தொடர் 13. குரா: தரணி போற்றும் தலமரங்கள்!

குறிஞ்சி நிலப் பகுதியில் மலைகளின் மீது வளரும் மரமாக விளங்குவது குரா. இதன் பூக்கள் தெய்வீக அம்சம் பொருந்தியது. சங்க இலக்கியங்களும், தேவாரம், திருப்புகழ், கம்பராமாணம் உள்ளிட்ட பழம்பெரும் பக்தி இலக்கியங்களும் குரா பற்றிக் குறிப்பிட்டுள்ளன.குறுங்காற்குரவு என நற்றிணையும், குறுநிலைக்குரவு என அகநானூறும் கூறுகின்றன.இதன் இலைகள் கரும் பசுமையானவை என செடிநூல் கூறுகின்றது. இப்பூக்கள் தூய வெண்மை நிறம் கொண்டு விளங்குகின்றது. மிகுந்த நறுமணம் கொண்டது. இதன் அரும்புகள் கூர்மையானவையாகும்.குராவை தமிழில் பாவை என்றும், தெலுங்கில் பொம்மை பாப்பா என்றும் அழைக்கிறார்கள். பொம்மை என்பதும் பாப்பா என்பதும் பாவை என்பதும் தற்கால வழக்கில் உள்ள சொற்களே. தமிழில் மறைந்த வழக்கு தெலுங்கில் காணப்படுவது குறிப்பிடத்தக்கது. குரா மரத்தின் பெயரால் "குராப்பள்ளி" என்ற ஊர் உள்ளது..இலக்கியம்:"பல்வீ பட்ட பசுநனைக் குரவம்பொரிப்பூம் புன்கொடுபொழிலணிக் கொளாஅ"- குறுந்தொகை "கொல்லைக் கோவலர் குறும்புனஞ் சேர்ந்தகுறுங்காற் குரவின் குவியிணர் வான்பூஆடுடை இடைமகன் சூடப் பூக்கும்" -நற்றிணை "குறுநிலைக் குரவின் சிறுநனை நறுவீவண்டுதரு நாற்றம் வளிகலந் தீயக்கண்களி பெறூஉம் கவின்பெறு காலை" -நற்றிணை "அரவெயிற்று அன்ன அரும்புமுதிர் குரவின்தேனிமிர் நறுஞ்சினைத் தென்றல் போழக்" - அகநானூறு "குரவங் கொண்ட குறும்பூழ் கொழுங்கான் முகை சுமந்தன" - சீவக சிந்தாமணி "நறும்பூங் குரவம் பயந்தசெய்யாப் பாவை கொய்யும் பொழுதே" - ஐங்குறுநூறு "ஈன்றாய் நீ பாவை யிருங்குரவே" - திணைமாலை நூற்றைம்பது "குராவரும் பனைய கூர்வாளெயிற்று வெங்குருளை நாகம்" -கம்பராமாயணம் "திருக்கு ராவடி நிழல்தனி லுறைவோனேதிருக்கை வேல்வடி வழகிய பெருமாளே... சிறக்கு மாதவ முனிவரர் மகபதியிருக்கு வேதனு மிமையவர் பரவியதிருக்குராவடி நிழல்தனி லுலவிய பெருமாளே ... "-திருவிடைக்கழி திருப்புகழ் மேலும் திருவிடைக்கழி திருப்புகழில் "திருக்குராவடி நிழல்தனி லுறைவோனே" என்றும், "திருக்கு ராவடி நிழல்தனி லுலவிய பெருமாளே", என்றும் குரா மரத்தையும், குமரனையும் அருணகிரிநாதர் புகழ்ந்துரைக்கின்றார்.."குராவரும் பனைய கூர்வாளெயிற்று வெங்குருளை நாகம்" - கம்பராமாயணம் குராவின் அரும்புகள் பாம்பின் பற்களுக்கு உவமையாகச் சுட்டிக்காட்டப்படுகின்றன. பெண்கள் சூடி மகிழவே இம்மலர்கள் பூத்துக் குலுங்குவதாக சங்க இலக்கியங்கள் பலவும் போற்றுகின்றன.சிவபெருமான் கொன்றை மலரோடு குரா மலரையும் சூடியதாகவும், குரா கூவிளம் பொருந்திய சடையுடையான் எனவும், உமையன்னை பார்வதி பல்வேறு இடங்களில் குரா மலரைச் சூடி மகிழ்ந்ததாகவும் தேவாரப் பாடல்களில் கூறப்பட்டுள்ளது. "தண்ணிளவிற் குன்றாது உயராது காஞ்சிமுன்னுள்ளது. மும்முனிவர் மூழ்கியது - மன்னவன் தன்செங்கோல் நலாங்காட்டும் தென்பருத்திக் குன்றமர்ந்தகொங்கார் தருமர் குரா " - திருப்பருத்திக் குன்றப் பாடல்.