கண் திருஷ்டி பரிகாரங்கள்!

`இந்த உலகில் பிரச்னை இல்லாத மனிதர்களே இல்லை. ஒவ்வொரு பிரச்னைக்கும் காரணங்கள் பலவும் சொல்லப்பட்டாலும், அவற்றுள் முக்கியமானதாகக் கருதப்படுவனவற்றுள் ஒன்று, கண் திருஷ்டி. அதனால்தான் நம் முன்னோர்கள், கல்லடி பட்டாலும் கண்ணடி படக்கூடாது என்று சொல்லிவைத்தார்கள். கண்ணடி, கண்ணேறு என்றெல்லாம் சொல்லப்படும் திருஷ்டி தோஷத்தின் பாதிப்பினை அறிந்தே ஆரத்தி எடுத்தல் முதல், கண்ணேறு கழித்தல் வரை எத்தனையோ வழிமுறைகளைச் சொல்லிவைத்தார்கள். இன்றைய தலைமுறையினர் பலரும் மறந்துபோன அந்தப் பாரம்பரியமான எளிய திருஷ்டி பரிகார முறைகள் இதோ இந்த இணைப்பில் தரப்பட்டுள்ளன. நீங்களும் உங்கள் குடும்பத்தினரும் கண்ணேறுகள் கழிந்து நிம்மதியாய் வாழ, உரிய பரிகாரங்களைச் செய்யுங்கள். அதோடு, உங்கள் குல தெய்வம், இஷ்ட தெய்வத்தையும் வணங்குங்கள். தெய்வங்களின் அருளால், பிரச்னைகள் தீர்ந்து, வாழ்வு பிரகாசிக்கும்..* கோயிலைத் தவிர வேறு எங்கே போய்விட்டு வீடு திரும்பினாலும், வாசலிலேயே காலைக் கழுவிவிட்டு உள்ளே செல்லுங்கள். இது சுத்தத்திற்கு மட்டுமல்ல, தெரியாத்தனமாக நீங்கள் மிதித்துவிட்டு வரும் திருஷ்டி தோஷங்கள் உங்கள் வீட்டில் பீடித்து விடாமல் இருக்கவும்தான். * இரவில் தூக்கமில்லாமல் தீய கனவுகளால் அடிக்கடி பாதிக்கப்படுகிறீர்களா? தினமும் மாலையில் சுவாமி முன் விளக்கேற்றி சாம்பிராணி போடுங்கள். தூங்கப் போவதற்கு முன் தலையணைக்குக் கீழ் அடுப்புக் கரித்துண்டு ஒன்றினை வைத்துக்கொள்ளுங்கள். அல்லது தலைமாட்டிலும் வைத்துக் கொள்ளலாம். நிச்சயம் நிம்மதியான தூக்கம் வரும். * பிறந்த குழந்தை ஏதோ ஒரு காரணத்தால் அடிக்கடி அழுவது இயற்கைதான். அதுவே உடலை முறுக்கியபடி ஓயாமல் அழுதால், நிச்சயம் திருஷ்டி பாதிப்புதான். ஒரு வெற்றிலையில் சிறிது கற்பூரத்தை வைத்து ஏற்றி குழந்தைக்கும் தாய்க்கும் அதனால் திருஷ்டி சுற்றிவிட்டு, பின் நடுவாசலில் வைத்துவிட்டு திரும்பிப் பார்க்காமல் வந்துவிடுங்கள். குழந்தை சிரிக்கும்! * ஆறு மாதத்திற்கு உட்பட்ட குழந்தைக்குத் தாயா நீங்கள்? அப்படியானால் குழந்தையின் உடைகள் மற்றும் மாற்று ஆடைகளை வீட்டுக்கு உள்ளேயே உலரவையுங்கள். அல்லது காலை 8 மணிக்கு மேல் துவைத்து மாலை 4 மணிக்குள் வெளியே காய வைத்து எடுத்து விடுங்கள். அதிகாலையிலும், அந்திவேளையிலும் பாப்பாவுக்கு பட்சிதோஷம் படாமல் இருக்க இது மிக முக்கியம்! * திடீரென்று சாப்பாட்டின் மீது வெறுப்பும், பார்த்தாலே