அம்மன் வழிபாடு: அம்மிக்குழவி வடிவில் அம்மன்!

ஆடி மாதம் என்றாலே அம்மன் தரிசனம்தான். மாரியம்மா, காளியம்மா, அங்காளம்மா, பொன்னியம்மா, கங்கையம்மா, முண்டகக்கண்ணியம்மா, பூங்காவனத்தம்மா, நாகாத்தம்மா என எத்தனை எத்தனையோ பெயர்களில் கோவில் கொண்டிருக்கும் அம்மனுக்கு இந்த மாதத்தில் பொங்கல் படைக்கப்பட்டு, கூழ் ஊற்றப்பட்டு சிறப்பு வழிபாடுகள் நடைபெறும்.இவை தவிர, ஆடி மற்றும் தை வெள்ளிக்கிழமைகளில் ஒரு சில குடும்பங்களில் செய்யப்படும் வழிபாட்டுமுறைகளும் உண்டு. அவற்றில் ஒன்றுதான் பச்சை படைத்தல் என்பது. ஆரம்ப நாட்களில் பச்சை புடைத்தல், அதாவது பயிர் பச்சைகளைப் பெருக்கவேண்டி மாரியம்மனை வணங்கிய வழிபாடு பின்னாளில் பச்சை படைத்தல் என்று மருவியது. இதன் முக்கியத்துவம், வழிபடும் முறை, பலன்கள் இவற்றைப் பற்றியெல்லாம் தெரிந்துகொள்ளலாம்.உலக உயிர்களையெல்லாம் உவப்புடன் காப்பவள் மாரியம்மன். “அம்மா….நீதான் காக்கணும்…” என்று தன்னைச் சரணடைந்தவர்களை ஒரு போதும் அவள் கைவிடமாட்டாள். உயிர்கள் தாங்க முடியாமல் தவிக்கும் வகையில் கொளுத்தும் வெப்பத்தைத் தணித்து, மழை பொழியவும், அந்தச் சமயத்தில் பரவக்கூடிய வெப்பநோய்கள் தாக்காமல் நம்மைக் காக்கவும், சுற்றுப்புறத்தில் இருக்கும் பயிர் பச்சைகள் வாடாமல் இருக்கவும் மனமுருகி அவளை துதிப்பதே இதன் முக்கிய நோக்கமாகும். இதில் அம்மிக்குழவி வடிவத்தில் அம்மனும், அவளுக்குப் பின்னே சப்தகன்னியரும் கொலுவிருக்கிறார்கள். இந்த வழிபாட்டு முறையினைக் காண்போம்.வீட்டில் எங்கு அம்மனை வழிபடப்போகிறார்களோ அந்த இடம் சுத்தம் செய்யப்பட்டு, மெழுகப்பட்டு, அழகான கோலத்துடன் பளிச்சிடும். குறிப்பிட்ட இடத்தில் சுவரில் சப்தகன்னியரை மனதில்கொண்டு அவர்கள் வரையப்படுகிறார்கள். வரலட்சுமி விரதம் கடைப்பிடிப்பவர்கள் சுவரில் அம்மனின் உருவம் வரைவதுபோல இதில் சப்தகன்னியர் இடம்பெறுகிறார்கள்.சப்தகன்னியரான பிரம்மனின் சக்தி பெற்ற பிராஹ்மி, சிவபெருமானிடமிருந்து சக்தி பெற்ற மஹேஸ்வரி, குமரனின் அம்சமான கௌமாரி, விஷ்ணுவின் வரப்ரசாதமான வைஷ்ணவி, விஷ்ணுவின் அவதாரமான வராகமூர்த்தியின் சக்தி பெற்ற வராஹி, இந்திரனின் அம்சமான இந்திராணி மற்றும் ஈஸ்வரனின் அம்சமான சாமுண்டி ஆகியோர் ஆதிசக்தியின் உடல் பாகங்களிலிருந்து தோன்றி அம்பிகைக்கு உதவியாக அசுரர்களை அழித்தனர். இவர்கள் அம்மிக்குழவி வடிவ அம்மனுக்குப் பின்னே இருந்து அருள்பாலிக்கின்றனர். .