இடையர்பாளையம்: பட்டத்தரசி அம்மன்!

கிராமியக் கோயில்கள் என்றாலே ஒரு யதார்த்தம், எளிமை, உணர்வுபூர்வமான கொண்டாட்டங்கள் இருக்கும். கிராமங்கள் அழிந்து நகரமாக மாறினாலும் இன்றும் அக்கோயில்கள் பழைமையைப் பறைசாற்றி வருகின்றன.அவ்வாறுள்ள ஒரு கோயில்தான் நாம் பார்க்கவிருக்கின்ற கோவை, தடாகம் சாலையில் இடையர்பாளையம் அருகே இந்திரா நகரில் அமைந்துள்ள பட்டத்தரசி அம்மன் ஆலயம்.சுமார் 150 ஆண்டுகளுக்கு முன் கோயில் அமைந்துள்ள பகுதி விவசாய நிலங்களாக இருந்தன. இங்கு வசித்த மக்கள் மேட்டுப்பாளையத்தில் குடி கொண்டிருக்கும் வனபத்ரகாளியம்மன் கோயிலுக்குச் சென்றபோது அம்மனை வேண்டி உத்தரவு பெற்று, பவானி ஆற்றில் இருந்து சிறிய கல் ஒன்றை எடுத்துவந்து சுயம்பு மூர்த்தமாக, தற்போது கோயில் அமைந்துள்ள இடத்தில் வேப்பமரத்தடியில் சிறிய ஓட்டு வீடு அமைத்து அதில் இருத்தி, பட்டத்தரசி அம்மன் எனப் பெயர் சூட்டி பூஜித்து வந்தனர். இந்த இடம் விவசாயி ஒருவருக்குச் சொந்தமானது.காலமாற்றம், வெளியாட்கள் குடியேற்றம், குடியிருப்புகள் விரிவாக்கம் என வளர்ந்த நேரத்தில், விவசாய பூமியின் உரிமையாளர் தனது நிலத்தில் குடியிருப்பு மனைப் பிரிவுகள் ஏற்படுத்தி விற்பனை செய்யத் திட்டமிட்டார். அப்போது கோயில் நிர்வாகிகளிடம் மூன்று சென்ட் நிலத்தை இலவசமாகத் தருவதாகக் கூறினார்..அன்று இரவு நில உரிமையாளரின் கனவில் அம்மன் தோன்றி, ’’எனக்கு மூன்று சென்ட் இடம் போதாது. நான் கோயில் கொண்டுள்ள இடத்தில் உள்ள வேப்பமர நிழல் எந்த அளவுக்கு உள்ளதோ, அந்த அளவு பரப்பளவு நிலத்தை எனக்குக் கொடு!’’ எனக் கூறி மறைந்தார். அடுத்த நாள் அம்மனின் ஆணையைச் செயலாக்கும் விதத்தில், அம்மன் கனவில் கூறியபடி இடத்தை அளந்து எல்லைக்கல் நட்டு, கோயிலுக்குத் தானமாக வழங்கினார்.பின்னர் கோயில் படிப்படியாக விரிவாக்கம் செய்யப்பட்டு, பட்டத்தரசி அம்மனுக்கு புதிய திருமேனி அமைக்கப்பட்டு, 2004-ஆம் ஆண்டு முதல் கும்பாபிஷேகம் கண்டது. பின் வசதிகள் பெருகிய நிலையில் விமானத்துடன் கூடிய கருவறை, மகாமண்டபம், பரிவார தெய்வங்களுக்கு சன்னதிகள் என அனைத்து திருப்பணிகளும் நிறைவடைந்த நிலையில் 12.12.2018 அன்று ஆதீனங்கள் முன்னிலையில் ஏராளமான பக்தர்கள் கலந்துகொள்ள கும்பாபிஷேக விழா மிகச் சிறப்பாக நடைபெற்றது.கோயிலை வலம் வரும் முன் பட்டத்தரசி அம்மன் வரலாற்றைப் பார்த்து விடுவோம்.