கிருஷ்ண ஜெயந்தி 6.9.2023 : குட்டிக்கிருஷ்ணன் என்றாலே ஆட்டம்… பாட்டம் கொண்டாட்டம் தான்!

“சின்ன சின்ன பாதம் வைத்து கண்ணா நீ வா வா வா! மணிவண்ணா நீ வா வா வா!” என்ற பாடலும், “கண்ணன் எங்கள் கண்ணனாம்… கார்மேக வண்ணனாம்” என்ற பாடலும் குழந்தைகளுக்கான பஜனை பாடல்கள் வரிசையில் கட்டாயம் இருக்கும். அவர்களின் குரல்களில் கோரஸாக கண்ணனை அழைப்பது எவ்வளவு சுகமாக இருக்கின்றதோ, அதுபோலத்தான், ஒவ்வொரு வருடமும் அந்தச் சின்னக்கண்ணனை நம் வீட்டுக்கு வரவேற்பதில் ஏற்படும் ஆனந்தமும் இருக்கும்.குட்டிக்கிருஷ்ணனை ஒவ்வொருவரும் தத்தம் வீடுகளில் வரவேற்பதற்காக எப்போது கிருஷ்ண ஜெயந்தி வரும் என்று ஆவலோடு காத்திருப்பார்கள். ஆவணி மாதம், அஷ்டமி திதி, ரோகிணி நட்சத்திரம் கூடிய நாள் கிருஷ்ணனின் பிறந்த நாளாகும். அந்த வகையில், இந்த வருடம் கிருஷ்ண ஜெயந்தி செப்டம்பர் மாதம் ஆறாம் தேதி வருகிறது. ஒவ்வொரு வருடமும் விஷமக்காரக் கண்ணன் எல்லா வீடுகளுக்கும் “விசிட்” செய்து, அனைத்துப் பலகாரங்களையும் ஒரு பிடிபிடித்துவிட்டு, வேண்டும் வரங்களை அள்ளிக்கொடுப்பான். பலகாரம் மட்டும்தானா? இல்லை… இல்லை…. இன்னும் அவனுக்கு என்னவெல்லாம் பிடிக்கும் என்று பார்க்கலாம்.பாலகோபாலனாக சிறுவயதில் அவன் செய்த குறும்புகளுக்கு அளவே கிடையாது. மாடு மேய்க்கச் சென்று நண்பர்களுடன் அட்டகாசம் செய்வான். அங்கே இருக்கும் அனைத்து கோபியர்களும், அவன் தங்கள் வீட்டில் தயிர்ப்பானையை உடைத்ததையும் வெண்ணெய் திருடியதையும், யசோதையிடம் சொல்லிப் புலம்பாத நாளே இல்லை எனலாம். மாடுகள் அவன் புல்லாங்குழலிசையில் மயங்கிப் பாலைத் தானே சொரியும். அதனால், பால், தயிர், வெண்ணெய் மற்றும் பாலினால் செய்யும் இனிப்பு வகைகள், பாயசம் என்று எல்லாமும் அவனுக்குப் படைக்கப்படும். அனைத்து பழவகைகளும் அவனுக்குப் பிடிக்கும். நாவல் பழம் பற்றி பெரியாழ்வார் திருமொழியில் சொல்லப்பட்டிருக்கிறது.சொல்லிலரசிப்படுதி நங்காய் சூழல் உடையன் உன் பிள்ளை தானே இல்லம் புகுந்து என் மகளைக் கூவி கையில் வளையைக் கழற்றி கொண்டு கொல்லையினின்றும் கொணர்ந்து விற்ற அங்கு ஒருத்திக்கு அவ்வளை கொடுத்துநல்லன நாவற் பழங்கள் கொண்டு நானல்லேன் என்று சிரிக்கின்றானே.....அதாவது, யசோதையிடம் முறையிடும் கோபியர்களில் ஒருத்தி, உன் மகன் கிருஷ்ணன் என் வீட்டில் புகுந்து, என் மகளைப் பெயர் சொல்லி அழைத்து, அவள் கையிலுள்ள வளையலைக் கழற்றிகொண்டு, அதனைக் கொல்லையில் நாவல் பழம் விற்பவளிடம் கொடுத்து, நாவல் பழங்களை வாங்கித் தின்றுவிட்டு, நான் செய்யவில்லை என்று சொல்கிறானே, இது சரியா? என்று கேட்கிறாள் என்பதாக உள்ள இந்தப் பாடலில் நாவல் பழம் சொல்லப்பட்டிருக்கிறது. மொத்தத்தில், குழந்தைகளுக்குப் பிடித்த அனைத்து வகையான விஷயங்களும் அவனுக்கு நிவேதனம் செய்யப்படும். அத்துடன் அவல் மிகவும் பிடித்த ஒன்று. அவன் அரசாட்சி செய்த காலத்தில், குசேலர் அவல் கொடுத்த