மகாபெரியவா : பரமாசார்யா பாதுகையைக் கழற்றிய ரகசியம்!

ஒருசமயம் பரமாசார்யா பாதயாத்திரையாவே காசிக்குப் போய்ட்டுவரத் தீர்மானிச்சு, அணுக்கத் தொண்டர்கள்கூட புறப்பட்டார்.யாத்திரை சமயத்துல வழியில குறிப்பிட்ட இடங்கள்ல தங்கி முகாம் இடறது, அங்கே சுத்துவட்டாரத்துல இருந்து வரக்கூடிய தொண்டர்களுக்கு ஆசிவழங்கறது, இப்படியே நாட்கள் நகர்ந்துது.ஒருநாள், மகாபெரியவா ஒரு சின்ன கிராமத்து வழியா பயணம் பண்ணிண்டு இருந்தார். அப்போ அந்த ஊரே தண்ணியில்லாம வறண்டு கிடந்துது. மனுஷா மட்டுமல்லாம, ஆடு, மாடுகள், செடி, கொடி, மரங்கள்னு எல்லா ஜீவராசிகளுமே தண்ணிக்காக ஏங்கிக்கிடந்தது பட்டவர்த்தனமாவே தெரிஞ்சுது. ஊரே அப்படி வறண்டு கிடந்தாலும் மகான் யாத்திரை பண்றார்ங்கறதால, எங்கெங்கேயோ அலைஞ்சு கொஞ்சம் ஜலம் எடுத்துண்டுவந்து பெரியவாளோட திருவடியில ஊத்தினா சில ஜனங்கள்.வறட்சியான எத்தனையோ இடங்கள்ல பெரியவா திருவடி பட்டதும் மழை பெய்ஞ்சிருக்குங்கறதால, இந்த ஜனங்களோட பக்திக்காக இங்கேயும் மழை பெய்யவைப்பா பெரியவா அப்படின்னு எதிர்பார்த்தா, அவரோட தொண்டர்கள். ஆனா, பெரியவா ஊரோட வறட்சியையே கவனிக்காதவர் மாதிரி நடந்துண்டு இருந்தார்.நேரம் நகர்ந்து உச்சி வெயில் நெருங்கித்து. அந்த சமயத்துல ஊருக்கு நடுவுல இருந்த பெரியவா, யாரும் எதிர்பார்க்காதவிதமா, தன்னோட பாதுகைகளைக் கழட்டினார். அவ்வளவுதான் பதறிப்போய்ட்டா எல்லாரும். ’பெரியவா, பாதுகைகளை தரிச்சுக்குங்கோ… இல்லைன்னா, திருவடி பொசுங்கிடும்’னு கத்தினா, கதறினா. ஆனா, பெரியவா எதையுமே காதுல வாங்கிக்கலை. அப்படியே மெதுவா நடந்தார். கொஞ்ச தூரம் நடந்ததும் ஒரு இடத்துல அப்படியே நின்ன பெரியவா, அணுக்கத் தொண்டர் ஒருத்தரைக் கூப்பிட்டு, “நான் நிற்கற இடத்தைச் சுத்தி பெரிசா ஒரு வட்டம் போடு!” அப்படின்னார்.‘பெரியவா எதுக்காக வட்டம் போடச் சொல்றார்?’ எல்லாருக்கும் ஆச்சரியம்! ஆனாலும் தொண்டர் பெரியவா சொன்னபடி செஞ்சார்..அடுத்து, ஊர்க்காரா சிலரைக் கூப்பிட்டு, ‘’நீங்க போய் ஊர்த்தலைவரைக் கூட்டிண்டு வாங்கோ!’’ அப்படின்னு சொன்ன பெரியவா, அப்படியே கொஞ்சம் ஓரமாப் போய் நிழலான ஒரு இடத்துல நின்னுண்டார்.போனவா, ஊர்த்தலைவரைக் கூட்டிண்டு வந்தா. பெரியவாளை நமஸ்காரம் பண்ணினார் அவர்.“கிரஹசாரப்படி இந்த ஊர்ல இன்னும் ஆறு மாசத்துக்கு மழை பெய்ய வாய்ப்பு இல்லை. ஆனா, ஊருக்கு ஜலம் கிடைக்க ஒரு வழி சொல்றேன்!” சொன்ன பெரியவா கொஞ்சம் நிறுத்திட்டு, மெதுவா நடந்து, முதல்ல தான் வட்டம்போடச் சொன்ன இடத்துக்கு வந்தார்.“இதோ வட்டம் போட்டிருக்கே இந்த இடத்துல, இப்பவே கிணறு தோண்டச் சொல்லு. இருபது இருபத்தஞ்சு அடியிலயே கங்கை ஊற்று மாதிரி வெள்ளமா ஜலம் வரும்.” பெரியவா சொல்ல, அவசர அவசரமா ஆட்களை அழைச்சு, தோண்டச் சொன்னார், ஊர்த்தலைவர்.ஊரோட தாகம் தீரப்போகறதுங்கற உத்வேகத்துல அவா தோண்டின வேகத்துல அடுத்த ரெண்டு மணி நேரத்துலயே அங்கே இருந்து ஊத்துப் பெருகித்து. எல்லாரும் ஆனந்த ஆரவாரம் பண்ணினா. ஊறின ஜலத்துல இருந்து கையளவு ஜலம் எடுத்து புரோஷிச்சுண்ட (தலையில தெளிச்சுண்ட) பெரியவா, ‘’ஊர் ஜனங்க எல்லாம் ஒத்துமையா எடுத்துக்குங்கோ… அதோட ஆடு, மாடுகள், பட்சிகள்னு எல்லாமும் குடிச்சுக்க தொட்டிகள் கட்டி அதுல ஜலத்தை நிறைச்சு வையுங்கோ!” சொல்லிட்டுப் பெரியவா நடைபயணத்தைத் தொடர, வறண்டுகிடந்த அந்த பூமியில எங்கே தோண்டினா ஜலம் வரும்கறதை தன்னோட திருவடி ஸ்பரிசத்தால கண்டுபிடிக்கத்தான், பரமாசார்யா பாதுகையைக் கழட்டினார்ங்கற பரம ரகசியம், அப்போதான் தொண்டர்களுக்குப் புரிஞ்சுது. -பி.ராமகிருஷ்ணன்