குமட்டலும் ஏற்படுகிறதா? நீங்கள் பெரியவரா சிறியவரா யாரானாலும் சரி. நீங்கள் சாப்பிடும் தட்டில் கொஞ்சம் உணவை எடுத்து அதில் சிறிது மஞ்சளும் குங்குமமும் சேர்த்துப் பிசைந்து நான்கு உருண்டைகளாக உருட்டிக் கொள்ளுங்கள். பின்னர் நடுவாசலில் நின்று அந்த உருண்டைகளை ஒவ்வொன்றாக எடுத்து தலையைச் சுற்றிவிட்டு திசைக்கு ஒன்றாக எறிந்துவிட்டு காலைக் கழுவியபின் உள்ளே செல்லுங்கள். சாப்பாடு ருசிக்கும்..* வீட்டில் எப்போதும் ஏதாவது பிரச்னை, சண்டை, சச்சரவு என்று மனநிம்மதி கெட்டால் அது பொறாமையால் ஏற்பட்ட திருஷ்டியாக இருக்கலாம். படிகாரக்கட்டி ஒன்றினை குடும்ப உறுப்பினர்கள் எல்லோர் உடலிலும் தலை முதல் கால் வரை தடவி விட்டு, அந்தப் படிகாரத்தை நெருப்பில் போட்டு விடுங்கள். பூத்ததுபோல் ஆகிவிடும் படிகாரத்தை பிறகு எடுத்து, கால்படாதபடி எறிந்துவிடுங்கள். ஒவ்வொரு சனிக்கிழமையும் இப்படிச் செய்யுங்கள். நிச்சயம் நிம்மதி கிடைக்கும். * வீட்டின் வாசல் கதவுக்குப் பின்புறம், அதாவது வீட்டிலிருந்து நீங்கள் வெளியே சென்றால் உங்கள் பார்வை படும் இடத்தில் கணபதி யந்திரத்தை மாட்டி வையுங்கள். தினமும் அதற்கு ஊதுவத்தி காட்டுங்கள். எதிர்பாராத திருஷ்டி தோஷம் பட்டு நீங்கள் செல்லும் காரியம் தடைப்படாமல் இருக்க இது அவசியம். முடிந்தால் புறப்படும் முன் உங்கள் பார்வையை கணபதி யந்திரத்தின்மீது பதித்துவிட்டுச் செல்லுங்கள். நல்லதே நடக்கும். * குடும்பத்தில் யாரோ ஒருவர் மட்டும் அடிக்கடி உடலநல பாதிப்புக்கு ஆளாகிறாரா? ஊர் கண் மட்டுமல்ல; உறவுகளின் கண் திருஷ்டி கூட பாதித்து இருக்கலாம். பக்கத்திலுள்ள பெருமாள் கோயிலில், நரசிம்மர் சன்னதியில் தரப்படும் தீர்த்தத்தை அவர் முகத்தில் தெளிக்கச் செய்யுங்கள். தெளித்ததும் முகத்தைத் துடைக்காமல் அப்படியே உலரவிடுங்கள். தோஷம் விலகி சந்தோஷம் கூடும். * கடல்நீரை ஒரு பெரிய பாட்டில் அல்லது கேனில் எடுத்து வாருங்கள். அதை தூய்மையான வெள்ளைத் துணியால் வடிகட்டுங்கள். வடிகட்டிய கடல்நீரை கொஞ்சம் எடுத்து, அதில் சிறிது பசுவின் கோமியம் கலந்து செவ்வாய், வெள்ளி, அமாவாசை, பௌர்ணமி தினங்களில் வீட்டின் வெளியேயும் உள்ளேயும் தெளியுங்கள். உங்கள் வீட்டில் திருஷ்டி பாதிப்பால் ஒற்றுமைக் குறைவு ஏற்பட்டிருந்தால், அந்த தோஷம் நிச்சயம் விலகும்.