தொடர்: தரணி போற்றும் தலமரங்கள்!

6 .அரச மரம்மரங்களின் அரசனாகப் போற்றப்படுவது அரச மரமாகும். தமிழகமெங்கும் காணப்படும் பெருமரங்களில் அரச மரமும் ஒன்று. நீள்வட்ட வடிவில் கூரிய இலைகளைக் கொண்டது அரசு. பெருமரம், திருமரம் என்ற பெயராலும் அழைக்கப்படும் அரச மரம், அதிக அளவில் பிராணவாயு எனும் ஆக்சிஜனை வெளியிடுகிறது.பீகார், ஒடிசா, அரியானா ஆகிய இந்திய மாநிலங்களின் மரமாக அரசமரம் விளங்குகின்றது. இந்தியா மட்டுமின்றி நேபாளம், இலங்கை, தென்மேற்கு சீனா, கிழக்கு வியட்னாம் முதலான நாடுகளிலும் இது காணப்படுகின்றது.பொதுவாக அரச மரம் தமிழகத்தின் கிராமங்களில் ஏரி, குளங்களின் கரையோரத்தில் காணப்படும். அரச மரத்துடன் வேம்பு மரத்தையும் இணைத்து வளர்ப்பதில் தமிழர்கள் அதிகம் விருப்பம் கொண்டவர்களாக உள்ளனர். இம்மரத்தை வலம் வருவதால் குழந்தைப்பேறு கிடைக்கும் என்பது பரவலான நம்பிக்கையாக உள்ளது.இந்திய அரசின் உயரிய விருதான பாரத் ரத்னா விருதின் முன்புறம் அரச இலையில் சூரியன் உருவமும், பாரத் ரத்னா என்ற சொல்லும், விருதின் பின்புறம் அரச இலையில் தேசியச் சின்னமும், சத்ய மேவ ஜெயதே என்ற சொல்லும் இடம்பெற்றுள்ளது. இது அரச இலையின் பெருமைக்குச் சான்றாக விளங்குகிறது..இலக்கியம்: "அலைபுனல் ஆவடு துறை அமர்ந்த இலைநுனை வேற்படை எம் இறையை நலமிகு ஞானசம் பந்தன் சொன்ன விலையுடை அருந்தமிழ் மாலைவல்லார் வினையாயின நீங்கிப்போய் விண்ணவர் வியனுலகம்நிலையாக முன்னேறுவர் நிலமிசை நிலையிலரே"எனத் திருஞானசம்பந்தர் தேவாரம் அரச மரத்தினைக் குறிப்பிடுகின்றது.புராணங்கள் அரச மரத்தை மும்மூர்த்திகளின் அம்சமாகப் போற்றுகின்றன. ’’மூலதோ பிரம்ம ரூபாய மத்யதோ விஷ்ணு ரூபிணேஅக்ரத சிவரூபாய வ்ருக்ஷராஜாயதே நம:-" என வடமொழி ஸ்லோகம் போற்றுகிறது.இதன் பொருள்: அடிப்பகுதி பிரம்மமாகவும், நடுப்பகுதி விஷ்ணுவாகவும், மேல்பகுதி சிவ வடிவமாகவும் விளங்கும் அரசனுக்கு வணக்கம் என்பதாகும்.தலங்கள் :சோழநாட்டில் திருவாவடுதுறை, திருநல்லம், திருப்பரிதி நியமம், தொண்டை நாட்டில் திருஅரசிலி ஆகிய சிவாலயங்களிலும், பாண்டிய நாட்டில் திருப்புல்லாணி, மலைநாட்டில் திருச்செங்குன்றூர் ஆகிய திருமால் தலங்களிலும் அரசமரம் தலமரமாகத் திகழ்கின்றது.தொண்டை நாட்டில் இரும்பை மாகாளம் சிவாலயத்திலும், சோழநாட்டில் திருச்சேறை திருமால் தலத்திலும் இரு தலமரங்களில் ஒன்றாக அரச மரம் திகழ்கின்றது.