கிருஷ்ணகிரி - பழையபேட்டை: அர்ஜுனன் பிரதிஷ்டை செய்த ஆளரிநாதன்!

கிருஷ்ணா என்றால் கருப்பு; கிரி என்றால் மலை. எனவே மலைகள், குன்றுகள் ஆகியவற்றால் சூழப்பட்ட ஊர் முற்காலத்தில் கருமலை என அழைக்கப்பட்டுள்ளது.இக்கோயிலில் தற்போதுள்ள ஸ்ரீகோபால கிருஷ்ணர் சிலை விஜயநகரப் பேரரசர் கிருஷ்ணதேவராயர் காலத்தில் கருமலை உச்சியில் தனியாக பிரதிஷ்டை செய்யப்பட்டு வழிபாட்டில் இருந்தது. அதனால் இவ்வூருக்கு கிருஷ்ணகிரி என்ற பெயர் ஏற்பட்டதாக தல வரலாறு கூறுகிறது.அர்ஜுனன்பாசுபதஅஸ்திரம்பெறுவதற்காகத்தீர்த்தயாத்திரைசெல்லும் வழியில் இங்கு வந்தார். அப்போதுஸ்ரீநரசிம்மஅவதாரம்தனதுஅடியார்களின்துயர்தீர்ப்பதில்என்றும்தாமதம்காட்டியதில்லைஎன்பதைஉணர்ந்து, கருமலைஅடிவாரத்தில்தங்கிதமதுகரங்களால்செய்வித்த லட்சுமிநரசிம்மரைபிரதிஷ்டைசெய்துவழிபட்டுள்ளார். பிற்காலத்தில் இங்குக் கோயில் கட்டப்பட்டுள்ளது.இந்த ஆலயம் சுமார் 1300 ஆண்டுகளுக்கு முற்பட்டது என்றும், இதை கரிவரத ரங்கராஜ பல்லவன் என்ற மன்னன் நிர்மாணித்தார் என்றும் இக்கோயில் கல்வெட்டு ஒன்றில் குறிப்பிடப்பட்டுள்ளதாக ஆலய வரலாறு தெரிவிக்கிறது.அந்நியர் படையெடுப்பின் போது ஆலயம் சிதிலமடைந்துள்ளது. மீண்டும் அது மகோன்னத நிலையை அடைவதற்காக கிருஷ்ணகிரி ஆன்மிக அன்பர்கள் மிகவும் பாடுபட்டுள்ளனர். அந்நியர் ஆட்சிக்காலத்தில் மலை மீது எழுந்தருளியிருந்த ஸ்ரீ கோபாலகிருஷ்ணர் சிலை அகற்றப்பட்டு கேட்பாரற்றுக் கிடந்துள்ளது. பெருமாளின் அருளாணைப்படி ஸ்ரீமத் நாராயணனின் பக்தரான படேதால குண்டையா குடும்பத்தைச் சார்ந்த அப்பாஜிராவ் என்பவரால் 1925-ஆம் ஆண்டு இத்தலத்தில் அது மீண்டும் பிரதிஷ்டை செய்யப்பட்டுள்ளது. மேலும் கோயிலில் ராமானுஜர், எம்பார் விக்ரகங்களும் பிரதிஷ்டை செய்யப்பட்டுள்ளன.பல்வேறு ஆன்மிக அமைப்புகள், பக்தர்களின் ஒத்துழைப்புடன் கடந்த 2018-ஆம் ஆண்டு மகாகும்பாபிஷேக விழா விமரிசையாக நடைபெற்றுள்ளது. கும்பாபிஷேகத்தை திருப்பதி தேவஸ்தான வைகானச ஆகம பண்டிதர்கள் நடத்தி வைத்துள்ளனர்.ராஜகோபுரத்தை அடுத்து கோயிலுக்கு முன்பு இரண்டு கருடகம்பங்கள் உள்ளன. ஒன்றில் அனுமனின் உருவமும், மற்றொன்றில் கருடனின் உருவமும் அமைக்கப்பட்டுள்ளது. பலிபீடம், கொடிமரம் ஆகியவற்றைக் கடந்து உள்ளே நுழைந்தால் கருடாழ்வார் சேவை சாதித்த நிலையில் உள்ளார். இதையடுத்து அழகிய பதினாறுகால் மண்டபமும், தொடர்ந்து உள் மண்டபம், அர்த்த மண்டபம், கருவறை போன்றவையும் அமைந்துள்ளன. கருவறை விமானமானது 50 அடி உயரத்தில் ஐந்து நிலைகளுடன், எண்கோண வடிவில் உள்ளது..கருவறையில் மூலவரான நரசிம்மர் இரண்டு அடி உயரப் பீடத்தில், நான்கு அடி உயரத்தில், சங்கு சக்கரதாரியாக நாற்கரங்களுடன் மகாலட்சுமியை இடது மடியில் தாங்கியபடி சாந்த ரூபமாகக் காட்சியளிக்கிறார். இவரது திருவடிகளில் சாளக் கிராமம் உள்ளது. மேலும் கோயில் வளாகத்தில் நாதமுனிகள், நம்மாழ்வார், காளிங்க நர்த்தனர், வாலில் மணிகட்டிய ஆஞ்சனேயரும், மேற்குப் பார்த்த சந்நதியில் வேணுகோபாலரும் உள்ளனர்.