சோழவந்தான்: நாக தோஷம் நீக்கி குழந்தை வரமருளும் மாரியம்மன்!

நம்பி வந்தோருக்கு நலமளிக்கும் தெய்வமாக விளங்குகிறாள், சோழவந்தானில் கோவில் கொண்டுள்ள ஜெனகை மாரியம்மன். ஏழுநூறு ஆண்டுகள் பழமையான வரலாற்றுச் சிறப்புமிக்க தலம். பாகனூர், சதுர்மறைக்காடு, வேள்விக்குடி, சனகபுரி, பராக்கிரம பாண்டியபுரம், சோழாந்தக சதுர்வேதிமங்கலம், ஜனநாத சதுர்வேதி மங்கலம் என்றெல்லாம் வெவ்வேறு காலகட்டங்களில் இத்தலம் அழைக்கப்பட்டு தற்போது சோழவந்தான் என்ற பெயரே நிலைத்துவிட்டது. கி.பி. 946 முதல் கி.பி. 966 வரை பாண்டிய நாட்டை வீரபாண்டியன் ஆட்சிபுரிந்தான். சோழ மன்னனை போரில் வென்று வெற்றிவாகைச் சூடியதால் வீரபாண்டியனுக்கு சோழாந்தகன், மதுரையை மீட்ட வீரபாண்டியன், சோழன் தலை கொண்ட வீரபாண்டியன் என்ற விருதுப் பெயர்கள் உண்டு. சோழாந்தகன் என்பதற்கு சோழர்களுக்கு அந்தகன் என்று பொருளாகும். அந்தகன் என்றால் எமன் என்பதாகும். ஜனநாத சதுர்வேதி மங்கலம் என்பது சோழவந்தானுக்கு இராஜராஜ சோழன் காலத்தில் வழங்கப்பட்ட பெயராகும். இவனது ஆட்சிக்காலம் கி.பி. 985 முதல் கி.பி. 1014 வரை ஆகும். இராஜராஜனின் 17வது ஆட்சியாண்டிலிருந்து (கி.பி. 1002) சோழாந்தக சதுர்வேதிமங்கலம் என்பதிலிருந்து மாற்றப்பெற்று, இராஜராஜனின் விருதுப்பெயரான ஜனநாத சதுர்வேதி மங்கலமாக அழைக்கப்பட்டது. ஜனநாதன் என்றால் ஜனங்களின் நாயகன் என்பது பொருள். இது இராஜராஜ சோழனின் விருதுப்பெயர்களில் ஒன்று. அதனால்தான் இத்தலத்தில் வீற்றிருக்கும் பெருமாளுக்கு ஜனகநாராயணப் பெருமாள் என்ற பெயரும், அதன்பின்பு சிறிது காலம் கழித்து வந்தருளிய மாரியம்மனுக்கு ஜனக மாரியம்மன் என்ற பெயரும் வழங்கப்பட்டது. அதுவே, பேச்சுவழக்கில் ஜெனகை மாரியம்மன் என மருவியுள்ளது என்கிறார்கள்..1651 - ஆம் ஆண்டு நடைபெற்ற வைகாசி திருவிழா தேரோட்டத்தின்போது இருபிரிவினர்களில் ஒரு தரப்பினர் தேரோட்டத்தை நடத்தும் உரிமை தமக்கே உரியது என்று பெரும் பிரச்னையை எழுப்பி, தேரோட்டத்தை நடைபெறவிடாமல் தடுத்து நிறுத்தினார்கள். ஜெனகை மாரியம்மனின் மகிமையை நன்குணர்ந்த மன்னர் திருமலை நாயக்கர் தம் படையினருடன் நேரில் வந்து நீதி விசாரித்து, பொய்யுரைத்து தேரோட்டத்தை தடை செய்தவர்களைத் தண்டித்து திருவிழாவை செவ்வனே நடத்திக்கொடுத்த வரலாற்றுச்சிறப்பு மிக்க பேராலயம் என்றால் மிகையாகாது. வைகை நதியின் கிழக்குக் கரையில் ஊரின் மையப் பகுதியில் கிழக்குப் பார்த்த வண்ணம் ஜெனகை மாரியம்மன் கோவில் அமைந்துள்ளது. முன்புறம் கம்பீரமான ஐந்து நிலை ராஜகோபுரம் காணப்படுகிறது. வாசலில் புராதன பலிபீடம் உள்ளது. இதில் சங்கிலி கருப்பண்ணசாமி எழுந்தருளியிருப்பதாக ஐதிகம். கோபுரவாசல் தாண்டியதும் விரிந்து பரந்த உள்சுற்று தென்படுகிறது. மகாமண்டபம், அர்த்த மண்டபம், கருவறை என்ற