தலமரம்:குரா எனும் அரிதான இம்மரம், திருவிடைக்கழி என்ற திருத்தலத்தில் தலமரமாக விளங்குகின்றது. திருக்கடையூருக்கு சுமார் பத்து கி.மீ. தொலைவில் அமைந்துள்ளது திருவிடைக்கழி. இக்கோயிலின் கருவறையில் சிவபெருமானும் முருகப்பெருமானும் ஒருசேர வீற்றிருக்கும் கோலம் அரிதானதாகும்.குரா மரத்தடியில் யோக மூர்த்தியாக முருகப்பெருமான் விளங்குகின்றார். இம்மரம் நன்கு செழித்து வளர்ந்துள்ளது. இதனைக் குராவடி என பக்தர்கள் அன்போடு அழைத்து மகிழ்கின்றனர்.முருகப்பெருமான் மார்பிலும், தோளிலும் தாளினும் குராவைச் சூடி மகிழ்கின்றான். குராப்புனை, தண்டையம் தாள் எனப் பல்வேறு இடங்களில் முருகன் திருவடியோடு குராவும் புகழப்படுகின்றது.அன்னை பார்வதி குரா மலர்களைச் சூடி மகிழ்ந்தார் என தேவாரம் எடுத்துரைக்கின்றது. இதனால் அன்னை குரவம் கமழ்கோதை, குராவம் குழலி என்றும் அழைக்கப்படுகின்றார். ஆப்பனூர் தலத்தில் வாழும் அன்னை குரவம்கமழ் கோதை என்று அழைக்கப்படுகின்றாள்.தென்பழனியில் முருகப்பெருமான் குராமரத்தடியில் நின்றிருந்து இடும்பனுக்கு அருள் வழங்கியதாகப் பழனி தலபுராணம் கூறுகிறது. இதனை உறுதிப்படுத்தும் விதமாக பழனி மலையில் குராவடிவேலர் என்ற பெயரில் தனிச் சன்னதி அமைந்துள்ளது குறிப்பிடத்தக்கது.இதுபோல, தெய்வயானை குரா மலர்களை சூடி அதன் மரநிழவில் வசிக்கின்றாள் என திருவிடைக்கழி தல வரலாறு கூறுகின்றது. மகாலட்சுமி குரவ மலர்களை சூடி மகிழ்வதால், குரவம் கமழ் குழலி என அழைக்கப்படுகின்றாள்.சாஸ்திரங்களில் தேர்ந்த ஐயனார் குரா மரத்தை விரும்பி அதன் அடியில் வீற்றருள்கின்றார். இத்தலம் திருவிடைக்கழி அருகேயுள்ள குராவஞ்சேரி ஆகும். அந்த ஐயனார் பெயர் ஐயனாரிதனார் என்பதாகும். இதே பெயரில் சங்ககாலப் புலவரும் இங்கே வாழ்ந்துள்ளதை அறிய முடிகிறது..சமணர் போற்றும் குரா:சைவ, வைணவம் மட்டுமின்றி, சமணர்கள் போற்றும் மரமாகவும் குரா மரம் விளங்கியுள்ளது. காஞ்சிபுரம் அருகேயுள்ள திருப்பருத்திக்குன்றம் என்ற திருத்தலத்தில் திரைலோக்கியநாதர் என்ற 24-வது தீர்த்தங்கரரான 1008 ஸ்ரீவர்த்தமான சுவாமிகள் ஆலய மேற்கு பிராகாரத்தில் குராமரம் செழித்தோங்கி வளர்ந்துள்ளது.மூன்று முனிவர்கள் வீடுபேறு பெற நிழல் பரப்பி, தருமத்தின் வடிவமாக இருப்பதே இக்குரா மரம். இதை தருமக்குரா என சமணர்கள் புகழ்கின்றனர். இம்மரத்தினைச் சுற்றி அழகிய மேடை அமைத்து அதில் மல்லிசேனர், புஷ்பசேனர், சமய திவாகர வாமன முனிவர் என மூவரைக் குறிக்கும் மூன்று திருவடிகள் அமைக்கப்பட்டுள்ளது. இவர்கள் மூவரும் இம்மரத்தின் நிழலில் அமர்ந்து வீடுபேறு பெற்றதைக் குறிப்பதாக ஐதிகம். (தலவிருட்சம் வளரும்)-பனையபுரம் அதியமான்