ராஜஸ்தான் : முக்கண் விநாயகர்!

கோட்டைகள், அரண்மனைகளுக்கு பிரபலமான மாநிலம், ராஜஸ்தான். இங்குள்ள ஐம்பதுக்கும் மேற்பட்ட கோட்டைகளில் 12 பிரபலம். அதில் ஒன்று சவாய் மதோபூர் நகருக்கு அருகில் உள்ள ரன்தம்போர் கோட்டை. பல கோட்டைகளில் கோவில்களும் உண்டு. அந்த வகையில் ரன்தம்போர் கோட்டைக்குள் அமைந்துள்ள த்ரிநேத்ர கணபதி மிகவும் சிறப்பு வாய்ந்தது. 1299 ஆம் ஆண்டு இந்தப் பகுதியை ஆண்ட ரஜபுத்ர மன்னன் ஹமீருக்கும், இஸ்லாமிய அலாவுதீன் கில்ஜிக்கும் இடையே இந்தக் கோட்டையில் பல மாதங்கள் யுத்தம் நடந்தது. அப்போது பெரிய பெரிய சேமிப்புக் கிடங்குகளில் அத்தியாவசியப் பொருட்கள் நிரப்பி வைக்கப்பட்டன. இருந்தாலும் ஒரு கட்டத்தில் சேமிப்புகள் மிகக்குறைந்துவிட்டது.இந்த சமயத்தில் மன்னன் கனவில் ஒருநாள் கணபதி தோன்றி, “கவலை வேண்டாம். நாளை காலையுடன் யுத்தம் முடிவுக்கு வந்துவிடும். கோட்டை குளத்தில் நான் இருக்கிறேன். என்னைக் கண்டுபிடித்து எடுத்து பிரதிஷ்டை செய்யுங்கள்!” எனக் கூறி மறைந்துவிட்டார். என்ன ஆச்சர்யம்! கணபதி கூறியபடியே, அடுத்தநாள் யுத்தம் நிரந்தரமாய் நிறுத்தப்பட்டுவிட்டது. மன்னர் திகைத்து, கோட்டைக்குள் இருந்த குளத்தில் ஆட்களை வைத்து தேடியபோது மூன்று கண்களை உடைய ஒரு கணபதி சிலை கிடைத்தது. மன்னன் மகிழ்ச்சி அடைந்து, அதற்குக் கோவில் கட்டி, பிரதிஷ்டையும் செய்துவிட்டான். இது நடந்தது 1300 ஆம் ஆண்டு. பெரிய சேமிப்புக் கிடங்குகளும் தானியங்களால் நிரம்பின. பிறகு இந்தக் கோவிலை பல மன்னர்கள் புதுப்பித்தனர்.கோவிலை அடைய 250 படிகள் ஏறவேண்டும். குரங்கு தொல்லை அதிகம். தனியாகப் போவதைத் தவிர்த்து நாலைந்து பேருடன் சேர்ந்து செல்லவேண்டும். பழங்கள், தண்ணீர் பாட்டில் கையில் வேண்டாம். பர்ஸை பத்திரமாக வைத்துக்கொள்ளவேண்டும். கோவில் வாசல் அருகேயே கடைகள் உள்ளன. அர்ச்சனை செய்ய விரும்புபவர்கள் அங்கு பொருட்களை வாங்கிக்கொள்ளலாம்.மலை உச்சியில் இருபுறமும் விரிந்த பெரிய தங்கும் விடுதி போலத்தான் கோவில் காணப்படுகிறது. நான்குத் தூண்கள் தாங்கும் போர்டிகோ முன்பக்கம் உண்டு. கர்ப்பக்கிரகத்திற்கு மேலே ஒற்றைக் கலசத்துடனும் உயர்ந்த சிறு கோபுரம் உள்ளது. அதற்கு மேல் நீண்ட கம்பத்தில் கொடி பறக்கிறது..சிவப்பு கரோலி கல்லில் நகாரா கட்டடக் கலையில் கோவில் எழுந்துள்ளது. நவம்பர் முதல் பிப்ரவரி வரை கோவிலுக்கு வர சிறந்த நேரம். வாசலில் இருந்து கர்ப்பகிரகத்திற்கு இருபுறமும் பிடித்தபடி பாதுகாப்பாகச் செல்ல கம்பி உள்ளது. கர்ப்பகிரகத்தில் வித்தியாசமான கணபதியைத் தரிசிக்கிறோம். மூன்று கண்களுடன் கூடிய த்ரிநேத்ர கணபதி, தலையில் மூன்று கண்களுடன் கூடிய நூதன கிரீடம் அணிந்து அழகாகக் காட்சி தருகிறார். இருபுறமும் அவருடைய இரு மனைவியரான சித்தி, புத்தி உள்ளனர். அதுமட்டுமல்லாமல், முன்னால் சுப், லப் என்ற இரு மகன்களும் இடம்பெற்றுள்ளனர். அதற்குச் சற்று முன்னால் அவருடைய வாகனம் மூஞ்சுறு அழகாக வீற்றுள்ளது.மூலவர் கருங்கல்லால் ஆனவர். அவருக்குச் செய்யப்படும் அலங்காரம் தனிச் சிறப்பு. தினமும் ஐந்து ஆரத்திகள் உண்டு. அப்போது அர்ச்சகருடன், கூடியுள்ள பக்தர்களும் பாடுவது சிறப்பு. சிராவாபேடே, சிராவா லட்டு, மூங்க்தல் பர்பி ஆகியவை பிரசாதங்கள்.விநாயகர் சதுர்த்திதான் பெரிய பண்டிகை. கடைசி மூன்று நாட்கள் மிகவும் விசேஷம். ஆண்டுதோறும் உலகின் பல பகுதிகளில் இருந்து ஏராளமான பக்தர்கள் கோவிலுக்கு வந்து வழிபட்டுச் செல்கின்றனர்.எங்கே இருக்கு?சென்னையிலிருந்து ஜெய்ப்பூர் செல்லும் ரயிலில் பயணித்து சவாய் மதோபூரை அடையலாம். அங்கிருந்து 12 கி.மீ.தரிசன நேரம்காலை 6 - இரவு 8. - ராஜிராஜா