கண்டாச்சிபுரம்: மணப்பேறு, மகப்பேறு அருளும் இராமநாதீஸ்வரர்!

-நடுநாடன்இராமபிரான் சிவலிங்கத்தை பிரதிஷ்டை செய்து வழிபட்ட தலம், கண்டராதித்திய சோழன் எழுப்பிய கோவில், பாண்டியர், சம்புவராயர்கள் திருப்பணி செய்த ஆலயம், வீடுகள்தோறும் திருமுறைகளைப் பாடும் ஊர், 40 ஆண்டுகளாக கம்பன் விழா நடத்தும் திருத்தலம், கந்தர் சஷ்டிக்கு கம்பம் ஏறும் ஊர், குடியரசுத் தினத்தன்று மயிலம் முருகனுக்கு படி பூஜை செய்யும் தமிழ் வேத வார வழிபாட்டு சபை கொண்ட ஊர் எனப் பல்வேறு பெருமைகள் கொண்ட தலமாக விளங்குவது, விழுப்புரம் மாவட்டத்தில் அமைந்துள்ள கண்டாச்சிபுரம்..இவ்வூர் சோழ மன்னன் கண்டராதித்தன் பெயரால் கண்டராதித்தபுரம் என வழங்கப்பட்டு பின்னர் மருவி இன்று கண்டாச்சிபுரம் என அழைக்கப்படுகின்றது.இராமன் வழிபட்ட இறைவன்:சீதையைத் தேடிவரும் வேளையில் இராமபிரான் இத்தலத்தில் லிங்கத்தை பிரதிஷ்டை செய்து வழிபட்டதாகத் தலபுராணம் கூறுகின்றது. தன்னை வழிபடும் அடியாரை, தன் பெயரோடு வழங்க அனுமதிக்கும் வழக்கப்படி, இறைவன் இராமநாதீஸ்வரர் என்று அழைக்கப்படுகின்றார். இதனை உறுதிப்படுத்தும் விதமாக, இவ்வாலயத்தில் பழைமையான புடைப்புச் சிற்பமாக லிங்கத்தை இராமர் வழிபடும் காட்சிகள் அமைந்துள்ளன.கல்வெட்டுகள்:கி.பி.1935−36 ஆம் ஆண்டின் இந்தியத்தொல்லியல் ஆய்வறிக்கையில் நான்கு கல்வெட்டுகள் கண்டறியப்பட்டுள்ளன. இவற்றின் மூலம் இவ்வூர் சோழர் காலத்திலும் முக்கியத்துவம் பெற்ற ஊராக விளங்கியதை அறியமுடிகிறது,மடவளாகம் குளத்தின் கரையில் உள்ள ஒரு பாறையில் முதல் கல்வெட்டு கண்டறியப்பட்டது. இது இராஜராஜதேவன் மூன்றாம் ஆட்சியாண்டு காலத்தைச் சேர்ந்தது. இதில் புலவரதியன் மருமகனான ஓரிக்கொண்டான் இவ்வூர் ஏரியின் மதகு பழுது நீக்கிய செய்தி கூறப்பட்டுள்ளது.இவ்வூர் மாரியம்மன் கோவிலின் முன்புறத்தில் கி.பி. பத்தாம் நூற்றாண்டைச் சேர்ந்த மூன்று கல்வெட்டுகள் கண்டுபிடிக்கப்பட்டன. இங்குள்ள மூன்று கற்களில் பொறித்த கல்வெட்டுகளில், பல்லுடையான் பெருங்காடன் மகள் போக்கி, கரை உடையான் பெருமல்லன் மகள் அறியாள், புல்லுடயான் மறவன் மகள் நாச்சி ஆகியோர் சபதம் செய்த செய்திகள் கூறப்பட்டுள்ளன. இது தவிர, விரிவுரையாளர் இல.தியாகராசன் அவர்கள் இங்கு மேற்கொண்ட ஆய்வில் மூன்று கல்வெட்டுகளைக் கண்டறிந்து, தனது "சம்புவராயர் வரலாறு" நூலில் வெளியிட்டுள்ளார்..