பார் போற்றும் நாயகியான பட்டத்தரசி அம்மன் பார்வதி தேவியின் ஓர் அவதாரமாகக் கருதப்படுகிறாள். மாதி சின்னான் என்பவர் ஒரு பெரிய நிலக்கிழார். நூற்றுக்கணக்கான பண்ணை நிலங்களுக்குச் சொந்தக்காரர். நெல், வாழை, கரும்பு என பல்வேறு இனப் பயிர்களைப் பயிரிட்டு வந்தார். ஒரு சமயம் ஒரு பசுமாடும் அதன் கன்றும் அவர் பண்ணை நிலத்தில் புகுந்து பயிர்களை அழித்து நாசம் செய்துவிட்டன. விளை நிலங்களைப் பார்வையிட குதிரையில் வந்த மாதி சின்னான், நாசமான பயிர்களைக் கண்டு கடும் கோபம் கொண்டு கன்றுக்குட்டியின் மீது அம்பை எய்தினான். அது வலி தாங்க முடியாமல் அழுது துடிதுடித்து மாண்டது. தாய்ப்பசு அடைந்த வேதனைக்கு அளவே இல்லை. தாரை தாரையாகக் கண்ணீர் பெருக்கெடுத்தது..தினமும் காலையில் சிவபூஜைக்கு தேவையான பாலை இப்பசுதான் வழங்குகிறது. நேரே பார்வதி தேவியிடம் சென்று அழுது முறையிட்டது. கன்றுக்குட்டிக்கு நேர்ந்த கதையைக் கேட்டு பார்வதி தேவி மனம் வருந்தினார். முனியப்பனை அழைத்து, மாதி சின்னானை பச்சைப் பந்தலிட்டு கரகம் ஜோடித்து வைக்குமாறும், தான் அங்கு வருவதாகவும் தகவல் சொல்லும்படி உத்தரவிட்டார்.அடுத்த நாள் காலை பார்வதிதேவி கையில் வாளுடன் பிரசன்னமானார். தேவியை கண்டவுடன் மாதி சின்னானும் அவன் குடும்பத்தாரும் தேவியை வணங்கி நின்றனர். அவன் மீது கொண்ட கோபத்தில் தன் வாளால் தலையை சீவி அக்குடும்பத்தையே நிர்மூலமாக்கினார். இதைக் கண்ட சின்னானின் பங்காளி ஓடிச் சென்று அரசாணிக் காட்டில் கொடிக்குள் புகுந்து ஒளிந்து கொண்டான். பின் அம்மனிடம் வந்து சரண் அடைந்தார். கன்றுக்குட்டியை தாக்கிய அக்குடும்பத்தையே நிர்மூலமாக்கி வெற்றி கண்ட தேவியை ‘பட்டத்து அரசி’ எனப் போற்றித் துதித்தனர்.அவர்களிடம் பட்டத்தரசி, ‘உங்களுக்கு மந்திரம் பூஜை எல்லாம் தெரியாது. ஏழு நட்டு கல் வைத்து படையல் இட்டு காவல் தெய்வமான மதுரை வீரனுக்கு மண் சிலை செய்து படைவெட்டி பட்டத்தரசி அம்மனை மனதில் நிறுத்தி அழைத்தால் நிச்சயம் நான் வருவேன். உங்களைக் காத்தருள்வேன், கவலை வேண்டாம்’ எனக் கூறி மறைந்தார். இன்று வரை பார்வதி தேவியார் கூறியபடியே இம்மக்கள் பின்பற்றி வருகின்றனர்.வாசல் தெற்கு நோக்கி அமைந்திருந்தாலும், கோயில் கிழக்கு முகமாக உள்ளது. கருவறை, மகாமண்டபம் முன் மண்டபம் என்ற அமைப்பில் ஆலயம் அமைந்துள்ளது. முன் பகுதியில் ஊஞ்சல் உள்ளது. மகா மண்டபத்தின் மத்தியில் அம்மனின் வாகனமான சிம்மம் மற்றும் பலிபீடம் உள்ளது. கருவறையில் பீடத்தில் இடது காலை மடக்கி வலது காலை தொங்கவிட்ட நிலையில் அமர்ந்த கோலத்தில் பட்டத்தரசி அம்மன் எழுந்தருளியுள்ளார். மேற்கரங்களில் கத்தியும், சர்ப்பத்துடன் கூடிய உடுக்கையையும், முன் கரங்களில் பாசக் கயிறும், குங்குமச்சிமிழ் ஏந்தியும் முகத்தில் புன்னகையுடன் வீற்றிருக்கும் தெய்வீக அழகை வர்ணிக்க வார்த்தைகளே இல்லை. மூலவர் அருகே உற்சவர் சர்வ அலங்காரத்தில் அருள்பாலிக்கின்றார்.