தேவிபட்டினம்: உலக மக்களைக் காக்கும் உலகநாயகி அம்மன்!

-பழங்காமூர் மோ. கணேஷ்நமது பாரத தேசத்தில் அமைந்துள்ள 51 சக்தி பீடங்களுள் பதினெட்டு பீடங்கள் தமிழ்நாட்டில் அமைந்துள்ளன. அவற்றுள் ஒன்றாக விளங்குகிறது, இராமநாதபுரம் மாவட்டத்தில், தேவிபட்டினம் என்ற ஊரிலுள்ள உலகநாயகி அம்மன் ஆலயம். பராசக்தியின் அக்குள் பகுதி விழுந்த இடமாகத் திகழும் இது வீரசக்தி பீடம் என்று போற்றப்படுகின்றது. மகிஷாசுரமர்த்தினி கோபம் தணிந்து அமைதியாக இங்கு கோயில் கொண்டிருப்பதாக தேவிபுர மகாத்மியம் எடுத்துரைக்கிறது. அதோடு அக்ஷர வகைகளில் சாகர எழுத்துகளும் இத்தலத்து சக்திபீட நாயகியாக விளங்கும் அன்னை ஸ்ரீ உலகநாயகியிடமே தோன்றியதாக மேலும் தெரிவிக்கிறது. மற்ற சக்தி பீடங்களில் உள்ள கரும்பாறை அமைப்பே இங்கும் இருப்பது இந்த வீரசக்தி பீடத்திற்கு ஆதாரமாக உள்ளது. இந்த தேவிகோட்ட பீடத்தில் உள்ள தேவியின் பெயர் அகிலேஸ்வரி என பிரஹத்நீலதந்திர நூல் குறிப்பிடுகின்றது. இப்பெயரே உலகநாயகி என்று தமிழில் வழங்கப்படுகிறது. இராமாயணம் போற்றும் முக்கிய க்ஷேத்திரமாகவும், இராமபிரானது வாழ்விலிருந்து பிரிக்க முடியாத இடமாகவும் தேவிபட்டினம் திகழ்கிறது. முதலாம் இராஜராஜ சோழனின் பட்டத்து அரிசியான லோகமாதேவியின் பெயரில் உலகமாதேவிபட்டினம் என்பதே மருவி தேவிபட்டினம் ஆனது என்று சரித்திரம் குறிப்பிடுகின்றது. மகிஷாசுர வதம்: பிரம்மனிடம் வரம் பெற்ற மகிஷாசுரன் தேவர்களையும் ரிஷிகளையும் பலவாறு துன்புறுத்தினான். மகிஷாசுரனின் அழிவு ஒரு பெண்ணால்தான் என்பதை அறிந்து பராசக்திக்கு சிவன் சூலத்தையும், திருமால் சக்கரத்தையும், பிரம்மா கமண்டலத்தையும் அளித்தனர்..இந்திரன் வஜ்ராயுதத்தையும், அக்னிதேவர் சக்தி என்னும் ஆயுதத்தையும், எமன் தண்டத்தையும், நிருதி கத்தியையும், வருணன் பாசத்தையும், வாயுதேவர் வில்லையும், குபேரன் பாண பாத்திரத்தையும், சமுத்திரராஜன் தாமரை மலரையும் வழங்கினான். சூரியன் ஒளிக்கதிர்களையும், ஆதிசேஷன் நாக ஆபரணங்களையும் அளித்தார். சர்வ சக்திகளையும் பெற்ற பராசக்தி பதினெட்டுக் கரங்களில் 18 விதமான ஆயுதங்களை தாங்கி மகிஷாசுரனை வதம் செய்தாள். வதம் புரிந்தவுடன் இங்கு வந்து தேவி சாந்தமடைந்து சுயம்புவாக எழுந்தருளினாள்.இராமர் பெற்ற ஆசி : இராவணனை வெல்லும் வெற்றி நோக்கத்தோடு தசரத புத்திரரான இராமர், தம்பி லட்சுமணர், அனுமன் மற்றும் வானரப்படை சூழ முதலில் உப்பூரில் வீற்றருளும் வெயிலுகந்த விநாயகரை வழிபடுகின்றனர்.