* ஊரார் கண் அல்லது உறவினர் கண்பட்டு உங்கள் வீட்டில் யாருக்காவது உடல்நல பாதிப்பு அடிக்கடி வந்துகொண்டே இருக்கிறதா? முச்சந்தி மண், உப்பு, காய்ந்த மிளகாய் எல்லாவற்றையும் குடும்ப உறுப்பினர்கள் எல்லோருக்கும் திருஷ்டியாக சுற்றுங்கள். பிறகு, கரி, சுண்ணாம்பு புள்ளிகள் குத்திய வறட்டியில் அவற்றை வைத்து எரியவிடுங்கள். ஆரோக்யம் சீராகும்..* நீங்கள் வளர்க்கும் ஆடு அல்லது மாடு சோர்ந்துபோய் படுத்துவிடுவது அடிக்கடி நடக்கிறதா? மாடு அல்லது ஆட்டினை மஞ்சள் நீர் தெளித்து குளிப்பாட்டுங்கள். கொட்டாங்கச்சி ஒன்றில் நடுவே துளையிட்டு கறுப்பு நிற கம்பளிக் கயிற்றில் கோத்துவிட்டு, கொட்டாங்கச்சியில் கறுப்பு, வெள்ளைப்புள்ளிகள் குத்தி கால்நடையின் கழுத்தில் கட்டி விடுங்கள். திருஷ்டி விலகி திடமாகும் கால்நடை. * கண்ணாடி டம்ளர் அல்லது ஜாடியில் சுத்தமான நீர் பரப்பி அதில் எலுமிச்சம்பழம் ஒன்றைப் போடுங்கள். அதனை அப்படியே உங்கள் கடை அல்லது வர்த்தகத் தலத்தில் எல்லோர் பார்வையும் படும் இடத்தில் வையுங்கள். தினமும் எலுமிச்சம்பழம், நீரை மாற்றுங்கள். எலுமிச்சம்பழங்களை வாரம் ஒருமுறை சனிக்கிழமையில் மொத்தமாக சேர்த்து கால்படாத இடத்தில் எறிந்து விடுங்கள். உங்கள் தொழிலில் லாபம் கனியும். * வீடு என்றிருந்தால் உறவும் நட்பும் வந்து போகத்தான் செய்வார்கள். அவர்கள் பார்வையால் உங்கள் வீட்டிலுள்ள விலை உயர்ந்த பொருட்கள் பாதிக்கப்படுகின்றதா? வண்ண வண்ணக் கற்கள் அல்லது கோலிகளை கண்ணாடிக் கிண்ணத்தில் நிரப்பி, எல்லோரது பார்வையும் பதியும் இடத்தில் வையுங்கள். திருஷ்டி தோஷம் உருண்டு ஓடிவிடும். * குட்டிப் பாப்பாவுக்கு குளித்துவிடுகிறீர்களா? கடைசி செம்புத் தண்ணீரை ஊற்றும்போது, அதில் கொஞ்சம் மிச்சம் வையுங்கள். அந்த நீரை குழந்தையின் தலைக்கு மேல் வல இடம், இட வலமாகச் சுற்றிவிட்டு சிறிதளவு நீரை குழந்தைக்குப் புகட்டுங்கள். மீதியை அதன் காலருகே ஊற்றுங்கள். அதைத்தொட்டு லேசாக குழந்தையின் தலையில் தெளியுங்கள். வந்தவர்கள் போனவர்கள் பார்வையால் பட்ட தோஷம் இதனால் விலகிவிடும். * சின்னக் குழந்தைகள் பரபரப்பாக சுறுசுறுப்பாக இருந்தால்தான் நல்லது. அடிக்கடி சோர்ந்து படுத்தால் ஏதாவது திருஷ்டி பாதித்திருக்கலாம். கைப்பிடியளவு கல் உப்பை எடுத்து குழந்தைக்கு வலம் இடம், இடம் வலமாக திருஷ்டி சுற்றுங்கள். குழந்தைக்குப் பின்புறமாகப் போய், உப்பைத் தண்ணீரில் கரைத்துக் கொட்டிவிடுங்கள். குழந்தை துள்ளி விளையாட ஆரம்பித்து விடும். * நன்றாகப் படித்துக் கொண்டிருந்த உங்கள் வாரிசுகள் திடீர் என மந்தமாகி விட்டார்களா? உங்களுக்கோ உங்கள் வாழ்க்கைத் துணைவருக்கோ அடிக்கடி மனக்குழப்பம் ஏற்படுகிறதா? இதுவும் ஒருவகை கண்ணேறு பாதிப்புதான். நாயுருவி வேர் அல்லது செடியை வீட்டு வாசலின் வலது ஓரத்தில் கட்டி விடுங்கள். பிறகு பசுமாட்டுக்கு அகத்திக்கீரை வாங்கிக் கொடுங்கள். உங்கள் மகன், மகனின் கல்வி ஆற்றல் பெருகும். உங்கள் மனம் வலிமை பெறும். * உங்கள் குழந்தைக்கு கண்ணேறு பட்டுவிடுமோ என்று பயப்படுகிறீர்களா? குழந்தையின் கழுத்திலே அல்லது இடுப்பில் கறுப்பு நூலில் கோத்த தாயத்தினைக் கட்டுங்கள். அந்தத் தாயத்திற்குள் உங்கள் குலதெய்வத்திற்கு உரிய திருநீறு அல்லது குழந்தையின் தொப்புள்கொடி இவற்றுள் எதையாவது (உங்கள் வழக்கப்படி) இட்டு மூடிவையுங்கள். தாயத்து பாதுகாப்பு வளையமாக இருக்கும். * வயிற்றுவலியால் உங்கள் வாரிசு அடிக்கடி துடிக்கிறதா? பசித்து அழுதாலும் பால்குடிக்கவோ சாப்பிடவோ முடியாமல் தவிக்கிறதா? நிச்சயம் கண்ணேறு பட்டிருக்கும். நடுத்தெரு அல்லது முச்சந்தி மண்ணும் கடுகும் கலந்து உங்கள் இடக்கையில் வைத்து மூடிக்கொள்ளுங்கள். அப்படியே குழந்தையின் வயிற்றில் அந்தக் கையால் தடவுங்கள். ஒன்பது முறை தடவியபின் மண், கடுகை தீயில் போடுங்கள். கடுகு வெடிப்பதுபோல், தோஷமும் சிதறிப் போய்விடும். .* உங்கள் இல்லத்தில் யாருக்காவது திருஷ்டிக் கட்டி வந்து அவதிப்படுகிறார்களா? அந்தக் கட்டி மீது மூன்று கண்கள் போன்ற முளைகள் இருப்பதுதான் அதன் அடையாளம். கவலைப்படாதீர்கள். கட்டியைச் சுற்றி கறுப்பு, வெள்ளை (மை கலந்து) பொருட்களை வையுங்கள். கொஞ்சம் மஞ்சள் நடுவே தடவுங்கள். சிறிது படிகாரத்தை கட்டி மீது தடவிவிட்டு அதனை நெருப்பில் வீசுங்கள். கட்டி உடையும். திருஷ்டியும் அப்படியே உடைந்து விலகும். * விவசாயத்தில் தொடர்ந்து நஷ்டம், விளைச்சல் பாதிப்பு ஏற்படுகிறதா? கருங்காலி மரத்தின் பட்டையை சிறிதளவு எடுத்து அரைத்து நீரில் கலந்து வயலில் தெளியுங்கள். திருஷ்டி தோஷப் பாதிப்பு விலகி, பயிர் வளம் செழிக்கும்; பசுமை கொழிக்கும். * பொதுவாக எல்லோர் வீட்டிலுமே ஏதாவது ஒருவகையில் திருஷ்டி பட்டுக்கொண்டுதான் இருக்கும். அதை விலக்க எளிய வழி, மீன் வளர்ப்பது. எல்லோர் பார்வையும் படும் இடத்தில் மீன் தொட்டியை வைத்து, மீன்களை நீந்த விடுங்கள். அவை வலம்வர வலம்வர திருஷ்டி தோஷம் நீங்கி வீடு வளம் பெறும். * மேல்மலையனூர் அங்காளபரமேஸ்வரி கோயிலுக்குப் போகிறீர்களா? அங்கிருந்து கொஞ்சம் புற்று மண் வாங்கி வந்து உங்கள் வீட்டு வாசலில் ஒரு துணியில் முடிந்து