சனிக்கிழமைகளில் சிறப்பு வழிபாடு நடைபெறுகிறது. சுவாதி நட்சத்திரத்தன்று நரசிம்மருக்கு சிறப்பு அபிஷேகமும், ரோகிணி நட்சத்திரத்தன்று கிருஷ்ணருக்கு சிறப்பு அபிஷேகமும், அன்று மாலை சந்தான கோபாலன் பூஜை மற்றும் தொட்டில் உற்சவமும், பௌர்ணமியன்று மாலை சத்யநாராயண பூஜையும், மூல நட்சத்திரத்தன்று ஆஞ்சநேயருக்கு சிறப்பு அபிஷேகமும், வடை மாலை சாத்துதலும் நடைபெறுகிறது..ஆண்டுதோறும் தைப்பொங்கல், ரதசப்தமி, யுகாதி, ஸ்ரீ ராமநவமி, தமிழ் வருடப் பிறப்பு, அக்ஷய திருதியை, கிருஷ்ண ஜெயந்தி, நவராத்திரி, புரட்டாசி சனிக்கிழமைகள், கார்த்திகை மாதம் விஷ்ணு தீபம், மார்கழி மாதம் 30 நாட்களும் சிறப்பு பூஜை, வைகுண்ட ஏகாதசியில் சொர்க்கவாசல் திறப்பு, துவாதசி உற்சவம், அனுமன் ஜெயந்தி ஆகிய முக்கிய தினங்களில் வெகு விமரிசையாக வழிபாடுகள் நடைபெறுகிறது.நரசிம்ம ஜெயந்தியன்று கோபூஜை, சிறப்பு ஆராதனை, நவகிரக ஹோமம், மஹா சுதர்சன ஹோமம், லட்சுமி குபேர ஹோமமும், தொடர்ந்து மூலவருக்கு மகா அபிஷேகம், சிறப்பு அலங்காரம் மற்றும் தீபாராதனையும் நடைபெறும். பின்னர் சிறப்பு அலங்காரத்தில் உற்சவர் நரசிம்மர் கருட வாகனத்தில் பிராகாரத்தைச் சுற்றி வந்து பக்தர்களுக்கு அருள்பாலிப்பார்.வைகாசி மாதம் பிரம்மோற்சவ விழா பதினான்கு நாட்கள் விமரிசையாக நடைபெறும். 37-ஆவது ஆண்டு பிரம்மோற்சவ விழா வருகின்ற 26.5.2023 அன்று துவங்கி 8.6.2023 வரை சிறப்பாக நடைபெற இருக்கிறது. இதில் கலச ஸ்தாபனம், நகர்வலம், அன்னபட்சி, சிம்மம், ஆஞ்சநேயர், சேஷ வாகனங்களில் உலாவும், சுவாமிக்கு அபிஷேகம், பிராகார உற்சவம், நரசிம்ம சுவாமிக்கு திருக்கல்யாணம் நடைபெற்ற பின்னர், சுவாமியை பல்லக்கில் வைத்து திருக்கோயிலைச் சுற்றி ஊர்வலமாக அழைத்து வருதல், யானை வாகனத்தில் லட்சுமி நரசிம்மர் திருவீதி உலா என ஒவ்வொரு நாளும் நடைபெறவுள்ள சிறப்பு பூஜைகளில் ஏராளமான பக்தர்கள் கலந்துகொண்டு சுவாமி தரிசனம் செய்வார்கள். இத்தல லட்சுமி நரசிம்மரை வழிபடுவோருக்கு மணப்பேறு, மகப்பேறு அமையும். மனம் தெளிவு பெறும். கடன் தொல்லையில் இருந்து நிவாரணம் கிடைக்கும். தம்பதியருக்குள் பிணக்குகள் நீங்கி ஒற்றுமை பெருகும்.திருமாலின் தசாவதாரங்களில் மிகவும் சிறப்பு வாய்ந்தது நரசிம்ம அவதாரம் என்பார்கள். தமது அடியார்களின் துயர் தீர்ப்பதில் என்றும் தாமதம் காட்டியதில்லை ஸ்ரீமத் நாராயணன். நீங்களும் வாய்ப்பு கிடைக்கும் நாளில் இத்தலம் வந்து வழிபட்டுச் செல்லுங்களேன். எங்கே இருக்கு?கிருஷ்ணகிரி புறநகர் பேருந்து நிலையத்தில் இருந்து 500 மீட்டர் தொலைவில் பழையபேட்டை என்ற பகுதியில் லட்சுமி நரசிம்மர் கோயில் உள்ளது.தரிசன நேரம்காலை 5 – பகல் 12; மாலை 4 – இரவு 8. முக்கிய நாட்களில் கூடுதல் நேரம் நடை திறந்திருக்கும்.

கிருஷ்ணகிரி - பழையபேட்டை: அர்ஜுனன் பிரதிஷ்டை செய்த ஆளரிநாதன்!

Related Stories