பிள்ளையார் தொட்டியாங்குளம்: வேண்டுதல் நிறைவேறினால் வள்ளித் திருமண நாடகம்!

ஆறு, குளம் போன்ற நீர்நிலைகளின் பெயரால் சில ஊர்கள் அழைக்கப்படுவதுண்டு. அந்த வகையில் குளத்தின் பெயரால் விருதுநகர் மாவட்டத்தில் அழைக்கப்படும் ஓர் ஊர்தான் பிள்ளையார் தொட்டியாங்குளம். சுமார் முந்நூறு ஆண்டுகளுக்கு முன் தொட்டியாங்குளம் என அழைக்கப்பட்ட இவ்வூரில் குளத்து நீர் பாயும் வாய்க்காலை சீரமைக்கும்போது வயல்வெளியில் விநாயகரின் சுயம்பு மூர்த்தம் ஒன்று கிடைத்தது. குளக்கரையில் ஓர் இடத்தைத் தேர்ந்தெடுத்து அதை அங்கே பிரதிஷ்டை செய்து வழிபட்டு வந்தனர். பின்னர் ஊர்ப்பெயருடன் பிள்ளையாரையும் இணைத்து பிள்ளையார் தொட்டியாங்குளம் என இவ்வூர் வழங்கப்படுகிறது. ஒரு கட்டத்தில் ஊர் மக்கள் இந்த விநாயகருக்கு எழிலான கோயில் ஒன்றைக் கட்ட விரும்பி திருவுளம் கேட்டனர். ஆனால், அதற்கு ஆனைமுகன் அனுமதி தரவில்லை. ஆகவே, கோயில் இல்லா குறையைப் போக்கும் வகையில் கலைநயமிக்க திருமதிலை நான்குபுறமும் வாசல்களோடு அமைத்து, மேல்கூரையை மட்டும் திறந்தவெளியாய் விட்டுவிட்டனர்.விவசாயப் பூமியாக இது விளங்குவதால் நாலா பக்கமும் பச்சைப்பட்டு விரித்தாற்போல் வாழைத்தோப்புகள், தென்னந்தோப்புகள் கண்ணுக்கும் மனதுக்கும் குளுமை சேர்க்கின்றன. பக்தர்கள் தெற்கு வாசல் வழியே நுழைந்து தரிசனத்திற்குப் பின் வடக்கு வாசல் வழியாக வெளியே செல்கின்றனர்.மூலவரான விநாயகப்பெருமான் கிழக்குப் பார்த்த வண்ணம் எழுந்தருளியுள்ளார். தினமும் நான்கு கால பூஜை நடைபெறுகிறது. இப்பகுதி மக்கள் இவரிடம் உத்தரவு பெற்றே தங்கள் வீட்டு சுபகாரியங்களைச் செய்வது வழக்கமாக உள்ளது. திருமண வரம் கிட்ட சனிக்கிழமைகளில் அதிகாலை வேளையில் இந்த விநாயகருக்கு குடம் குடமாய் தண்ணீர் எடுத்து ஊற்றி வழிபட்டுச் செல்கின்றனர்.இந்த விநாயகரிடம் வைக்கும் கோரிக்கைகள் விரைவில் நிறைவேறுகிறது. அதற்கு நேர்த்திக்கடனாக விதவிதமான சிலைகளைச் செய்து ஆலய வளாகத்தில் வைக்கின்றனர். குறிப்பாக தொழில் அபிவிருத்தி, நாள்பட்ட வழக்குகளில் சாதகமான தீர்வு, கடன் தொல்லையிலிருந்து விடுதலை போன்ற விஷயங்களுக்கு நந்திதேவர் சிலை செய்து வைக்கின்றனர். பிள்ளைவரம் கிடைத்தவர்கள் தவழும் குழந்தை சிலையையும், உடல்நலம் பெற்றவர்கள் மனித உருவச்சிலையையும் விநாயகர் சந்நதியில் கொண்டு வந்து வைத்து நன்றியைக் காணிக்கையாக்குகின்றனர். நேர்த்திக்கடனாக வருகிற விதவிதமான சிலைகளை ஆண்டுக்கொருமுறை பத்திரமாக வேறோர் இடத்தில் கொண்டுபோய் வைக்கின்றனர்..இந்த நேர்த்திக்கடனுக்கு சிகரமாய் விளங்குவது சித்ராபௌர்ணமி விழாவின்போது வள்ளித் திருமணம் நாடகம் நடத்தி வைப்பதுதான். இத்தலத்தில் சித்ரா பௌர்ணமி திருவிழா கடந்த அறுபத்து மூன்று ஆண்டுகளாகக் கொண்டாடப்பட்டு வருகிறது. சித்ரா பௌர்ணமியன்று விடிய விடிய கோயில் எதிரே உள்ள கலையரங்கில் ஊர் சார்பாக வள்ளித் திருமணம் நாடகம் விமரிசையாக நடைபெறும். இந்த விழாவில் சுற்று வட்டார ஊர்களில் இருந்து ஆயிரக்கணக்கான மக்கள் குடும்பத்தோடு வந்து கலந்துகொள்வர். இதில் ஆச்சர்யம் என்னவெனில், தங்கள் வேண்டுதலை நிறைவேற்றிக்கொடுத்த ஆனைமுகனுக்கு நேர்த்திக்கடனாக பக்தர்கள் சித்ரா பெளர்ணமி சமயத்தில் வள்ளித்திருமணம் நாடகம் நடத்தித் தருவதாக ஒரே சமயத்தில் பலரும் வேண்டிக்கொண்டிருப்பதுதான். சித்ரா பெளர்ணமிக்கு அடுத்த நாள் முதல், அவர்கள் வள்ளித்திருமணம் நாடகத்தை வெவ்வேறு நாடகக் கலைஞர்களால் நடத்துவர். இந்த நிகழ்வு சிலநாட்கள் வரை தொடரும். சித்திரை தமிழ் வருடப்பிறப்பு, விநாயகர் சதுர்த்தி, மார்கழி 30 நாட்கள் திருப்பள்ளியெழுச்சி, தைப்பொங்கல் ஆகிய விழாக்கள் கொண்டாடப்படுகிறது. சங்கடஹர சதுர்த்தி, அமாவாசை நாட்களும் சிறப்பிக்கப்படுகிறது. விநாயகர் சதுர்த்தியை முன்னிட்டு இப்பகுதி சிறுவர்கள் சிறு பலகையில் களிமண் பிள்ளையாரை தயாரித்து வீதிவீதியாக கணபதி நாமத்தைச் சொல்லி ஊர்வலமாக வருவது வழக்கம். அன்றைய தினம் நாள் முழுவதும் அன்னதானம் வழங்கப்படும். எங்கே இருக்கு?விருதுநகர் மாவட்டம், அருப்புக்கோட்டையிலிருந்து பிள்ளையார் தொட்டியாங்குளம் கோயில் வாசல் வரை நேரடிப் பேருந்து வசதி உள்ளது. பயண தூரம் 14 கி.மீ. தரிசன நேரம்காலை 6 – பகல் 1; மாலை 4 – இரவு 8.30. சனிக்கிழமை மட்டும் காலை 5 மணிக்கே நடைதிறக்கப்படும். - வெ. கணேசன்