காவல் தெய்வம்: சுபிட்சம் தருவார் சுடலை மாடசாமி!

- முத்து. இரத்தினம்தமிழ்நாட்டில் கிராமப் பகுதிகளில் தனி ஆட்சி நடத்திவரும் காவல் தெய்வங்கள் துடிப்பு மிக்கவை. வீராவேசம் கொண்டவை. அதில் சிவபெருமானின் வாரிசாகக் கருதப்படும் சுடலை மாடன் பிரசித்தி பெற்றவர். இவரை அனைவரும் விரும்பி வணங்குவர். வணங்க மறுத்தவர்களை தன் சன்னதி தேடி வரும்படி செய்துவிடுவாராம். தென் தமிழகத்தில் வாழும் மக்கள் பெரும்பாலோர் சுடலை மாடசாமியைக் குலதெய்வமாகவும், இஷ்ட தெய்வமாகவும் கொண்டு வழிபடுகிறார்கள். பக்தர்கள் தாங்கள் இழந்துவிட்ட பொருட்களை மீட்டுக் கொடுக்க சுடலை மாடசாமி கோயிலில் வழிபாடு நடத்துகிறார்கள். அதன் பலனாக அந்தப் பொருட்களை மீண்டும் கிடைக்கப்பெறுகிறார்கள். தீயசக்திகளால் பாதிக்கப்பட்டவர்களை சுடலைமாடசாமி கோயிலுக்கு அழைத்து வந்து சிறப்பு வழிபாடு நடத்தினால், விரைவில் அவர்கள் நல்லநிலையை அடைவர். சுடலை மாடசாமி உக்கிரத் தெய்வமாகக் கருதப்பட்டாலும் இவரை வழிபடுவோர் மன அமைதியையும் துணிவையும் பெறுகிறார்கள். இவர் நள்ளிரவில் வேட்டைக்குச் சென்று திரும்புவாராம். அப்போது யாரும் குறுக்கே செல்லக்கூடாதாம். தெரியாமல் சென்றால் எந்தப் பாதிப்பும் இல்லையாம். தெரிந்தே சென்றால் தெய்வக்குற்றத்திற்கு ஆளாகிவிடுவார்களாம். தென் மாவட்டங்களில் இவருக்குக் கோயில்கள் அதிகம். அங்கு விழாக்காலங்களில் நடைபெறும் வில்லுப்பாட்டு நிகழ்ச்சியில் சுடலை மாடன் வரலாறு தவறாது இடம் பெறுகிறது. பொதுமக்கள் இதைக் கேட்டு ரசிப்பர். சுடலை மாடன் கிராமத்துக் கடவுளாக இருப்பதால், ஒரு சில கோயில்களைத் தவிர மற்ற கோயில்கள் அனைத்தும் சாதாரணமாகவே காணப்படுகின்றன,.சூளைக்கரை மாடன், பனையேறி மாடன், கரடி மாடன், புலி மாடன், தொழுவத்து மாடன், தூக்கினி மாடன், துரை மாடன் உள்பட பல பெயர்களில் சுடலை மாடன் வணங்கப்படுகிறார். பார்வதியின் மகனாக அவதரித்த சுடலை மாடன், ஒருசமயம் பிணத்தைச் சுவைத்த குற்றத்திற்காக பூலோகத்தில் போய் வாழும்படி சாபம் பெற்றாராம். பூலோகம் வந்த சுடலைமாடன், கன்னியாகுமரி பகவதி அம்மனின் ஆலயப் பொருட்களை பொறுப்புடன் காவல் காத்து வந்தார். ஒருநாள், மலையாள நாட்டைச் சேர்ந்த ‘காளிப்புலையன்’ என்ற மந்திரவாதி, குமரி பகவதியின் பொருட்களைத் திருடிக்கொண்டு சென்றான். பொருட்களைக் காணாது திகைத்த சுடலை மாடன், விபரம் தெரியவர, காளிப்புலையனை விரட்டிச் சென்று, அவனுடன் கடுமையாகப் போரிட்டு, அவனைக் கொன்று, திருடிய பொருட்கள் அனைத்தையும் மீட்டு வந்தார். பிறகு குற்றாலம் வழியாக சீவலப்பேரி வந்து தங்கினார். அங்கு மண்கலையம் ஒன்றில் தன் ஜீவனை செலுத்தி ஓய்வு எடுத்த நேரத்தில், திருவிழாக் காலங்களில் நடனம் ஆடும் கனியான் என்பவரும் அங்கே வந்து தங்கியிருந்தார். அப்போது, எதிர்பாராதவிதமாக