கதை நமக்கெல்லாம் தெரிந்த ஒன்று. சரி, இப்போது இந்த விரதத்தைக் கடைபிடிக்கும் விதத்தையும் அதன் பலனையும் தெரிந்துகொள்வோம். கிருஷ்ண ஜெயந்தி மாலைவேளையில் கொண்டாடப்படும் பண்டிகை ஆகும். கிருஷ்ண ஜெயந்தி விரதம் அனுஷ்டிப்பவர்கள் காலையில் குளித்து கிருஷ்ண நாமம் சொன்னபடி, வேலைகளில் ஈடுபடுவார்கள். அன்றைய தினம் காலையில் வீட்டைச் சுத்தப்படுத்தி கோலமிடவேண்டும். பிறகு, அவரவர் வீட்டிலுள்ள கிருஷ்ணன் பொம்மையோ, சிலையோ, விக்ரஹமோ அல்லது படமோ எதுவாக இருந்தாலும், அதனை நன்றாகத் துடைத்து, சந்தனம் குங்குமம் இட்டு, பூஜைக்குரிய இடத்தில் வைக்கவேண்டும். அவனுக்கு மிகவும் பிடித்த துளசி மாலை, முத்து மாலை, பூமாலைகளால் அலங்கரிக்கலாம். அவன் பாக்களைப் பாடியபடி, அவன் பெருமையைச் சொன்னபடி, அவன் நினைவுடனேயே வெல்லச் சீடை, உப்புச் சீடை, முறுக்கு, அப்பம், வடை என்று பக்தியுடன் அனைத்து எண்ணெய் பண்டங்களையும் செய்வார்கள். அந்தக் குறும்புக்கார மாதவன் எண்ணெய் வாசனை வருகிறதா என்று பார்ப்பானாம். அன்றைய தினம் முழுவதும் உண்ணாது, அவன் பேர் சொல்லி விரதமிருந்து, மாலையில் அவனை வரவேற்கும்விதமாக அரிசிமாவினால், கிருஷ்ணனின் செல்லமான சிறிய பாதங்களை, அவனை மனத்தில் நினைத்தவண்ணம் வரையவேண்டும். அப்போதுதான், உங்கள் வீட்டில் அவன் குதித்து குதித்து ஓடிவருவான். பலகாரத்தைத் தேடி எல்லா இடத்துக்கும் போவான். வீட்டு வாசலிலிருந்து ஆரம்பித்து, வீட்டின் அனைத்துப் பகுதிகளுக்கும் கண்ணன் வருவதாக ஐதிகம். அதனால், எல்லா இடங்களிலும் அவன் பாதம் வரையவேண்டும். பிறகு, மாலையில் கிருஷ்ணன் அஷ்டோத்திரம் முதலானவைகளைச் சொல்லி, அவனை பல வண்ண மலர்களாலும், துளசி இலைகளாலும் அர்ச்சிக்கவேண்டும். பஜனை பாடல்கள், நாராயணீயம் உள்ளிட்டவைகளைப் பாராயணம் செய்யலாம். தூப தீபங்கள் காட்டி, பழவகைகள், வெண்ணெய், பால், தயிர், அவல் அத்துடன், செய்துவைத்திருக்கும் பதார்த்தங்களை பக்தியுடன் அவனுக்கு நிவேதனம் செய்த பிறகு, அன்றைய தினமே பூஜை செய்த படமோ, சிலையோ அதனை வடக்குமுகமாக நகர்த்தி, தூப தீபம் ஆரத்தி எடுத்து விரதத்தை முடிப்பார்கள். இன்னும் சிலர், காலையில் புனர்பூஜை செய்து கிருஷ்ணனை எந்த உருவத்தில் ஆராதித்தார்களோ, அதனை சற்றே வடக்குமுகமாக நகர்த்தி, விரதத்தை முடிப்பார்கள். புத்திரபாக்யம் வேண்டுவோர் இவ்விரதத்தைக் கடைபிடிப்பதன் மூலம் சந்தானப்ராப்தி கிடைக்கும் என்பது நம்பிக்கை. கர்நாடகாவின் உடுப்பி, கேரளாவின் குருவாயூர் போல தமிழகத்தில் ஊத்துக்காடு என்ற சிறிய கிராமத்தில் அருள்பாலிக்கும் காளிங்கநர்த்தன கிருஷ்ணன் நம் மனதைக் கொள்ளை கொள்ளும் திவ்ய ஸ்வரூபத்துடன் காட்சி அளிக்கிறான். அன்னைக்கு தன் சிறிய வாயில் அண்ட பிரமாண்டத்தைக் காட்டிய அவனை நாம் மனத்தில் இருத்தித் துதித்து அவன் தாள் பணிவோம். நம் வீட்டிலும் கிருஷ்ணனை வரவேற்க இப்போதே தயாராவோம்! -மாலா ரமேஷ்