மகாபெரியவா: பாஷையின் பெருமை சொன்ன பரமாசார்யா

ஒருசமயம் மகாபெரியவா ஸ்ரீமடத்துல சந்திரமௌளீஸ்வரர் பூஜை பண்ணிட்டு யதா ஸ்தானத்துல வந்து உட்கார்ந்து தரிசனம் தர ஆரம்பிச்சார். அந்த சமயத்துல, ஒரு கல்லூரியில பெரிய பொறுப்புல இருந்த அதிகாரி ஒருத்தரும் அவர்கூட அயல்தேசத்தைச் சேர்ந்த இளவயசுக்காரா சிலரும் மகாபெரியவாளை தரிசிக்க வந்திருந்தா.வரிசைல வந்து மகானை நமஸ்காரம் பண்ணின அந்த அதிகாரி, ‘’பெரியவா, இவாள்ளாம் இங்கிலாந்துல பெரியபடிப்பு படிக்கறா. அங்கே இங்கிலீஷ் லிட்டரேச்சர்ல ஆராய்ச்சி பண்ணிண்டு இருக்கா. அப்படிப்பட்டவா, இங்கிலீஷ்ல நான் பெரிய பட்டமெல்லாம் வாங்கியிருக்கேன்கறதைத் தெரிஞ்சுண்டு சில ஆராய்ச்சிகள் சம்பந்தமா என்னோட உதவியை நாடி வந்திருக்கா!” சொன்னவர் குரல்ல, அளவுக்கும் அதிகமாகவே கர்வம் ஒட்டிண்டு இருந்தது அங்கே இருந்தவா எல்லாருக்குமே பட்டவர்த்தனமா தெரிஞ்சுது.‘என்ன இது, மகான் முன்னாலேயே இப்படித் தற்பெருமையைத் தம்பட்டம் அடிச்சுக்கறார்?”னு எல்லாருக்குமே கொஞ்சம் அசூயையாத்தான் இருந்துது.மறுபடியும் அதிகாரியே பேசினார். “இங்கிலீஷ் நாளுக்கு நாள் வளர்ந்துண்டே இருக்கு. ஏன்னா, அதுல தெனம் தெனம் புதுசுபுதுசா வார்த்தைகளை சேர்த்துண்டே இருக்கா. ஆனா, நம்ப பாஷைகள்ல பலதும் பழசையே வச்சுண்டு, கொஞ்சங்கொஞ்சமா தேய்ஞ்சு இல்லாமயே போய்டறது!” சுய கர்வத்தோட, இங்கிலீஷ்தான் ஒசத்தியானதுங்கற எண்ணமும் அவருக்கு இருக்கறது தெளிவாச்சு. ‘அவரோட அந்த ஆணவப் பேச்சை ஆசார்யா இப்படி அமைதியாக் கேட்டுண்டு இருக்காரே!’ அப்படின்னு எல்லாரும் யோசிச்சுண்டு இருக்கறச்சே, மெதுவா பேச ஆரம்பிச்சார், பெரியவா. ‘‘நீ சொல்றது வாஸ்தவம்தான். இங்கே எத்தனை பாஷைகள் இருந்தாலும் மத்த பாஷையால முடியாத காரியத்தை இங்கிலீஷ்காரன் தன்னோட பாஷையால செய்யறான் இல்லையா! அதனால, அதுதான் ஒசந்த பாஷை!” பீடிகை மாதிரி சொல்லிட்டு நிறுத்தினார்.என்ன சொல்ல வர்றார் மகான்னு அதிகாரி உட்பட எல்லாரும் யோசிக்க, மகானே பேச ஆரம்பிச்சார்.‘‘நாம எல்லாரும் பால், தயிராகுமே தவிர, ஒருபோதும் தயிர் பாலாகாதுன்னு நினைச்சுண்டிருக்கோம். ஆனா, இங்கிலீஷ்காரனைப் பார். தயிரும் மோர் ஆனதுக்கப்புறம் அதைத் தன்னோட பாஷையால பால் ஆக்கறான்!” ன்னார் குறுஞ்சிரிப்போட.இதையெல்லாம் அந்த அயல்தேசத்து இளைஞர்கள் அதிகாரிகிட்டே கேட்டுத் தெரிஞ்சுண்டா. அவாளுக்கும் ஆசார்யா அடுத்து என்ன விளக்கம் தரப்போறார்ங்கறதுல ஆர்வம் வந்துடுத்து.. ‘என்ன புரியலையா?’’ன்னு ஆரம்பிச்ச பெரியவா, ” நாம, தயிரைக் கடைஞ்சுட்டு, மோர்னு சொல்றோம். ஆனா, அவன் அதை பட்டர் மில்க்னு சொல்றான். அதாவது, கடைஞ்ச தயிருக்கு மில்க்னு பேர் வைச்சு அதைப் பாலாகக் குறிப்பிடறான். இப்போ சொல்லுங்கோ.. தயிரை மறுபடியும் பால் ஆக்கற பாஷை ஒசந்ததுதானே?” மகான் சொல்லி முடிச்சதும் அவரோட வார்த்தைகள்ல இருந்த நாசூக்கான நையாண்டியைப் புரிஞ்சுண்டு மௌனமா சிரிச்சா, அங்கே இருந்த எல்லாரும்.அவ்வளவுதான், தன்னோட அகந்தையைப் போக்கறதுக்கு ஆசார்யா நடத்தற திருவிளையாடல்தான் இதுங்கறது புரிஞ்சுண்டு, தலைகனத்தை உதறிட்டு, ஆசார்யாளோட திருவடியில் விழுந்து பணிஞ்சார், அந்த அதிகாரி!‘‘பாஷையெல்லாம் வெறும் ஓசைதான். அவாவாளுக்குத் தெரிஞ்சதை அவாஅவா பேசறா, எழுதறா. மத்தபடி இதுல ஒசத்தி தாழ்த்தியெல்லாம் இல்லை.. புரிஞ்சுதா? சொன்ன பெரியவா கல்கண்டு குடுத்து அவரை ஆசிர்வதிச்சார். -பி.ராமகிருஷ்ணன்

மகாபெரியவா: பாஷையின் பெருமை சொன்ன பரமாசார்யா

Related Stories