இக்கோவிலில் புனரமைப்பினால் துண்டுக் கல்வெட்டுகள் பல்வேறு இடங்களில் கட்டுமானத்திற்குப் பயன்படுத்தப்பட்டன. இவை குலோத்துங்க சோழன் கல்வெட்டுகள், குலசேகரப்பாண்டியனின் கல்வெட்டுகள் என கண்டறியப்பட்டுள்ளதால், சோழர் காலம் முதல் பாண்டியர் காலம் வரை சிறப்பு பெற்றிருந்ததை அறிய முடிகிறது. மேலும் கண்டராதித்த சோழன் காலத்தில் (கி.பி. 950 − 956) இவ்வூர் நெற்குப்பையான கண்டராதித்தபுரம் எனக்குறிப்பிடப்பட்டுள்ளது.திருவீராமீசுவரர் கோவில் என்று கல்வெட்டுகளில் குறிப்பிடப்பட்டுள்ள இவ்வாலய கருவறை மேற்கு சுவர் அதிட்டானம் முப்பட்டை குமுதப்பகுதியில் முதலாம் இராஜநாராயண சம்புவராயர் பதினொன்றாவது ஆட்சி ஆண்டு கல்வெட்டும், வடச்சுவரில் இரண்டாம் இராஜநாராயண சம்புவராயர் பன்னிரண்டாவது ஆட்சியாண்டு கல்வெட்டும், தென்புறச்சுவர் குமுதப்பகுதியில் விஜய நகர மன்னன் கம்பணாரின் கல்வெட்டும் கண்டறியப்பட்டுள்ளன. இதன் மூலம் கி.பி. 1348 ஆம் ஆண்டில் சம்புவராயர் இக்கோவிலைக் கட்டியதை உறுதி செய்ய முடிகின்றது.தல வரலாறு:இத்திருக்கோவில் கண்டராதித்த சோழன் காலத்தில் எழுப்பப்பட்டதையும், பாண்டிய மன்னர்கள் திருப்பணி செய்ததையும் கல்வெட்டு சான்றுகளால் அறிய முடிகிறது. தொடக்கக் காலத்தில் இன்றைய கண்டாச்சிபுரம் அடுத்துள்ள மடவளாகம் ஏரிக்கரையில் இத்திருக்கோவில் இருந்தது. கால வெள்ளத்தால் சிதைவுற்ற இவ்வாலயம் கவனிப்பார் யாருமின்றி நெடுங்காலம் இருந்து வந்தது.இதன்பிறகு, கி.பி. 1348 ஆம் ஆண்டில் இப்பகுதியை ஆட்சி செய்த சம்புவராயர் இக்கோவிலின் பெருமையை அறிந்து, புதுப்பித்துக்கட்டி, இறையிலியாக நிலதானம் அளித்துள்ளார்.இக்கோவிலின் கல்வெட்டில், "மலாடாகிய ஜனநாத வளநாட்டு குறுக்கை கூற்றத்து திருமுனைப்பாடி நாட்டு பெண்ணை வடகரை உழைக்காட்டு நாட்டு திருக்கோவலூர்ப் பற்று நெல்குப்பையான கண்டராதித்தபுரத்து உடையார் திருவீராமீசுமுடைய நாயனார்க்கு" எனக் குறிப்பிடப்பட்டுள்ளது. இக்கோவில் பூஜை, திருப்பணிக்கு எட்டு மா− நிலம் இறையிலி தரப்பட்டுள்ளது. சம்புவராயரின் திருப்பணிக்குப் பிறகு இக்கோவில் மாற்றம் ஏதுமின்றி சுமார் 600 ஆண்டுகள் வழிபாட்டில் இருந்து வந்தது. இதன்பிறகு இவ்வாலயம் சிதிலமடைந்ததாகத் தெரியவருகிறது.இந்நிலையில், இருபதாம் நூற்றாண்டில் வாழ்ந்த இவ்வூர் சிவனடியாரான பாளையத்தார் கணபதி முதலியார், தன் ஊரில் சிவாலயம் பழுதடைந்து வழிபாட்டில் இல்லாதது குறித்து வருந்தினார். அவர் மனதில் சிவாலயத்தை புனரமைத்து எழுப்ப வேண்டும் என்ற வைராக்கியம் தோன்றியது. அதன் பயனால், கி.பி. 