கட்டி வையுங்கள். தீய சக்திகளால் ஏற்படும் திருஷ்டி தோஷங்கள் எதுவும் உங்கள் வீட்டை அணுகாது. * வீட்டில் அடிக்கடி துக்கச் செய்திகளைக் கேட்கவோ அல்லது சந்திக்கவோ நேரிடுகிறதா? அதற்குக் காரணம் திருஷ்டிதான். வீடு பெருக்கித் தேய்ந்து போன துடைப்பம் ஒன்றை எடுத்து அதனால் குடும்பத்தில் எல்லோருக்கும் திருஷ்டி சுற்றி விட்டு, அந்தத் துடைப்பத்தை வீட்டின் பின்புறம் வைத்து எரித்து விடுங்கள். படிப்படியாக நற்செய்திகள் வர ஆரம்பிக்கும். * சுபகாரியச் செயல்கள் எவ்வளவு முயற்சித்தும் தடைபட்டுப் போகிறதென்று வருத்தப்படுபவர்கள், கருங்காலி மரத்தின் சிறு கட்டையை அல்லது கருங்காலி சமித்தை வாசற்படிக்கு மேல் வீட்டின் வெளிப்பக்கம் கட்டித் தொங்க விடுங்கள். நிச்சயம் திருஷ்டிகள் விலகி, சந்தோஷச் செய்திகள் கதவைத் தட்ட ஆரம்பிக்கும். * சின்னக் குழந்தைகள் விளையாடப்போகும் இடத்தில் விழுந்து பயந்துபோய் வருவதும் ஒருவகை திருஷ்டிதான். இரும்புக் கரண்டி ஒன்றை பழுக்கக் காய்ச்சுங்கள். ஒரு டம்ளரில் கொஞ்சம் நீர்மோர் எடுத்து குழந்தைக்கு அருகில் வையுங்கள். சூடான கரண்டியால் குழந்தைக்கு திருஷ்டி சுற்றிவிட்டு, அதனை நீர்மோரில் முக்குங்கள். ‘சொர்’ என சத்தம் வந்ததா? அந்த மோரை குழந்தைக்குக் கொடுங்கள். குழந்தை குதூகலமாகச் சிரிக்கும்..* பிரசவித்த பெண்ணை வெகு எளிதாக திருஷ்டி தோஷங்கள் பிடித்துவிடக்கூடும். அதை விலக்க எளிய வழி, பிரசவித்த நாள் முதல் 48 நாட்களுக்கு வெளியே போகும்போது இடுப்பில் அல்லது தலையில் வேப்பிலையைக் கொஞ்சம் செருகிக் கொள்வதுதான். வீட்டுக்கு வந்ததும் மறக்காமல் அதை எடுத்து எறிந்துவிட வேண்டும். கசப்பான தோஷம் தாக்காமல் இனிப்பாக இருக்கும் வாழ்க்கை. * குழந்தைக்குப் பால் கொடுக்கும்போது பிறர் கண்பட்டால், தாய்க்குப் பால் கட்டிக் கொண்டு வலி ஏற்படும். அந்த தோஷம் விலக, எலுமிச்சம் பழங்களை எடுத்து ஒவ்வொன்றாக திருஷ்டி சுற்றி மொத்தமாக வெளியே எடுத்துப் போய் திசைக்கு ஒன்றாக நசுக்கி வீசுங்கள். ஒரு பழத்தின் மேல் கற்பூரம் வைத்துக் கொளுத்தி வீட்டின் நடு வாசலில் வைத்து நசுக்கிவிட்டு, காலைக் கழுவிவிட்டு உள்ளே வாருங்கள். தாயும் சேயும் நலமாக இருப்பார்கள்..