இந்த ஐதிகத்தைப் பின்பற்றி, கோலத்துக்கு ஓரத்தில் பூசக்கூடிய காவி என்ற செம்மண்ணால் சுவரில் எட்டுக் கோடுகள் வரையப்படுகின்றன (மணிச்சட்டம் போல). அந்த எட்டுக் கோடுகளுக்கு உள்ளிருக்கும் ஏழு அறைகள் சப்தகன்னிகைகளாகப் பாவிக்கப்பட்டு, அந்தக்கட்டத்தின் மேல் பகுதியான நெற்றிப்பகுதியில் சந்தனம், குங்குமம் வைத்து அலங்கரிக்கப்படுகிறது. இது வழிபாட்டுக்கான தயாரிப்பின் முதல் பகுதி. அடுத்த பகுதியாக, அந்த இடத்தில் தரையில் ஆற்றுமணல் பரப்பப்பட்டு, அதில் தண்ணீர் தெளிக்கப்படுகிறது. இதில் வீட்டிலிருக்கும் அம்மிக்குழவியை அம்மனாக அலங்கரித்து அவளுக்கு நிவேதனங்கள் படைத்து வணங்குகிறார்கள். அம்மிக்குழவியானது நிறைந்த பக்தியுடன் சுத்தமாகக் கழுவப்படுகிறது. பிறகு, ஆற்றுமணல் பரப்பப்பட்ட இடத்தில், அதன் மத்தியில், அம்மிக்குழவி நேராக நிறுத்திவைக்கப்படுகிறது. பின்பு, குழவி முழுவதும் நல்ல பசு மஞ்சள் பூசி, கண்கள், மூக்கு, வாய் என அங்க அவயங்கள் மஞ்சளும் குங்குமமும் பயன்படுத்தி வரையப்பட்டு அம்மன் அருள்மழை பொழியத் தயாராகிறாள்.அம்மிக்குழவிக்கும் சுவருக்கும் இடையே உள்ள இடத்தில், குழவியின் பின்புறமாக வேப்பிலைக்கொத்து செருகப்படுகிறது. இப்போது வேப்பமரத்தினடியில் சப்தகன்னியர் சூழ மாரியம்மன் காட்சி அளிக்கிறாள்.மாரி என்றால் மழை. மழைக்கடவுளான மாரியம்மனை வழிபட்டு, வெப்ப நோய்களிலிருந்து காத்து அருளும்படி இறைஞ்சிக்கேட்டுத் துதிக்கப்படுகிறது. இவளுக்கு நிவேதனமாக, குளுமை தரக்கூடிய பொருட்களான இளநீர், நீர்மோர், பானகம், எலுமிச்சம்பழம் ஆகியவற்றுடன் துள்ளுமாவு என்று சொல்லப்படும் அரிசிமாவும் வெல்லமும் கலந்த கலவையும்; அம்மை போன்ற நோய்களிலிருந்து காப்பதன் அடையாளமாக ஊற வைத்த அரிசியும் வைக்கப்படுகின்றன. இவை தவிர அவரவர் மனவிருப்பம்போல பாயசம், சர்க்கரைப்பொங்கல், வடை, சுண்டல் முதலானவை படைக்கப்படுகின்றன.மாரியானவள் வெப்ப நோய்களிலிருந்து நம்மைக் காப்பவள், பயிர் பச்சைகள் வாடாமல் பார்த்துக்கொள்பவள். நம்முடைய வெவ்வினைகளைத் தீர்த்து அருள்புரிபவள். அனைவருக்கும் அன்பானவள். வேண்டும் வரங்களை அள்ளித் தருபவள். அவளைத் துதிப்போம். அவள் அருள் பெறுவோம்!-மாலா ரமேஷ்