முழுவதுமாக மாறிவிடவில்லை. சட்டப்படியும் சமூகப் பொதுவிதிகளின்படியும் மூன்றாம் பாலினத்தார் என்று வகைப்படுத்திவிட்டாலும், இவர்களைச் சம உரிமையோடும் சக வாழ்நிலையோடும் ஏற்றுக்கொண்டுவிட்டோமா என்னும் வினா எழாமல் இல்லை.இளை ஏளனப்படுத்தப்படவில்லை என்பதையும், நிலைமையை ஏற்றுக் கொண்டு புதனும் இளையும் தங்கள் வாழ்வைத் தங்களுக்கேற்ப வடிவமைத்துக் கொண்டார்கள் என்பதையும், புரூரவனுக்குச் சட்ட – சமூக அந்தஸ்து வழங்குவதில் சிக்கல்கள் தோன்றவில்லை என்பதையும் எண்ணினால், நம் கால வாழ்க்கையை நாம் எவ்வாறு அணுகவேண்டும் என்பதற்கு ஒளியும் வழியும் கிட்டுகின்றன.மகாபாரதம் பயிற்றுவிக்கும் பற்பல பாடங்களில் இதுவும் ஒன்று!(பாரதம் விரியும்)

தொடர்: மகாபாரதம் - 5

Related Stories