பேரையூர்- வீரபத்திரருக்கு சந்தனக்காப்பு செய்தால் விரைவில் கொட்டும் மழை!

கடவுளின் கருணையால்தான் உலக உயிர்கள் அனைத்தும் இம்மண்ணில் இன்புற்று வாழ்ந்து வருகின்றன. அதேநேரத்தில் நாம் ஏதேனும் துன்பத்தை எதிர்கொள்ள நேர்ந்தால், அந்தப் பரம்பொருளைச் சரணடையும்பட்சத்தில், அதிலிருந்து மீள்வதற்கு நமக்கு வழிகாட்டியும் அருள்புரிவார்.அந்த வகையில் மனித குலத்துக்கே வாழ்வாதாரமாக விளங்கும் வான்மழையைப் பெய்ய வைத்து, தவித்துக் கிடந்த மக்களின் துயர் துடைத்த அதிசயமும் ஒரு திருத்தலத்தில் நடந்தது. அந்த அற்புதத் தலம், மதுரை மாவட்டம், பேரையூர்..சுமார் ஆயிரம் ஆண்டுகள் தொன்மையும் பெருமையும் மிக்க இவ்வூரில், கி.பி. 17-ஆம் நூற்றாண்டில் பாண்டிய நாட்டை நாயக்க மன்னர்கள் ஆட்சி செய்து வந்தனர். அவ்வேளையில், நாட்டின் நிர்வாக வசதிக்காக 72 பாளையங்களாகப் பிரித்து, உள்நாட்டில் வரி வசூல் நிர்வாகம் செய்து வரும் பொறுப்பை பாளையக்காரர்களிடம் ஒப்படைத்திருந்தனர். அந்தச் சமயம் இந்த மலைநாட்டுப் பகுதியை தும்பிச்சி நாயக்கர் என்ற பாளையக்காரர் ஆட்சி செய்து வந்தார். அக்கால வழக்கப்படி ஊருக்கு தும்பிச்சி நாயக்கனூர் என அவர் பெயர் சூட்டப்பட்டது. ஆனாலும் சிலர் அவரது பெயரைச் சொல்வதில் தயக்கம் காட்டினர். அதற்கு மாற்றாக அவர்களே ஒரு புதிய வழியைக் கண்டுபிடித்தனர். அதன்படி ராஜா பெயரே ஊர் என்று அழைக்கலாயினர். அதுவே ஒரு காலகட்டத்தில், பெயரே ஊர் என்றாகி, மறுபடியும் மருவி பேரே ஊர் என்றாகி, இன்றைக்கு பேரையூர் என அழைக்கப்படுகிறது. இவ்வூருக்கு பெருமை சேர்க்கும் வகையில் வீரபத்திரசுவாமி திருக்கோயில் அமைந்துள்ளது. ஊரின் மத்தியில் நாலாபுறமும் உயர்ந்த திருமதில் சூழ, சாலக்கோபுர வாசலுடன் கிழக்குப் பார்த்தவண்ணம் வீரபத்திர சுவாமி கோயில் விளங்குகிறது. பிரதான வாசல் தாண்டி உள்ளே நுழைந்ததும் விரிந்து, பரந்த உள்சுற்று காணப்படுகிறது. கருவறை, அர்த்த மண்டபம், மகாமண்டபம், முகமண்டபம் என்ற அமைப்பில் கல்கட்டுமானமாக பாண்டியர் கலையமைப்பில் கோயில் எழிலாக விளங்குகிறது..மகாமண்டபத்தில் பலிபீடம், நந்திதேவரும், அர்த்த மண்டப வாசலில் துவாரபாலகர், விநாயகர், சுப்பிரமணியரும் தரிசனம் தருகின்றனர். மூலவராக தாமரைப்பீடத்தில் நின்ற கோலத்தில் வீரபத்திரசுவாமி எழுந்தருளியுள்ளார். மேல் இரு கரங்களில் மான், மழு ஏந்தியும்; கீழ் இரு கரங்களில் தண்டம், கத்தி ஆகியவை தாங்கியும் நான்கு கரங்களுடன் காட்சியளிக்கிறார். சிவனின் அம்சமாதலால் இவரது வாகனம் நந்தியாகும். சிவநெறி வழிபாட்டில் சிவன், சக்தி, விநாயகர், முருகன் முதலியோருடன் வீரபத்திரரும் இணைந்தே காணப்படுகிறார். சிவபெருமான் உலகில் அநீதியை அழித்து தர்மத்தை நிலைநாட்டிட எடுத்த 64 அவதாரங்களில் முதன்மையானவராக விளங்குபவர் வீரபத்திரசுவாமி. ஒட்டக்கூத்தர் முதல் பல மூத்த தமிழ் முன்னோர்களும் வீரபத்திரரைப் போற்றிப் பாடியுள்ளனர். இவருக்கு