* படிகாரம், ஊமத்தை, பச்சைமிளகாய், சங்கு, எருக்குவேர், கற்றாழைச்செடி இவற்றுக்கெல்லாம் திருஷ்டி தோஷங்களை ஈர்க்கும் சக்தி உண்டு. இவற்றுள் எதையாவது கருப்புக்கம்பளிக் கயிற்றால் கட்டி வீட்டு வாசலில் தொங்க விடுங்கள். பெரும்பாலான திருஷ்டிகள் உள்ளே வராமல், வாசலோடு ஓடிவிடும். * பாட்டுப் பாடுவது, மேடைப் பிரசங்கம், செய்வது, பேசுவது இதெல்லாம் புரிபவரா நீங்கள்? திடீரென்று தொண்டை கட்டிப் போகிறதா? பேச முடியாதபடி தடங்கல்கள் தொடர்ந்து வருகின்றனவா? இது கண்ணேறுதான். உரிய மருத்துவம் செய்து கொள்ளுங்கள். கூடவே திருஷ்டி விலக, அரசமரத்தின் குச்சி (சமித்து) ஒன்றினை வீட்டு வாசலில் கட்டி வையுங்கள். இன்னொரு அரசங்குச்சியை சிறிய துண்டாக எடுத்து உங்கள் சட்டைப் பையிலோ கைப்பையிலோ வைத்துக்கொண்டு புறப்படுங்கள். ஜெயம் நிச்சயம். * தண்ணீர் கூட திருஷ்டி தோஷத்தைப் போக்குவதுதான். எங்காவது புறப்படும்போது யாராவது கூப்பிட்டு விட்டால், உடனே வீட்டுக்குள் வந்து சிறிது தண்ணீர் குடித்துவிட்டுப் புறப்படுவது உண்டுதானே. உங்கள் மகன் அல்லது மகள் திருஷ்டி தோஷத்தால் பாதிக்கப்படாமல் இருக்க, வாரம் ஒரு முறை உங்க கைகளை கொஞ்சம் உப்பு கலந்த தண்ணீர்ல நனைத்துவிட்டு அந்தக் கைகளால் மகன், மகள் உச்சி முதல் பாதம் வரை தடவுங்கள். பிறகு கைகளைக் கழுவிவிட்டு மீதி நீரை குழந்தைகளின் தலையைச் சுற்றி விட்டு வீட்டு வாசலின் இடது ஓரம் கொட்டிவிடுங்கள். வாரிசுகள், திருஷ்டியால் வாடாமல் இருப்பார்கள். * ’சுண்ணாம்பும் மஞ்சளுமா சுத்தி எறி கண்ணார்க்கு’ என்ற தாலாட்டுப் பாடலைக் கேட்டிருக்கிறீர்களா? பிறப்பு முதல் திருமணம் உள்ளிட்ட சகல சுபகாரியங்களிலும் முக்கியமானது சுண்ணாம்பும், மஞ்சளும் சேர்த்து தண்ணீரில் கரைத்து எடுக்கப்படும் ஆரத்தி. இது சகல தோஷங்களையும் போக்கும்; அலட்சியம் செய்யாதீர்கள்... அவசியம் ஆரத்தி சுற்றுங்கள். * ஒன்பது பச்சைமிளகாய், எலுமிச்சம்பழம் ஒன்று, சிறிய துண்டு படிகாரம் இவற்றை கருப்புக்கம்பளி நூலில் கோத்து வீட்டு வாசல், வியாபாரத் தலம், வாகனம் என்று எங்கு வேண்டுமானாலும் கட்டி விடுங்கள். பிறர் கிண்டல் செய்யலாம். ஆனால் இதில் எல்லாம் அணு அதிர்வுகள் அதிகம் இருப்பதும்; தீய அதிர்வுகளை இவை தடுப்பதும் விஞ்ஞானபூர்வ உண்மை. அதனால் நிச்சயம் திருஷ்டி பாதிப்புகள் அண்டாது. நீங்களே இவற்றைக் கோத்துக் கட்டுவது சிறப்பு. கட்டியபின் கைகளையும், முகத்தையும் கழுவிக்கொள்வது அவசியம். * ஒரு முறத்தில் கொஞ்சம் உப்பு, கொஞ்சம் காய்ந்த மிளகாய், சிறிது கடுகு, ஒரு கட்டி கற்பூரம் எல்லாவற்றையும் எடுத்துக் கொள்ளுங்கள். எதற்குத் தெரியுமா? ஒரு வயது முதல் பன்னிரண்டு வயது வரையுள்ள குழந்தைகள் ஏதாவது திருஷ்டியில் பாதிக்கப்பட்டு