அமைப்பில் கோவில் உருவாக்கப்பட்டுள்ளது. மகாமண்டபத்தில் செப்புக்கவசம் போர்த்திய கொடிமரம், பலிபீடம், நந்தி வாகனம் அமைந்துள்ளது. பொதுவாக அம்மனுக்குரிய வாகனம் சிம்மம். ஆனால், இங்கு நந்திதேவரை அமைத்திருப்பதற்கு ஒரு காரணம் சொல்லப்படுகிறது. ஒருசமயம் வைகையில் வெள்ளப்பெருக்கு ஏற்பட்டபோது, ஆற்றுநீரில் மரத்தாலான ரிஷபத்தின் தலை மட்டும் அடித்து வரப்பட்டு வைகைக் கரையோரம் ஒதுங்கியது. அதனைக் கண்டெடுத்த அடியார்கள் இக்கோவிலில் கொண்டு வந்து சேர்த்தனர். அந்த மரச்சிற்பத்தின் அமைப்பு தெய்வீக அம்சம் நிறைந்ததாக இருந்தமையால் அந்தத் தலைக்குப் பொருத்தமாக முழு ரிஷபத்தையும் புதிதாகச் செய்து வைத்தனர். அம்மனுக்கு ரிஷப வாகனம் உருவானதால், அம்மனை சிவசக்தி சொரூபமாக வணங்கி அவள் சந்நதியில் நந்திதேவரை வாகனமாக பிரதிஷ்டை செய்துள்ளனர்..கருவறையில் மூலவராக இரு தேவியர் எழுந்தருளியுள்ளனர். ஒருவர் நின்ற நிலையில் சந்தன மாரியம்மன் எனும் பெயர் கொண்டு சுதையாகவும்; இன்னொருவர் ஜெனகை மாரியம்மன் எனும் பெயர் கொண்டு வீராசனத்தில் அமர்ந்த நிலையில் கல்திருமேனியாகவும் காட்சியளிக்கின்றனர். சந்தன மாரியம்மன் மூலிகைக் கலவையினால் உருவாக்கப்பட்டவள். பல நூற்றாண்டுகளாக சந்தன மாரியம்மன் மட்டுமே மூலவராக அருள்பாலித்துள்ளார். கி.பி. 15 - ஆம் நூற்றாண்டிற்கு முற்பகுதியில் தற்போது ஆலயம் இருக்கும் இடத்தில் பூமியிலிருந்து பொக்கிஷமாகக் கிடைத்த விக்ரகமே தற்போதைய ஜெனகை மாரியம்மன். பின்னர் இந்த அம்மனை சந்தன மாரியம்மனின் சுதை விக்ரகத்திற்கு முன்பாக பிரதிஷ்டை செய்து வழிபட்டு வருகிறார்கள். ஜெனகை மாரியம்மன் விக்ரகம் சோழர்கள் காலத்திய சிற்ப அம்சத்துடன் பலகைக் கல்லிலால் ஆன புடைப்புச்சிற்பமாக அமைந்துள்ளது. ஜெனகை மாரியம்மனுடன் வைத்துப் பார்க்கும்பொழுது சந்தன மாரியம்மன் மிகுந்த உக்கிரம் கொண்டவள். துடியான தெய்வம். எளியோரை ஓடிவந்து காக்கும் இவளே தவறு செய்த வலியோர்களை நிற்கவைத்து நீதி விசாரிக்கும் நீதிபதியாகவும் விளங்குகிறாள். பல நூற்றாண்டுகளாக ஆலயத்தின் மூலஸ்தானத்தில் சுவரோடு ஒட்டி நிற்பது போன்ற அமைப்பிலேயே சந்தனமாரியின் சுதைத் திருமேனி உருவாக்கப்பட்டிருக்கிறது. சுதையாக இருப்பதால் அபிஷேகங்கள் எதுவும் செய்யப்படுவதில்லை. வருடத்திற்கு ஒருமுறை தைலக்காப்பு மட்டுமே சாத்தப்படுகிறது..சந்தனமாரியின் வலது மேல்கையில் அரவம் சுற்றிய உடுக்கையும், வலது கீழ்க்கையில் வாள் ஒன்றும், இடது மேற்கையில் திரிசூலமும் காணப்பட, இடது கீழ்க்கையில் குங்குமத்தை ஏந்தியபடி நிற்கிறாள். இந்த சந்தன மாரியம்மனே மகாமண்டபத்தில் உற்சவமூர்த்தியாக ஐம்பொன் திருமேனியராகக் காட்சியளிக்கிறாள். திருவீதி உலாவரும்போது ஜெனகை மாரி என்ற பெயரில் அழைக்கின்றனர். அர்த்த மண்டப வாசலில் துவார