அக்னி வீரபத்திரர், அகோர வீரபத்திரர், வீரேசுவரர், வீர சூடாமணி, வீரேசுவரன், உறங்கா வல்லவன் என்ற பல்வேறு சிறப்புப் பெயர்களும் உண்டு. தட்சனின் மகளான தாட்சாயணியை பரம்பொருளான ஈசன் கரம் பிடித்து மணமுடித்தார். ஒருசமயம் அந்த தட்சன் கூடுதலாக பலம் பெறவேண்டி பெரிய யாகம் ஒன்றை நடத்தினான். சம்பிரதாயப்படி யாகத்திற்கு அழைத்துக் கௌரவிக்க வேண்டிய மருமகனான பரம்பொருளை அலட்சியப்படுத்தி முறைப்படி அழைக்காமல் யாகத்தை நடத்தலானான். தவிர, வேள்வி குண்டத்தில் ஆகம விதிப்படி ஈசனுக்கு அளிக்கவேண்டிய அவிர்பாகத்தையும் அளிக்க மறுத்து யாகத்தைத் தொடர்ந்தான். அந்த வேளையில், மகளான உமாமகேசுவரி அந்த வேள்விச்சாலைக்கு வந்தாள். அவளையும் மதிக்காமல் தட்சன் அவமதித்தான். ஆகவே, சிவனுக்கும் பார்வதிக்கும் தட்சன் மேல் கடும் கோபம் எழுந்தது. எனவே, தட்சனின் வேள்வியை அழிக்கும் கடமை சிவனால் வீரபத்திரருக்குத் தரப்பட்டது. இறைவனின் கட்டளையை ஏற்று பூதகணங்களுடன் தாட்சாயணி அனுப்பிய காளியுடன் சென்று தட்சனின் வேள்வியை அழித்தார், வீரபத்திரர். தட்சனின் செருக்கை அடக்க அவரது தலையை வெட்டினார் வீரபத்திரர். ஆனாலும், உமாமகேசுவரியின் கருணையால் தட்சனுக்கு ஆட்டுத்தலை பொருத்தப்பட்டு அவனுக்கு உயிர்ப்பிச்சை அளிக்கப்பட்டது..அவ்வேளையில் இந்திரன் குயிலாய் மாறி தப்பிப் பறந்தான். அக்னியின் நா அறுக்கப்பட்டது. சூரியன், சந்திரன் ஆகிய இருவரும் வீரபத்திரரின் காலால் தேய்க்கப்பட்டனர். இதுவே இறைவனால் வீரபத்திரர் உருவாக்கப்பட்டு மற்றவர்களை சம்ஹாரம் செய்த வரலாறு.மாணிக்கவாசகப் பெருமான் திருவாசகத்தில் திருஅம்மானைப் பதிகத்தில் இந்த சம்ஹார காட்சியை முழுவதுமாகப் பாடியுள்ளார். தேவாரம் பாடிய ஞானசம்பந்தர், அப்பர், சுந்தரமூர்த்தி சுவாமிகள் ஆகிய மூவரும் தட்சனைப் பற்றியும், தட்சனின் வேள்வியை அழித்ததைப் பற்றியும் பாடியுள்ளார்கள்.கி.பி. ஏழாம் நூற்றாண்டில் உருவான எல்லோரா குகைக்கோயிலில் வீரபத்திரரின் அழகிய சிற்பத்தைக் காணலாம். கர்நாடகா, ஆந்திரா மற்றும் தமிழ்நாட்டில் மட்டுமல்லாது உலகெங்கும் வீரபத்திரர் வழிபாடு நடைபெற்று வருகிறது.அக்காலத்தில் பேரழிவுகள், வறட்சி, கால்நடைகள் பராமரிப்பு, அந்நியப் படையெடுப்பு போன்ற காரணங்களால் பாதுகாப்பான, வளமான பிரதேசங்களைத் தேடி பெரும் இடப்பெயர்வுகள் நிகழ்ந்தன. அந்த வகையில் கர்நாடகம், ஆந்திராவிலிருந்து புலம்பெயர்ந்து தமிழகம் வந்த மக்கள் பலரும் தங்கள் குலதெய்வமாக வீரபத்திரசுவாமியை வழிபட ஆரம்பித்தனர்.கி.பி. 15-ஆம் நூற்றாண்டில், பாமினி சுல்தான்களின் படையெடுப்பால் கர்நாடகத்தில் இருந்து கைத்தறி நெசவையும், விவசாயத்தையும் பூர்வீகத் தொழிலாகக் கொண்டவர்கள் தமிழகத்தின் பல்வேறு ஊர்களுக்கும் புலம் பெயர்ந்து வந்தார்கள். அவர்களில் ஒரு பிரிவைச் சேர்ந்தவர்கள் பேரையூரில் குடியேறினார்கள். அவர்கள் அங்குள்ள வீரபத்திரசுவாமியை குலதெய்வமாக வணங்கி வருகின்றனர். தவிர இஷ்ட தெய்வமாக மற்றவர்களும் இவரை வழிபடுகின்றனர்..