1922 ஆம் ஆண்டு ஏரிப்பகுதியில் இருந்த சிவலிங்கத்தையும், அன்னை செளந்தர்ய ஞானாம்பிகை அம்மனையும் எடுத்து வந்து பிரதிஷ்டை செய்து உருவாக்கிய ஆலயமே இன்று மடவளாகத்தின் தென்பகுதியில் அமைந்துள்ள கண்டாச்சிபுரம் இராமநாதீஸ்வரர் திருக்கோவில் ஆகும்.இன்றைய மூலவர் வேளாண்குளம் என்ற நீர்த்துறையில் இருந்ததாகக் கூறப்படுகிறது. அதைத் தூர்த்து கருவறை அமைக்கப்பட்டது. அதற்குப் பதிலாக ஆய்க்குளம் அகழ்ந்து தரப்பட்டதாகவும் சொல்லப்படுகின்றது. என்றாலும், பழைய கற்கோவிலில் இருந்த சோழர், பாண்டியர் கால கல்வெட்டுகள், இன்றைய ஆலயத்தின் சுவர்களில் அமைந்துள்ளன. இதன்பிறகு செளந்தர்ய ஞானாம்பிகை அம்மன் திருக்கோவில், விநாயகர் சன்னதி, தண்டபாணி சன்னதி, பாலகணபதி சன்னதி, நவகிரக சன்னதி அமைக்கப்பட்டது..ஆலய அமைப்பு:கி.பி. 1999 இல் எழுப்பபட்ட ஐந்து நிலை இராஜகோபுரம் கிழக்கு நோக்கி கம்பீரமாக அமைந்துள்ளது. உள்ளே நுழைந்ததும் பலிபீடம், கொடிமரம், நந்திதேவர் காட்சிதர, ஆலயத்தின் வலதுபுறம் விநாயகர் சன்னதி, இடதுபுறம் தண்டபாணி சன்னதி அமைந்துள்ளன. நந்திதேவரின் எதிரே சிவலிங்கத்தை இராமர் வழிபடும் கோலம் புடைப்புச்சிற்பமாக அமைந்துள்ளது.நந்திமண்டபத்தைக் கடந்து சில படிகள் ஏறினால், இடதுபுறம் அறுபத்து மூவர், சோமாஸ்கந்தர், இராமர், சீதை, லட்சுமணர், ஆஞ்சநேயர், கஜலட்சுமி, வள்ளி, தெய்வானை உடனாய ஆறுமுகசுவாமி, தட்சிணாமூர்த்தி, சண்டிகேசுவரர் அமைந்துள்ளனர். உற்சவமூர்த்திகளாக நடராஜப்பெருமான், சிவகாமி அம்மை, மாணிக்கவாசகர் அமைந்துள்ளனர். இவர்களின் நடுநாயகமாக இராமநாதீஸ்வரர் கம்பீரமாய்க் காட்சி அருளுகின்றார்.வெளிப்பிராகாரத்தில் சுவாமியின் இடதுபுறம் செளந்தர்ய ஞானாம்பிகை அம்மன் தனிச் சன்னதியில் அமைந்துள்ளார். அன்னை தன் பெயருக்கேற்றபடி ஞானநிலையில் ஞானம் அருளும் கோலத்தில் அருள் வழங்குகின்றாள். இது தவிர, நவகிரக சன்னதி ஈசான்ய மூலையில் அமைந்துள்ளது.விழாக்கள்:சிவாலயங்களுக்கு உரிய அனைத்து விழாக்களும் சிறப்புடன் நடத்தப்படுகின்றன. சமயக்குரவர் நால்வர் குருபூஜை, வைகாசி விசாகம், ஆனித் திருமஞ்சனம், ஆடிப்பூரம், ஆடி நான்காம் வெள்ளியில் திருவிளக்கு பூஜை, விநாயகர் சதுர்த்தி, நவராத்திரி கொலு, ஐப்பசியில் கந்தர் சஷ்டிப் பெருவிழா, கம்பம் விழா, இடும்பன் விழா, கார்த்திகை தீபம், மார்கழியில் நடராஜர் அபிஷேகம், தை மாதம் பிரம்மோற்சவம், தை 2 இல் திருவூடல் உற்சவம், தேரோட்டம், மாசியில் தீர்த்தவாரி என அனைத்தும் வெகு விமரிசையாக நடத்தப்படுகின்றன.