கனியான் காலில், அந்த மண்கலையம் பட்டுவிட, உடனே கனியான் அருள் வந்து சாமியாடி அங்கிருந்த மக்களிடம் அருள்வாக்குக் கூறத் தொடங்கினான். கனியான் மூலம் அனைவருக்கும் சுடலை மாடன் வரலாறு முழுவதுமாகத் தெரியவந்தது. இங்குள்ள சுடலைமாடன் கோயில் மிகவும் பிரசித்தி பெற்றது. இந்தக் கோயில் உருவான கதை சுவாரஸ்யமானது. அக்காலத்தில் ஒருநாள் சன்னாசி கோனார் என்பவர் ஆடு மேய்த்துக்கொண்டிருக்கும்போது அங்கு துறவி ஒருவர் வந்து பால் கேட்க, உடனே அவர், “இந்த ஆடுகள் இன்னும் குட்டி போடவில்லை. எனவே பால் தர இயலாது” எனக் கூற, “அப்படியா? குட்டி போடாத இந்த ஆடுகள் பால் கறக்கும்” என்று கூற, ஆடுகள் பாலைச் சொரிந்தனவாம். இதைக் கண்டு திகைத்த சன்னாசி கோனார் துறவியை நோக்க, அவர் திடீரென மாயமானார். உடனே சன்னாசி கோனாருக்கு மருள் வந்து இறங்க சாமியாடினார். அப்போதுதான், துறவியாக வந்தவர் சுடலை மாடன் என்பது தெரியவந்தது. .சன்னாசி கோனாரின் வாக்குப்படி தாமிரபரணி ஆற்றங்கரையில் கோயில் கட்டப்பட்டது. காவல் தெய்வமான சுடலைமாடன் முறுக்கு மீசையோடும், வீச்சருவாளோடும் காட்சிதருகிறார். இவருக்கு வலப்புறம் பேச்சியம்மனும், பிரம்மசக்தியும் உள்ளனர். இந்தக் கோயிலின் முன் பொய் பேசினாலோ, பொய்சாட்சி சொன்னாலோ கடும் பாதகம் உண்டாகுமாம். ‘உண்மையே’ இந்தக் கோயிலின் தாரக மந்திரமாகும். கோயிலில் வழங்கப்படும் விபூதி, கழுவன்திறடு என்ற இடத்தில் இயற்கையாகவே உற்பத்தியாகிறதாம். அந்த மண்ணை எடுத்துவந்து விபூதி பிரசாதமாக வழங்குகிறார்கள். சீவலப்பேரி கோயிலில் பிடிமண் எடுத்துச்சென்றே தென்மாவட்டங்களில் பல சுடலை மாடசாமி கோயில்கள் கட்டப்பட்டதாகக் கூறப்படுகிறது. சித்திரை மாதம் கொடை விழா மிகச்சிறப்பாக நடைபெறும். மேலும் சுடலை மாடன் கோயில் கொண்டு அருள்பாலிக்கும் ஆலயங்கள் சிலவற்றைக் காண்போம். திருநெல்வேலி நகரில் சந்தி பிள்ளையார் கோயில் அருகில் ‘அடுக்கு சுடலை மாடன்’ கோயில் உள்ளது. இங்குள்ள சுடலை மாடன் சுத்த சைவம். இங்கு கோயில் கட்டி, சுடலை விக்ரகம் செய்ய கல் எடுக்க முனைந்தபோது, ‘பீடமாக அமைந்தால் போதும்’ என அசரீரி சொன்னது. எனவே இருபத்தொரு படிகள் கொண்டு அடுக்கடுக்காக பிரமிடு போன்ற அமைப்புடன் அமைந்த பீடமே இங்கு மூல விக்ரகமாக வழிபடப்படுகிறது. இங்கு பலி பூஜை கிடையாது. பங்குனி மாதம் கடைசி வெள்ளிக்கிழமை பெரிய விழா நடைபெறும். முக்கியமாக நள்ளிரவு பூஜை பிரமாண்டமாக நடைபெறும். அடுக்குச் சுடலை தன்னை அடிபணிவோருக்கு அளவில்லா நற்பலன்களை வாரிவழங்கி வருகிறார். திருநெல்வேலி அருகில் ‘திருப்பணி கரிசல் குளம்’ என்ற ஊரில் வாழ்ந்த வடிவழகிய நம்பி என்பவர் குளக்கரையில் சுடலை மாடனுக்கு ஒரு அழகிய ஆலயம் கட்டினார். சுடலை இங்கு வடக்கு நோக்கி உள்ளார். இத்தெய்வம் பிள்ளை