கூர்ம ஜெயந்தி: மலையைத் தாங்கிய மாலவன்!

-சந்தான கிருஷ்ணன்“முப்பத்து மூவர் அமரர்க்கு முன் சென்று கப்பம் தவிர்க்கும் கலியே, துயிலெழாய்!” என்று ஸ்ரீஆண்டாள் தான் அருளிய திருப்பாவையில் எம்பெருமானைத் துயிலெழுப்பினாள்.தன்னை நம்பியிருக்கும் தேவர்களையும் முனிவர்களையும் காப்பாற்றுவதற்காக எப்பொழுதும் முன்களத்தில் நின்று பணியாற்றுவதே எம்பெருமான் ஸ்ரீமந்நாராயணனின் நல்லியல்பு என்பதையே ஸ்ரீஆண்டாள் அவ்வாறு குறிப்பிடுகின்றாள்.முன்னொரு காலத்தில் துர்வாச முனிவரின் சாபத்தால் தங்களுடைய பலத்தை இழந்திருந்த இந்திராதி தேவர்களெல்லாம் அசுரர்களிடம் தோற்றுக்கொண்டே இருந்தனர். தங்களின் இன்னல் தீர அவர்களெல்லாம் எம்பெருமானைச் சரணடைந்த பொழுது, அவ்வெம்பெருமான் பாற்கடலைக் கடைந்து அதிலிருந்து கிடைக்கும் அமிர்தத்தைப் பருகி இழந்த பலத்தைப் பெறுமாறு அறிவுரை கூறினார். மேலும், தேவர்களின் முயற்சியினால் மட்டும் பாற்கடலைக் கடைந்து விட முடியாது என்றும்; அப்பணியில் அசுரர்களையும் ஈடுபடுத்துவது அவசியம் என்பதால், அவர்களுடன் சமாதானமாகச் செல்லும்படியும் வலியுறுத்தினார் பெருமாள்..அளவில் பெரிய மந்தரமலையை மத்தாகவும், நாகங்களின் அரசனாகிய வாசுகியைக் கயிறாகவும் கொண்டு அப்பாற்கடலைக் கடைவதென்று தீர்மானிக்கப்பட்டது. பிரும்மாண்டமான மந்தரமலையைத் தூக்கி வருவது தேவர்களுக்குச் சிரமமாக இருந்ததால், பகவானின் வாகனமாகிய கருடனே அதனை அனாயாசமாகத் தூக்கி வந்து பாற்கடலில் நிலைநிறுத்தினார்.தன்னுடைய பாரத்தின் காரணமாக அம்மந்தரமலை பாற்கடலில் மூழ்கத் தொடங்கியதால் தேவர்களும் அசுரர்களும் செய்வதறியாமல் திகைத்து நின்றனர். அப்பொழுது, யாரும் அதுவரையில் கற்பனைசெய்து பார்த்திராத மிகப்பெரிய (கூர்மம்) ஆமையின் வடிவத்தை எடுத்துக்கொண்ட பெருமாள் தமது பரந்த முதுகினால் அம்மலையைத் தாங்க, பாற்கடலைக் கடைவது சுலபமானது.ஆமைவடிவ எம்பெருமானின் முதுகின் மேல் சுழன்ற அம்மந்தரமலை அப்பெருமானின் தினவு தீரும்படி அவருடைய முதுகை இதமாகச் சொறிந்து கொடுத்தது என்று ஸ்ரீவேதாந்த தேசிகன் தம்முடைய தசாவதார ஸ்தோத்திரத்தில் வித்தியாசமாக வர்ணித்துள்ளார்.அவ்வாறு கடையப்பட்ட பாற்கடலில் இருந்து வெளிப்பட்ட ஆலகால விஷத்தைச் சிவபெருமான் ஏற்றுக்கொண்டதையும், அமிர்தத்தை மோகினி அவதாரப் பெருமாள் தேவர்களுக்கே பகிர்ந்து அளித்ததையும் நாம் அறிவோம்.எம்பெருமான் நினைத்திருந்தால் பாற்கடலைக் கடையாமலே அமிர்தத்தை வரவழைத்து தேவர்களுக்கு அளித்திருக்கலாம். ஆனால், அவ்வமிர்தத்தினை தேவர்கள் தங்களுடைய உழைப்பின் மூலமே அடைய வேண்டும் என்று எம்பெருமான் கூறியதில் ஒரு வாழ்வியல் சூட்சுமம் அடங்கியுள்ளது.“எவர் ஒருவரும் தங்களுக்கு வேண்டியதை இலவசமாகப் பெற முயற்சிக்காமல், தங்களுடைய சொந்த உழைப்பின் மூலமே பெற வேண்டும்; அவ்வாறு உழைக்கும் பொழுது ஏற்படுகின்ற இடர்ப்பாடுகள் அனைத்தும் களையப்பட்டு இறுதிப் பயனை நாம் அடைவதற்கு எம்பெருமானின் திருவருள் துணைநிற்கும்” என்ற உயர்வான வாழ்வியல் சூட்சுமத்தை நமக்கெல்லாம் உணர்த்திய ஸ்ரீகூர்மாவதாரம் தோன்றிய திருநாளாகிய ஸ்ரீகூர்மஜெயந்தி வருகின்ற 14.6.2023 (வைகாசி மாதம் 31 ஆம் நாள்) அன்று அமைகின்றது.