பின்னர் கடற்கரை ஓரமாகவே பயணித்த இராமரும், அவரது படைகளும் தேவிபட்டினத்தில் முதலில் திலகேஸ்வரப் பெருமானை வணங்கி, வழிபட்டு, பின் வீரசக்தி பீடத்தில் வீற்றருளும் மகிஷாசுரமர்த்தினியின் மறு உருவாய்த் திகழும் அன்னை உலகநாயகி அம்மனை தீர்த்தம் உண்டாக்கி அபிஷேகித்து, ஆன்மசுகம் அடைகின்றார். இங்கு உலகநாயகியம்மனை ஆராதித்து, ஆசி பெற்ற பின்னர் கடல் பகுதியில் நவ நாயகர்களைக் கல்லால் நிறுவி வழிபடுகின்றார்.அப்போது இங்கே அலைகள் முன்னெழும்பி வரவே, இங்கு ஆதியாய் இருந்து அருள்புரியும் ஸ்ரீஆதி ஜகந்நாதரை ஆராதிக்கின்றார். ஜெகந்நாத பெருமாளின் ஆணைக்கு அடங்கிய அலைகள் பின்னே செல்ல, நவகோள் நாயகர்களையும் நலமுடன் பூஜித்து, பின் வானரப் படையுடன் ஈழநாடு அடைந்தார் இராமச்சந்திர மூர்த்தி..ஆலயம்:கடற்கரைக்கு சற்று உட்புறமாக அமைதியான சூழலில் அமைந்துள்ளது ஆலயம். கிழக்கு முகமாக ஏழு கலசங்களைக் கொண்ட ஐந்து நிலை இராஜகோபுரம் அற்புதமாகக் காட்சியளிக்கின்றது. நான்கு தூண்களைக் கொண்ட முகமண்டபம் அழகுற விளங்குகின்றது. உள்ளே பலிபீடம், கொடிமரம் மற்றும் சிம்ம வாகனம் உள்ளது. நீண்ட முன் மண்டபம் பதினாறு தூண்களைக் கொண்டு பதினாறுகால் கருங்கல் மண்டபமாக பற்பல சிற்பங்களை தாங்கி நிற்கின்றன. பின் இடை மண்டபம். அடுத்ததாக கருவறை. கருவறையுள் சுயம்புவாய் எழுந்து உலகமக்களைக் காத்தருள்கிறாள் அன்னை உலகநாயகி. சுதையாக முழு உருவச் சிலையும் இங்கு காணப்படுகின்றன.ஆலயத்தைச் சுற்றி வருகையில் அம்பாளின் கருவறை மேலே அமைக்கப்பட்டுள்ள ஏகதள விமானத்தைக் கண்ணுறுகின்றோம். பிராகாரத்தில் கந்தன், கணபதி மற்றும் நாகராஜர் சன்னதிகள் அமைக்கப்பட்டுள்ளன. சிறிய ஆலயம் எனினும் சீருடன் திகழ்கிறது. பிரதி செவ்வாய் மற்றும் வெள்ளிக்கிழமைகளில் சிறப்பு அபிஷேக, அலங்காரங்கள் நடைபெறுகின்றன. நவராத்திரி மற்றும் சித்ரா பௌர்ணமி ஆகிய வருடாந்திர விசேஷங்களும் இங்கு சிறப்புற கொண்டாடப்படுகின்றன. இந்த உலகநாயகி அம்மனை வழிபட சகல சௌபாக்கியங்களும் கிடைக்கும். மன தைரியம் கூடும். எதிரிகளால் ஏற்படும் இடையூறுகள் நீங்கும். எடுத்த காரியத்தில் வெற்றி உண்டாகும். சக்தி பீட நாயகியாக மட்டுமில்லாமல் கிராம தேவதையாகவும், பலரது குலதெய்வமாகவும் திகழும் உலகநாயகியை வழிபட்டு வாழ்வில் உயர்வு பெறுவோம். எங்கே இருக்கு?இராமநாதபுரம் - தொண்டி கடற்கரை சாலையில், இராமநாதபுரத்தில் இருந்து 15 கி.மீ. தொலைவில் தேவிபட்டினம் அமைந்துள்ளது.தரிசன நேரம்காலை 6 - இரவு 8.

தேவிபட்டினம்: உலக மக்களைக் காக்கும் உலகநாயகி அம்மன்!

Related Stories