அடிக்கடி சோர்ந்து போனால், இந்தப் பொருட்களால் அவர்களுக்கு திருஷ்டி சுற்றிவிட்டு அதையெல்லாம் நெருப்பில் போட்டுவிடுங்கள். கடுகு, உப்பும் மிளகாயும் வெடிப்பது போலவே திருஷ்டியும் வெடித்து விலகி விடும். * உங்கள் வீட்டுக்கு வரும் உறவோ, நட்போ எப்படிப்பட்ட மனநிலையுடன் வருவார்கள் என்பது எப்படித் தெரியும். அவர்களின் எண்ணம் உங்களை பாதிக்காமல் இருக்க, வீட்டுக்குள் நுழைபவரின் முகம் தெரியும்படி அதாவது வாயில்படிக்கு நேர் எதிரில் ஒரு கண்ணாடியை மாட்டி வையுங்கள். அதோடு, வருபவரை வாசலிலேயே கால் அலம்பி வரச் சொல்லுங்கள். திருஷ்டிக்கு ‘நோ என்ட்ரி’ ஆகிவிடும். * பூசணிக்காய்க்கும், தேங்காய், எலுமிச்சைக்கும் திருஷ்டியை ஈர்க்கும் ஆற்றல் அதிகம். இவற்றை திருஷ்டியாக சுற்றுவதும், திருஷ்டிக்காக வைப்பதும் சரிதான். ஆனால் முக்கியமான விஷயம் ஒன்று இதில் இருக்கிறது. திருஷ்டி கழித்தபின் இவை நடுரோட்டில் அல்லது முச்சந்தியில் எறியப்படுவது மிக மிகத் தவறு. பிறர் கால்பட்டு அவர்கள் ‘சே... அய்யோ..!’ இப்படி ஏதாவது சொல்லிவிட்டால், கழிந்த திருஷ்டி உங்களுக்கே வந்துவிடும். அதனால் பிறர் கால்படாதபடி போடுங்கள். உடைத்தபின் எடுத்து ஓரமாகப் போடலாம். பிறகு காலையும், கையையும் கழுவிக்கொண்டு, சிறிது நீரை தலையில் தெளித்துக்கொண்டு விட்டால் போதும்..* அகலமான மண்பாத்திரத்தில் நீர்நிரப்பி சிறிய அடுப்புக்கரித்துண்டு ஒன்றை அதனுள் போடுங்கள். மணம் மிக்க கலர்கலரான பூக்களை அதில் மிதக்க விடுங்கள். உங்கள் அலுவலக வரவேற்பு அறையில் ஒவ்வோர் பார்வையும் படும் இடத்தில் அதை வையுங்கள். பொறாமை திருஷ்டியால் உங்கள் அலுவலகப் பணி பாதிக்கப்படாமல் இருக்கும். முக்கியமான விஷயம் பூக்கள் வாடுவதற்கு முன்பாகவே, தண்ணீரையும் பூக்களையும் மாற்றி விடுங்கள். * ஆசை ஆசையா வாங்கிய பொருளை அனுபவிக்க முடியாதபடி அடிக்கடி பழுதாகி விடுகிறதா? இது பார்வை தோஷ பாதிப்பு. ஏழு காய்ந்த மிளகாயை அந்தப் பொருளின் முன்னால் அல்லது பக்கத்தில் வையுங்கள். கொஞ்சம் தண்ணீரில் சிறிது உப்பை சேர்த்து மிளகாய் மீது தெளித்துவிட்டு அந்த மிளகாயால் குறிப்பிட்ட பொருளுக்கு திருஷ்டி சுற்றுங்கள். பிறகு அந்த மிளகாயோடு, துடைப்பக்குச்சிகள் ஏழும் சேர்த்து தரையில் போடுங்கள். அந்த நொடியில் திருஷ்டி நொடியில் ஓடிப்போகும். * பழைய இரும்புப் பொருள் எதையும் கீழேயிருந்து எடுத்துவரக்கூடாது என்பார்கள். ஆனால் விதிவிலக்காக குதிரை லாடத்தை மட்டும் எடுத்து வரலாம். அப்படி