சக்தியர், விநாயகர், சுப்பிரமணியர் உள்ளனர். மூலவர் விமானம் நாகர வடிவில் உள்ளது. உள்சுற்றில் தீர்த்தக்கிணறு, தலவிருட்சம் வேம்பு, அரசு, நாகதேவதை, மூலவரின் பின்புறம் உள்ள சுற்றுப்பிராகாரத்தில் பல்லவர் காலத்து சிம்ம விளக்கு அமைந்திருப்பது கூடுதல் சிறப்பு. மதுரை சுற்றுவட்டாரத்தில் இந்த மாரியம்மன் மிகவும் பிரசித்தி பெற்றவள். அதனால்தான் இப்பகுதி மக்களால், ‘சொல்லி வரங்கொடுப்பாள் சோழவந்தான் ஜெனகைமாரி’ என்று சொல்லும் அளவுக்கு சத்திய வாக்குக் கொடுக்கும் தெய்வமாகக் கொண்டாடப்படுகிறாள். பொதுவாக உடல்நலக்குறைவு ஏற்பட்டு கஷ்டப்படுகிறவர்கள் நம்பிக்கையோடு இத்தலத்தை நாடி வருகின்றனர். மாரியின் சந்நதியில் தம்மைப் பிடித்துள்ள நோய்தீர வேண்டிச் செல்கின்றனர். அவர்களின் பிரார்த்தனையும், நம்பிக்கையும் பொய்க்காத அளவுக்கு நோயின் தாக்கம் குறைந்து விரைவிலேயே பூரண குணமாகி மகிழ்வடைகின்றனர். இதற்கு நேர்த்திக்கடனாக மண் பொம்மை ஒன்றை வாங்கி வந்து கருவறையை மூன்று முறை வலம்வந்து பொம்மையை அங்கேயே வைத்துவிட்டுச் செல்கின்றனர். பின்னர், அம்மன் சந்நதி முன்பு மாவிளக்கு ஏற்றி வழிபடுகின்றனர். இந்த வகையில் ஜெனகை மாரி மகாசக்தியான தெய்வம் என சகல மக்களாலும் போற்றி வணங்கப்படுகிறாள்.. அதுபோல, அம்மையால் பாதிக்கப்பட்டவர்கள் குணமாகி நலம்பெற இந்த அம்மனின் அபிஷேக தீர்த்தத்தில் மஞ்சள், வேம்பு கலந்து அர்ச்சகர் அளிக்கிறார். இதனை பாதிக்கப்பட்டவர்கள் மூன்று நாட்கள் பருகிவர, விரைவில் அம்மை இறங்கி பூரண குணமாகிவிடுகிறதாம். இந்தக் காரணத்திற்காகவும் நம்பிக்கையோடு பக்தர்கள் நாளும் இங்கு கூடுகிறார்கள். வாரந்தோறும் செவ்வாய், வெள்ளி ஆகிய இரு தினங்களிலும் வெளியூர் பக்தர்கள் வசதிக்காக காலை ஆறு மணி முதல் இரவு ஒன்பதரை மணி வரை நடை சாத்தாமல் கோவில் சந்நதியை திறந்து வைத்திருக்கிறார்கள். பௌர்ணமிதோறும் 108 திருவிளக்கு பூஜை சிறப்பாக நடந்து வருகிறது. கருவறையில் ஜெனகைமாரி கிழக்கு நோக்கியபடி தனது வலது காலை ஊன்றியபடியும், இடது காலை மடக்கியும் வீர ஆசனத்தில் எழுந்தருளியிருக்கிறாள். ஜெனகை மாரியம்மன் தன் திருமேனியில் சர்ப்பங்களுடன் காணப்படும் மகாசக்தியாக அருள்பாலிக்கிறார். எனவே, புராதனப் பெருமை மிக்க இத்தலம் நாகதோஷம் நீக்கும் பரிகாரத் தலமாகவும், குழந்தைப்பேறு கிட்டும் அற்புதத் தலமாகவும் விளங்குகிறது. இந்தக் கோரிக்கைக்காக நூற்றுக்கணக்கானோர் மரத்தொட்டிலை இங்கு கட்டி வைத்துச் செல்கின்றனர். மேற்குச் சுற்றில் தலவிருட்சங்களுள் ஒன்றான அரச மரத்தின் கீழ் நாகர்கள் பிரதிஷ்டை செய்யப்பட்டுள்ளனர். அவர்களை வலம் வந்து வழிபாடு செய்வதன் மூலம் கால சர்ப்ப தோஷம் நீங்கி புத்திரபாக்கியம் பெறுதல், திருமணம் விரைவில் கைகூடுதல், நரம்புத்தளர்ச்சி முதலிய