கருவறை மீது ஏகக் கலசம் தாங்கிய மூன்று நிலை விமானம் அமைந்துள்ளது. மகா மண்டபத்தின் வெளியே தென்பகுதியில் வீர மாஸ்தி அம்மன், வடபகுதியில் வெள்ளையம்மாள், பொம்மி சமேத மதுரை வீரன் ஆகியோரது சன்னதிகள் தனி விமானத்துடன் விளங்குகின்றன..அரச மரம், வேம்பு ஆகியவை தலவிருட்சங்களாகவும், கங்கை நீர் தீர்த்தமாகவும் விளங்குகின்றன. தமிழ் முறைப்படி காலை 5, மாலை 6 என இரண்டு கால பூஜைகள் நடந்து வருகின்றன. மணப்பேறு, மகப்பேறு கிட்ட, உடல்நல பாதிப்புகள் விலக, கால்நடைகளுக்கு ஏற்படும் நோய்கள் குணமாக போன்ற வேண்டுதல்களுக்கு நல்ல பலன் கிடைக்கின்றதாம். குழந்தைப்பேறு, கால்நடைகளின் நலன் ஆகியவற்றுக்கு மண்ணால் செய்த உருவ பொம்மையை நேர்த்திக்கடனாக அம்மனுக்குச் செலுத்துகின்றனர். சுருக்கமாகச் சொன்னால், நியாயமான வேண்டுதல்களுக்கு வேண்டிய வரம் அனைத்தையும் வழங்குவதில் அன்னைக்கு நிகர் அன்னை தான்.செவ்வாய், வெள்ளி, அமாவாசை, பௌர்ணமி ஆகிய தினங்களில் சிறப்பு அபிஷேக ஆராதனைகள் நடைபெறுகின்றன.வருடத் திருவிழாக்களில் வைகாசி மாதம், வளர்பிறை செவ்வாய்க்கிழமை இரவு சேவற் கொடியுடன் கூடிய கம்பம் நட்டு, பூச்சாட்டு மற்றும் காப்பு கட்டுதலுடன் விழா துவங்கும். தினசரி விசேஷ அபிஷேக ஆராதனைகள் நடைபெறும். மூன்றாவது செவ்வாய்க்கிழமை அன்று அணிக்கூடை, சீர் வரிசைகளுடன் திருவீதி உலாவாக வந்து அம்மனுக்கு சமர்ப்பணம் செய்வர். அடுத்த வியாழனன்று மஞ்சள் நீராட்டுடன் பட்டத்தரசி அம்மன் சிம்ம வாகனத்தில் எழுந்தருளி திருவீதி உலா வந்து விழா இனிதே நிறைவடையும். கார்த்திகை மாதத்தில் நடைபெறும் ஆண்டு விழா மிகவும் பிரசித்தி பெற்றதாகும்.இத்தனை பெருமைகளுக்கும் உரித்தான கிராம தேவதையான பட்டத்தரசி அம்மன் கோயிலுக்கு நீங்களும் ஒருமுறை குடும்பத்துடன் சென்று அம்மனின் அருள் பெற்று வரலாமே!.எங்கே இருக்கு?கோவையிலிருந்து தடாகம் செல்லும் சாலையில் 7 கிலோ மீட்டர் தொலைவில் இடையர்பாளையம் பஸ் நிறுத்தம் உள்ளது. அங்கிருந்து சுமார் 200 மீட்டர் தூரத்தில் இந்திரா நகரில் கோயில் அமைந்துள்ளது. கோவை ரயில் நிலையத்திலிருந்து தடம் எண் 11 மூலம் கோயிலை அடையலாம்.தரிசன நேரம் காலை 5 - 9; மாலை 4 – இரவு 9.-வி. பி. ஆலாலசுந்தரம்

இடையர்பாளையம்: பட்டத்தரசி அம்மன்!

Related Stories