சுமார் அறுபது ஆண்டுகளாக தமிழ் வேத வார வழிபாட்டு சபையினரால், சுவாமி வீதியுலாவின் போது பன்னிரு திருமுறை ஓதியபடி வருதல், சுதந்திர தினத்தன்று திருவண்ணாமலை அருணகிரிநாதர் விழாவில் பங்கேற்பு, குடியரசுத் தினத்தன்று மயிலம் முருகன் திருக்கோவிலில் திருப்படி விழா போன்றவை சிறப்புடன் நடத்தப்படுகின்றன..மகப்பேறு தரும் வீரவாகு பிரசாதம்:கந்தர் சஷ்டி விழாவின் ஆறு நாட்களில் முதல் ஐந்து நாட்கள் வீதியுலாவில் வேல் செல்லும். காப்பு கட்டிய வீரவாகு அடியார்களுக்கு, நோன்பிருக்கும் அடியார் வீட்டில், வேல்பூஜை செய்து, அமுது படைப்பார்கள்.அவர்கள் தங்கள் சார்பில் ஒரு பிடி அன்னத்தை குழந்தைப்பேறு வேண்டும் தம்பதியினருக்கு அருட்பிரசாதமாகத் தருவார்கள். அதனை அவர்கள் மீதமின்றிச் சாப்பிட வேண்டும். அவர்களுக்கு விரைவில் முருகப்பெருமான் அருளால் மகப்பேறு கிடைக்கும் என்பது நம்பிக்கையாக இருந்து வருகின்றது. இதேபோல, ஆறாம் நாள் மாலை நடைபெறும் கம்பம் விழாவில் வழங்கப்படும் கம்பத்தடி மாவை, சிறு காணிக்கை செலுத்தி பெற்று உண்ணும் பெண்களுக்கு மகப்பேறு கிடைக்கும் என்பதும் நம்பிக்கையாக உள்ளது.கம்பன் விழா:இவ்வூரின் சிறப்பு, இங்குள்ள மக்கள் திருமுறை ஓதுவதில் வல்லமை பெற்று விளங்குவது. இளம்வயதில் இருந்தே தங்கள் குழந்தைகளுக்கு இதனை இவர்கள் பயிற்றுவிக்கின்றனர். சைவர்களாக வாழும் இவர்கள் தமிழையும், வைணவத்தையும் இன்றளவிலும் போற்றி வருகின்றனர். அந்த வகையில் கம்பன் விழாவை ஆண்டுதோறும் மே மாதத்தில் இரண்டு நாட்கள் வெகு சிறப்பாக நடத்துகின்றனர். இதில் திருமுருக கிருபானந்த வாரியார் உள்ளிட்ட பல்வேறு தமிழ் அறிஞர்கள், முக்கியப் பிரமுகர்கள் கலந்து கொண்டு சிறப்பு செய்துள்ளனர். இவ்விழா சுமார் 40 ஆண்டுகளைக் கடந்தும் சிறப்பாக நடத்தப்பட்டு வருவது குறிப்பிடத்தக்கதாகும். கும்பாபிஷேகம்:இச்சிறப்புமிகு கோவிலின் திருப்பணி பேரூர் ஶ்ரீசாந்தலிங்க மருதாசல அடிகளார் தலைமையில், சிவனடியார்கள் மற்றும் ஊர் மக்கள் ஆதரவோடு நிறைவேறி வருகின்றது. கும்பாபிஷேக விழா, வரும் 29.6.2023, வியாழக்கிழமை அன்று காலை 9.30 மணியளவில் நடைபெறவுள்ளது குறிப்பிடத்தக்கது.மணப்பேறு அருளுதல், மகப்பேறு வரமளித்தல் என அடியார்களின் கனவுகள் அனைத்தையும் நனவாக்கும் கண்டாச்சிபுரம் இராமநாதீஸ்வரரை வழிபடுவோம், வளம் பெறுவோம்!எங்கே இருக்கு?விழுப்புரம் - திருவண்ணாமலை வழித்தடத்தில், விழுப்புரத்தில் இருந்து 25 கி.மீ. தொலைவில் கண்டாச்சிபுரம் உள்ளது. தரிசன நேரம்காலை 8 – 10; மாலை 5 – இரவு 8.