வியாதிகள் நீங்கப் பெறுதல் ஆகிய பலன்கள் கிடைக்கிறதாம். அதுமட்டுமின்றி கணவன் - மனைவி ஒற்றுமை ஓங்கும். சொந்தபந்தங்கள் ஒன்று சேரும். விட்டுப்போன உறவுகள் ஒன்றுகூடும். எதிரிகள் தொல்லை குறையும். இவ்வாறு அன்னையின் பொன்மனம் கனிந்து, நல்வாழ்வு பெற்ற பக்தர்கள் ஆண்டுதோறும் நடைபெறும் வைகாசிப் பெருந்திருவிழா சமயத்தில் சிரம் பணிந்து செலுத்தும் நேர்த்திக்கடன்களும், காணிக்கையுமே இவற்றுக்குச் சாட்சியாக உள்ளன..வைகாசிப் பெருந்திருவிழா 17 நாட்கள் கொண்டாடப்படுகிறது. கடந்த 80 ஆண்டுகளுக்கும் மேலாக இது நடைபெறுகிறது. வைகாசிப் பெருந்திருவிழாவையொட்டி நாள்தோறும் அம்மன் புறப்பாடு நடைபெறும். ஒன்பதாம் திருநாளில் பால்குடம், அக்கினிச்சட்டி நிகழ்ச்சியும், வைகையில் பூப்பல்லக்கு வைபவமும், பத்தாம் திருநாளில் பூக்குழி இறங்குதலும், பதினாறாம் திருநாளில் தேரோட்டமும், பதினேழாம் நாள் வைகையில் தீர்த்தவாரி உற்சவமும் வெகு சிறப்பாக நடைபெறும்.இந்த பிரமோற்சவ விழா நாட்களில் கோவில் காலை ஆறு மணி முதல் நள்ளிரவு பன்னிரண்டு மணி வரை தரிசனத்திற்காக திறந்திருக்கும். சுற்றுவட்டார கிராமங்களிலிருந்து மக்கள் கலந்துகொள்ள வசதியாக சிறப்புப் பேருந்து வசதி செய்யப்படுகிறது. நேர்த்திக்கடன் செலுத்துபவர்கள் பலரும் துலாபார மூலமாகவும் தங்கள் வேண்டுதலை நிறைவேற்றுகின்றனர். இந்த வைகாசி விழா நடைபெறுவதற்கு ஒரு வாரத்திற்கு முன் வரக்கூடிய ஞாயிற்றுக்கிழமையன்று அம்மனுக்கு பூச்சொரிதல் விழா நடைபெறுகிறது. முன்னதாக, பலவிதமான வாசமலர்க்கூடைகளும் பெருமாள் கோவில் சந்நதியில் இருந்து கிளம்பி ரத வீதிகளில் வலம் வந்து மாரியம்மன் கோவிலை வந்தடைவது வழக்கமாக உள்ளது..அதுதவிர ஆடி மாத செவ்வாய், வெள்ளிக்கிழமைகளில் அம்மனுக்கு சிறப்பு அலங்காரம், ஆடிப்பூரம், நாகசதுர்த்தி, தீபாவளி, கந்தசஷ்டி, திருக்கார்த்திகை, தைப்பொங்கல், தைப்பூசம், பங்குனி உத்திரம், சித்திரை தமிழ் வருடப்பிறப்பு ஆகிய உற்சவங்கள் சிறப்பாக நடைபெறுகிறது. இவ்வூரைச் சேர்ந்த அரசஞ்சண்முகனார் என்ற கவிஞர் மாரியைப் போற்றி கட்டளைக்கவியை இயற்றி உள்ளார். நூற்றாண்டுகள் கடந்து உலகின் பல்வேறு பகுதிகளில் வாழும் மக்களும் இத்தலத்திற்கு வந்தும், இருந்த இடத்திலேயே அம்பாளிடம் மனதார வேண்டிக்கொண்டும் அவளின் பேரருளுக்குப் பாத்திரமாகி தமது குறை நீங்கி வரம் பல பெற்று வாழ்வாங்கு வாழ்ந்து வருவதைக் காணும்போது அருள்மிகு ஜெனகை மாரியம்மன் ஒப்பற்ற கருணை அருட்பெருங்கடல் என்பதை நன்கு உணர்ந்திட முடிகிறது! எங்கே இருக்கு?மதுரை பெரியார் பேருந்து நிலையத்திலிருந்து சோழவந்தானுக்கு நேரடி பேருந்து வசதி உள்ளது. பயண தூரம் 25 கி.மீ.தரிசன நேரம்காலை 6 – பகல் 12; மாலை 4 – இரவு 8.30. செவ்வாய், வெள்ளிக்கிழமைகளில் நடை சாத்துவது இல்லை.- ரா. ஜெனகராஜ்