ஸ்ரீராமபிரான் அளித்த தாமரை மலர்கள்!

ஸ்ரீஸத்தியஸந்த தீர்த்தர் ஸ்ரீமத்வாச்சாரியாரால் உபதேசிக்கப்பட்ட துவைத தத்துவத்தைப் பாரெங்கும் பரப்பி வருகின்ற மடங்களுள் முக்கியமானது ஸ்ரீஉத்தராதி மடமாகும்.ஸ்ரீமத்வாச்சாரியார், ஸ்ரீபத்மநாபதீர்த்தர், ஸ்ரீநரஹரி தீர்த்தர் ஆகியோரின் வழிவந்த உத்திராதிமடத்தில்தான் நான்முகக் கடவுளாகிய பிரம்மாவால் பூஜிக்கப்பட்ட ஸ்ரீமூலராமர், ஸ்ரீமூலசீதை ஆகிய அற்புதமான விக்கிரகங்களுடன், ஸ்ரீமத்வாச்சாரியார் பூஜித்து வந்த ஸ்ரீதிக்விஜயராமரின் விக்கிரகமும் பக்திசிரத்தையுடன் வழிபடப்பட்டு வருகின்றன. பல்வேறு ஆன்மிக அதிசயங்களைப் புரிந்த ஆசாரியபுருஷர்கள் உத்தராதி மடத்தின் தலைமைப் பீடத்தை அலங்கரித்து வந்துள்ளனர். இம்மடத்தின் இருபத்தாறாவது பீடாதிபதியே ஸ்ரீஸத்தியஸந்ததீர்த்த ஸ்வாமிகளாவார்.1733-ஆம் வருடம் அவதரித்த இவருடைய திருப்பெயர் ஹாவேரி ராமச்சந்திர ராவ்.உத்திராதி மடத்தின் இருபத்தைந்தாவது மடாதிபதியாகிய ஸ்ரீஸத்யபோத தீர்த்தர் இவருடைய ஆயுள்பாவம் மிகவும் குறைவாக இருப்பதை அறிந்து, தமது பிரார்த்தனையின் மூலம் இவருடைய ஆயுளைப் பத்து ஆண்டுகள் நீட்டித்துக் கொடுத்துப் பீடாதிபதியாக அமரவைத்துள்ளார்.1783-ஆம் வருடம் பீடாதிபதியாகிய ஸ்ரீஸத்தியஸந்த தீர்த்த ஸ்வாமிகள் தாம் அருளாட்சி புரிந்த பத்து வருடங்களில் பலவித அதிசயங்களைப் புரிந்துள்ளார்.ஒருமுறை ஸ்வாமிகளின் அன்றாட பூஜைக்கு புஷ்பம் கிடைக்காத நிலையில் ஸ்ரீமூலராமரே ஒரு வயோதிகராகத் தோன்றி நிறைய தாமரை மலர்களைக் கொடுத்துவிட்டுக் கண்ணிமைக்கும் நேரத்தில் மறைந்துவிட்டாராம். ஸ்வாமிகளும் புஷ்பம் கிடைத்த மகிழ்ச்சியில் அவை அனைத்தையும் ஸ்ரீமூலராமருக்கே சமர்ப்பித்த பிறகு ஸ்ரீமூலசீதாதேவிக்கு சமர்ப்பிக்கத் தாமரை மலர்கள் இல்லையே என்று யோசித்தார். அச்சமயம், அனைவரும் பார்த்துக் கொண்டிருக்கும் பொழுதே ஸ்ரீமூலரமர் மேலிருந்த தாமரைப் புஷ்பங்களில் ஒன்று தானே சென்று ஸ்ரீமூலசீதையின் மீது விழுந்ததாம்.ஸ்ரீஸத்தியஸந்தர் வடநாட்டிலுள்ள புண்ணிய க்ஷேத்திரமாகிய கயாவுக்குச் சென்ற பொழுது அங்குள்ளவர்கள் தங்களுக்குப் பணம் கொடுக்காவிட்டால் கோயிலைத் திறக்க மாட்டோம் என்று கூறியிருக்கின்றனர். ஆனால், ஸ்ரீஸத்தியஸந்தர் திருக்கோயில் வாசலை அடைந்த மறுகணமே திருக்கோயிலின் பூட்டுகள் உடைந்து, கதவுகளும் திறந்தன. தொடர்ந்து ஒரு வார காலம் இது போன்று நிகழ்ந்ததைக் கண்ட கோயில் நிர்வாகிகள் ஸ்வாமிகளின் பெருமையை உணர்ந்து மன்னிப்புக் கேட்டுள்ளனர்.இத்தகைய பெருமைகள் வாய்ந்த ஸ்ரீஸத்தியஸந்த தீர்த்தர், தமக்கு அடுத்தபடியாக ஸ்ரீஸத்தியவர தீர்த்தஸ்வாமிகளைப் பீடாதிபதியாக்கிவிட்டு 1794-ஆம் ஆண்டு பிருந்தாவனப் பிரவேசம் செய்தார். கர்நாடக மாநிலம், ஷிமோகா மாவட்டத்தின் தீர்த்தஹள்ளி தாலுக்காவிலுள்ள மஹிஷி என்ற திருத்தலத்தில் அமைந்துள்ள தமது பிருந்தாவனத்தில் (ஸ்ரீராகவேந்திர ஸ்வாமிகளைப் போலவே) இன்றளவும் உயிர்ப்புடன் இருந்தபடி தம்மை நாடிவரும் பக்தர்களுக்கு அருள்புரிந்துவரும் ஸ்ரீஸத்தியஸந்ததீர்த்த ஸ்வாமிகளின் ஆராதனை வரும் 21.5.2023 அன்று அமைகின்றது. -சந்தான கிருஷ்ணன்

ஸ்ரீராமபிரான் அளித்த தாமரை மலர்கள்!

Related Stories