திருவாவடுதுறையில் படர்அரசு தலமரமாக உள்ளது. இதன்கீழ் அமர்ந்து திருமூலர் திருமந்திரத்தை அருளினார் என்பது வரலாறு. இம்மரத்தின் பெயரால் திருவாவடுதுறை ஆதீனம், அரச வனத்து அறநிலையம் என அழைக்கப்படுகிறது. பொதுவாக பல ஆலயங்களில் குழந்தைப்பேறு வேண்டி அரச மரத்தை வலம் வந்து வணங்குகின்றனர். திருப்புல்லாணியில் அரச மரத்தடியில் நாகத்தை நிறுவி குழந்தைப்பேறு வேண்டுகின்றனர். இது வடஇந்தியாவில் உள்ள கயாவில் செய்யும் சடங்கிற்கு இணையானது எனக் கூறுகின்றனர்..தலமரத்தின் பெயரால் திருஅரசலி என்ற திருத்தலம் அமைந்துள்ளது. அத்தலத்தின் இறைவனாக அரசலிநாதர் விளங்குகின்றார்.திருவாவடுதுறையில் அரச மரத்தடியில் திருமூலர், திருநல்லத்தில் கௌதம முனிவர், திருஇரும்பை மாகாளத்தில் கடுவெளிச்சித்தர் முதலானவர்களும், திருச்சேறையில் காவிரி நதியும் பேறு பெற்றதாக புராணங்கள் விவரிக்கின்றன. திருவாவடுதுறையில் முப்பத்துமுக்கோடி தேவர்களும் ஒன்று சேர்ந்து அரசமரமாகி நின்றதாகவும் கூறப்படுகின்றது. திருப்புகழ் தலமான குன்றக்குடி, திருவத்துறையில் அரசு தலமரமாக விளங்குகின்றது. பொதுவாக அம்பிகை பசுவாக வழிபட்ட தலங்கள், காமதேனு முதலான பசுக்கள் வழிபட்ட தலங்கள் ஆகியவற்றில் அரச மரமே தலமரமாக அமைந்துள்ளன. சூரியனோடு தொடர்புடையது அரச மரம். பெரும்பாலான சூரியத் தலங்களில் அரசமரமே தலமரமாக விளங்குகின்றது. எடுத்துக்காட்டாக பருத்தியப்பர் கோயில், அரசிலிலையக் கூறலாம். காஞ்சிபுரம் இஷ்ட சித்தீஸ்வரர் ஆலயத்தில் அமைந்துள்ள சூரிய தீர்த்தத்தின் கரையில் பெரிய அரசமரம் அமைந்துள்ளது. இதன் அடியில் நூற்றுக்கணக்கான நாகலிங்கங்கள் நிறுவப்பட்டுள்ளன. இது சிறந்த பிரார்த்தனைத் தலமாக போற்றப்படுகின்றது. ஆலங்காட்டில் ஆடிய ஆலங்காடன் எனும் எம்பெருமான், பேரூர் பட்டீஸ்வரத்தில் மட்டும் அரச மரத்தின் கீழ் நடனமாடினான். அதனால் அங்குள்ள நடராஜர் சபை அரசம்பலம் என்றும், நடராஜர் அரசம்பலவாணர் என்றும் அழைக்கப்படுகின்றார். அரசமரம் இந்து மதத்திலும், பெளத்த மதத்திலும், ஜைன மதத்திலும் முக்கியமான மரமாகப் போற்றப்படுகின்றது. புத்தர் ஞானம் பெற்றதாகக் கூறப்படும் போதி மரம் அரசமரம் ஆகும்.மருத்துவம்:அரச மரத்தின் விதை ஆண் மலட்டையும், வேப்பமரத்து இலை பெண் மலட்டையும் நீக்கும் என்பது மருத்துவ நம்பிக்கையாக உள்ளது. அரசின் தளிர், பட்டை, வேர், விதை என அனைத்துமே மருத்துவ குணம் கொண்டவையாகும்.தளிர் இலையை அரைத்து பற்று போட்டால் புண்கள் ஆறும். அரசம்பாலை பித்த வெடிப்புகளுக்கு தடவிவர குணம் பெறலாம்.கொழுந்து வெப்பு அகற்றி தாகம் தணிக்கவும், விதை காமம் பெருக்கவும், குடிநீராக்கி குடிக்க சுரம், தாகம் தீரவும் உதவும் என மருத்துவ நூல்கள் கூறுகின்றன.பூச நட்சத்திரத்தில் பிறந்தவர்களுக்கான மரம் அரசு ஆகும். குருபகவானுக்கு உகந்த மரம் இது.(தலவிருட்சம் வளரும்)-பனையபுரம் அதியமான்

தொடர்: தரணி போற்றும் தலமரங்கள்!

Related Stories