எடுத்து வரும் லாடத்தை வீட்டின் நிலைப்படியின் மேல் கட்டிவிடவோ அல்லது ஆணியால் அடித்துப் பதித்தோ வையுங்கள். குடும்பத்தில் ஏற்படும் குழப்ப சூழலை மாற்றி, அமைதி நிலவச் செய்யும் இந்த அமைப்பு. வெளிநாடுகளில்கூட இந்த நம்பிக்கை பலரிடம் இருக்கிறது. * ஹோமம், யாகம் ஏதாவது பக்கத்திலுள்ள கோயிலில் நடத்துகிறார்களா? அதில் அவசியம் கலந்துகொள்ளுங்கள். அங்கே பூஜையில் வைக்கப்படும் கலசத்து நீரை வாங்கி வந்து வீடு முழுவதும் தெளியுங்கள். முடிந்தால் அதன் மீது வைக்கப்பட்ட மட்டைத் தேங்காயை வாங்கி வந்து மஞ்சள் தோய்த்த துணியில் சுற்றி வீட்டு முகப்பில் கட்டுங்கள். உங்கள் வீட்டில் உள்ள தோஷங்கள் தேய்ந்து மறைந்து போகும். * வீடுகட்டி கிரகப்பிரவேசம் செய்யப்போகிறீர்களா? முதல் நாளே விநாயகர் அல்லது உங்கள் இஷ்ட தெய்வத்தின் படம் ஒன்றை வீட்டின் தலைவாசலுக்கு முன் மாட்டி வையுங்கள். அதாவது நிலைப்படிக்கு மேல் முடிந்தால் படத்தை மாட்டும் கம்பியில் சிறிது கறுப்பு அல்லது சிவப்பு நூலைச் சுற்றுங்கள். தூபதீபம் காட்டுங்கள். மறுநாள் நீங்கள் வரும்போது உங்களைத் தொடர்ந்து பழைய வீட்டிலிருந்து ஏதாவது தோஷம் வந்தால் அது வாசலிலேயே தடுக்கப்பட்டுவிடும்.. * விஷப்பூச்சிகள், பாம்புகள், வெறிநாய்கள் இவற்றைப் பார்த்து பயந்து போவதும் ஒருவகை திருஷ்டி தோஷம்தான். உங்கள் வீட்டில் யாராவது அப்படிப் பயந்திருந்தால், தர்ப்பையை சிறிய கட்டாகக் கட்டி வீட்டு நிலைப்படியின் இடதுபக்கம் கட்டித் தொங்க விடுங்கள். பாதிக்கப்பட்டவர் குணமாகும் வரை, குடிநீரிலும் உப்பிலும் சிறிய துண்டு தர்ப்பையைப் போட்டு வையுங்கள். சீக்கிரமே பயதிருஷ்டி பயந்து ஓடிவிடும். * சனி, ஞாயிறு, அமாவாசை தினங்கள் திருஷ்டி தோஷம் கழித்திட ஏற்ற தினங்கள். பிற நாட்களிலும் மாலை ஆறு மணிக்கோ, உச்சி வேளையான பகல் பன்னிரண்டு மணிக்கோ செய்யலாம். எவரைப் பற்றியும் சந்தேகமாக நினைத்து திருஷ்டி கழிப்பது கூடாது. தோஷம் பாதித்தவர் கிழக்குப் பார்த்து அமர்ந்தும் கழிப்பர். அவருக்கு எதிரில் நிற்பதும் நல்லது. வலம் இடமாக, இடவலமாக, மேலிருந்து கீழாக மட்டுமே திருஷ்டி கழிக்க வேண்டும். கீழிருந்து மேலாக கூடாது. இது தீவினைக்கு எதிரான வினை மட்டுமே. தீய நோக்கோடு செய்தால் கழிப்பவரையே மீண்டும் தாக்கிவிடும். இறை நினைவோடு செய்யுங்கள். நிச்சயம் திருஷ்டி தோஷங்கள் விலகும். சந்தோஷம் மலரும். - யதார்த்த ஜோதிடர் ஷெல்வீ

கண் திருஷ்டி பரிகாரங்கள்!

Related Stories