ஒரு சமயம் இந்த வட்டாரத்தில் பருவமழை பொய்த்துப் போய் எங்கும் வறட்சி ஏற்பட்டது. முழுக்க முழுக்க விவசாயத்தை மட்டுமே நம்பி வாழ்கிற இப்பகுதி மக்கள் நம்பிக்கையோடு இத்தல வீரபத்திரருக்கு சந்தனக்காப்பு அலங்காரம் செய்து மழை வேண்டி மனமுருகி பிரார்த்தனை செய்தனர். அவர்களின் பரிபூரண பக்திக்கு இரங்கிய பரம்பொருளின் கருணையால் மறுநாள் பேரையூர் வட்டாரம் முழுவதும் பெருமழை பெய்து காடு, வயல்கள் மழை நீரால் குளிர்ந்தன. குளங்கள் பெருகி தண்ணீர் தட்டுப்பாடு அறவே நீங்கி, மக்கள் நிம்மதி அடைந்தனர். அன்றிலிருந்து இத்தலத்தில் விவசாயப் பெருங்குடி மக்கள் மழை தேவைப்படும் சந்தர்ப்பங்களில் சுவாமிக்கு சந்தனக்காப்பு அலங்காரம் செய்து வழிபடும் வழக்கத்தைக் கொண்டுள்ளனர். வீரபத்திரரின் கருணையால் ஆண்டு முழுவதும் இப்பகுதி பசுமையாகவே காணப்படுகிறது. தேவகோட்டத்தில் தட்சிணாமூர்த்தி, லிங்கோத்பவர், துர்க்கை உள்ளனர். மூலவர் விமானம் நாகர வடிவில் உள்ளது. உள்சுற்றில் கன்னிமூலை கணபதி, காலபைரவர், நவகிரக சந்நதிகள் உள்ளன. தலவிருட்சம் வில்வம். தினமும் இரு கால பூஜை நடைபெறுகிறது. மார்கழி திருவாதிரை நட்சத்திரம் வீரபத்திரரின் அவதாரத் திருநாளாகக் கடைப்பிடிக்கப்படுகிறது. எனவே, ஆண்டுதோறும் திருவாதிரை விழா மூன்று நாட்கள் சிறப்பாகக் கொண்டாடப்படுகிறது.முதல் நாள் விழாவில் சிறப்புத் திருமஞ்சனம் மற்றும் அலங்காரம் நடைபெறும். பின்னர் பக்தர்களுக்கு திருவாதிரைக் களி பிரசாதம் வழங்கப்படும். இரண்டாம் நாள் புஷ்பாஞ்சலி நிகழ்ச்சியில் சில மணி நேரம் மட்டும் பக்தர்கள் சுவாமிக்கு நேரடியாக அபிஷேகம் செய்ய அனுமதிக்கப்படுவர். மூன்றாம் நாள் விழாவில் வீரபத்திரருக்கு பொங்கல் வைத்து வழிபாடு செய்வர். அதுசமயம் பக்தர்கள் தங்கள் கோரிக்கைகளை நம்பிக்கையோடு சுவாமி சந்நதியில் வைப்பர். அது உடனடியாக நிறைவேறும் என்பது பக்தர்களின் நம்பிக்கை.முன்னதாக, ஊருக்கு மேற்கே மொட்டை மலையில் எழுந்தருளி இருக்கும் கல்யாணி அம்பாளை சென்று தரிசித்து படையல் இட்டு வருவது வழக்கமாகப் பின்பற்றப்படுகிறது. சித்திரை தமிழ் வருடப்பிறப்பை முன்னிட்டு மகாஅபிஷேகமும், அக்கினி நட்சத்திரம், தீபாவளி போன்ற சமயங்களில் சிறப்பு அபிஷேக, அலங்காரமும் நடைபெறும்.இத்தனை சிறப்புகளுடன் கூடிய இத்திருக்கோயிலில் மகாகும்பாபிஷேகப் பெருவிழா 1.6.2023, வியாழக்கிழமை காலை 7.35 மணி முதல் 8.45 மணிக்குள் நடைபெற இருப்பது குறிப்பிடத்தக்கது.எங்கே இருக்கு?மதுரை மாவட்டம், டி.கல்லுப்பட்டியில் இருந்து 8 கி.மீ. தூரத்தில் பேரையூர் அமைந்துள்ளது.தரிசன நேரம்காலை 6 – பகல் 1; மாலை 4 – இரவு – 8

பேரையூர்- வீரபத்திரருக்கு சந்தனக்காப்பு செய்தால் விரைவில் கொட்டும் மழை!

Related Stories