வரம் தருபவராகப் போற்றப்படுகிறார். பிள்ளை இல்லாதவர்கள் இங்கு வந்து வழிபட்டு பலன் பெறுகிறார்கள். நாங்குநேரி அருகே வடக்கு விஜயநாராயணம் பகுதியில் உள்ள ‘ஒற்றைப்பனை சுடலை மாடன் கோயில்’ கொடை விழா பெரிய அளவில் நடக்கும். பூசாரி மந்திரம் கூறி ஆடு பலி கொடுக்க, ஆங்காங்கே மக்கள் வேண்டிக்கொண்டபடி தங்கள் ஆடுகளைப் பலியிடுகிறார்கள். இந்த பூஜை எட்டு நாட்கள் நடக்கும். இந்த எட்டு நாளும் பூஜை நடந்த பகுதியில் சுடலை ஆடுவார். விளையாடுவார். அப்போது யாரும் அவர் கண்ணில்படக்கூடாது என்பது ஐதிகம். நமக்கு எட்டு நாள் என்பது சுடலைக்கு எட்டு நாழிகை என்று கூறுகிறார்கள். ஒற்றைப்பனை சுடலையை வணங்கினால் நோய் நொடிகளில் இருந்து நம்மைக் காப்பார் என்பது நம்பிக்கை. கரிசூழ்ந்தமங்கலம் எனும் கிராமத்தில் நடைபெறும் சுடலைமாடன் விழாவில் ஒருவரது ஒரு காலை மடித்துக்கட்டிவிட, அவர் சுற்றியுள்ள ஒன்பது ஊர்களுக்கு நொண்டியடித்தபடி செல்வார். ஒன்பது ஊரிலும் ஒவ்வொரு வீட்டு வாசல் முன்பு பலவகை பலகாரம் செய்து வைத்துவிட்டு, வீட்டில் உள்ளவர்கள் கதவை மூடிக்கொண்டு உள்ளேயே இருப்பார்கள். விருப்பப்படி அவர் பலகாரத்தைச் சாப்பிட்டுவிட்டு முடிவில் சுடுகாட்டை அடைய, அங்கு அவரது கால்கட்டு அவிழ்க்கப்படும். பிறகு பரண் பூஜை நடக்கும். இதில் அனைத்து சாதியினரும் வழிபட்டு படையல் வைப்பார்கள்.. முக்கூடல் சுடலை மாடன் கோயில், அய்யாபுரம் வேம்படி மாடன் கோயில், வேதம்புதூர் மந்தையடி சுடலை மாடன் கோயில் போன்ற பல கோயில்களில் நடைபெறும் கொடை விழாவில் சாமியாடிகள் நள்ளிரவில் சுடுகாடு சென்று புதைகுழியைத் தோண்டி எலும்புகளை எடுத்துக்கொண்டு வந்து வழிபடுகிறார்கள். பொதுவாக, சுடலை மாடனுக்கு ஊருக்கு ஊர் படையல் வைப்பது வித்தியாசப்படும். தொழு மாடனுக்கு உழா மீன் கலந்த உணவு படையல். தூக்கினி மாடனுக்கு கருவாடு படையல். துரை மாடனுக்கு சுருட்டு, பிஸ்கட், பிராந்தி, மாமிசப்படையல், மாமிசம் கலந்த உணவு, முட்டை, தேங்காய் ஆகியவற்றை வேகவைத்து சோற்றுடன் கலந்து படைக்கும் ‘சாவாப் பலி படையல்’ ஆகியவை பிரசித்தம்..சுடலை மாடன் கோயில்களில் கோடை காலத்தில் நடக்கும் ‘கொடை விழா’ மிகச் சிறப்பானது. வெள்ளிக்கிழமை இரவு ஆசார பூஜையிட்டு ஆசாரப் படைப்புப் படைப்பார்கள். பால், பொங்கல், தேங்காய், பூரம் ஆகியவையே ஆசாரப் படைப்பாகும். நடு இரவில் நடக்கும் பூஜை பரண் பூஜை எனப்படும். உயிர் பலியிட்டுப் படையல் வைப்பர். பூஜை முடிந்து பிரசாதமாக இந்தப் படையலை சாப்பிடுவர். தன்னை வணங்குபவர்களின் வாழ்வில் சுபிட்சங்களை அளித்தல், தீயவைகளை அழித்தல், உண்மையைக் காத்தல், ஆடு, மாடுகளைப் பாதுகாத்தல் சுடலை மாடசாமியின் பொறுப்பு என கிராம மக்கள் உறுதியாக நம்புகிறார்கள்.

காவல் தெய்வம்: சுபிட்சம் தருவார் சுடலை மாடசாமி!

Related Stories