ஊனையூர்: வம்சம் தழைக்கச் செய்யும் முத்து வெள்ளைச் சாத்தய்யனார்!

-தேனம்மை லெக்ஷ்மணன் தமிழ்நாட்டிலுள்ள காவல் தெய்வங்களில் குறிப்பிடத்தக்கவர், அய்யனார். பல ஊர்களில், பல்வேறு திருநாமங்களில் கோவில் கொண்டுள்ள இவர் பூரணா, புஷ்கலா சமேத முத்துவெள்ளைச்சாத்தய்யனார் என்ற பெயரில் எழுந்தருளியுள்ள தலம், சிவகங்கை மாவட்டத்திலுள்ள ஊனையூர்..சமண மதம் சார்புடைய சாத்தன் என்ற பெயர் அய்யனாரையும் குறிக்கிறது. சாத்தன் என்பதற்கு காப்பவன் என்று பொருள். சக்தி வாய்ந்த தெய்வமான அய்யனார் மற்றும் சாத்தன் வணிகர்களின் குலதெய்வம். வணிகக்குழுக்களைக் காக்கும் தலைவனுக்கு சாத்தன் என்ற பெயர் இருந்தது போல, மக்களைக் காக்கும் பேரரசர்களுக்கும் சாத்தன் என்ற பெயர் இருந்திருக்கிறது வியக்கவைக்கும் ஒற்றுமை. அரசர்களின் பெயர்கள் சாத்தன், சாத்தன் மாறன், சாத்தன் பூதி, சாத்தன் பழியிலி என்றும், ராணியின் பெயர் சாத்தன் காளி என்றும் வழங்கப்பட்டிருக்கிறது.கிழக்கு முகமாகக் கண்மாயைப் பார்த்த கர்ப்பக்கிரகத்தில் விநாயகரும், பூரணை - புஷ்கலையுடன் முத்துவெள்ளைச் சாத்தய்யனாரும் அருள்பாலிக்க, அதன் வெளிப்புற மண்டபத்தில் முன்னோடியும், தனிச்சன்னதிகளில் கருப்பர், பண்டாரத்தையா, வீரப்பசுவாமி, அகோரவீரபத்திரர் ஆகியோரும்; சுற்று பிராகாரத்தில் பண்ணி வீரப்பர், செட்டிச்சி அம்மன் (இச்சன்னதி உள்ளேயே சப்தகன்னியர்), பிள்ளையார், சுப்ரமணியர், பைரவர் ஆகியோரும் தரிசனம் தருகிறார்கள். அய்யனார் சன்னதிக்கு எதிரே பலிபீடமும், அவரது வாகனமான யானையும் இருக்கிறது. பண்ணி வீரப்பர் சன்னதியைச் சுற்றி உள்ள தோட்டத்தில் வாடாமல்லி பூத்துக் கிடக்கிறது. தினசரி மூன்றுகால பூஜை நடைபெறுகிறது.அக்கம்பக்கம் கிராமத்தார் தங்கள் புது விளைச்சலை முன்னோடிக்கு முன்னே தெரியும் உயர்ந்த பளிங்குத் தளத்தில் கொட்டிக் கோவிலுக்கு அர்ப்பணிக்கிறார்கள். இதை நெல் அளக்கும் இடம் என்று சொல்கிறார்கள். தோட்டம், வயல் எதுவானாலும் முதல் விளைச்சலை இங்கே கொண்டு வந்து கொட்டிக் கோவிலுக்குக் கொடுக்கிறார்கள்.எல்லா அய்யனார் கோவிலைப் போலவும் இங்கேயும் சிவராத்திரி பிரசித்தம். உறவினர்கள் ஒன்றுகூடி மாட்டு வண்டி கட்டிக்கொண்டு வந்து இரவு தங்கி அய்யனாருக்கு அபிஷேகம், அலங்காரம், பூஜை செய்து, சாதம் வடித்து உண்பார்கள். இப்படி வருவோர் தூங்காமல் விடிய விடிய விழிக்கக் கல்தரையில் செதுக்கியுள்ள கட்டங்களில் ஆடுபுலி ஆட்டம் விளையாடுவார்களாம்.சாதாரண நாட்களிலும், திருமணம், பிறந்தநாள், தீபாவளி, சிவராத்திரி, குடிபுகுதல் போன்ற பண்டிகைகள், திருவிழாக்களின் போதும் பக்தர்கள் இங்கே வந்து எல்லா தெய்வங்களுக்கும் திரவியங்களால் அபிஷேகம் செய்து வஸ்திரம், பூமாலை சாத்தி, தளிகை படைத்து, அர்ச்சனை செய்து வணங்குவது வழக்கம். சிலர் சுருட்டு, சாராயம் படைப்பார்கள். கிடாய் பூஜை, கோழி பூஜையும் நடைபெறும். பண்ணி வீரப்பர் சன்னதிக்குப் பக்கவாட்டில் ஒவ்வொரு தெய்வத்துக்கும் பலிபீடங்கள் உள்ளன. அங்கேதான் இவற்றைப் படைப்பார்கள். சைவமாகப் படையல் செய்ய விரும்புபவர்கள் சர்க்கரைப் பொங்கல், புளிசாதம் ஆகியவை படைப்பார்கள்..சோனையனுக்குக் கோவிலின் எதிரில் கம்மாய்க்குள் தனிச்சன்னதி அமைந்துள்ளது. இவர் கண்மாயைக் காக்கும் காவல் தெய்வம். இவருக்குப் பொரிகடலை, வெல்லம் படைத்து, இளநீர் கண் திறந்து வைத்து சிதறுகாய் செலுத்தி வருவது வழக்கம். மனபயம் நீங்க, நினைத்தது நிறைவேற இவருக்கு மண்புரவி செய்து வைப்பதாக நேர்ந்து கொள்கிறார்கள். அதன்படி உள்ளே சிறிதும் பெரிதுமான புரவிகள் அணிவகுக்கின்றன. வாயிலில் உயர்ந்து நிற்கும் அய்யனின் மாபெரும் புரவிதான் எவ்வளவு பேரழகு! அதன் கீழே திருவிழாக் கொண்டாட்டமாக நடனப்பெண், நட்டுவனார், வாத்தியக்காரர்கள் சுதைச் சிற்பமாக வடிக்கப்பட்டுள்ளார்கள். கோவிலுக்குள் இடதுபுறம் பிரமாண்டமாக வரவேற்கிறார் குதிரை வீரர்..கோவிலின் இடப்புறம் ஓர் அழகான தாமரைத் தடாகம் காட்சி அளிக்கும். இங்கே விடுமுறை நாட்களில் குழந்தைகள் குளித்துக் கும்மாளமிடுவார்கள். ஒருபுறம் கரை உயர்ந்து ஆலமரங்கள் வரிசையாக நின்று கவினுறக் காட்சி அளிக்கும். கொஞ்சம் சுத்தம். கொஞ்சம் கலங்கல். இதுதான் இந்தத் தடாகம் மற்றும் கண்மாயின் நிலைமை.ஆனால், வெள்ளத்தனைய மலர் நீட்டம் மாந்தர் தம் உள்ளத்தனைய உயர்வு என்பது போல் இந்தத் தாமரைத் தடாகம் அல்லிகளாலும் நீண்ட தண்டுகளுடனான தாமரைகளாலும் நிரம்பி இருக்கிறது.காக்கும் தெய்வமான சாத்தய்யன் வம்சம் தழைக்கவும் அருள்பாலிக்கிறார். குழந்தை பாக்கியம் பெற வேண்டி நேர்ந்துகொண்டவர்கள் மரத்தாலான தொட்டிலைக் கொண்டு வந்து வேளாரிடம் கொடுத்து பூஜை செய்கிறார்கள். அதன்பின் முத்து வெள்ளைச் சாத்தய்யனார் சன்னதிக்கு வெளிப்புற மண்டப விட்டத்தின் மையத்தில் உள்ள சுதையாலான தாமரை புடைப்புச் சிற்பத்தின் நாற்புறமும் உள்ள வளையங்களில் வேண்டுதல் மரத் தொட்டில்களை மாட்டித் தொங்க விடுகிறார்கள். சிலர் அதிலும் குழந்தை பொம்மைகளையும் போட்டு இருக்கிறார்கள். வேண்டுதல் நிறைவேறியதும் திரும்பக் குழந்தையுடன் வந்து பூஜை செய்து வணங்குகிறார்கள்.நாட்டார், நகரத்தார் குலதெய்வமாகவும், மற்றவர்கள் இஷ்டதெய்வமாகவும் முத்து வெள்ளைச் சாத்தய்யனாரைக் கொண்டாடி மகிழ்கிறார்கள்.கடைசியாக 2009-ஆம் ஆண்டு கும்பாபிஷேகம் கண்ட கோவில் அடுத்த கும்பாபிஷேகத்திற்கு தயாராகிவருகிறது. அதற்கான திருப்பணிகள் நடைபெற்று வருகின்றன.காடு கழனி செழிக்கவும், மனப்பயம் நீங்கவும், வம்சம் தழைத்துப் பெருகவும் அருளும் ஊனையூர் ஸ்ரீ முத்துவெள்ளைச் சாத்தய்யனாரை நீங்களும் ஒருமுறை அங்கு சென்று தரிசித்துவரலாமே!எங்கே இருக்கு?சிவகங்கை மாவட்டம், காரைக்குடிக்கு அருகிலுள்ள கானாடுகாத்தானிலிருந்து திருமயம் செல்லும் வழியில் இருக்கிறது ஊனையூர். காரைக்குடியில் இருந்து திருச்சி செல்லும் பேருந்தில் ஏறி, ஊனையூர் நிறுத்தத்தில் இறங்கி, கம்மாய்க்கரை வழியாக நடந்து செல்லலாம். அல்லது காரைக்குடியில் இருந்து கானாடுகாத்தான் அல்லது நேமத்தான்பட்டி சென்று அங்கிருந்து ஆட்டோவில் செல்லலாம்.தரிசன நேரம்காலை 8 - மாலை 3.